هذي القصه فيها قليل من الواقعية والكثير من الخيال
ما يمنع تقرونها وتعطونا رايكم اذا نكمل ولا ندفن موهبتنا وننام
معاكم (رمق )
______________
نتقل بكم الى شمال المملكة العريق
منطقة الجوف (سكاكا)
يازين ضمة نسمة الجوف بالجوف
لأوردت بالبال مثل الخميله
وجه الشمال مدلهة كل ملهوف
حتى على التاريخ ماهي بخيله
دارا لها في ذمة الوقت معروف
وانا بحب الدار راعي طويله
مساعد الرشيدي يرحمه الله
___________________
الجزء الاول :
———————-
في بيت ابو صالح وام صالح
تزوج صالح المرأه الثانيه بعد ما جابت زوجته ولد و اربع بنات وحامل
صالح اقتنع بالزواج من زن امه واخته عليه عشان يجيه الولد الثاني
قبل القصه بعدة آشهر
نسرين جالسه ترزز عند صالح عشان يتزوجها وتقدر تعيش حياتها في السعودية وما تروح مع امها مع ان ابوها ماخذ الجنسيه السعودية ولكنه متوفي
نسرين العمر سبعة وعشرين سنه قبل الميلاد امزح معاكم سبعة وعشرين بدون قبل الميلاد
ناشفه كنها هيكل عظمي تحب الذهب والفلوس
شعرها عسلي طويل ولكن لسانها اطول
تحب صالح وجالسه تكافح وتسوي المستحيل عشان تاخذة
اما بصحن كبسة ولا بتشريبه تحاول توصل له انها تعرف الطبخ عشان تصيد جوه
تؤمن بمقولة ان الطريق للوصول لقلب الرجل معدته
الله حق مافيها من الزين شعره مير مدري كيف حبها صالح وتزوجها
مبطي يقولون الحب اعمى،،،
نرجع لكم بعد ستة اشهر في بيت ابو صالح
وبين اهل الحي وزحمه الرقص
ام فيصل تجهز القهوة والشاي وتبخر
وتبهر الدلال على زواج زوجها
لطيفه :من حريم الحارة تقنع ام فيصل تهرب وتترك الرجل لنسرين
ام فيصل :يا بنت الحلال اسكتي خليه يتزوج ويفكني شره هو مسويها مسويها رضيت ولا ما رضيت ولاني منحاشه وتارك بيتي وهي الدخيلة علي
—————-
اسقيتك من دمع عيني لين رويت ضماك
والحين يوم جفت عيوني من الدمع عايفني
(هبدت بيتين مدري هي مكسرة ولا معدله مير حسيت ودي اقصد وقصدت)
————
الشخصيات
بيت ابو صالح
ملفي شايب حنون امام مسجد حافظ القران يخاف الله وكلن يحبه
ام صالح عذيه حرمة قويه طيبه ماهي رديه الله حق تقدر وتحترم الناس ولا عليها خوف
صالح البكر عمره ٣٠ سنه متزوج فهدة عمرها ٢٥ وعنده منها ولد وثلاث بنات وحامل
فيصل :خمس سنوات ونص
سحاب :اربع ونص
نهال:ثلاث ونص
وسمر :سنه
وخايفين العائلة الكريمة تجي البنت الخامسة بستثناء فهدة الي تقول انا قمر وكل اللي حولي نجومي ما زين الارض الا انا وبناتي
—-
عبدالله اخو صالح
متزوج نورة وعنده ولد وبنت
مرفيه اخت صالح متزوجة وعندها بنات واولاد
————
تم الزواج وسكنت نسرين وفهدة بنفس البيت
وامورهم تمام لين بعد خمس شهور جت صافيه اخت نسرين وانقلب كل شي فوق تحت
صارت نسرين تلسع بلسانها وتقرص بيدينها (تعبير مجازي لا تصدقوني)
يوم من الايام فهدة نظفت المطبخ وراحت فوق تنام صحت على صراخ زوجها وتهديده
صالح:قومي يا الوسخه كيف نايمة و نملك يسعى قومي قامت قيامتك
فهدة :بسم الله شفيك نمل وش وسعي وش وش جالس تقول
صالح :لا تسوين نفسك ما تدرين ومسك يدها ونزلتها مع الدرج لين تحت عشان يوريها المطبخ
فهدة :وهي تنزل من الدرج صالح تكفى ما اتحمل بطني والطلوق شتدو علي شوي شوي
صالح مدرعم كنه تريله ما يشوف الدرب لين وقفو بالمطبخ وشافت المنظر
بقايا بصل وطماط مقطع وطاسه فيها بيض مقلي
واكواب شاهي وعصير على الطاولة وريحة مب زينه طلعت دجاجة معفنه وشي يحوم الكبد
فهدة : وهي مسكره خشمها وماسكة بطنها بتموت من الالم
يويلي وشذا من مسوي كذا
نسرين:تسوين نفسك ما تدرين يالوسخه يامعفنه ليش كذا المطبخ وش تبين الرجل يقول عني ما اعرف اهتم فبيتي!!
فهدة:والله نظفته وطلعت انام
نسرين :وهي تقرب من صالح وتمسك فيه وبصوت مستفز وضحك
شكلك نظفتيه بحلمك يلا قومي نظفيه ولا يكثر واخذت صالح وصعدو فوق
صالح :وهو يضحك اتوقع
فهدة: وهي تبلع الغصه عرفت انو بالنهايه راح تنظف ولا فيه مجال للتبرير
تحاول تمسك نفسها وبدات تنظف وتتألم لين انتهت تنظيف وبدأت صياح
خلاص مافيها صبر
جلست تصيح وتزحف لين وصلت لين الصاله اخذت التليفون وتتصل على ام زوجها الو عمه تكفين الحقيني معاد اقدر امسك نفسي
عذية:يالله صباح خير شبلاتس تصيحين من الصبح علامتس
فهدة:عمه تعالي وصاله مقدر اروح للمستشفى
عذيه:جيتس جيتس
عذيه وهي تاخذ عبايتها وتركض لام مشعل جارتها وتطق الباب
ام مشعل:خير خير عسى خير وش تبين يام صالح
عذيه:تكفين تعالي عاونيني على فهده بتولد
ام مشعل وهي تركض تدور عباتها
اخذت عباتها وانطلقو للبيت فهدة على رجولهم
ووصلو يطقون
نزلت نسرين وهي تتبختر وتدلع مينن ؟
عذيه :افتحي الباب انا
نسرين فتحت الباب هلا خالتي امريني
عذيه جيبي مويه ساخنه والحقيني وين فهده
نسرين:قصدك المعفنه داخل مادري وين راحت
ام مشعل :ابعدي بعدت صحتك عن جسمك وين فهدة
ادخلو يدورون فهده وحصلوها بالصالة مو قادرة تحرك
راحت ام مشعل تجيب مويه واغراض لعذيه
ووساعدو فهدة لين جابت
ويبكون ويباركون وفهدة تصيح فرحة والم
وتاخذ ولدها لحضنها قالت والله انك جوف قلبي وموطنه
نسرين وهي وقافه وميته قهر راحت فوق تركض تصحي المهبول
عذيه : وين صالح جاها الي يسر خاطره ويبره
ام مشعل:مغير خامد عند ام العلوم وتارك حرمته وراه ما ودها للمستشفى
ولا غاارق بالعسل وناسي الضعيفه تموت وتحيا بولده
صوت هبد على الدرج
صالح وهو فرحان الحمدلله الله يجعله مبارك هالولد
ويبوس امه ويحضنها
ام مشعل :وهي تناظره بقهر ايه ايه مبارك مبارك مير الرجال ما يترك مرته بدون مايشوف وضعها هالمره عدت ولحقنا عليها المره الجايه يا ويلك مني ما تنتبه لها
صالح وهو صاد عن ام مشعل يلا يمه اوديها المستشفى اتطمن عليها ويشوفون وضع الطفل
ام مشعل:معاد به مستشفى ولاده وولدناها نروح لهم وش نقول زوجها مهمل وجابت وهو ما درى عنها!
عذيه:يا ام مشعل خلاص حصل خيرالمهم الولد جا وامه بخير وعافيه الحمد لله
ام مشعل :يلا يمه فهده امشي اوديك انا واتطمن عليك
راحو كلهم للمستشفى عشان بس يتطمنون ويشوفون وضع الطفل
بالحارة
وتحديدا عند الباب مشعل واقف ينتظر امه
مشعل :يمه وينس طولتي
ام مشعل رحت مع فهده للمستشفى جابت ولد بالبيت ورحنا نتطمن على وضعها
مشعل :كيف حالها عساها بخير
ام مشعل :بخير بخير مير لو تسلم من عروس السوء بخير
بالصالة والكل من اهل فهدة موجود يباركون
ام فهد:الله يجعله مولود صالح ويرزقك بره يا وليدي
فهد:ياحظي يوم صرت لهم خال والله لدلعهم اكثر من عيالي
زوجة فهد وهي مبسوطة:تبارك وهي خاطرها لو بطفل واحد
سلمان:معه ولده عزوز وبنته فيّ وزوجته عنود يباركون ويوزعون فلوس
____
نسرين جالسه فوق ومقهوره ليش ولد ليش مو انا الي جبت ولي العهد تكلم امها واختها وتصيح من القهر
امها:ولك يا غبيه لساتك مجوزه قدامك سنوات طويله بتعيشها معه وبتخلفي منو الصبي اصبري شوي
صافيه:نسرين ادري انك تبيكن ومهمومه بس ماعليك بتجيبين الولد وهو اصلا يحبك انتِ لا تخافين بس شوفي اذا عبدالله اخو جا عندكم ولالا
نسرين:ليه وش تبين فيه
صافيه: بس قولي لي ابيه بموضوع يخص الجامعه
——————-
