#حكايه_روح
#قصة_قصيرة
#الجزءالأول
انا اسمي عصام عندى 23 سنه معايا دبلوم صنايع ...
وزى شباب كتير مش لاقي شغل كل ما اروح اى مكان مكنتش اكمل أسبوعين واسيب الشغل
وكالعادة ابويا يتخا'نق معايا ويطر'دني من البيت وكنت بروح عند إسلام صاحبي عايش مع أبوه وأخته الصغيرة لوحدهم عندها خمس سنين من بعد ما اخوه ماجد مات فى حادثة 😓 اتصدم فى عربيه نقل ع الطريق الصحراوي الله يرحمه كان طيب وجدع أوى ..
زعلت عليه أوى وفضلت واقف جنب اسلام وأبوه فى المحنة دى ويمكن من وقتها ابو اسلام بيعتبرني في مكانة ابنه وكانوا عارفين عصبيه ابويا وكل مرة أروح ابات عندهم يومين تلاته وترجع أمي تكلمني علشان أرجع البيت . ده طبعا بعد ما يكون ابويا أعصابه هديت شويه
وفى يوم لقيت محل ملابس منزل اعلان عاوز واحد يشتغل عنده لمدة أسبوع لحد ما أخوه يرجع من السفر.
وافقت قولت اى حاجه احسن من قعدت البيت، وفى آخر يوم شغل ليا فى المحل قبضت. فلوسي وخدت بعضي وجبت هدومى من البيت واتصلت ع اسلام صاحبي علشان اقوله انى جاى ابات عندهم ، لكن فضل موبايله يديني مغلق او غير متاح واوقات كان بيديني خارج نطاق الخدمة ؟؟ طب وبعدين أعمل ايه أنا ماليش مكان تانى ابات فيه و كل أصحابي عندهم أخوات بنات كبار وأخري معاهم اروح اقف عند باب البيت من تحت ..
بعد شويه افتكرت ان معايا الرقم الأرضي ، اتصلت ع الرقم رد عليا أبوه وقالي ان إسلام سافر راح البيت عند عمه محتاجه يوضب له شويه حاجات وينضف له بير الميه وطلب مني أسافر له وقالي خليك معاه الكام يوم دول وساعده يابني هو محتاجك معاه
وعرفت منه ان هناك مافيش شبكه للموبايل وان علشان ابنه يتصل عليه لازم يمشي أكتر من اتنين كيلو وقالي ان حتى لو لقيت البيت فاضي اقعد فيه وانضف البير
ولما سألته هروح هناك ازاى قالي أنه هيبعتلي عربيه هتوصلني لحد البيت وان السواق يبقي قريبه بس أخرس. مش بيكلم …
قولت له حاضر يا عمي وبصراحة مكنش قدامى حل تانى وإلا بقي كنت ابات فى الشارع .
وفى أقل من عشر دقايق لقيت عربيه وقفت قدامى وواحد بيشاورلي روحت له ولقيته بيشاور بأيده علشان اركب معاه سألته انت من طرف أبو إسلام هزرأسه ب أيوة
ركبت وأنا مستغرب هو عرفني ازاى والشارع مليان ناس كتير وخمنت يكون أبو إسلام ادي له صورتي
وفضلت العربية ماشية مسافة كبيرة لدرجة إنى نمت وفجأة حسيت ان حد بيهز كتفي فتحت عيني لقيت العربيه واقفه قدام البيت والراجل واقف بره بيبص فى إتجاه تانى بعيد عن العربيه اومال مين اللى صحاني .!؟؟
نزلت وخدت شنطتي وروحت للراجل قولت له هو ده البيت هز رأسه ب ايوة ، وعينه باصه للبير وبعدها ركب العربية ومشي او بمعني أوضح اختفي
