جاهلٍ بالحُّب

( البارت الثالث )

بْسـم آلُلُہ آلُرحٍـمـنْ آلُرحٍـيَم 🤎.
•
•
— الحريم —
نزلت لهم امل تجلس معهم وتاخذ علوم هنا وهنا الين ماشافت سعد جاي ومعه حذيانه يلبسهم ويقول بصوت مسموع: نجووود قولييي لجدييي يصبررر لبسسست
ام راكان: على وين ان شاءالله؟! سعد: بنروح الدكان مع جدي وركض يطلع ويروح معهم .
ام راكان: نجووود نجوود
امل: راحت مع اخوها
ام راكان: وشو له تروح!!
أم جاسر: وخزياه! تخلين بنتتس تروح الدكان!؟ المره ماتروح الدكان
امل رفعت حاجبها: ليه وخزياه؟ عادي شفيها تراها دكان بعدين أنا اروح مع أبوي مافيها مشكله
ام جاسر: عشان تسذا معنسه! لازواج ولا احد يبيتس مانبي بناتنا يصيرون مثلتس!
انصدمت امل وعصبت عليها وشلون تقول لها هالكلام الجارح بدون تفكير بمشاعرها او تفهّم لعدم رغبتها فوق ان امل تكرهها أصلاً كرهتها زوود من بعد هالكلام .
بعد صمت ردت ام وافي: ماله شغل ياعلياء اذكر يومنا صغار كنتي ماتطلعين ولا شي وشوفي متى اعرستي ماعرستي إلا يوم دخلتي الثلاثين وبعدين الزواج قسمه ونصيب
الكل سكت ويناظرها بصدمه واستغراب وفوق ان شلون دلال مرة عبدالرحمن تعرف عن وقت زواج علياء وهي ماتعرف شي عن علياء ولا لها علاقه فيها لدرجة ان أصلا كانت ام وافي بمنطقة غير منطقتهم  .
ابتسمت امل لها بانتصار اخيراً احد تكلم عن رغبتها وكلامها اللي بداخلها .
— الدكان —
وصلو الدكان ودخلو نجود وسعد متحمسين يشترون وراح سعد من جهه ونجود راحت مع جدها اللي كان ماسكها ومنتبه لها خايف يصير لها شي . وهي تختار ولما خلصو ونزلو ،
نجود: يووه جدي عادي اروح اجيب الشيبسات اللي هناك؟
الجد راشد: لا وش تجيبينها بعيدةٍ بالحيل!
نجود: جدي تكفى نسيتها هي اهم شي وكنت جايه عشانها
زفر الجد راشد بهدوء وقال: رح معها ياسعد وراح سعد معها بينما راشد جلس على احدى الكراسي الموجوده وهو شايل هم يصير لها شي .
— عيال الحاره —
قبل دقايق من الوقت ،
خلصو مباراتهم الاخيره وفاز فريق باسل كالمعتاد
عزوز: مشينا للدكان نشتري جيعان
زيد بسخريه: وانت فيه يوم ماتصير فيه جيعان؟ طول وقتك تجوع ماشاءالله
عزوز: اصه انت !
باسل ضحك بخفه ينطق: أصلا شفه على طريقنا ودخلو .
تفرعو وكل واحد راح يشتري اللي يبيه لكن وقعت عيون باسل على بنت غريبه عليه كان اول مره يشوفها . لابسه عبايتها ولافه طرحتها وبعض شعرها طالع صفن فيها بما انه مستغرب من هالبنت؟ ووش جابها؟ وليه تجي؟ هو يعرف نادر يجون بنات للدكان ولو جو يجون بنقاباتهم وعبايات الرأس .،
بينما نجود اول ماشافت نظراته خافت وبشده! وصدت عنه بسرعه لكن باسل ظل يتابع تحركاتها حتى انه نسى وش يشتري وليه هو هنا .
جاء زيد وهو يقول: هاه باسل خلص.... سكت من شافه واقف ويهوجس ونظراته غريبه استغرب وقال: ياهوه باسسل واشر بيده وفز باسل ينطق: شتبي؟؟
زيد: خلصت؟
باسل: اصبر
نتقدم ،،،،
راحت ومعها سعد تشتري وتشوف وانصدمت من شافته نفس الشخص!! نجود بنفسها " أفف ذا وش يبي؟؟؟ يووه اخاف يصير شيي "
سعد شافه وقال: نجود شوي وجايس
توسعت عيونها بصدمه: وش شوي وجاي! اقول انثبر معي سمعت جدي وش قال؟؟
سعد: يابنت الناس بروح اسلم على باسل عادي
نجود: من ذا باسل بعد! اجلس بس
سعد: اففف منتس! أخذت أغراضها على السريع وجو وقالت: خلصت ياجدي ،
باسل اول ماشافهم راحو للكاشير راح للعيال عشان يحاسبون
الجد راشد: كم حسابنا؟
عارف: ١٠٠ ريال
الجد راشد: أخذ وعطاه الفلوس ولما جو يروحون شاف الجد راشد باسل
الجد راشد: باسل؟ باسل: اوه عمي راشد! وسلم عليه وحب رأسه
الجد راشد ابتسم: شحالك؟
ابتسم باسل: بخير وانت؟ الجد راشد: الحمدلله ، وينك ماجيت تسلم ولاشيء؟
ضحك باسل: والله نيتي أجيكم اليوم وأسلم دام عبدالرحمن موجود
الجد راشد: ابد حياك باي وقت ، هاه وش جايبك هالحزه؟
باسل ابتسم بخفه: ابد بس تونا لعبنا كوره وجايين ناكل شوي
الجد راشد: انتبهو لانفسكم من الشوراع
باسل: ابشر وراح الجد راشد ومعه احفاده وباسل اللي انقهر انه ماشاف نجود زين ولكن عرف انها تقرب لراشد بس مايدري وش صلة قرابتهم!  .
— بيت الجد راشد —
وصلو اخيراً للبيت وكل واحد كيسته هالكبر ،
بهاج: ماشاءالله ياسعد كل هالخيرات وماودك تعطينا؟
سعد: لا أنا فقير رح لنجود معها أشياء اكثر مني
بهاج: افا بس افا! كل ذا وتقول فقير؟
،،
ابو راكان: اجل جيتو
الجد راشد: الله الله ، وشفت ولد عبدالله " باسل "
ابو وافي: شحاله؟
الجد راشد: ابد بصحه وعافيه
راكان: وينها اللي راحت تشتري؟
الجد راشد: دخلت
راكان قام لكن عود مكانه من كلام عمه ؛
ابو وافي: انثبر مكانك لاتشب بينهم!
راكان: شدعوه اختي اعرف لها
ابو وافي: تعرف لها بالصراخ انثبر بس
راكان بلع ريقه: اء سم وجلس
— البنات —
جتهم وهي معها كيسة شوكولاتات وشيبسات وعصيرات وكل ماتشتهيه النفس
حطت الأغراض ورمت عباتها تجلس ورتبو جلستهم وأكلهم وجلسو يأكلون ويسولفون ،
نجود: عاد الحيوان يناظر! خفففت ان فيه شي باين بس مافيه! قهررننييي
ابتسمت امل: شسمه؟
نجود: مدري أصلا تصدقين؟ رغم اني اجي دايم لكن اول مره أشوفه ! بوصفه لتس اكيد بتعرفين
امل: أوصفي
نجود: طويل شوي له ندبة على خده مدري طرف مادري مادري ماشفته زين
امل: معه ولدين؟ نجود: ايه امل: تحسين إعمارهم اكبر منتس بشوي؟ نجود: ايه امل: امم طيب الولد كان شعره بني فاتح؟ نجود: ايه!! كان شعره بني بس فاتح بس ماحفظت ملامحه ! حتى ان جدي سلم عليه ويتكلم انه بيجي وكذا
ابتسمت امل تنطق: عرفته
البنات كلهم: من؟؟؟ امل: باسل ولد عبدالله ، اكيد استغرب انتس كنتي هناك لانه ماشاءالله كل يوم مسنتر للدكان
نجود: زين طمنتيني وضحكو البنات وجلسو يكملون سوالفهم ومواقفهم ،،
— المغرب —
في بيت ابو باسل  ، ،
جالسين سوا ورجع ابو باسل مع القصيم وأول مادخل استلموه عياله وبناته بالأحضان والبوسات
ابتسم ابو باسل يحاوطهم بحب ويقول: هلا هلا والله هلا
وتين: اشتقت لك يبه
ابتسم ابو باسل: ماني اقل منتس يابوي ابتسمت ليلى ( ام باسل) تناظرهم بحب وكيف مستأنسين بعودة أبوهم
جلسو كلهم سوا وجلس يحكي لهم ابو باسل وش سوا هناك وكيف كانت أيامه ،
ابو باسل: اسمع ياباسل العشاء تصلي وانا ابوك وتاخذ التمر هذا وتعطيه لعمك ابو كايد فهمت؟
باسل: ابشر ياسر: بجي معه ابي العب مع سعد
ليلى: لا وش تروح! صاحي انت
ياسر: يمه وش فيها؟
ابو باسل: وأخذ معك اخوك بس هاه انتبه له!
باسل: ان شاءالله ......

‎ (الثلاثاء) 1446/3/14
الكاتبة : نُوت ✍🏻