بعد رجعو البيت بليل في اوضتهم:
معمر:معليش اعفي لي يا رحمة انا بس حسيت بالخ..
قاطعته:معمر انا ما طالباك اعذار ولا تبريرات انت ما فشلت حبيبي صدقني انت بس مكبل بوجعك ومخاوفك القديمة محتاج تشارك الحاجة دي مع زول عشان يحتويها شاركني همك ما تشيله براك مش قلنا الهم بنشيله سوا؟
اتنهد:ياريت لو كان هم ده ذنب تقيل وحمل فوق ضهري
خافت يكون عمل ذنب كبير لكن قالت بهدوء وبكل ثقة:
ما مشكلة احكي لي ما حاحكم عليك انا ح تقبلك وادعمك
دنقر راسه للأرض :الحكاية بدت ايام انا في المعهد الحرفي كنت صغير وقتها ما عندي هموم ومسؤوليات الا مرض مبشر اخوي والبتعمله مرته من مشاكل مع امي الله يرحمها مبشر اخوي قلبه كان طيب لكن ضعيف ما بتحمل الضغوط عشان كده جنبنا الحاجة دي قدر ما نقدر لكن مرته كانت بتزيدها عليه كانت عارفة انو بحبها وما بقدر يبعد عنها عشان كدة كانت بتستغل الحاجة دي اسوء استغلال كانت بتحاول تخليه يكرهنا انا وامي عشان تنفذ خطتها لكن ده ما حصل بعداك بقت تطلب منه مباشر انه يخلينا نتنازل ليه عن نصيبنا في البيت والورشة ويبقو ملك ليه هو بحجة انها خايفة لو حصل ليه شيء نظلمها بوراه لكن مبشر اخوي الله يرحمه كان راجل كلس وحقاني رفض الحاجة دي رفض تام قامت طلبت الطلاق وهددته تخلي البيت لكن برضو ما استجاب ليها تاني يوم الصباح نفذت تهديدها ومشت بيت اهلها فعلا كان بتوجع عشان خلته ومشت غابت بالاسابيع لمن مرضو زاد عليه بس برضو ابى يعمل ليها الهي عاوزة بعدها جاتنا راجعة براها فجأة مبشر فرح شديد برجعتها واحنا رحبنا بيها وفرحنا عشان صحته اتحسنت اول ما رجعت البيت
لكن العقربة دي اتاريها كانت بتخطط لخطة جديدة عرفتها منها بعد موته اتنهد بضيق وكمل:كانت قافلة على واحد قريبهم راجع من الخليج بثروة كبيرة قالتها لي في وشي بكل وقاحة لمن واجهتها قالت انه قريبهم ما كان حيطمن ليها لو اطلقت من راجلها العيان عشان تعرسه هو عشان كدة قررت تاخد لقب ارملة المرحوم واستعملتني انا كسكين طعنته بيه في قلبه الضعيف عشان تقدر تحقق هدفها بدون ما تقتله بيدها الكلام ده كان قالته لي فاليوم الشافوني فيه مهاد وعمتي سعاد وانا بضربها كف - سكت مسافة
ضغطت على يده :كمل يا معمر انا سامعاك الحصل شنو؟
نفسه قام كمل:يوم بليل كنت نايم في اوضتي متخفف من هدومي بس ساتر عورتي فجأة حسيت بلمسات انثوية جريئة على صدري اتنفضت ولمن صحيت لقيتها مرت اخوي راقدة جمبي فالسرير-رحمة شهقت بصدمة ختت يدها على خشمها
كمل بانفعال:كوركت فيها بهلع انك بتعملي شنو هنا زحي مني لكن ما ردت علي وبقت تضحك بتفاهة ما فهمت قصدها الا لمن رفعت راسي شفت مبشر اخوي واقف قدام باب اوضتي.
