حواديت بطعم الإفادة

اختيار النهاية".

كنت ماشية مع أصحابي كان عندنا درس كالعادة أنا كنت لابسه لبس فضفاض وخمار وكمان بفكر البس النقاب يعني بصراحة أنا بحاول أكون قريبة من ربنا بمشي في كل طريق ممكن يخليني أتغلغل جوا جمال ديني لأني طماعة حبتين وهدفي منزلة عالية في الجنة، صحابي بقى مريم وعبير

مريم مش محجبه ولبسها بصراحه وحش بس أنا بنصحها وكمان بدعي ليها بالهداية

أما عبير فهي البيست فريند محجبة بس حجاب ربع كم لأن بباها فارضه عليها فبتنزل من البيت تمام وممكن تيجي عند واحده مننا تبين شعرها وتحط ميك اب وقبل ما تروّح ترجع تعدل طرحتها وتمسح وشها

_غدير بقولك أي ما تيجي منروحش الدرس ونطلع على أي كافيه أنا زهقانة.

_لا يا مريم مش هينفع دي حصص مراجعة وأنا محتجاها.

اتكلمت عبير وهي بتساوي شعرها اللي طالع من الطرحه:

_غدير الحصة هتبقى باردة وساعتين وزحمة وحر وحاجه قرف يلا متبقيش قفل.

بصيتلهم وسكت لأني بصراحة أصلًا مخنوقة وكمان هما عندهم حق الحصة بتبقى خنقه قوي

" خلاص ماشي يلا وابقى أراجع على اليوتيوب بقى"

روحنا الكافيه اللي بنحب نقعد فيه وقامت عبير وطلبت لينا اللي عايزينه، شويه وجه العامل ونزل الطلبات وهو باصص لِعبير اللي بتضحكله وقام غامز ليها ومشى بصراحة أنا اتضايقت وكلمتها بزعل:

_أي يا عبير القرف دا؟

_أي يا غدير عادي!

_لأ مش عادي طبعًا

_مالك يا غدير يا ستي أنا حرة وبعدين مش كل ما حد يعاكس أو يبص تقوليلي عيب خليهم يبصوا أنا مش همسك عنيهم ومتدخليش خليكِ في اهتمامك بشكلك وهما يبصولك انتي كمان

بصيتلها واتكلمت بزعل:

_انتي بتهزري صح؟
أظن انك أكتر واحده عارفه اني بهتم بنفسي ازاي بس دا جوا بيتي مش مضطرة أوريه لحد

خدت العصير بتاعي ولفيت وشي بزعل من كلامهم الدايم اني مكبره نفسي وإن اللبس دا وحش وحتى مش شبه الأماكن اللي بندخلها، بصيت بالصدفة على الترابيزه اللي قدامنا لقيت عليها شباب كنت هبعد نظري بسرعة لاني عارفه إن غض البصر مكلف بيه الراجل والست علشان الفتنة بس رجّعت عيني تاني وأنا شايفه شابين منهم باصين على عبير ومريم بإعجاب وبيبتسموا عيني دارت على وش كل شاب فيهم محدش باصصلي نهائي ولا كأني معاهم رغم اني احلى منهم أصلًا بس مش باين مني غير وشي يمكن دا السبب مقارنة بيهم ويمكن كلام عبير صح؟

روّحت البيت في ميعاد رجوعي من الدرس ودخلت استحميت وصليت وقعدت آكل في أوضتي وأنا فاتحه الـ تيك توك وكنت عادي لحد ما جه اللي حصل في الكافيه في بالي بصيت للفون وللفيديوهات وازاي البنات اللي بتطلع بكل شكل ولون وقليل قوي لما تظهرلي المخترمه ولا المنتقبة دا حتى المحجبين اللي بيظهروا بيبقوا مبينين شعرهم ورقبتهم وبيعملوا الفيديو على أغاني بموسيقى وللأسف حلوين واللي بشعرهم حلوين قوي قوي ازاي قادرين يلبسوا براحتهم يخلوا الهوا الطبيعي يطير شعرهم و...