بسم الله الرحمن الرحيم»
« رنوة أمل »
« آمنه عادل »
«اللهم صلِِّ على محمد وآل محمد »
لماذا لا يُزهر ما أسقيه فيك ؟
===========================
«تارا»
مر شهر واني داخله بحالة ضياع ماله نهايه
كلشي صعب وضعي الصحي والنفسي ما
جاي اسيطر على كل حياتي..
بين يوم ويوم ترتفع حرارتي وتلعب نفسي من
كل الأكل والطبخ، والدوخه ما تفارقني صرت
كلش ضعيفه وكل أسبوع بالمستشفى يحطولي
مغذي...
هشام يجيني كل اسبوع من ما أقبل اشوفه
يروح ويارا تجي تحچي عليه وترزل بيه لان
ما اگعد وياه..
بس اني چنت أريد ارتاح وعبالي من ما أشوفه
راح انساه لو راح ابتعد عنه..
طلعت من الحمام تقيئت وطلعت گعدت بالأرض
وگمت أبچي اجتني يارا بسرعه..
ــ شبيچ يمعوده؟
ــ تعبت والله تعبت راح اموت جسمي كله يوجعني..
ــ سوده عليه يروحي..
حضنت رجليه الصدري وتچيت راسي على رجلي
ودموعي تنزل طلعت يارا من الغرفه واني غمضت
عيوني بتعب حتى نوم ما أگدر أنام مثل الناس..
سمعت صوت الباب انسد وايد نحطت على راسي
درت وچهي شفته هشام گاعد ومخلي أيده على
شعري...
ــ هيچ تسوين بيه.. تعاقبيني وما تخليني أشوفچ..
ــ ما أعاقبك بس تعبانه..
لزم أيدي گومني وضمني الصدره وهو يمسح
على شعري..
يمكن اكثر شي محتاجته هو واحد يحضني
ويطلعني من البيت كلش جاي اختنگ..
اخذني للسرير واني دموعي تنزل گعدني وگعد
بصفي وحاوط كتفي بـ أيده وحط راسي على
صدره وگال..
ــ تنامين؟
ــ لا ما أگدر.. كلشي جاي اعيشه مو انسانه طبيعيه..
ــ نروح للدگتوره؟
ــ تگول نساوتچ متعبه..
ــ گومي بدلي خلي نطلع..
ــ ما بيه حيل..
ــ تغيرين جو..
ــ لا..
ــ مو بكيفچ رايح اگول لابوچ وانت بدلي..
طلع من الغرفه واني بمكاني بقيت وصافنه بالفراغ
الى ان اجت يارا وكومتني للحمام غسلت وهي
طلعتلي ملابس لبستهن ورحت باوعت على نفسي
بالمرايه..
