حكاية (( ضحية انتقام ))

(( بارت 11 ))

حكاية)( ضحية انتقام )(للكاتبه حوراء الموسوي

......... لما بيوم بليل كاعده يم الحجيه وارث بعده ما راجع انتظره جانت الساعه 10ـ اجت نورس صاحت عليه تعالي ويانه نسهر بغرفتنه اني وياج واستبرق تفاجئت بيها معقوله نورس كامت تحبني وتريد اسهر وياهن لحت عليه مرتين صعدت وياها دخلت وياها للغرفه انصدمت بأمير واكف منتظرني واستبرق ما موجوده ردت اطلع اجه عرض كدامي فاتح اديه ميخليني اطلع ونورس طلعت وسدت الباب تخبلت كمت اتوسل بي يخليني اطلع وارث على جيه للبيت كالي بتوسل الله يخليج بس حجايتين احاجيج اصبري ما اسوي شي والله ما كدرت حتى اسمعه الخوف سيطر عليه كلبي يدك ابراسي كمت اتخيل وارث يفتح الباب ويشوفني ويا سوه بالغرفه الوحدنه مجرد تخيل تخبلت كال بس اسمعيني ماكو شي عمو طالع بعد ميرجع هسه واني بس اريد اكولج فد شغله اضطريت اسمع اله كال شوفي والله موبيدي حبيتج ما اعرف شلون وشوكت بس من اول ما شفتج دخلتي الكلبي وجنت احاول ابتعد عنج اعرف هذا الشي غلط وحرام وميصير بس والله موبيدي احبج خليت ايدي على حلكي كوتله اششش لتكول هيج انتَ متستحي شنو هل حجي استحي على نفسك اني زوجة عمك تعرف اذا وارث عرف شيسوي والله يموتني ويموتك واني احبه ما اشوف غيره الله يخليك خليني اطلع لا يجي للبيت لو احد ثاني شافنه شيكول الله يرزقك بنت الحلال احسن مني طلعني من بالك وبتعد عني لك حررام شلون تفكر هيج خيانه هاي يسمونها خيانه العمك راح اسكت ما اكول العمك هلمره بس اذا انعادت والله اكوله عليك وتعرفه شيسوي كال اطلكي منه فتره واني اتزوجج فتحت عيوني عل وسعهم شدا تحجي انتَ شنو اطلك منه لك اني احبه ومستحيل اعوفه واني موبكيفي اتزوجته ولا بكيفي اطلك منه تعرف شنو وضعي هنا فه شيلني من بالك الله يخليك ورفعت اديه بتوسل اترجا يخليني اطلع انزاح من الباب فتحته وطلعت اتلفت خاف واحد يشوفني جمدت من شفت سهام واكفه بالباب بيدها تليفون تصور بي وعلى وجها ابتسامه شيطانيه غمزتلي ونزلت جوا ضليت افرفح اكيد راح تشوفه الوارث ويذبحني دخيلك ربي ساعدني احس لعبت نفسي ودخت وبطني وجعتني من الخوف دخلت للحمام غسلت وجهي اخذت نفس ونزلت وراها شفتها واكفه بالمطبخ اكيد منتظره وارث تكوله وتشوفه المقطع كمت ابرد واعرگ بنفس الوقت البيت هدوء شفت دخلت استبرق من الكراج ركضت الها جريتها من ايدها تعالي وياي صعدتها للغرفه مالتي دخلتها وسديت الباب ولطمت على وجهي ولج استبرق الحكيلي سهام ونورس وكعني بسالفه مالي دخل بيها كالت شبيهن سولفتلها كالت ولج عمو وارث اذا شاف المقطع يموتج كمت ابجي ليش هيج والله ما سويت شي كله من امير ونورس همه يردون يوكعوني بورطه و وارث يذبحني كالت خلي اطلع اشوف امير اكوله بالكي يمنعها ياخذ المقطع وطلعت اني ضليت الووب افتر بالغرفه مثل التطلگ اتمنى وارث ما يجي هسه عكس قبل اشويه انتظره شوكت يجي حقيرات نورس الحقيره شلون هيج تسوي تريد تلزم عليه فدشي تبقه تهددني بي خاف اكول عليها بيوم وسهام تريد وارث يذبحني اي هيه هددتني قبل فتره بس معقوله نورس تنطي باخوها متخاف لو عرف وارث يموته لو امير همين وياهن متفق احتاريت الافكار كامت تضارب ابراسي بس جان يحجي من صدك حتى مبين علي معقوله يمثل حتى يوكعني وبعدين يكول هيه الجانت تغريني لا لا يا الله دخيلك ساعدني ما اتحملت ابقه بالغرفه التفكير موتني طلعت اباوع من الطابق الثاني للارضي سمعت الباب انفتح ونطبك شويه وشفت وارث دخل وسهام تمشي ورا دخل الغرفه الحجيه وهيه ويا بعد ما تحملت جسمي يرجف كعدت ابجي طلعت نورس شفتها رحتلها الله لا يوفقج يا حقيره تردين تبليني ليش شمسويتلج اني شنووهل حقد ولج اخوج لو عرف بي وارث يموته انتي متخافين علي ردت عليه ابرود كالت حتى متفكرين تكولين عليه شفتيني ويا محمد وامير هو الي كالي وترجاني اصيحلج يحجي وياج وما فوتتها كولتلها وسهام شعرفها ليش تخلينها تصورني شفتها تفاجئت كالت ما كايلتلها شنو صورتج لطمت على وجهي كولتلها بسوايتج هاي راح تموتيني وتموتين اخوج وياي شفتها انخطف لونها ونزلت جوا رجعت الغرفتي كلت اكيد هسه وارث يفتح الباب ويخلي طلقه براسي طلعت للحمام اركض اتقيئ شويه وطلعت شفته صعد ضليت مركزه بوجه اشوفه معصب لو طبيعي وجهي مخطوف ريگي ناشف رفع عينه شافني واجه بأتجاهي كالي خيرج يايه شبيج وجهج اصفر جريت نفس يعني ما كايلتله سهام بلعت ريگ وجاوبته معدتي مئذيتني ماكو شي بس ما اخلي عيوني بعيونه احس اعيوني فاضحتني خله ايده على ضهري مشاني ويا صاحت سهام وارث اريد احجي وياك شويه باوع عليها وهز راسه الها بمعنى شنو تردين كالتله شسالفه يمعود اريد احجي وياك كلمتين عندي موضوع مهم وياك وباوعتلي هبالك تتحلفلي وبتسمت بطرف شفتها ودخلت للغرفه راح وراها لزمت ايده حيل كالي شكو شبيج هسه ارجع بطلي هل سوالف ولغيره تره هم مرتي ما طلكتها باسني بخدي وراح وراها دخل للغرفه وسد الباب فكرت هسه كالتله وراح يطلع ضليت انتظر ما دخلت الغرفه طلع امير من غرفته شفته هزيتلهراسي بأسف باوعلي بنضرات اعتذار عفته ودخلت الغرفتي وجع ابطني ملخني شويه ودخل وارث مزعوج اني مركزه بملامح وجه اجاني كالي شبيج صوتي ميطلع كرر سؤاله ندى موطبيعيه اليوم احجي شبيج بجيت وخليت ايديه على وجهي كعد وحضني متلهف يعرف شبيه خفت اكوله ما اكدر احجي اكتفيت ابجي وكوتله بطني توجعني وبس جابلي مسكنات شربنياهن وطفه الضوء وكالي هسه تصيرين احسن تمدد وسحبني علي نيمني بحضنه تضاهرت بالنوم شويه وحسيته نام سحبت نفسي منه وكمت افتر اختنكت اكيد تريد تلعب على اعصابي سهام وتبقى تهددني بي قرب يطلع الصبح يله نمت ما اعرف شكد وحسيت وارث يكعد بيه يريد يطمن على صحتي واذا احتاج دكتور كوه فاتحه عيوني من النعاس جاوبته صرت احسن كال كومي سويلي ريوك أتأخرت كمت ويا نزلت كوه امشي سويتله ريوك نزل سابح ولابس ملابسه العسكريه تريك وطلع التفتت شفت سهام متخوصره واكفه بالباب مال المطبخ خازرتني كالت اله اخلي هو يموتج بأيده بس اصبريلي تتمعشكين مووو ويا ابن اخو تتواعدين يا يا ساق... طه متستحين على نفسج تفلت عليه ومشت ما اكدر احجي حرف وشحجي وهيه شافتني طلعت اني وامير من غرفه جان مسدود بابها علينه وبس اني ويا رحت يم الحجيه دخلت عليها كالت ها ندوه شبيج وجهج اصفر كولتلها مريضه من معدتي وبطني توجعني شو كالت يا صلوات حبله كولتلها لا بيبي يا حبله بس تأذيت البارحه من العشا متعرف اني اطلگ من السوه بيه وراح اموت من التفكير ولقلق نزل امير دخل شافني ونزل راسه صبح على بيبيته وباس راسها وطلع وحسيت بصوت البنات بالمطبخ يتريكن يردن يطلعن للدوام كالت الحجيه كومي اتريكي وشربي علاج لا تضلين مسدوحه الرجال ميحب المره المريضه ولفاهيه هزيت راسي الها وبقيت كاعده مالي حيل اكوم صاحت عليه وفاء طلعت الها كالت اعجني وخبزي شمنتظره اله اني اكولج مسويه نفسج متدرين ماعدنه خبز بدون ما ارد كمت عجنت وبلشت انظف بالبيت وعيون سهام تراقبني وتتبسم بخبث تلعب على اعصابي ما كدرت آكل شي نفسي مسدوده ضليت لضهر خبزت وصعدت سبحت وضليت بغرفتي ما نزلت لمن سمعت صوت وارث وحتى صوت حذائه من صعد الدرج اسمعه انفتح الباب ودخل وارث بس عبالك اعصار يرعد بصوته وضرب الباب قوي بأيده سدا و كالي............ للحكايه بقيه دمتم في حفظ الله ورعايته