جاهلٍ بالحُّب

( البارت الرابع )

بْسـم آلُلُہ آلُرحٍـمـنْ آلُرحٍـيَم 🤎.

•
•
— بيت الجد راشد —
صلو المغرب واجتمعو الحريم سوا يتقهوون ويسولفون .
كِنان حس بدوخه خفيفه مع صداع شديد وماتحمله ودخل ينطق: ياولد ياولد
ام وافي: هاه ياكِنان وش تبي؟
كِنان: تجين شوي يايمه
جت بتقوم ام وافي لكن نطقت ليان: بروح له أنا وراحت .
ليان: وش تبي؟
كِنان: دايخ وفيني صداع عطيني حبة بنادول وافتحي لي طريق انوم الله يرضى لي عليتس
ليان: يوه .. لا وش تنوم! انتظر هنا بروح اجيب البنادول واجي وراحت تجيبه واخذت مويه ورجعت له تعطيه
أكلها كِنان وشرب المويه وقال: امي وين؟
ليان: وش تبي بأمي؟ خلها مع الحريم
كِنان: ياالله .. طيب بروح الغرفه افتحي لي طريق
ليان: انت ماتفهم؟ أقولك ل.....
قاطعها ينطق: عارف وش قلتي دليني وانتهى وتنهدت ليان واخذته للغرفه وراحت وبينما كِنان غطس بنوم عمييق ماقام منه الا العشاء .
— بيت ابو باسل —
صلو العشاء وأخذ كراتين التمر الموجوده ونادى اخوه ياسر وراحو لبيت الجد راشد
ضرب الباب وقال الجد راشد: افتتح ياسعد! سعد!
سعد: سم .. وراح فتح لهم وانصدم من شافهم وضم خويه وعشيره ياسر وياسر بالمثل .
ابتسم باسل ودخلو كلهم
ابو جاسر: من ياسعد؟؟
سعد: عيال عمي عبدالله
الجد راشد: حيي الله عيال عبدالله اقلطو اقلطو ضحك باسل يحب رأسه ويسلم عليه
وقال: الله يحييك ياعمي ، شحالك؟ شخبارك؟
الجد راشد: بخير الحمدلله ، انت اخبارك وأخبار ابوك واهلك؟
باسل: كلهم بخير ونعمه
امجد: وش هالكراتين؟ وش جايب؟
باسل ناظره بكرهه وقال: ماتشوف؟؟ احول انت؟
امجد: كلامك ياورع! باسل بحده: مالورع إلا انت
امجد: ماتربيت انت؟ لسانك طويل!
باسل: متربي قبل لا أشوف خشتك! واطول لساني على اللي أبيه انثبر مكانك وأحشم عمرك! كل هالطول وتناقرني؟
ابو جاسر: بدينا يابو عبدالله؟
ابو وافي: العن الشيطان! وانت الولد توه جاي!
سكتو اثنينهم يناظرون بعض بحقد .
— البنات —
بالسطح وشافو هذا كله ونجود اللي مصدومه من شافته وفوقها من هوشته مع امجد من الواضح انه جريء جداً وانسان مايسكت عن حقه
نجود: يوييزييي بنات والله هو!!!!
بيان: وش يبي يتضارب مع امجد؟
امل: اخوتس بعد يستاهل! وش له يسأله؟ بعدين قبل مايسأله انتي شفتي حركات رجوله؟ يحاول يخلي باسل يطيح بس ماقدر جزاه !
ليان: اشششش!! خلنا نسمع !
وسكتو يسمعون لهم .
— الغرفه —
قام من النوم وصلى ومن انتهى لبس ثوبه وتعطر وطلع من الغرفه رايح للحوش لكن يتفاجئ بوجود باسل.
كِنان: يابااسلل باسل أنصدم وضحك: ياعيونه !
كِنان ابتسم يجيه ويضمه وباسل بادله باقوى ماعنده
باسل: حسبتك ماجيت! كِنان: افا؟ أنا مااجي! لا والله انك ماصبت ! وش هالتفكير؟
باسل: ابد عمي قال انك تعبان بالحيل وماجيت وإنك بالمستشفى ياانه ضاق صدري!
كِنان: بسم الله علي ! .. اجل تتفاولون علي!
ضحكو كلهم وجلسو وقال الجد راشد: ايه ماشاءالله واضح جاي عشان مين
باسل: والله جاي عشانك .. المهم أبوي رجع من القصيم ووصاني اعطيكم هالتمر
الجد: ماقصر جزاه الله خير . ماكان له داعي .. إلا صدق وينه؟
باسل: تعرف .. تعبان من السفر وماجاء إلا المغرب
الجد راشد: ايه اجل بسلامته
باسل: استأذنكم
الجد راشد: وين!؟
باسل: للبيت
ابو تركي: اقول اقعد بس اقعد! توك جاي أمداك!
باسل: والله ياعم انه..
ابو وافي: بلا بس بلا خرابيط! توك جاي حتى قهوه ماتقهويت! ابك صاحي انت!! وصب له قهوه وعطاه واضطر باسل يجلس
الجد راشد: اللي يشوفك يقول عندك اشغال هالكثر! وش تروح؟ احنا اهلك اجلس بعد أبيك بشيء ضروري بس اصبر تتقهوى وأعلمك
باسل: ااء ابشر ياعمي
وجلس معهم .
— الصغار —
ياسر وسعد يلعبون وبعد ماتعبو جلسو
سعد: شرايك نروح للبنات؟
ياسر: رح لحالك ماني رايح
سعد: ليه؟ ياسر: عيب!
سعد ضحك: عيب؟ تونا صغار بيمديك تتغطى! امش نروح ناخذ لنا شقلاطه وفشفاش بدال جلستنا هنا
ياسر زفر بهدوء ينطق: سعد يعني ترضى ادخل على خواتك؟
ضحك سعد: تونا بزران عش حياتك بس ! امش معي عندي بعد مكان سري اعرف وين يحطون فيه الشقلاطات والعسكريمات وسحبه بيده يدخلون وياسر راح معه سعد ابتسم يأشر على باب صغير شوي وغريب كأنه مهجور او قديم
لكن المعروف عن سعد وياسر مو خوافين ابداً لكن ياسر يعرف يتصرف عكس سعد اللي شوي دبوج ،
فتحه سعد بعدم مبالاه باللي يصير لهم وانصدمو اثنينهم بوجود بنتين قاعدين ويسولفون وياكلون سوا واللي كانو < ليان ، يارا >
ليان: وعمى يعميكم من بزران!! وش فتحك لهذا الباب؟؟
سعد: اء هنا مو فيه شقلاطات؟
ليان: ماشاءالله اجل انت اللي تاخذ شوكلاتاتنا؟؟!!
سعد حك رأسه لكن عدلو البنات جلساتهم من انتبهو لوجود ياسر
ليان: اء اوه كيف الحال ياسر؟
ياسر: اء بخير وانتي؟
ليان: بخير .. أنا ليان أخت كِنان إذا تعرف
ياسر: اوه .. هلا
يارا: اي صف ياياسر؟
سعد: تمونين؟ ياسر بهدوء: سادس ابتدائي
ليان: والله وكبرتو! .. ايه وش تبون؟
سعد: نبي شقلاطات عيب الضيف يجلس بدون ماياكل
ليان: عشتو ! الحين صرت تفكر بالضيف .. وطلعت كم شوكلاته وعطتهم وقالت: بالعافيه
العيال: يعافيتس ....

1446/3/22(الأربعاء )
الكاتبه : نُوت ✍🏻