“Laldinpui, ding rawh!!! i muthlu ziah mai, ding nghal rawh, tûn period ringawt ah pawh vawi engzat nge ka hauh tawh che, ding rawh.” Miss kimi chuan whiteboard a physics min zirtir lai chu tawp hmak in a rawn ti lâng lâng a.
Kâ'n phu chiang mai mai, hmalam leh hnunglam hre lova ka'n din chhuah tak kha.
“Chapter-1, Optics ami i thiam tawh ami? Class-XII inih tawh hi, muthluk a hun tawh lo.” tih chuan a chhunzawm mawlh mawlh a.
Ka ngai thutak lo pawh anilo, nizan lamah rank te kan push ve a dar 12 ah ka mu a, dar 5 ah ka chhungte'n minla kaitho zui. Chu pawh gas bur ruak a thar nen thleng angaih avangin, huiss.
Chhuanlam hi a vang teh a sin.
“Thu la muthlu tawh suh angche.” a thu chu a nghet tawh hle.
Kei pawh chu thu ve nghal in, inthlahrung takin kun ngul chung chuan ka lehkhabu chu ka bih ta a.
Lunch break dar ri zawng a mawi mang e, kan thian ho chuan kan tiffin chu phawrh nak nak in, chawhmeh chu kan chuh helh hle. Kan ei kham hnu chuan, classroom corridor ah chuan kan thian za ho chuan kan ding khawm leh a, hmeichhia chhelo leh hmel mawi tak te chu ka thiante chuan an melh a, kei erawh 11-C ami ngei mai chu ka zawng leh a, sports a bawn ve em ani.
E, chuan, Ka hming chu Laldinpuia niin, Govt. Chaltlang Hr. Sec. School ah ka lut bawk, Kum 18 mek a, Science la ni mah ila ka thawveng harh harh hle.
“Dinpui, saw Zomuana, C mi kha...” ka thiannu ve em em Zuali chuan rawn tiin, Zomuana volleyball compound a kal lai mek chu, ka thlir vawng vawng a, a pawisawilo hmel mawlh chu ka hlimpui em em a, kei ngei pawn mak ka ti zawk a chang hi chuan.
Tiang em em a, mihring fa ve mai han hmel duh tak mai chu amak ka ti ani, a hmel chhuan tur erawh anei lo mahsela a pawnlam leh chhunglam landan hian min hip tlat zawng chu ani.
“A ho, ka theihnghilh tawh dawn, football a thiam si, bialnu emaw hmeltha tihzawng a nei awm emmai.” tiin, lehlam chu ka hawi ta daih a.
A ni chuan,“Awi, awi, awi iti ve ziah i theihnghilh leh awm lo emmai.”
“Saw tiang duh ila ex ka ngah tawh awm emmai” tiin ka chhang a, ka rilru chhungril tak ah erawh chuan kei ngei pawh chu ka in ngaihtuah ve hle, engtin zel nge he fa lubawk hi ka theihnghilh theih meuh ang le.
“Ti ta daih ila, naktuk chu va han nuam dawn tak, Bawngkawn south YMA hall kha ni em kha.” ka thian dang te an rawn kal avang chuan ka sawi pui ta daih a.
Zuali chuan,“Aw ni e, refreshment kan sem dawn kha, i crush te pawh an kim dawn lawm le.” tiin ka bulah chuan a nui ta vak vak maia.
“I crush changpat a an an nen,” ti a ka han chhang mai chu, a thinrim ngang mai, a dang tam deuh pawh kala hria, a tha ber kala thlan chhuah sak zawk mawle.
Break zawh hnu chuan kan lut leh ta rum rum a, class chu la nghal char char in, naktuk ngawt chu ani kan sawi nin theihloh chu. Science ho pawh tianghi kan nih chuan Arts ho anva ngaihtuah awm dawn ve tih mai mai te ni ka ngaihtuah tawh.
Zanah chuan keimah te chuan common room ah ka awm ta reng a, a lum leh a vawt pawh thliar hran har ka ti ngang mai. Enge awmzia pawh ka hre nek lawve.
Lehkha zir lah rilrua lan nachang reng reng awm silo, ML ah bawk chuan ka lut leh ta a, Science subject la si ah chuan ka glory ka chapo pui ve viau. Immortal erawh kai ka tum lem lo, profile ah lang mawi viau mah se, ka lakah hian keimah leh keimah ka inthlahrung.
A tuk ah chuan Jacob a chuan minlo sawm leh a, scooty chu la chhuak in kan lawmna hmun tur lam chu kan pan ding ta nghal a, phone lah kala ken theihnghilh daih zui.
Reilo te ah chuan thleng ve hnuhnawh in, volunteer ah in pek chuan tangkaina a nei tlem hle, tihtur awm vel pawh chu keini aia kal hma chuan anlo ti zo vek tawh a, kawng lehlam takah chuan a hlimawm phian.
Class kan neih loh vang nge, ni chu a reilo viau hian ka hria a, refreshment chu kan section chan anih avang chuan programme pawh chu kan chhim zeuh zeuh animai. Tlai lamah chuan programme chu zo ve in, line chuan an rawn chhuk ta sup sup a, kan tam tham bawk nen, chauh chu awl ve viau.
Kan sem zawh chuan building chung lamah chuan chho leh in, en thuak chuan hall chu kan tifai ta a, volunteer ho chu kan hah haw ve hle.
In kan thlen chuan, ka thianpa pawh an in lamah a tlang deuh nghal a, ka chau deuh nen, ka khum ka ngaih em em chungah chuan ka bawk leh thur a. Lu lam leh ke lam hre lek lova ka mut kha.
***
“Naute, nuam iti em?” U hriata chuan ka khup ti za chung chuan a bike chu ala khalh a.
“Umm, U Hriat khawilai nge kan kal dawn, kan long run em ni?” tiin ka khi ver ver a, keima tawkah ka hlim ve hle. Kawng te chu a nuam in khuavel ani nen a fan dun chu a nawm dan a dang ngang mai. Ka thiante nena kan len lai te chu a tluk lo hle.
“Umm, kan thleng tep tawh e, reilo te tlan leh animai.” tiin a tlan dan pangai ai chuan a tlan chak deuh a, hlau ta na fam chu a kawngah chuan ka kuah ta a, ka khur bep bep animai.
Thawk leh khatah truck horn chu ring mang kheng chuan rawn riin, ka hmuh theih chinah kha chuan U Hriata'n a bike handle chu thlah in min rawn kuah a, a awm ah chuan ka lu chu nghet tak chuan min bei tir a, a dang zawng chu a thim mup ta.
