ج

جح

■■■■■■■■■■■■■■■■■■■■
قد يحمل هذا الجزء ومايليه احداث مؤلمة وقاسيه ولكنها تخفي بين طياتها مغزى عميق لايصل اليه سوى أصحاب القلوب الحية وأولوا الألباب فهنيئا سلفا لكل من يقرأ بعمق ليصل للعبرة🌸
/////////////////////////////////////////////////////////////
#طوبى  "جنة طوبى"
#جمان_فريد
#الجزء_130"إمتحان/جزئي"
☆احداث هذه الروايه معظمها واقعي وحقيقي مع اضفاء لمسة من الخيال لزيادة المتعه والتشويق والحفاظ على الخصوصية..تبدا من سنة 1996..تنتهي 2022☆
🚫الـرجـــــــــــاء الـــتـــركـيــــــــز عـلـــــى الـمــــــــرور الـــزمـنــــــي و الـتــــواريـــــخ والأيــــــــام🚫
#الجنة
ألا إن سلعة الله غاليه..إلا إن سلعة الله الجنة..
..رسول الله صلى الله عليه وسلم..
🌿🌿🌿🌿🌿🌿🌿🌿🌿🌿🌿🌿🌿🌿🌿
🍃 التسليم لإرادة الله وأمره يحمي عقلك من الجنون، جنون التفكير فيما سيحدث، ترقب المستقبل المجهول عذاب، الرضا بقضاء الله وتدبيره راحة للبال وطمأنينة للقلب."🍃
____________________________________________
⏳.....
"رغم أنني اهزم كل يوم،فأنا أسعى أن لايشعر من أحبهم بالهزيمه،هذا إنتصاري الوحيد"
وهادي طوبى من يوم صارت..ع قد ماتعاني وتتألم تحاول بكل ماعندها من قوة إخفاء مافيها من حزن ومواجع،تستمر في المقاومة ع خاطر احبابها بالدرجة الأولى..
معاش تبي حد يحمل همها..معاش تبي تقعد عقبة في وجه سعادتهم وراحتهم..
قاعدة تحارب في عدوها الخفي بمعية رفيقها الأعلى وعونه، الوحيد اللي تقدر ترمي عليه حمولها وتظهر ضعفها وحزنها قدامه وهي ع يقين تام ان معاها وقاعد يساعد فيها ويمد فيها بالقوة ويحن ويطبطب عليها..
🍃وزي مافي ناس تقاوم في شدائد الحياة بقوة الإيمان وبدافع حب اقرب الناس ليها..
في ناس تقاوم بدافع الغضب..الحقد..حب الإنتقام والثأر لأنفسهم الخبيثة..
🍀يوم الثلاثاء..
الثامن والعشرين من شهر صفر..
5اكتوبر...سنة 2021..
..في إحدى دول القارة العجوز..كان يتمشى في غابة كبيرة غزت ملامحها مظاهر فصل الخريف..
كان يتأمل في هالملامح وهو يسمع عن طريق السماعات في سينفونية لأحد الموسيقيين العالمين..
في عز انسجامه ربت حد ع كتفه ووقفه..
التفت شافله..حول السماعات وقعد بنظره عليه يراجي فيه يقول اللي عنده..
🍃الأقجم:العرس بادي من اليوم ويتم يوم الخميس ويوم الجمعه بيسافروا لقبرص شهر عسل..
رد عليه مختار وهو يسأل بملامح متجهمه ليها فترة طويله مستوطنه وجهه..
/غيره؟
الأقجم:إلى الآن مافي حد منهم يعرف عبد القيوم وين مكانه..
وزع مختار نظراته اللي كانت خليط من البرود والكره ع المكان بعدين التفت لبس سماعاته وكمل مشي..
والأقجم قعد في مكانه للحظات يشوفله بعدين لحقه وهو مخلي بينهم مسافة..
🍃ومن اوروبا..لشارع القهوة في بلاد الزهر والحنة..
تحديدا في دار السطح لحوش طوبى الواعر..
كانت صاحبة هالحوش مشغوله باللوحة اللي بتخش بيها المعرض اللي حيقام في العشرين من اكتوبر..
قطع عليها انسجامها اصوات الزغاريد..
ابتسمت وحطت اللي في يدها..غطت اللوحة ورتبت المكان بعدين للباب..غطت وجهها بالخمار وفتحت الباب وطلعت..
🍃🍃
نزلت من فوق وهي تسمع فيهم يغنوا في الشتاوات ويصفقوا
اول ماوصلت في الباب..حست بمغص في حزامها تجاهلاته كالعاده وخشت للحوش وهي ترفع في خمارها..
لقتهم كلهم ملمومين ع غرفه وهي لابسه البودي..
سدرة وفردوس واريج وآلاء ومطيرة وهاديه وفايزة وبناتها وسالمين وكاريمان وسميرة وزوز من خالاتهم..
🍃ايه خالاتهم..
المحجوب خلا بنات اخته يرجعوا العلاقات بزوز من خالاتهم اللي كانوا راغبين في مواصلة بنات اختهم،وهما تقبلوا كرامه لروح امهم..وحب في خالهم اللي كانلهم اب بعد بوهم..
عزمتهم طوبى مرتين لحوشها وهما عزموهم كذلك العلاقه بينهم قاعده تشوبها الرسميه لكن الطرفين يحاولوا يخلوها تولي مع الوقت اكثر ترابط وود..🍃
غيرت نظرها عنهم للصغار..لقت بنتها ترقص وتصفق وجنبها مئاب تقلد فيها والولاد حداهم،اواب ومهاب كانوا يتأملوا في امهم بس..
ردت نظرها للعروس..لقتها راسمه ع وجهها ابتسامة مجامله..كان باين عليها من عيونها انها تجامل وبس..عارفتها مش فرحانه زي مامفروض تفرح العروس..
ماقدرتش غرفه لهاللحظه تتقبل فكرة العرس..كذلك مازال في داخلها خوف من حياتها الجديدة هالخوف اللي خلفه زواجها السابق ولعند هاللحظه ماتحولش من قلبها وعقلها..
وطوبى..كانت عارفه هالشي كويس لهذا كانت تبي دخل ع قلبها الفرحة وتخليها ماتحسش بشعور تاني غيرها..
رفعت ايديها وبدت تصفق وتغني..
"هاللي محرمته كيف رداه..صونه ياربي وارعاه"
توجهت انظارهم ليها وشاركوها الغني بحماس زايد..اغلبهم كانت نظراتهم ليها فيها مسحة حزن تبعوها بيها وهي تقدم لغرفه..وصلت فيها وشدت ايديها وقعدت ترقص فيها وهي تغني..
"قولوا ياالله عليها..ياماشاء الله عليها"
زاد حماسهم..اللي رددت وراها..اللي زغردت..اللي صاحت من الحماس..
والعروس كانت تضحك وعيونها تعبوا دموع..
ومازال طوبى تغني..
"اللي محرمته خط بخط..شبوبه ع الولاف سقط"
ضحكوا ومطيره صاحت وخشت معاهم شدت ايديهم الزوز وقعدت ترقص معاهم وهي تردد في البيت اللي غناته طوبى..
رفعت اريج ايديها فوق وهي تغني..
"علينا قولوا ياالله..علينا ياماشاء الله"
وكلهم رفعوا ايديهم وهما يصفقوا ويردوا وراها والعروس مازال ترقص مع عمتها وطوبى وهي تضحك من قلبها..
طوبى وهي تشوفلها بإبتسامه كانت تحس بنوبات المغص وحست معاهم ان رجليها ثقلوا..
خلت عمتها تشد يد اختها التانيه ووخرت وقفت مع الباقي وهي تصفق..
قالتلها آلاء:شورك حفظتي شتاوات جديده للعرس!
طوبى بضحكه:ايه نزلت هلبه وحفظتهم..
ضحكت آلاء..
وعيون سالمين وكاريمان وسدرة ع طوبى كانوا حاسين بحزن كبير ع حالها لانهم عارفينها كويس قاعدة تظاهر قدامهم بعكس ماتحمل في باطنها..
"إن شاء الله ديما افراح.. ياربي وقليبي مرتاح"
قالت هالبيت هاديه وكلهم ردوا وراها ومطيره قريب طير من الحماس وهي ترقص..
🍃🍃🍃🍃
ومن حوش اهل العروس لحوش العريس..
كانت الاجواء حلوة بحضور مرت خوه واهل امه اللي في منهم ماكانش فرحان هلبه للعريس لانه راح من بين ايديهم لكنهم عاشوا اجواء الفرح وخلاص..
كانوا مشغلين منظومه يرقصوا ويغنوا عليها واميمه شايشه زي مانقولوا فرحانه لخوها اللي واخيرا نال حاجه تمناها..
🍃خوها اللي كان موجود في سيارته مع سامي ويسمع منه شي يخص عبد القيوم..
..سامي:غدوة ان شاء الله يوصلوا القعدان وباقي الحاجات يوصلوا للجامع وقت عقد القران..
حسين بإستياء:وهو؟
سامي سكت وع وجهه باديه ملامح الضيق..
قاله حسين:لأخر مرة نسألك ياسامي عبد القيوم وينه وشن قاعد يدير؟
تنهد سامي وقال..
/اعفيني من الاجابه ياحسين..
غير حسين نظره القدام وهو قلق سامي شافله وقال..
/بنولي للمصور ماتبي شي ؟
حسين شافله وقال..
/نبيك غدوة تكون من الحاضرين ياسامي..
ابتسم سامي وقال..
/من غير ماتقول..مستحيل نفوت عليا فرصة تصوير فرح الملازم حسين الواعر..
ضحك حسين ضحكة خفيفه..
فتح سامي الباب وهو يقول بإبتسامه..
/نتلاقوا غدوة ان شاء الله..
حسين:بإذن الله..
سامي نزل وهو يقول..
/السلام عليكم..
نزل من السيارة وسكر الباب وهو يسمع في حسين يرد عليه السلام..
☘☘☘☘
ليلة هاليوم كانوا العيلتين دايرين سهرية بسيطه..
رفع شكري مطيره لحوش ولد خوها بش تحضر سهريتهم وتجي معاهم وهما جايبين الكسوة تاني يوم..
ونبيله جابها المحجوب تحضر السهريه وتقعد في حوش طوبى ليوم الجمعة..
ماكانش ساهل ع نبيله حضور فرح المراة اللي كانت زوجة خوها يوما ما زي ماكان هالموقف صعب ع سميرة اللي عاشاته قبلها وتوا قاعده تشوفلها مرة مرة وهي تصفق وتغني لاحظت الدمعه المحبوسة في عينها تنهدت بحسرة بعدين غيرت نظرها عنها وكملت مشاركتها لفرح عيلة الواعر..
هالسهريه حضروا فيها إلى جانب الجيران والاصدقاء المقربين زي عيلة الفاندي وعيلة ابله زينب وصديقات غرفه وعبير صديقة طوبى وسلافة وامها واختها لبانه..حضروا بنات خوات وردة اللي من يوم يومهم وهما مترفعين عليهم وماعندهمش اتجاههم اي مشاعر ود..
حاضرات بالإجبار من امهاتهم وفي نفس الوقت كانوا يبوا يعرفوا احوال بنات خالتهم عن قرب..
🍃🍃🍃
في نهاية ليلة السهريه اشتد المغص ع طوبى وظنا منها ان مافي حد ملاحظها انسحبت ومشت طول للحمام..
قعدت فيه لحظات بعدين طلعت منه وهي مضايقه ع الآخر
توجهت لدار البنات واول ماوصلت فيها طلعت في وجهها اريج..
اريج بقلق:خيرك؟
طوبى وهي تحاول تبان عاديه...
/مافي شي جاني العذر بس..
وسعت اريج عن الباب وهي تقول..
/خلاص سادك اليوم بدلي وارقدي وجنة مادوريهاش حني معاها..
هزت طوبى راسها بدون ماتتكلم الوجع كان قوي خلاها ماعندهاش حيل حتى للكلام..
سألتها اريج وهي مركزة ع حالتها..
/نديرلك بابونج؟
طوبى بشي من التعب قالت..
/لالا ديريلي مليسا بمية الرقية..
ردت عليها تقول..
/تمام..ومشت طلعت وسكرت الباب..
وقعدت طوبى طلع في حوايج بش تبدل..بعد ماطلعتهم وبدلت وقفت ع مرايتها وقعدت تمسح في المكياج وهي تردد في دعاء يونس..
بعد ماكملت..فتحت الدرج وطلعت منه عطر عبد القيوم..سكراته ومشت تمددت ع السرير..حولت غطا العطر وبخت منه ع المخده..بعدين غمضت عيونها وبدت تقرا في آيات الرقيه..
وهي تقرا فيهم نزلوا دموعها وضمت العطر لحضنها بقوة وماهي الا لحظات وجاها النوم خداها معاه..
وتخش اريج بكوباية المليسا..سكرت الباب وقدمتلها لقتها راقده وهي ضامه العطر بدت ع وجهها ملامح الألم وهي تقول بكره..
/الله ينتقم منهم كلهم..
وكان قصدها بدعاها الجالي وخديجه واهل عبد القيوم..كل حد قهر طوبى وفرق بينها وبين زوجها اللي تحبه من كل قلبها حب كبير لاينتسى ولايتعوض...
🍃🍃🍃🍃
تاني يوم..
التاسع والعشرين من شهر صفر..
6اكتوبر..سنة 2021..
بعد عصر هاليوم تم عقد قران حسين وغرفه..
فرحة حسين بعد تم عقد القران كبيره باينه في عيونه ومن ابتسامته اللي كانت طالعة من قلبه..
اول ماطلعوا من الجامع بدي شوط النوبه اللي كان سامي يصور في اجوائه ولقطاته الفريدة والحاضرين المتحمسين معاه  من اقارب حسين من امه واصدقائه وشباب من جيرانه في الشارع..
كذلك من ضمن الحضور..عديله المهدي وراجل الاء عزيز ونسيبه اسامه اللي ماقدرش يقاوم جو النوبه خدي حسين وخش يرقص هو وياه وانضملهم يوسف اللي كان فرحان لخوه بشدة..
حتى عدي كان من ضمن الحضور برغم انسجامه معاهم في الاجواء استغرب غياب عبد القيوم عن هاليوم وهو يعرف ان كل شي يخص عقد القران هو متكفل بيه!
الشي هدا خلا شك ليه فتره ساكن عقله يكبر اكثر يبي بس مايقطعه باليقين...
☘☘☘☘
"قال المهدي كل شي في الفاتحه من عبد القيوم الروزاطه العبمبر البكلاوة الصاله اللي داروا فيها العشي العشي نفسه خداله تلاثه قعدان تخيلي!"
فردوس وهي متفاجئه من اللي سمعاته قالت..
/الله يبارك!
سدرة بضيق وحيره..
/باهي هو وينه! وين خدي وجهه!؟ اهو العرس قريب يتم وماجاش وهو اللي قال بعد عرس بندير اللي يريح الجميع!
فردوس بحزن؛ياسدرة الراجل عاطي كلمة لولد عمك ووفى بيها هي هادي وكان ناوي الطلاق حق هو قال بعد العرس..
مسحت سدرة دموعها وهي تقول..
/خايفه من اللي بيصير فيها كان طلقها حق خايفه بنموت..
فردوس بقلق تحاول تطرده من قلبها قالت..
/هي اللي طالباته ومصرة عليه معناها مهيئة نفسها ليه ياسدرة..
حطت سدره يدها ع صدرها وطلعت منها آهة قهر بعدين قالت وهي تدعي..
/الله لايربحهم ولايوجهلهم الخير..
خشت عليهم سالمين الكوجينه الخارجيه بعدين سكرت الباب وهي تقول..
/شني ياسدرة مافش اخبار عن عبد القيوم!؟
سدرة بنبرة حزن..
/كل شي في فاتحه حسين داره زي ماقال وزياده..
سالمين:باهي مش باينله جيه؟
حركت سدرة راسها بالنفي..
سالمين وهي تفكر قالت..
/مش عارفه ليش حاسه ان هالراجل قاعد يدير في شي غلط..
شافولها بإستغراب وسدرة قالت..
/زي شني!؟
سالمين بريبه وقلق..
/نا نعرف عبد القيوم كويس ياسدرة اللي داره هذكي الكلب مش حيفوته..
فردوس:تبي تقولي ان غيبته هادي في جرة الجالي!؟
بدت ع وجه سدرة ملامح الخوف..
سالمين هزت راسها موافقه لكلام فردوس وهي قلقه وخايفه..
سدرة بخوف..
/معناها لما قال ندير مايريحها ويريح الجميع ناوي يقتله قصده؟! غبارة كانا هكي!..
فردوس بتوجس وخوف..
/لاياربي ان شاء الله لا والله هدا وين طوبى تموت..
سدرة بشي من الذعر..
/بعيد وبر بعيد وبر..كان هكي ان شاء الله يطلع ناوي الطلاق ياربي..
سالمين تنهدت بضيق شديد وقالت..
/يارب..
ويدق عليهم الباب ويسمعوا بعد الدقه صوت اريج وهي تقول..
"امي..خالتي سدرة"
مسحوا دموعهم وفردوس تقول..
/هانا طالعين..
التفتت سالمين فتحت الباب وطلعت وتلاقي قدامها اريج اللي لما شافتهم قالت..
/الكسوة بتجي الساعة التمانيه وتوا الساعه السته سقدوا وتوا ارواحكم معاش في وقت..
طلعوا امها وخالتها بعد سالمين هي تمعنت فيهم بالنظر وشافت اثار دموعهم استنتجت انهم كانوا يتكلموا عن شي يخص طوبى،برغم القلق اللي حست بيه وقتها اجلت سؤال امها وخالتها لبعدين..
☘☘☘☘
ومع الساعة ثمانيه وصلوا عرب الكسوة اللي استقبلوهم عيلة العروس استقبال حار بالشتاوات وطوبى كانت اكثر من حمى الشوط بالأبيات اللي تقول فيهم ماغنتش ع غرفه بس غنت حتى ع حسين واميمه وصفيه عجبتهم هلبه الابيات اللي قالتلهم عنه..
☘الكسوة اللي دارها حسين لغرفه لامبالغه لو وصفوها بالاسطوريه كل شي من افخم واغلى الحاجات..
وطبعا من الحاضرات ماكانوا يتفرجوا بذهول وكذلك بعيون حاسدة..
كيف ارملة بصغارها عريسها العزري فرحان بيها لهالدرجة!
هما ياخدوهم عذراى صغيرات ماجابولهم ربع اللي قاعدين يشوفوا فيه!
وطبعا في منهم اصحاب العقول النيرة والنفوس الطيبه والقلوب السليمه اللي تسائلوا تعجبا..
"مسرع نست راجلها!!؟.."
وفي من قال بحسرة كاذبة قالوا..
"ايه بالله اللي مات مات ع روحه.."
واكيد لاتخلوا التعليقات من ذكر سيرة الخطين والبسبوسة..
🍃عقلية مجتمعنا الجميل الراقي🍃
ولأن غرفه تعرف المجتمع اللي عايشة فيه كويس ماقدرتش تفرح بشي،عقلها يفكر بس في كلامهم عنها ونظراتهم ليها..
🍃"نوضي ارقصي غرفه"
غرفه وهي مقعمزة في وسط الحاضرات بلبسها البودري قالت لهاديه برفض واحراج..
/لالا فكيني بالله عليك..
هاديه شافتلها شويه بعدين قالت..
/براحتك..
تباعدت عنها وهي تصفق وتغني..وعيون نبيله كانوا ع غرفه لاحظتها وكأنها مقعمزة بالغصب ويدوب تبتسم..
ناضت من مكانها ومشتلها..وصلت فيها طبست عليها وقالت..
/تعالي شويه غرفه..
مشت نبيله بتطلع من الخيمه وغرفه لحقتها وهي متوترة وعيون طوبى واريج معاهم..
🍃🍃🍃🍃
"خيرك غرفه نشوف فيك مش ع بعضك"
غرفه بضيق..
/لاشي عادي..
نبيله:لامش عادي..ماتقولش عروسة بكل!
غرفه تنهدت وقالت..
/الحق ماكنتش نبي ندير عرس سادة حفله عائليه مع قراية الفاتحة وخلاص..
نبيله بإستغراب شديد..
/علاش!؟
غرفه بإحراج وضيق..
/شن علاش يانبيله! شن منظري بالله واني لابسه البودري تقول اول مرة نتزوج في حياتي وصغاري يلعبوا بحداي!
قالتلها متسائلة بإستنكار..
/وان شاء الله انتي  مازال تفكري هكي ياغرفه!!
غرفه:مش اني اللي نفكر هكي يانبيله الناس هي اللي تفكر هكي..
نبيله:تعرفي مانحسابش شخصيتك ضعيفة لهالدرجه!
الناس اللي تحكي عليهم اغلبهم يتمنوا يكونوا مكانك،لو جتهم فرصة زي اللي جاتك يقلبوا الدنيا ع رووسهم من الفرح،ماتنكديش ع روحك وتحرمي نفسك تعيشي فرحتك ع خاطر نظرة مجتمع زي هدا مليان عقد نفسيه وعقليته متخلفه..مدام لاديري في حرام ولاعيب عيشي حياتك وماتفكري في حد..
بدت ع وجه غرفه ابتسامه حب وامتنان وهي تسمع في كلام نبيله بعدماسكتت نبيله هي قالت..
/ياريت في منك هلبه يانبيله..
ابتسمت نبيله وقالت..
/حبيبتي..طبطبت ع ذراعها وقالت..خشي توا للخيمة اضحكي ارقصي هيجي..هدا حقك ياغرفه ماتحرميش روحك منه..
فجأة رن هاتف غرفة..قاماته وشافت المتصل ابتسمت..
نبيله بإبتسامة..
/العريس؟
هزت غرفة راسها بإيجاب وهي مبتسمة بخجل..
نبيله وهي مبتسمه قالت..
/ردي عليه ردي..ومشت متوجهه للخيمه طاحت من عينها دمعة مسحتها وخشت للخيمه..
وغرفه خشت للحوش وهي ترد ع حسين..
/آلو..
"مرحبا"
ضحكت..
"شن يضحك فيك"
غرفه بضحكه:مش عارفه..
"اممم..باهي اطلعي قعمزي حدا شجرة الفل وراجيني غادي".
غرفه:جيت ولا بتجي؟
"جيت مقعمز في المربوعه هيا اطلعي"
بإبتسامة قالت..
/باهي..
"لما تقعمزي وين ماقتلك ديري رنه"
قالت:باهي..
"يبهي ايامك ياحنة"
ضحكت غرفه وهو قال..
"بري هي"
وسكر عليها..
ضحكت وهي تحرك في راسها يمين ويسار ومشت بإتجاة الكوجينة..
☘في الخيمة..
كانت طوبى مقعمزة في صف ع يمينها اريج وع يسارها سلافة وعبير وكانت يدور بينهم حديث يخص تخصص سلافة الدراسي اللي خدمت فيه قبل سنين طويلة بنجاح..
🍃عبير:ليه ستة شهور فاتحه تقدري تقولي ماشي حاله لكن يبي دعاية بش ينتشر ويجوه زباين..
سلافه:في افكار دعاية كتيرة لهالمجال..
عبير:نعطيك رقمهم تتفاهمي معاهم؟
سلافه:عندهم موظفات؟
ابتسمت طوبى لما سمعت سؤالها..
عبير:اكيد..
سلافه مررت نظرها قدام وهي تفكر بعدين قالت...
/باخد رقم المكتب وبحكي معهن..
عبير بإبتسامة..
/تمام..
قربت طوبى من وذن سلافه وقالت..
/شكله سعد بادي يبسط سيطرته..
سلافة بضحكه..
/بتصدقي عم بيسيطر عليي بطريقة مقنعة بيخليني وانا عم بضحك قلوا طيب متل مابدك..
ضحكت طوبى بعدين قالت وعيونها معبيات دموع..
/معناها قدر يخش قلبك..
سلافه وهي تفكر بإبتسامه..
/انا كمان هيك حاسة...
ابتسمت طوبى وهي تشوف لنظرة عيونها بعدين قالت..
/نحس فيك بتمشي بتمشي وبتخليه يدير العرس في شهر 12..
شافتله سلافه وقالت بضحكه..
/ليش انا ماقلتلك!؟ العرس بشهر 12..
ضحكت طوبى وسلافه ضحكت معاها واريج جنبهم كانت تسمع في حديثهم وهي تشوف لطوبى بإبتسامه حسرة..
☘☘☘☘
وتحت شجرة الفل كانت غرفه مقعمزة وهي مشغوله بهاتفها ماحستش الا وهو مقعمز جنبها يقول..
/غزاله..
شافتله وضحكت بخجل..
وهو يتامل في ضحكتها قال بإبتسامه..
/نوضي سلمي عليا وكبي ع راسي هي..
ناضت وهي تضحك وهو ناضلها..
مدت يدها صافحها..سلمت عليه بالخد وهو يقول..
/مبروك عليك اني..وياسعدك وياهناك وياقداش ربك راضي عليك..
هي تضحك بس مش قادرة تقول شي..
نزللها راسه..ضحكت من قلبها بعدين طبعت قبله ع جبينه كانت سريعه زي ماهو بسرعه رفع راسه وخداها في حضنه..
غرفه بصدمه..
/بلاهبال!
هو قال:هبال شني ياهبله انتي!راك وليتي مرتي ياهو..
غرفه بعدت وهي تقول بخجل..
/لكن مش هكي عاد!
رجع حاوطها وهو يقول بإبتسامه..
/سكري فمك وهاتي يدك..
رفعت حاجبها وقالت..
/من اولها!
قرصها من خدها بقوة بعدين خدي يدها وطلع من جيب فرمتله خاتم ولبسهولها..
هي لما شافت الخاتم قالت بضحكه..
/الهديه ماتنعطاش توا راهو..
بإبتسامه قال..
/عارف غدوة بعد نروح بيك هدا المتعارف عليه لكن اني نبي نطلع من المألوف وعن المعروف ونعطيك هديه الليله وغدوة..
ابتسمت وهي تشوف للخاتم اللي كان ذهب وفيه فص الماس وقالت..
/هلبه هكي حسين..
حط يده في جيبه وطلع منها الانسيال اللي جابه في عيد ميلادها لبسهولها وهو يقول..
/مهما نجيبلك شويه عليك..رفع يدها وطبع عليها قبله بعدين قال..مافي شي يسواك..
غرفه وهي تشوف لنظرات عيونه اللي كانت نظرات حب صافيه تسارعت دقات قلبها واحمروا خدودها نزلت عيونها خجلا وقالت..
/صحيت..
ضحك وقال..
/سلمك ياحنه..
ويحط يده في جيبه للمرة التالته هي قالت بضحكه..
/ولى جيب عبقور..
ضحك وطلع حاجه لما شافتها غرفه استغربت..
هو قال بإبتسامه..
/تتفكري اول مرة عطيتك المستكه هادي!؟
تمعنت فيها بالنظر وهي تتفكر لعند ماذكرت الموقف ضحكت وقالت..
/تفكرت..
حسين:هديكا المرة اول مرة نهدي فيها حد حاجه في حياتي بعد اختي اميمه..
خدتها وهي مبتسمه قامت عيونها فيه وقالت..
/صحيت.
شد راسها بإيديه وقربه ليه وطبع قبله ع جبينها بعدين قال..
/نحبك..
نزلت عيونها وقالت وهي مبتسمه بخجل..
/صحيت..
رفع حاجبه وقال..
/سلمك ياحنة..
ضحكت وهو ضحك معاها بعدين طلع هاتفه من جيبه وقال..
/عجباتك الكسوة؟
قالت:هلبه..
قرص خدها بعدين قال..
/خلاص خشي توا بعدين نهدرزوا تسكري هاتفك نوريك..
هي بضحكه قالت.
/لامافيهاش كيف الليله بيحنوني..
قال بإنزعاج؛إياااح..
قالتله:ماتحبش الحنه؟
عقد حواجبه وقال بإبتسامه..
/نموت فيها..
ضحكت بخجل..
حرك راسه للباب وقال..
/خشي خشي..
مشت وهي مبتسمه بخجل وهو قعد معاها بعيونه لعند ماخشت داخل تنهد من قلبه بعدين رجع لهي بهاتفه دار اتصال وحطه ع وذنه ومشي بإتجاه المربوعه وهو يقول..
/ايوه عدي..
☘وتخش غرفه للخيمه بحالة غير اللي طلعت بيها ضحكتها ع وجهها اللي بان منور وتتلقاها سميرة شدتها من يدها وجابتها لنص الخيمه وبدت تغني عليها وترقص فيها وغرفه تضحك بخجل ..
اشرت سميرة لسدرة وفردوس وطوبى يجوهم..
شافوا لبعض التلاته تبادلوا الابتسامات وناضوا مع بعض..
الاء:قولوا ياالله عليهم..ياماشاء الله عليهم..
خلتهم سميرة يرقصوا مع بعض وقعدت دور عليهم وهي تصفق وتغني..
"ماشاء الله ياعليك بنات..وين مايمشوا مشكورات"
والحاضرات يردوا وراها وهما يشوفوا لبنات الواعر كيف يرقصوا مع بعض وهما يضحكوا..
ناضت سالمين وبكل حماس قعدت تغني عليهم خلت كل من في الخيمه ينشط معاها وتعالت اصواتهم وهما يغنوا ويصفقوا ومرة مرة تنسمع صوت الصيحات اللي من اريج واللي من صفاء..
وينضمولهم مع فايزة وهاديه وكاريمان وتزيد تنشط الاجواء اكثر واكثر..
طوبى يدوب كانت ترقص لكنها تغني بحماس وتزغرد رغم وجع المغص اللي تحس بيه تجاهلاته وعاشت الفرحة مع العيله...
وطبعا جنتها ومئاب حتى هما شاركوا معاهم وماغيبوا جهد لافي الرقيص ولاالتصفيق..
☘☘☘☘
وتستمر طوبى تقاوم لتاني يوم..كان وجع المغص يجي زي نوبات لحظات ويختفي لكن في كل مرة يجي فيها كانت شدة متاعه تزيد وهي مازالت تقاوم وتتجاهل..
🍃هي حاليا واقفه في اخر القاعة تتفرج بحب وفرح ع غرفة اللي كانت طالعة بطلة رغم بساطتها جميلة جدا واكثر شي محليها ابتسامتها الحقيقيه الباديه ع وجهها..
كانت تشوف في اميمه وجهينه كيف نزلوها من ع الكوشه بش يروحوا بيها..
لحظتها اجتاح قلبها شعور بالوحشة،هدا وين استوعبت ان غرفه حتبعد عنها وحتفقدها..
سالوا دموعها ع وجهها اللي بدت عليه ملامح الوجع فجأة..
المغص هالمرة قوي بزياده وحست معاه بشعور الغثيان اضطرت تهرب من القاعه للحمام ..
لما وصلت فيه وخشت مشت بسرعه للحوش وقعدت ترجع فيه..ترجع بقوة وألم المغص كل ماله يقوى..
اجهدت تماما وحست انها حتفقد الوعي في أي لحظه..
قعدت شادة الحوض بماقعد عندها من قوة وهي تاخد في انفاسها بصعوبه وكأنها كانت تجري في سباق ماراثون..
غمضت عيونها بشدة ورجعت مرة تانيه بقوة وصوتها كان عالي..
انفتح باب الحمام وخشوا عليها اريج ومعاها وحده من العاملات..
اريج بخوف بالغ..
/طوبى!
طوبى بصوت متعب..
/مافي شي..مافي شي..عادي..طلعت غرفه؟
نزلوا دموع اريج وهي تقول..
/ايه..
طوبى بتعب:نبي نروح..نبي نرقد..
اريج قربتلها ضمتها وهي تقول..
/باهي باهي تعالي معاي..
وطلعتها وطوبى شاده فيها شافت للعامله وقالت..
/اسفه
العامله بشفقة:ولايهمك لاباس عليك
طوبى معاش قدرت تتكلم واريج ردت ع العامله تقول..
/لايوريك باس
🍃🍃🍃🍃
سدرة ووحده من خالاتها وهاديه لحقوا غرفه لصالة اهل العريس..
لكن باقي نساوين العيله..
اريج روحت مع راجلها بعد مااجبرتها طوبى تروح لحوشها..
والاء وفردوس روح بيهم عزيز لحوش طوبى..
وطوبى روح بيها خالها المحجوب..
اماضيوفهم الشراقه روحوا ع حوش قريبهم اللي شد فيهم يجوا يباتوا عنده ليوم السبت..
🍃🍃🍃🍃
"جديد عليك التعب متاعي من العذر يافردوس!؟"
فردوس بقلق..
/وانتي نسيتي شن صار فيك لما اغمى عليك اخر مرة؟
طوبى بضيق..
/عادي يافردوس والله عادي حاله تجي وتمشي
فردوس بإصرار وحزم..
/اني بنرقد بحداك الليله تبي ولاماتبيش
طوبى هزت راسها بالموافقه استسلاما بعدين حطت راسها ع المخده وغمضت عيونها..
تنهدت فردوس بضيق ومشت طفت الضي ورجعت تمددت ع سرير غرفه..
🍃ومن دار البنات لدار المعيشه..
اللي بيباتوا فيها آلاء وهاديه مع الصغار كانت هاديه ترقد في جنة وهي تحكي مع آلاء عن حال طوبى..
/والله هداكا اليوم لتوا رعشته قاعده في عظامي..اشرت ع الباب وقالت..طاحت غادي هكي لابيها لاعليها ولما فيقناها شدت في غرفه وقعدت تتنفض نفض مابعضها..
الاء ودموعها ينزلوا قالت بألم وحقد..
/ربي يسلط عليها شر خلقه هديكا الشيطانة ان شاء الله اللي داراته فيها تلقاه..
مسحت هاديه دموعها وهي تقول..
/ايه والله..
☘☘☘☘
سلم من الصلاة وهي سلمت بعده..
التفت عليها شافلها بإبتسامه وهي نزلت عيونها خجلا..
ضحك وناض ومشي بإتجاه الشنطة متاعه فتحها وطلع منها ورقه ملفوفه بشريط لونه ابيض..
وهي كانت بعيونها معاه لعند ماجاها وقعمز قدامها..
حط يده ع جبهتها وبدي يدعي بعدين قرب منها وطبع قبله عليها وهي مبتسمه وقلبها يدق بقوة..
بعد عنها وهو يشوفلها بإبتسامه ومدلها الورقه وقال..
/وهادي هديه الليله..
ابتسمت بإستغراب..
هو قال بإبتسامه..
/خوديها وافتحيها واقري اللي فيها..
خدتها وهي مستغربه فكت الشريط وفردتها وبدت تقرا وهو يتأمل في ملامحها..
بدت ع وجهها ملامح الاندهاش شيئا فشيئا رفعت عيونها فيه وقالت..
/من جدك؟
بضحكه قال..
/علاش متفاجئه لهالدرجة! قتلك قبل بالنسبه ليا اني مافي شي درتهولك ولاعطيتهولك يسواك ياغرفه..
تعبوا عيونها دموع وهي تشوفله لهاللحظه مش قادرة تستوعب ولاتصدق حب حسين ليها..
ابتسم بحب وقال..
/تكلمي ماتقعديش ساكته..
بنبرة حلوة قالت..
/صحيت..
ضحك من قلبه وضمها ليه وهو يقول..
/هبله...
☘☘☘☘
الساعه 2:30بعد منتصف الليل..
نزلت من سريرها بهدوء..خدت هاتفها من جنب المخده ومشت طلعت من الدار..
توجهت للصاله...وصلت فيها وخشتلها وقعمزت تحت شباكها..
قامت هاتفها وخشت ع الاستديو..تحديدا مقاطع الفيديو فتحت اول فيديو كان لعبدالقيوم في عرسهم وهما يزفوا فيه..
قعدت تتفرج عليه والدموع تنزل منها وهي تمسح فيهم تم الفيديو وتلقائيا انفتح اللي بعده حتى هو كان لعبدالقيوم لكن وهو يكتب في احدى لوحاته من انسجامه مع رسمه للخط ماحسش بيها وهي تصور فيه..
حالته هادي وشكله كانت تعشق تتأملهم..بالذات عقدة الحواجب وتضييقة العيون..
حطت يدها  ع فمها بش تكتم صوت بكاها وهي تتفرج ع الفيديو اللي بعده كان فيه يغني بالتارقي وهو يدير في الشاهي الاخضر هي كانت معاه لكن مش طالع منها شي الا صوتها وهي تغني معاه..
"ديري طلة ع خبزتك نشم في بنة حرق
عينك..طايبه قداش ليها ومطفيه عليها ومطلعتها"
ضحك وهو يحرك في راسه يمين ويسار وهي ضحكت معاه بعدين قالت بضحكه..
"اسفه مش عارفه كيف قلتها
مريشة"
ضحكت تاني وانتهي الفيديو وينفتح الفيديو اللي بعده..
كان ليه هو وجنه..
"جنة من احسن عبادة ولا ماما
سوا..سوا"
ضحكوا عليها من قلوبهم وطوبى تقول..
"ياربي منين تتعلم فيه الكلام هدا بس..
الله يبارك عليها نبيهه وتتعلم بسرعه..
الله يبارك عليها قلبوشة مامي..
حبك مامي..
وانا؟
حبك حوبادة..
وانا نحبك ونحب اللي جاباتك هذي نموت فيها"
طيحت الهاتف في حجرها وغطت عيونها بإيديها وهي تبكي بحرقه وكتمان..
وفردوس اللي فاقت فجاه ومالقتهاش طلعت دور عليها وهي مرعوبه لعند مالقتها في الصالة بهالحاله..
خشتلها وقعمزت جنبها وخدتها في حضنها وطوبى شدت فيها بقوة وهي تبكي..
🍃🍃🍃🍃
"كاريمان"
كاريمان وهي حاطه راسها ع المخده قالت..
/نعم؟
سالمين:ليش مازلتي واعيه..
قالتلها بضيق:ياريت روحنا مع بنتي وماجيت هنا..
سالمين ودموعها في عيونها قالت..
/حبتيها واجد ياكاريمان؟
التفتت كاريمان ع سالمين وقالت..
/نحبها واجد من صغرها بس توا تعلقت بيها نحس فيها بنتي حق من دمي ومن لحمي وطلعت من رحمي..نزلوا دموعها وهي تقول..حتى صابر يقولي فيها يقولي نحس فيها بنتي من صلبي..هي ياسالمين حنونه واجد ديما تحن وتنشد.. تعرفي قبل وين نسمع خواتي وهن يحكن ع بناتهن كيف يكلمن فيهن يوميا ولاوين يجي عيد الام كيف يجيبولهن في الهدايا قلبي يوجعني واجد ونتحسر..وسبحانك ياربي بعتها ليا بيش تعوضني..ضحكت وقالت..تميت حتى نا نحكي كيفهن بنتي اتصلت بيا بنتي بعتتلي هدية بنتي جابتلي هذيك الحاجه..
سالمين بإبتسامة من بين دموعها قالت..
/مش غير هي اللي ربي عوضكم بيها حتى انتم ربي عوضها بيكم..
تنهدت كاريمان بإبتسامه وقالت..
/الحمد لله رب العالمين ياخد ويعوض..
مسحت سالمين دموعها وقالت..
/الحمد لله..
☘☘☘☘☘
يوم الجمعة..
الاول من ربيع الأول..
8اكتوبر...سنة 2021..
سافروا حسين وغرفه لقبرص يش يقضوا شهر العسل فيها وحيكون موعد رجوعهم التاسع من شهر نوفمبر يعني حيقعدوا فيها شهر كامل..
ماجتش غرفه لحوش طوبى قبل السفر بش ماتشوفش صغارها اللي كان صعب عليها فراقهم والصغار كانوا فاقدينها بالذات مئاب لكن هاديه بحنها الفايض ع الصغار عرفت كيف تهديها وتنسيها غياب امها..
غياب غرفه اللي زادت حست بيه طوبى بعد ماروحوا فردوس وآلاء..
ويروحوا اسامه واميمه ويوسف وجهينه وتقعد صفيه في حوش طوبى لعند مايروحوا العرسان من شهر العسل..
🍀🍀🍀
وتمر الأيام وتبعها الأيام ومازال عبد القيوم مختفي ومافيش منه خبر..
وغيابه هدا زود الحيرة الخوف عند الجميع واكثرهم طوبى..
🍃🍃🍃🍃
الثاني عشر من شهر ربيع الأول..
19اكتوبر..سنة 2021..
واقفة هي وسلافه قدام لوحتها اللي كانت في دار الخزين كانت طوبى تتكلم وسلافه تسمع فيها..
🍃طوبى:ماارتحتش الا لما عرفت انه يتواصل مع صاحبه سامي..
سلافه:تعرفي! انا حاسه انه متقصد يعمل هيك يعني مشان انتي تخافي عليه وتقبلي ترجعيلوا..
طوبى بقلق:اني حاسه ان في شي اكبر من هكي ياسلافه..
سلافه:مثل شو؟
طوبى بخوف وقلق..
/ياخوفي يكون مشي للسافل الجالي واشبح شن دارله..
سلافه بريبه:لامستحيل هو مو هيك ابدا..
قالتلها بألم وخوف:اللي داره الحقير هداكا مش شويه راجل زيه مايقدرش يفوتها يا..
سكتت لما حست بوجع فضيع في حزامها..
سلافه بخوف..
/طوبى!
طوبى وهي مغمضه عيونها بشده قالت..
/مافي شي مافي شي..وجع بسيط ويمشي ع حاله..
سلافه بقلق:وشك اصفر..
فتحت طوبى عيونها وقالت..
/عادي عادي..مافي شي..هاه مشي ع حاله..خدت نفس وقالت..اهي اللوحة سلافه وبالله زيدي اعتذريلي منهم مانقدرش نطلع من الحوش الايام هادي. هزت سلافه راسها بإيجاب وهي تقول..
/طيب..وفي داخلها قلق كبير ع صحة طوبى اللي ولت تتراجع بشكل ملحوظ المدة الاخيره..
🍃🍃🍃🍃
وجي يوم المعرض..
وشاركت لوحتها في المعرض..اللوحه اللي اثارت اهتمام كل الحضور بكل تفاصيلها واسمها كان معبر جدا عنها..
"رحلة صعود للسماء السابعة"
اقتبست فكرتها من الحديث اللي دار بينها وبين سلوى  وخيالها جمح بيها وخلاها تحط كل ماعندها من احاسيس ومشاعر وامكانيات واللي عطاته لهاللوحة وصل لقلب كل من شافها...
🍃وهي في هداكا اليوم كانت حاسه بشعور حلو بالمرة جاها من لاشيء مابتش تسأل نفسها هلبه عن اسبابه فضلت تعيش بيه وتعطيه للي حواليها نساوين عمها وصغار غرفه وجنتها..
واستمر هالشعور مرافقها لتاني يوم دارت في حوشها لمة كل خميس والاجواء كانت من احلى مايكون لعند ماروحوا احبابها..
رقدت بنتها وحطتها مع الصغار جنب نساوين عمامها ومشت لدارها بش تراجع ورد الحفظ اليومي..
وهي تقرا فيه نزل عليها النوم..ردت المصحف في مكانه وتمددت ع السرير ورقدت...
🍃وتعدي ساعة وراها ساعه وتبان صورة القمر ع سيارة غرفه اللي كانت مدرسه جنب كرم العنب...
🕸ويزور طوبى حلم من هديكا الاحلام المخيفه..
شافت فيه نفسها واقفه ع حافة جرف تشوف للقمر اللي كان بحجم كبير جدا كانت مستغربه في كبر حجمه..
تبدلت ملامح الاستغراب ع وجهها للخوف لما شافت لمجموعة طلاسم مش مفهومه كانت تبان عليه وتختفي وبدت تسمع في اصوات متداخله تقول في كلام مش مفهوم..
شويه وبدي القمر يقرب منها دب فيها الرعب..وخرت خطوة والتفتت بتهرب منه وتوقف في مكانها لما تشوف مجموعه من الاسود واقفين جنب بعض وبدوا يقدمولها..
...فاقت من النوم والخوف الشديد معبي صدرها...
غمضت عيونها بشده لما رجعت حست بالمغص وهالمرة كان اقوى من قبل وكل ماله يزيد يشتد..
ناضت من مكانها بصعوبه وهي تتوجع بشده وتقول بصوت يدوب طالع..
"يارب"
ومجرد ماقالتها رجعت تسمع في نفس الاصوات المتداخله اللي سمعتها في الحلم وهي تقول في كلام مش مفهوم..
وترافقت مشاعر الوجع مع الخوف وهي كانت تحاول تهرب منهم..
وصلت في باب الدار جت بتنادي ماقدرتش ع قد ماحاولت ماقدرتش..
وماإن طلعت من باب الدار الا وهي بدت تحس بشي حاوطها وشد عليها بقوة بعدين طلقها..وشي تاني دفعها بقوة وشي تاني يغم ع نفسها ويسيبها..
هي معاش قدرت تشوف حاجه المحيط اللي حواليها كله كان مظلم ومرة مرة تشوف حاجات تشبه الاطياف تفوت قدامها..
كانت حتستسلم لهديكا الحاله وتسلم نفسها ليها بسبب ضعفها الشديد..
وفجأه..من لاشي بدت تسمع في آيات قرآنيه تتردد في عقلها..
"لاتخافا إنني معكما اسمع وأرى"
"إنما صنعوا كيد السحر ولايفلح الساحر حيث اتى"
"والق مافي يمينك تلقف ماصنعوا"
وترجع وتحس بشي غمها بقوة هي في هديكا اللحظه بكل مااوتيت من قوة ايمان ساكنة قلبها قالت بصوت عالي كله وجع..
"يارب"
وترجع تشوف قدامها في حوشها..وتشوف نفسها وافقه في الممر..
لكن الاطياف مازالت تتخطف قدامها..قعدت درق في وجهها بإيديها وتقول
"حولوا.."
حست بحد شدها دفاته بقوة وهي نقول
"حول.."
وبدون ماتشوف قدامها كانت تضرب وتدفع وتعيط وهي تقول..
"حولوا"
وحواليها هاديه وصفيه وعمها كانوا في حالة ذعر يحاولوا يشدوها ويوقفوها لكن هي ماكانتش تشوف فيهم..
عياطها واصوات عمها ونساوينه فيقت الصغار اللي من خوفهم قعدوا يبكوا..
"طوبى..ياطوبى..خيرك"
فتحت عيونها وشافتهم قدامها شافت ملامح وجوههم كانت مذعورة..
فجأه..حست بشي ينزل منها نزلت عيونها شافت دم..نزيف دم..ويصحب هالنزيف وجع اقل مايقال عنه انه قاتل..
حطت يدها ع حزامها وصرخت بأعلى صوتها من قوة الألم وفي لحظه تنهار ع الأرض فاقده للوعي...

#امتحان
#طوبى

....يتبع....