"بعدك يجرحني وقربك يشفي لي جروحي"

[الجزء السابع عشر]

مسكو الجد وهم يحاولون يطلعون من هالبر بأمان..
----------
• عـنـد جـبـر و سـيـف :
كان سيف يسوق بكل سرعته وقلبه خايف عليهم كلهم ،وخايف من فكره فقدهم ،اما جبر يلي كان يناظر حواليهم وهو يحاول يشوف اي شي لكن الظلام كان قاطع عليهم ،الين استوقف سيف بعد ما شافوا نور وواضح انه نار،جبر :وقففف وقففف
وقف سيف بخوف وهو يناظر حوله:لقيتهممم!
جبر :هذيك مب سياره عز!
طلع سيف بعجله بعد ما تأكد انها سيارته وهو ينادي بصوت عالي :عززز،يالوليدددد
اقتربوا وكانت صدمتهم لما شافوا الخيمه متساويه بالارض ومليانه رمل والسياره محترقه بجانبه،سحب جبر سيف بسرعه اول ما انفجرت السياره وهي تولع بقماش الخيمه،توق جبر بصدمه وهو يشوف الخيمه تحترق،اما سيف كان يقترب من الخيمه وهو على امل انها طايحه وهم نايمين فيها،كانت صدمته وهو يشوفها تحترق قدامه ،تراجع بصدمه وهو يكرر:الوليد،الوليد فيها
مسكه جبر وهو يسحبه عن المكان:محد فيها الخيمه متساويه مع الارض،اكيد انهم قراب السياره ماصار لها وقت مولعه ،مشى سيف وفكره فقدانه الوليد تتكرر بباله ،ضلوا يمشون بوسط الظلام الين توقف جبر عند قطعه بيضا وهو يسحبها من تحت الرمل:هذا قماش ثوب محروق
اقترب سيف وهو يناظر لها وازداد خوفه اول ما انتبه لأثار الدم عليه،فز بصوت مستعجل:صدقني صاير لهم شي،امشش
قام جبر وهو يركض ورا سيف يلي يركض بكل خوف وهو يحاول يتماسك ،اقترب من سيف وسحبه :لقيت احد يقدر يساعدنا
سيف :مين؟
جبر:الرعد
التفت سيف وهو يتنهد تنهيده طويله:الرعد بأبها وشلون نجيبه من وسط الناس ؟
جبر:دور شبكة حواليك وبلغ
بدا سيف وجبر يدورون شبكه لكن نهائيا مافي اي شبكه..
------------
• بـيـت هِـمـام :
عند البنات يلي يلعبون مع جودي ويضحكون،جلست شوق بعد ماضحكت على جودي يلي طاحت وكسرت صحن بعد ما حاولت كثير مرام انها ماتكسره،اما وتر وقفت وهي تجمع القطع الكبيره ،وتكنس القطع الصغيره،اقربت جودي لعند وتر لكن استوقفتها وتر وهي ترفعها وتجلسها على الكنب ،مسحت الارض وتأكدت منها ،اخذت طرحتها وهي ترمي القزاز خارج الحوش بجانب الباب،ورجعت البيت ،جلست وتين بجانب وتر: وين تركتيه؟
وتر نزلت طرحتها وجلست:مثل العاده خارج الحوش عند الباب
وتين سحبت جوالها :اصبري بأقول لبتال يقول لهم لحد يدوس عليه
قربت فدوه وهي تترك ابريق الشاهي على الطاوله:تقولين لبتال وشو؟
وتين:بس وتر تركت القزاز عند الباب قلت اقول له يقول للباقي عشان مايمشون عليه
فدوه ابتسمت:ماعليه بتال نايم مع ابوكم بالمجلس انا بأطلع أقول لهم ،خلوكم هنا
وتر ابتسمت:طيب
طلعت فدوه وهي تشوف باسم وهتان جالسين يسولفون ،بينما الرعد متمدد "منسدح" على سرير كبير ويناظر القمر وافكار تجيبه وافكار توديه،طلعت وهي تقترب من هتان وباسم :وش فيه خويكم متحيز لحاله
هتان ضحك:ولاشي ياعيني بس الخوي قرر يجلس لحاله
فدوه جلست بجانبهم:اييي كيف ياهتان زانت لكم أبها
هتان ضحك :ايه ولله زانت لي ،ولا انتوا نسيتوا الديره؟
ضحكت فدوه وهي تلعب بالحجر :لاولله مانسينا الديره بس تعرف جدتك تحب مزرعتها ،بس ترا بنرجع الديره رمضان وشوال كاملين
هتان:تنورون الديره ولله
وقفت فدوه وهي تعدل طرحتها: اسمعوا وقولوا لخويكم وللصنم يلي داخل في قزاز عند الباب الخلفي بجانبه لاتمشون حافين وانتبهوا
هز هتان راسه وهي يأشر بسبابته على عيونه:من عيني هذي قبل هذي
اما باسم كان يبتسم وهو يسمع نقاشهم :انا لو قلت له شي رفعت ضغطه وأكمل وهو يقلد هتان:من عيني هذي قبل هذي
ضحكت فدوه وهي تروح:قولوا لخويكم السرحان ،ودخلت بينما هتان وقف وهو يروح لعند الرعد يلي كان يتذكر طفولته مع وتر يلي كل ماحاول يتخيل شي تدخل بالموضوع وكأنه مايقدر يفكر بغيرها رغم انه مايحس اتجاهها بأي شعور ،تقدم هتان وهو يضرب كتفه بخفه:يالخوي؟
الرعد التفت بأنتبه:لبيه؟
هتان جلس بجانبه وهو يناظر القمر:تقول خالتي فدوه لانمشي من عند الباب الخلفي في قزاز هناك
الرعد بهدوء وعيونه للحين تراقب القمر:ان شاء الله
باسم جاهم وهو يركض:ياهوووو
فز هتان وهو يلتفت له:مجنون انت في احد يجي ركض كذا
توقف عند باسم:صلاه العشاء فاتتنا
ناظر الرعد لساعته:اي ولله مر عليها 20 دقيقه وشلون ماحسينا،قوموا نصلي بالمجلس
باسم:هذا ولا الجديد
الرعد وهو يسحب شماغه من على الكرسي:هذا
اما هتان لحقهم وراحوا يصلون..
----------------
• بـيـت الـجـد ســعــود :
للحين وتبارك تحس بضيقه،دخلت مها المطبخ وهي تشوفها جاليه وواضح عليها الهم ،تركت صحن التقديم على الطاوله واقتربت من تبارك:فيك شي ياعمه
تبارك ابتسمت وهي تخفي الهم يلي بداخلها ولا انزاح:لايعيني بس صداع اخذ دوا ويروح نادي ليي عمك
طلعت مها وهي تلبس طرحتها للمجلس لكن استوقفها صوت بكاء تعرفه زين،التفت وهي تشوف غاية يلي جالسه بالحوش ومنهاره تماما وهي تدعي لعز،بدا الشك يدور براسها وتأكد ان عز فيه شي،التفت لأمها بخوف:يمه احد فيه شي
رفعت غايه راسها وأكملت انهيار:اخوك يابنتي اخوك ،قلبي يقول لي انه به شي مايعرفه غير خالقه
جلست مها بجانبها وهي تحاول تمسك دموعها:ماعليه يمه كله احساس وان شاء الله يرجع
غايه بضيق:احساس الام مايخيب يابنتي
مها تنهد بضيق وهي تقوم :يمه خليك مكانك شويات وراجعه،ومشت بدون ماتشوف غايه يلي ماتحركت ولا قالت شي وهي للحين بصدمتها ،اقتربت مها من المجلس لكن استوقفها صوت البكي وهنا تأكدت انه في شي ،دخلت بسرعه وهي تشوف شام جالسه وسط خوفها ،اقتربت وهي تمسكها بخوف:شامم ،شامم ردي
لكن شام كانت تناظرها ببرود:عز مو موجود
جلست مها بخوف:شامم مو قوت مقالبك عز وينه تكلمي ،عززز وينه؟
انهارت شام وهي تكرر:عز فيه شي عشان كذا مارجع ومحد يعرف مكانه
مها انصدمت من كلام شام:شاممم كيف مايعرفون مكانه،هو راح البر مع جدي والوليد ولا لا؟
شام هزت راسها بأنهيار:راحوا ومارجعوا
صرخت مها بصوت عالي:كيفففف مارجعووواااا تكلمييي،شامممم عزززز وينه تكلمييي
اما شام اكتفت بالانهيار بينما مها يلي كانت تبين قدام الكل انها قويه قدام فكره انها يمكن في يوم يفقدون عز تضعف .. فزت الجده على صوت صرخه مها وهي تقوم بتعب:وش في؟
بينما كل البنات بحاله صدمه ماعدا امال يلي كانت حاسه انه في شي من احساس امها ،طلعوا للحوش وهم يشوفون غايه المنهاره وباب المجلس المفتوح،وقفت الجده بذهول من منظر غايه يلي خوفها اكثر من صرخه مها:غاية ،يابنتي احد فيه شي
مسحت غايه دموعها اول ماوصلها صوت امها لكن ادركت انه مافي مجال تخفي عن امها ،اقتربت الجده منيره بخوف:احد فيه شي؟
لكن غاية ماكنت تتكلم واكتفت انها تبكي بحضن امها تحت عيون الكل يلي منهارين ويلي يدعون انهم يرجعون لكن الجده كانت جاهله تماما ان الجد معاهم لكن بداخلها احساس كان يثبت انه فيه شي..
-------------
• الـبـر :
رمى عز نفسه على الرمل بعد ماصبر كثير على الم رجله ،اما الوليد رغم حرق كتفه الا انه شايل الجد وقاعد يحاول يمشي ،جلس وهو يترك الجد بجانبهم بتعب:ياعز خلنا نصبر مابقى شي على الشارع
عز وهو يتألم :ماني بـ قادر اوقف
تنهد الوليد وهو يمد يده:أمسك يدي
عز انتبه لكتف الوليد رغم انه محترق أكثر من عز لكنه يتجاهل:يالوليد كتفك
قفل الوليد عيونه وهو يتجاهل الالم :تعال يلا الالم مابيفيدنا لو قعدنا وسط هالبر وجدي طايح لازم نطلع نسعف انفسنا وجدي الطايح يلي مب عارفين وش هي سواته
مسك عز يد الوليد وهو يقوم رغم ان الوليد كان يتألم لكنه كان يدعي انهم يطلعون،اخذوا الجد وضلو يمشون الين انتبهوا لنور سياره واقفه بنص البر ،تراجع عز:ارجع يالوليد يمكن انهم هم
لكن الوليد بدا يشك انه يعرف السياره واقترب :ياعز امش هنا
عز :خبل انت اقولك نروح تقول امش هنا
الوليد:هذي سياره اوادم واضحه ولا وش يبون منها ،وتوها موقفه ماصار لها وقت ورغم كل هذا في اثار لبشر يعني ماراحوا بعيد
عز بدا يتوتر من الوضع :انت متأكد
الوليد:اجلس جدي داخل وخلنا ندور جوال ولا أي شي يمكن يساعدنا
اخذوا الجد ودخلوه السياره وبدوا يدورون لأي شي يمكن يساعدهم..
توقفت عيون عز بصدمه لما أنتبه لسلاح ومكتوب عليه "سيف بن سعود" ناظر بالوليد وهو يمده له: خذ
ناظره الوليد بذهول منه،اكمل عز وهو يمد له:خذ
الوليد رفع حواجبه بصدمه: وش اسوي فيه؟
عز لفه لوجه الوليد وبدا يأشر له على الاسم:هذا أسم خالي سيف شوف مكتوب "سيف بن سعود" يعني هذي سياره خوالي وخذ سلاح أبوك وارمي
ابتعد الوليد بصدمه:ماني برامي
ابتعد عز عن السياره وهو يفتح الامان وبدا يرمي 3طلقات ورا
بعض.. في الطرف الثاني عند سيف وجبر يلي ماتركوا مكان مارحوا ،قاطعهم صوت أطلاق نار التفت جبر :من وين هالصوت؟
سيف:من جهه السياره!
بدا جبر يركض وهو يرجع لموقع السياره ،استوقفه سيف:بس العيال مايعرفون يرمون
جبر التفت له بصوت مستعجل:عز يعرف
اكملوا ركض لـ طريق السياره ،اما عند عز والوليد يلي انهاروا من الالم على الارض ينتظرون اي شخص يستجيب ،جلس عز وهو يون من الالم وينتظر أي احد يجي بينما الوليد سحب السلاح من يد عز وبدا يرمي بالسما وكانت أول مره يستخدم السلاح ،قاطعهم صوت قريب من السياره لكنهم من قوه الالم معد قدروا يتحركون ،اما عز الدنيا بدت تغيب عن عيونه لكن الوليد كان كل ماشافه يقفل عيونه يمسكه او يضربه ،الين اقترب جبر وهو ينادي:ياعيالل
لكن الوليد بدا ينهار من التعب ومعد قدر يتكلم ،اما عز فقد وعيه ،تقدم جبر وهوويشوفهم ويشوف شكلهم التفت لسيف بصوت عالي:تعاللل
تقدم سيف بخوف وهو يشوفوفهم دخلوهم السياره بجانب الجد وهم يتجهون لأقرب مستشفى ..
----------------
• بـيـت الـجـد ســعــود :
دخلت غايه بعد محاولات من الجده منيره ،اما شام طلعت الحوش وهي تحاول تاخذ نفس :يارب رجعه لنا بالسلامه يارب استودعناك سندنا بهالدنيا .
اما مها كانت جالسه قدامهم ولا كأنه مأثر فيها شي رغم ان الكل يعرف بالهموم يلي بداخلها والخوف،اما الجده جلست بخوفها بجانبهم ينتظرون رجوع سيف وجبر فيهم،طلعت مسك الحوش وهي تشوف شام المنهاره قدامها قربت منها وهي تحضنها :ادعي له وان شاء الله يرجعون وكلنا نعرفهم اقوى اثنين ماشاءالله ومايضعفون لـ شيء واكيد انها زحمه سير وراجعين
انهارت شام بحضن مسك جلست مسك على الكرسي وهي تواسي شام يلي اكتفت انها تناظر السماء بخوف من خبر فقدانه ،اخذت امال جوالها وهي تتصل على أبوها"سيف" مره ومرتين وثلاث لكن مافي أي رد ،جلست بخوف تنتظر الرد ،الين كلمتها غايه:امال!
التفت امال:لبيه؟
غايه:كلمتي ابوك
امال:ايه
غايه:رد؟
تنهدت امال بضيق:لا ،بس ماعليك اكيد ماعندهم شبكه وراجعين ان شاء الله
تراجعت غايه بخوف:طيب احد يكلم جبر يشوف
سحبت الجده جوالها وهي تمده لـ الزين :دوري لي رقم عمك جبر عساه يرد
اخذت الزين الجوال وهي تتصل وترجعه للجده: يتصل
رفعت الجوال الجده وهي تنتظر رد جبر الين وصلها صوت:ايه ماتقول لي وينكم ،لقيتوهم
جبر بصوت مستعجل:ماعليك يايمه بشريهم انا لقيناهم وانهم بخير بس بنروح مشوار شوي للوالد وراجعين
نزلت الجده الجوال :كلهم بخير ارتاحوا يقولون لقوهم،رجعت الجوال:ووشهوله هالمشوار
جبر:بناخذ كم من غرض لـ عامل النياق يبيهم
الجده:ايه ، ايه ماعليه لاتبطون العشا ينتظركم
جبر:ابشري ،اجل انا بأقفل لازم انزل الجوال
الجده:لاتسرعون
جبر:ابشري
قفلت الجده الاتصال وهي تناظر بغايه يلي الفضول ذابحها:هاه يمه وينهم؟
الجده وهي تبتسم :لقوهم لقوهم يابنتي وهم بخير ورايحين ياخذون اغراض للنياق ،امشوا للمطبخ وزهبوا لهم عيشه زينه ياكلونها
ابتسمت غايه بهدوء :الحين الحين،قوموا يابنات
قاموا البنات ،اما زين طلعت ركض لشام بالحوش:شاااممم شاامم
فزت شام بخوف:هاه وش في عز فيه شي؟
مسك فزت بخوف:وجعه ماتعرفين تسكتين ؟
الزين بفرحه:وليش اسكت وهم بخير وراجعين
قامت شام:احلفي
الزين:ولله بيروحون مشوار وراجعين
زفرت شام انفاسها :الحمدلله
الزين:يلا دخلنا ،تقول جدتي نسوي العشاء
شام :ايه ماعليه نسوي العشاء
مسك ابتسمت:الحمدلله ،يلا ندخل
دخلوا البنات وعشان يجهزون العشاء ،وينتظرون رجوع العيال سالمين..
----------------
• بـيـت الـجـد هِـمـام :
كل العيال جالسين بالمجلس بينما البنات بالمطبخ يجهزون العشاء ،طلعت وتر وهي تاخذ جودي وتلعب معها بعد ما أنتهت من جزئها في العشاء ،اما جودي كانت تطلع العابها وتوريها وتر ،الين طلعت ديمه لـ وتر ،ابتسمت وتر وهي تاخذ جودي وتضمها:ياااااا روحييي علييييككك
تركت جودي وتجلس بحضنها وتلعبها بالدمى ،توقفت جودي وهي تمسك يد وتر وتمشي فيها الين توقفت عند باب المجلس :نزلت وتر لحدودها وبـ همس: مايصير ادخل في رجال
لكن شدت جودي على يدها وهي تحاول تسحبها وتدخل فيها المجلس ،دقت وتر الباب وهي تنتظر الرد
تقدم رواد من عند الباب:ياهلا جهز العشاء
وتر:لاياخال لسا على النار ،بس جودي تبيكم
ابتسم رواد وهو يفتح الباب وياخذ جودي يلي بدأت تبكي ،رجعها لوتر يلي جلست قدامها: هاه ياعيني وش تبين اخذناك للمجلس ماتبين
مسكت جودي يدها وهي تسحبهاللمجلس ،ناظرت بـ خالها رواد ويلي فهمت ان جودي تبيها تدخل معها المجلس ،ابتسم رواد :ماعليه ادخلي للممر الباب مقفل واذا نزلت الدرج ادخلي
وتر:اخاف تبكي وتبتلشون فيها
رواد ضحك:ماعليه نسيتي ان الرعد وهتان موجودين
ابتسمت وتر:ان شاء الله يقدرون
تقدمت مع جودي لأخر درجه لكن حودي للحين تشدها ،نزلت وتر وهي تحاول توصل لها المعلومه:مااقدر ادخل ياجودي
ابتسم رواد يلي لقى الحل:خليك هنا وانا بأنادي هتان يجي يلعبها وياخذها واذا اخذها اطلعي انتي
وتر بهدوء :طيب
دخل رواد:هتان ماعليه تعال خذ جودي
فز هتان وهو يلي كان ينتظر اللحظه طول اليوم
طلع وركض لها وهو ياخذها ويلعب معها:هاااه تبين وتر تدخل معك عيبب
ضحكت وتر:اسمع خذها وانا بأنتظر فوق
هتان هز راسه:ابشري
اخذهات ودخل فيها المجلس بعد ماتخبت وتر وهو يلعبها وطلعت لداخل قسم البنات..اما في المجلس ،دخل هتان ومعاه جودي:جتتت الشيخه جودي جتت
ضحك الجد:لو انهم سموها جود وش هو له جودي
مالك بضحك:قرار التغير لازال مستمر يا ابو رواد
التفت الرعد لـ جودي يلي جت له ركض وهي تحضنه :هاه؟مااشتقتي لي
هتان مسك دميتها :حتى لعبتها اطول منها هالنتفه
ضحك بتال:لو تذكر نفسك بعمرها كوره
جلس رواد يلي تقدم وهو يقدم القهوه استوقفه هتان:أقسم بالله انك تجلس انا اصبها خلك
رواد:ماعليه كم من فنجان
هتان:أجلس اجلس ،حلفت ولله مايصبها غيري
جلس رواد وهو يشوف هتان يقدم لهم:حطوها وراكم لاتتلقف هالملقوفه وتكبها
التفتت جودي على طاري كلمه الملقوفه ،ضحك الرعد عليها وهي تناظر المكان:وش تدورين شي تكسرينه ؟
ضحكت جودي بوجه ،وهذي كانت نقطه ضعف الرعد:ياعساهههه دايمهه ،ياقلبي على هالسنونن ياما شاءالله ،امشي امششيي
وقف وهو يمسم يدها ،استوقفهم الجد :وين رايح بالبنت؟
الرعد وهو يرفعها:ماعليه بأروح فيها البقاله وراجعين
بتال:البنت صغيره على البقالة
الرعد بـ مزح:ماعليه اذا اخذت شي ماهو لعمرها اعطيتك ياه
بتال ضحك: اقول دربك خضر،لاتسرع
تقدم هتان وهو يحط دميه جودي بجيب ثوب الرعد:خذ اللعبه هذي تسكتها فيها
الرعد:ماودك تخاوي؟
هتان وهو يضحك:الجايات خلني اقهويهم
الرعد:اجل مع السلامه
الكل:مع السلامه
طلع الرعد وهو يدق باب قسم بالبنات:يابيادرر
فزت وتر عل ىالصوت يلي تعرفه وطلعت لـ المطبخ:بيادر ينادونك
بيادر طلعت وهي تمسح يدها:قلت بأرتاح من المطبخ جوني هالهم ،ليه خلفتوا يا اخواتي
ضحكت ميعاد:ماعليه دورك جاي
بيادر:لا أعوذ بالله،توقفت بيادر عند الباب :مين؟
الرعد وهو يناظر جودي ويبتسم:الرعد ،جيبوا لـ الحلوه لبس تتدفى فيه بأطلع انا وهي مشوار وراجعين
بيادر بـ مزح: في مجال تاخذوني؟
الرعد: القلب أوسع لك من السياره خذي عبايتك وتعالي
بيادر بضحك:المره الجايه ،الحين اجهز العشا
الرعد:ان شاء الله بس بسرعه عشان ابي ارجع قبل العشا
بيادر وهي تشوف وتر قدامها جالسه:وتررر
وتر بأبتسامه:سمي؟
بيادر:جيبي جاكيت جودي
طلعوت وتر الغرفه وهي تاخذ جكيت جودي ،اما الرعد ابتسم:افتحي الباب يابيادر ودخليها تلبس وانا جالس هنا
فتحت بيادر وهي تدخل جودي وتترك الباب تقدمت وتر :هذا زين صح
بيادر:ايه لبسيها
صرخت وصايف:بيادررر
مشت بيادر للمطبخ وهي ناسيه:جيتت جيتتت
وقف الرعد وهو يشوف يد تلبس جودي الين قاطعه صوتها :على وين ياحلوه ،طالعه مشوارر،لبستها وهي ترتب شعرها:يلا الله يحفظك ،فتحت الباب بهدوء وهي تأشر جودي تطلع لكنها مسكت بفستانها نزلت وتر عشان تفهمها،لكن قاطعتها يد الرعد يلي سحبت جودي،صرخت وتر بهدوء وهي تمسك فستانها :ماعليه جودي ماسكه فستاني
نزلها الرعد بأرتباك :جودي يلا مشينا
تركت جودي فستان وتر لما شافت دميتها بجيب الرعد،ابتسم الرعد:اسف ماكنت ادري
وتر بهدوء:عادي ماصار شي
طلع الرعد وهو يبتسم وبداخله ربكه من سمع صوتها اما وتر بدا جسمها كله يرحف وهي تتذكر يده وصوته،اما الرعد طلع السياره وهي يجهز لـ جودي حزام الامان:اقسم بالله ان هالدميه تفك ازمه ،يلا مشينا
ابتسمت جودي ،قفل الباب وهو يركب ويمشي:والحلوه صارت معي
ابتسمت جودي وهي تلعب بدميتها
التفت الرعد لها ورجع يناظر طريقه:جودي
التفت له وهي تبتسم،ناظرها الرعد :قولي الرعد، ا لـ ر عـ د
كملت جودي لعب ،اما الرعد :قولي الرعد واجيب لك العاب
اكتفت جودي بضحكه توقف الرعد وهو يناظرها:يازييننننن هالضحكههه ياعرببب ياجعلها ماتغيببب
ناظرته جودي وهي تكمل بضحكتها يلي قدرت فيها تسرق قلب الرعد:قولي الرعد ،هاه قولي الـ ر عـ د
اما جودي لسا تضحك،اكمل الرعد طريقه لكن استوقفه صوت جودي يلي يكرر: رد ،رد
التفت لها وهو يضحك:تكفين تكفين الرعد
صحكت وهي تناظرها اما الرعد ماتحمل وهو ياخذها ويطلع فيها :يلا ناخذ لك لعبه
ابتسمت جودي اما الرعد دخل السوق يلي كان يمره قبل سنين ،وقف رجل كان يعرفه الرعد:ياهلا بالرعد ياهلااا
اقترب الرعد وهو يسلم ،اما الرجل ابتسم: يامطول الغيبه نشوفك جيبت الغنيمه
ضحك الرعد لكن استوقفه الرجل:الله يعطيك برها وان شاءالله تشوفها عروس
ضحك الرعد عليه وكان وده يفهمه لكنه ماقدر الين استوقفته جودي يلي خافت وبدات تبكي  مسكها وهو يهديها:خلاص خلاص الحين الحين نرجع
اقترب الرجل :اسمع مدامها جت بنت ابوها خذ لها يلي تبي هديه
ضحك الرعد:ماعليه ياعم الجايات بس ولله قلت اخذها عن البيت يرتاحون وارجعها وجيت اخذ لها كم من غرض ونمشي
الرجل:اجل مني بتاخذ هالعبه ببلاش
الرعد:اقسم بالله لأدفعها
الرجل:خذها هديه لها مدامها جت ولا باركنا لكم
الرعد تنهد ؛ماعليه الجيات ياعم
قاطعهم صوت رجل يعرفه الرعد التفت وينصدم وهو يشوف سعد"أبو هديل" ومعاه ولد وبنت بنفس عمر بعض ،انصدم سعد لما شاف الرعد ومعاه بنت وفكر انه تزوج وهذي بنته ،بصوت جمهوري: السلام عليكم
تنهد الرعد بضيق وهو يشوف سعد يجلس :هاه كيفك يالرعد ابطيت عن أبها معد شفناك
الرجل:الولد تزوج وجته بنت تشغله عن الدنيا
ابتسم الرعد وهو يمسك جودي يلي تحاول تلعب مع العيال،ناظر لها سعد:خلها تلعب معهم ولا هي لحالها مامعها أخوان
ناظره الرعد بصدمه لكن تحولت لأبتسامه وهو يسمع جودي تكرر:رد رد
الرعد جلسها بجانبها:لاولله ماعندها
سعد أبتسم:الله يرزقك ياوليدي
الرجل:ولا ياسعد منهم هالصغار ماقد شفتهم معك
سعد :ولله عيال بنتي جت الديره وماريحوها قلت اخذهم واجيبهم ياخذون شي يسكتون فيه
الرجل:الله يصبرها عليهم
وقف الرعد وهو يسحب دميه لـ جودي ويدفع:انا أستأذنكم
الرجل:الله يحفظك
سعد:اجلس خلنا ناخذ معك سالفه
الرعد:لاولله ياعمي مشغول والبيت ينتظروني
سعد:في حفظ الله
طلع الرعد وهو ياخذ جودي ويطلعها السياره وهو يفكر ان العيال يلي مع سعد عيال هديل ،تضايق الين ناظرته جودي وهوي يضبط لها حزام الامان:بابا
حس الرعد انه تخدر وهو يسمعها تكرر "بابا" رفع راسها بسرعه وضرب بالسياره ناظرها وهي تضحك عليه:تهونن تهونن
جلس بجانبها وهو يسمعها تكرر :بابا،بابا
وحس ان الكلمه هذي بالذات مسحت ضيقته وزرعت بداخله فرحه..
----------------
• الـمـسـتـشـفـى :
صحى الوليد وهو يشوف سيف عنده ينتظر ،اما عز صحى وحوله الممرض ،بصوت متعب:ويني؟
الممرض:الحمدلله على سلامتك ،انت بالمستشفى ابيك ترتاح شوي عشان رجلك محروقه حروق من الدرجه الثالثه
التفت عز وهو يناظر رجله ورجع ظهره وهو يتألم: الله يسلمك،متى بأطلع؟
الممرض: بأعطيك مغذي الحين عشان جسمك يحتاج تغذيه تعرضت لعطش لفتره طويله
جلس عز وهو يلتفت للجه الثانيه وتذكر الوليد وجده :جدي والوليد وينهم؟
الممرض: لاتشيل هم كلهم بخير موجودين
تنهد عز وهو يناظر المغذي:متى يخلص؟
كان الممرض بيتكلم لكن قاطعه دخول الدكتور:الحمدلله على سلامتك وأن شاء الله ماتتكرر
عز :الله يسلمك،بس طلعوني انا مااتحمل قعده المستشفيات
الدكتور:اهدى ياعز نحنا لازم نتطمن عليك وعلى حرقك
تنهد عز وجلس ينتظرهم ينتهون منه،اما الوليد صحى وهو يشوف أبوه عنده:يباه؟
سيف:ايه يابوي موجود انا
الوليد ابتسم:الحمدلله انك موجود،عز وجدي وينهم؟
سيف ابتسم:ماعليه كلهم موجودين وبخير
الوليد بصوت متعب:جدي صحى؟
سيف:ايه ايه صحى وبخير أبشرك
الوليد: الحمدلله ،متى بنطلع
سيف:ماعليه كم من دقيقه واوقع على الخروج
ونطلع
ابتسم الوليد واكتفى بالانتظار
اما عند الجد يلي قام وهو ناسي تماما وش صار بعد ماكان يأذن معاهم ،ناظر جبر قدامه :ليه جبتوني هنيّه ماتعرفني مااحب المستشفيات
جبر:يبه اهدى جينا نتطمن عليك ومدامك قمت اجل مافيك الاالعافيه
ناظر حواليه الجد :عز والوليد وينهم كانوا معي؟
جبر وهويبتسم:ايه ايه يباه موجودين وكلها كم من دقيقه ونطلع..
----------------
« بـعـد سـاعـة »
• بـيـت ســعــود :
وصلوا الكل بوجود الجد يلي شايل هم عز والوليد اكثر من نفسه،جالسين مع الجده منيره،وضحكاتهم ماانتهت رغم الرعب يلي بداخلهم للحين لكن جمعه الاهل تنسيهم ،توقف الجد وهو يناظرهم:اقول جلسنا وضحكنا ونسينا ،لكن ورانا قومه لصلاه الفجر
ضحكت غايه يلي كانت جالسه بجانب عز ،اما عز رفع راسها وهو يناظرها:كانه يطرد؟
ضحكت غايه:حلوو ولدي يفهم
عز وهو يمثل الالم:اييي ياأبو ماجد مااقدر امشي
ضحكت غايه وهي تضربه بخفه على كتفه:قم وانا أساعدك
قام عز بمساعده شام ومها يلي جالسين يضحون على كلامه وهو يكرر وهو يضحك ويحاول ينغم كلامه :طارت طاررتت طار الحظ واحرق رجلي
اما الوليد طلع مع امه وابوه للبيت بعد يوم مرعب للكل ،دخل الجد غرفته بعد مافضى البيت وهو يعلن نهايه اليوم ...

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

وكذا يكون نزلت لكم الجزء يلي ماعرف احرقكم مثلي اولا !،في شي بالاجزاد الجايه حيصدمكم مرااا جهزوا المناديل واستعدوا ولاتنسوا تضيفوني أنستا وتيك :rwa.rof5
انزل أجزاء في الانستا احداثها تسبق الواتباد الحقوا وشوفوا وش بيصير ونزلت تسريب للأحداث الجايه تيك طبوا وشوفوااا ،وبس قراءه ممتعه💞💞