مر يومين على المواجهة الحصلت بين رحمة و مجيد عمها وبالرغم من كدة كانت لسه خاله آثرها فيهم كلهم خصوصا رحمة الحبست نفسها في اوضتها بقت ما بتطلع منها الا في أوقات الصلاة عشان تتوضى وترجع ليها تاني القلق والخوف عليها قطعو قلب نسيبتها الما قدرت تسكت عن الوضع اكتر من كده وقررت تشارك همها مع ولدها وهم بشربو في الشاي
خالتي آمنة :معمر انا خايفة على رحمة بقت ما بتتكلم كتير ولا بتتونس معاي زي زمان من زيارة عمها ديك لينا وياداب بتاكل ليها لقمة لقمتين وتقوم وما بتطلع تاكل وتشرب معانا دلني اعمل معاها شنو ياولدي خايفة البت يحصل ليها حاجة
معمر عاين ليها بطرف عينه وشفط ليه جغمه من شاييه:
الزيارة دي ما كانت صعبة عليها بس كانت مهينة عديل عمها ده قصد يهينها قدامنا ويكسر نفسها بانه يوريها الامور على حقيقتها عشان يقلل منها قدام نفسها قبل ما يكون قدامنا عشان كدة خليها تاخد وقتها و تقدر تلملم باقي كرامتها
آمنة :وانت ما دام عارف ده كلو وعامل فيها ابو العريف ليه ما دافعت عنها؟ ليه حتى ما حاولت تهدده او تخوفه وانت قادر على كده عضلاتك دي الفايده منها شنو ومرتك بتذل قدامك انت وامك وانت واقف ما بتعمل شيء غير انك تكورك وتقوليه لحدي هنا كفاية وما بسمح ليك وبتاع وكمان قال شنو عايزين نسمع منكم قولة مبروك اخوو مبروك شنو يا بارد خبته وحدة منك كانت ح تسكته بنية وحدة على الاقل تحلل بيها قروشك البتصرفها شهريا في التمارين والبروتين
ببرود وهو بياخد شفطه تانية :وليه مفروض اعمل كده؟
خالتي آمنة :عشان دي مرتك يا بارد يا عديم الاحساس
أدى امه نظرة بقعر عينه سكتتها وسكت يكمل باقي كبايته بعداك قليها:امي عاين هنا ما تكضبي كضبتك وتعيشيها البت دي ما مرتي بعدين اصبري عليها شوية يوم يومين وحترجع لطبيعتها واضح عليها انها قوية وجلدها تخين كلام عمها ده ما حياثر عليها كتير خصوصا انها خربت ليه خطته كده وخسر بسببها قروشها الكان ح يخت يده عليها من تركة اخوه قروش بيتهم الكانو ساكنين فيه هي وامها لو اتباع براها ما هينة بعدين انا حسمته وقفلت الموضوع براحة عشان ما نكسب عداوته ساي وخليته ينسحب وهو حاسي انه هو الكسبان وح يخلي ليك بتك العايزة زي ما اتفقنا وخلاص
قام على حيله وسئلها :دايرة مني شيء تاني يا امي؟
زحت راسها منه وهو مدنقر عشان يودعها ويطلع ردت بغيظ:
لا لا ما دايرة حاجة من وشك امشي من قدامي هسي وخليك عارف انا الليلة ما طابخة حاجة جيب معاك اكل من برة
معمر بضيق:انت عارفاني بقرف من اكل الشوارع ده يا امي
مصمصت شفايفها :وانا اعمل ليك شنو يا حبيب امي ضغطي علا بسبب زول كده حسبي الله بس ما عايزة احسبن عليه حاسه اني فترانه ما قادرة اعمل حاجة بعدين ما اسمه اكل شوارع اسمه طلب من مطعم حسن ملفاظك دي الله يكرمك
