Reservoir Dogs (MMTranslation)

(၃) စွပ်စွဲမှုများ

(Unicode) ထိုညတွင် ဧည့်သည်အိပ်ခန်းမှ အိပ်ရာပေါ်တွင် လှဲလျောင်း၍ အိပ်ရန်ပြင်လိုက်သည်။

အိပ်ရာသည် မာကျောပြီး သက်တောင့်သက်သာမရှိသည့် သစ်သားကုတင်နှင့်မတူညီစွာ နူးညံ့လွန်းသည်။ ဤနေရာတွင် ဘေးနားရှိအိပ်ရာမှ ဟောက်သံကိုမကြားရ၊ ခြေနံ့ဆိုးများမရှိ၊ ၂၄ နာရီ ၁ ရက်လုံး ဖွင့်ထားသည့် ၁၅ ဝပ် လမ်းမီးလည်း မရှိပေ။ ရှောင်ကျိုးသည် အိပ်မပျော်နိုင်သေးသောကြောင့် မျက်လုံးများကို ဖွင့်ကာ မျက်နှာကြက်ကို စိုက်ကြည့်နေခဲ့သည်။

နေ့ခင်းဘက်တွင် အယ်ဖာဖီရိုမုန်းများနှင့် လွှမ်းခြုံခံထားရခြင်းကြောင့် သူသည် ရုပ်ပိုင်းဆိုင်ရာ၌ သက်တောင့်သက်သာမဖြစ်မှုကို ခံစားနေရဆဲဖြစ်သည်။ ခြေကုန်လက်ပန်းကျခြင်း၊ ဂနာမငြိမ်ဖြစ်ခြင်း၊ ပူလောင်ခြင်းများဖြင့် သူ၏စိတ်သည် ဝရုန်းသုန်းကားအခြေအနေသို့ ကျရောက်နေသည်။ လေထုသည် အရက်နံ့နှင့်လိမ္မော်ပွင့်တို့၏ အရိပ်အယောင်ကို သယ်ဆောင်ထားသကဲ့သို့ ဝေ့ခနဲရနေသော အရိပ်အငွေ့တိုင်းက သူ့ကို အားနည်းစေသည်။

သူ လှည့်ကြည့်မိလိုက်တော့ သူ၏တီရှပ်အသစ်သည် ရေချိုးပြီးသားဖြစ်သော်လည်း သူ၏နောက်ကျော၌ မသက်မသာဖြစ်စွာ ကပ်နေသည်။

သူသည် အိပ်ရာပေါ်တွင် ခဏတာ လှဲလျောင်းပြီးသည့်နောက် ဒီနေ့ ဆေးမထိုးရသေးတာကို ရုတ်တရက် သတိရသွားသည်။

ကုတင်ပေါ်မှ သူ့ကိုယ်သူ လက်ထောက်ကာ ထလိုက်ပြီး ကြမ်းပြင်ပေါ်သို့ ခြေဗလာဖြင့်နင်းကာ ဗီရိုထဲရှိ သူ၏ကျောပိုးအိတ်ထဲမှ ဆေးထိုးအပ်နှင့် အလုံပိတ်သေတ္တာကို ထုတ်ယူလိုက်သည်။ သေတ္တာအတွင်း၌ ဆေးပုလင်းပေါင်းများစွာ ပါရှိသည်။ ပြတင်းပေါက်မှ ကျရောက်လာသော လရောင်အောက်တွင် ငုတ်တုတ်ထိုင်ချလိုက်ပြီး သူ၏အင်္ကျီလက်စများကို လှန်တင်လိုက်ပြီး သူ့လက်မောင်းပေါ်တွင် နေရာရှာ၍ ကြည်လင်နေသော အရည်များကို ထိုးသွင်းလိုက်သည်။

သူ၏လက်မောင်းပေါ်တွင် ဆေးထိုးအပ်မှ သေးငယ်သော အပ်ပေါက်ရာများဖြင့် ဖုံးလွှမ်းနေသည်။ အိုမီဂါလက္ခဏာရပ်များကို ထိန်းသိမ်းထားနိုင်ရန်အတွက် သူသည် ဟော်မုန်းဆေးများကို ပုံမှန်ထိုးပေးခြင်းနှင့်အတူ ဆေးရုံ၌ ပုံမှန်စစ်ဆေးရန် လိုအပ်သည်။