تراك السيف الاملح وراس المال‏ودرعيّ من ظروف الحياه وبلاويها

🩷

<< في بيت تركي ال تركي >>
تركي جالس يتقهوى هو و فاطمه و يتبادرلون بعض الكلام و السوالف
سالم : مشاءالله مشاءالله طيور الحب قاعدين يتقهوون بدوني
تركي : يمرحبابك ياسالم حياك عاد قهوة الشيخه فاطمه ماتتطوف
ناظر سالم امه و وهو مبتسم : اكيييييد دام فطوم الي مسويتها بتطلع آطلق قهوه
تقدم يحب راسها و راس تركي وبحركه سريعه اخذ مطاره القهوه و انحاش وهو يضحك
تركي : ولد سويلم هاتها لا اقوم عليك
سالم وهو واقف عند الدرج و يلهث : مافيه تقهويت بما فيه الكفايه
نزلت روان وهي تضحك عليهم وبكل هدوء سحبت من سالم المطاره وحطتها على الطاوله عند تركي
سالم : ايا الحقيره ضحيت بحياتي وتجين انتي بارده مبرده
ضحكوا كلهم
فاطمه : كل شي الا سلوم حبيبي ابشر وانا امك اسوي لك مطاره كبيره وبروحك بعد
سالم : يابعدهم ياميمتي ويلوموني فيس لبى كبدس .
<< عند بطلنا سيف >>
صحى وشاف الساعه ١١:٣٠ شهق و قام يركض لدورة المياه ( عزكم الله ) واخذ شور على السريع و طلع لبس بدلته العسكريه و نزل يركض تحت
مناهل : شوي شوي ياسيف لا تتكسر و تعال اكلك لقمه قبل لا تطلع
سيف : متأخر يمه فديتس ليه ما قيمتوني
مناهل : مادريت يامك ان عندك دوام احسب انك مرخوص
سيف وهو يقبل راسها : حصل خير
نزلت عفراء وهي بكامل زينتها و ريحه العطر و البخور تسابقها التفت سيف يشوفها
سيف بهمس : يالله صباح خير استلمي مابقى عطر ماحطته
ضربت كتفه مناهل : عيب تراها زوجه ابوك
سيف : وحتى ايش زوجه ابوي وع
مناهل بحده: سيف اشغلتني روح لدوامك
ضحكت عفراء و بأستفزاز : اذا حضرت الملاكه غابت الشياطين
ناظرها سيف من فوق لتحت: الله و اعلم من الشيطان فينا
مناهل بحده : سيف !
سيف بنفس الحده : ماتسمعي يمه وش تقول !
لفوا على صوت محمد : لاحول والبيت هذا محد يقدر يرتاح فيه يعني !
رحت عفراء تمثل الزعل : شف تربيه ولدك صبحت عليهم وقالي اني شيطان
محمد : سيف وش ذا الكلام ؟ تراها مثل امك اعتذر لها
عفراء وهي مبتسمه وراء محمد و تناظر سيف ناظرها سيف و عصب من كلام ابوه شلون يقول كذا !
سيف : تخسي و تعقب اعتذر لذي الاشكال و تكرم امي عنها
محمد بصرخ : مايخسى الا انت !
عفراء وهي تهدي محمد : خلاص حبيبي واضح ماعرفت تربي عيالها وشمقت لمناهل و سيف
سيف : واضح من الي يبي له تربيه
وطلع من البيت وهو معصب .