«الحوش، عند هِتان وفواز»
نطقت هِتان : اشتقت لـ امي تصدق ، بس ررغم كل شيء الا انها واقفه بـ صفّ الزفت عيّاد
نطق فواز: تمر الايام وتعرف انها غلطانه ، هي ام واكيد ماهي مستغنيه عن ولدها عشانه داشر ،
نطقت هِتان بغبنه: بس انت شفت كيف مُعاملته لها !
ناظر عيونها فواز يسكت وتوترت هِتان تتدارك الوضع ونطقت تضيع الموضوع: شسمه ، اسفه دخلتك باشياء ماتعني لك ونـ
قاطعها فوّاز يقبّل خدّها وابتعد عنها وسكتت بخجل يحمّر وجهها ونطق فواز : احمدي ربك جت على الخد ، عشاننا بالحوش بس
ناظرته تتوسع عيونها وضحك فواز يرفع كتوفه ،
ضربته بخفّه ودخلت البيت هِتان تتهرب من فواز ، وضحك يناظرها وهي تدخل ،
تنهد فواز يرجع للمجلس يجلس، ونطق ساير:شفيك مكتئب
نطق فواز: انت بالذات انطم ، انتم وغداكم الي بعزّ القوايل ، الواحد الحين يتقلب في فراشه والمكيف يهف عليه وانتم علوم المراجل ضاربه عندكم
ضحك ساير بقوه ينطق: هذا همك متاكد ؟
قرص له فواز بعيونه ينطق: ارفع علومك
ضحك ساير يصد يمسح وجهه يستغفر
،
نطقت سِهام: بابا اقنعه بليز وش الي ملكتنا بالديره ؟ يستهبل ذا ؟
ضحكت تِذكار: خلي الحب ينفعك
التفتت عليها سِهام بجنون: وش حبه وش خرابيط تستهبلين؟ الحين الحب لازم يعني بالديره ولا وشو؟ اوف اوف
نطق نواف: خلّه يبه بكلمه واشوف عنه لعله يغير رايه
نطق فواز يناظره: والله ياسهام لو تشوفين الديره لتغيرين رايك
ناظرته سِهام بطرف عين ونطقت اسماء: وين الي تحب البساطه والاشياء البدويه على قولتك
نطقت سِهام تحك جبينها: اي بس مو كذا يعني
ضحك نواف: الا مافيه الا كذا
والتفت عليهم يكمل: وتبون الصدق؟ احسن ما اختار احمدوه ، والله خرج عن المألوف
نطق فواز : صادق ، الديره مافيه زيها واشتقنا لها ، جايزٍ لي اختياره
ناظرته سِهام متنرفزه: انت وين هِتان عنك؟؟
ضحك فواز ينطق: في بيت اهلها وش تبين انتي؟
نطقت سِهام : طيب فارق انت لبيت اهلك وع
ناظرها سلطان: وهو وينه هالحين ؟
ضحكت تِذكار: حرام عليكم البنت متوتره
ناظرتها سِهام تنطق بحدّه: كلي تراب اوكي؟
هزت راسها بالنفي تِذكار : لا مو اوكي
طلعت من عندهم سِهام تاخذ جوالها وارسلت لـ احمد تنطق: ابي اشوفك ضروري
بعد مُده ، تنرفزت لانه تاخر بالرد ، تأففت لـ اول مره تتجرأ تدق عليه ، دقت تنتظر منه رد ،
،
«الديره ، بيوت آل صقر »
حوش وسيييع وبوسطه البيوت الثلاث الشعبيه الي بينهم مسافه صغيره جداً ، والحجر الرمادي الي منثور بكل الحوش فوق التُربه،
كانوا العيال يزينون البيوت بالعقود ، ويعلقونها ودق جوال احمد ورفع صوته خيّال: احمد جوالك يدق
رفع صوته احمد وهو فوق السلّم يعلق العقود : منهو
نطق خيّال يقرا الاسم : ابو سلطااان
تعثّرت رجل احمد بالسلّم وطاح على ظهره بحركه سريعه وتجمعوا عليه العيال وضحك خيّال: منهو ابو سلطان هذا ياتُرى
وقف احمد بهدوء وظهره يألمه ونطق: هات الجوال
ابتسم خيّال يأشر على علامة الردّ ويهدد احمد انه بيرد ونطق احمد بغضب: ولد
نطق خيّال يضحك: شفيك
صرخ احمد: خيّال تراك قروشه ، هات الجوووال
نطق جسّاس: هذا كله عشان ابو سلطان ؟
نطق خيّال يناظر جسّاس: قايل لك ابو سلطان هذا وراه سالفه ، افتح الخط يا احمد؟
نطق احمد بحدّه يأشر باصبعه بتهديد: قسماً بالله لا افلم فيك يا خيّال ،
ركض خيّال وكان بيركض احمد لكن وقف من اشتد عليه ظهره وصرخ بقوه يتألم: اخوو العياااال
، التفتوا العيال بسرعه يناظرونه طاح وتقدم خيّال بالجوال بسرعه يحذفه عليه وكان بيمسكه احمد لكن استسلم للالم ينسدح على التراب ، وهو يونّ: اهخ
نطق ساير: انت وجعان وجعان ؟ مافيك طب
نطق جسّاس يأشر على احمد: ماذكر يوم مر والثور هذا ماطاح فيه
ضحك ساير ونطق: ابك ابو سلطان وين غَدَا
التفت احمد بسرعه ووقف ينفض يدينه عن التراب واخذ جواله من خيّال بقوه ورجع يدق عليها وابتعد عنهم يسمعها تنطق بغضب: كان رقدت احسن ؟ الحمدلله على السلامه !!
سكتت تسمع ضِحكه عليها ونطقت بهدوء تزعل: احمد
سُرعان ما ابتسم احمد ينطق: سمي
سكتت سِهام تلعب بأظافرها ونطق احمد: تزعلين وبكره ملكتنا ؟ افا
نطقت سِهام: حركاتك مُستفزه
نطق احمد: وانا وش تبيني اسوي يابوي ؟ العيال آخذين جوالي يوم إني اعلق العقود ، والا انا يجيني اتصال منك وافوته؟ اخسى
ابتسمت سِهام تسمعه يكمل وتلعب بخصل شعرها ونست هي ليش متصله عليه اصلاً ، ونست عِتابها له بخصوص ملكتهم بالديره ، ماتذكر الا إنها تحبه ،
ابتسم احمد مايسمع منها الا السكوت ونطق:طيب سمعيني كلمه على الاقل قبل اسكر ؟
ابتسمت تناظر السقف تنطق: احمد
ابتسم احمد يهيم فيها مِن تنطق اسمه برقتها ونعومتها ودلعها ونبرتها الهاديه الي تجذببه ، نطق احمد: ابوي انتي سمي
نطقت سِهام: مابي اكذب عليك ، ماني متقبله فكرة ملكتنا بالديره ! وش ينقنصني عن البنات الي زواجاتهم بقصور ؟ ليش انا بديره !!
نطق احمد يرفع حاجبه: اخو من طاع الله ، هذا الي مزعلك ياحلو ؟
ضحكت سِهام من اسلوبه وتعامله معها ، ونطق: شفتي عروسهم الي بقصور والخرابيط هذي؟ والله ليندمون عليها لا شافوا ملكتنا اليوم ، ابك انتي اصبري علي بس
ابتسمت تنطق: اثق فيك
نطق احمد:ياشيخه جعل محد يثق فيني غيرك
ابتسمت سِهام يعتليها الشُموخ وشوفة النفس من كلام
احمد ونطقت: اشوف نفسي عليك ترا
ضحك احمد: ودي اقول جعل مايشوف نفسه غيرك بعدين حسيت انك صدق بتشوفين نفسك
ضحكت سِهام تلعب بخصلات شعرها تنطق: امزح معك
زفر راجح يرفع صوته: انت ماخلصت لهاللحين
التفت احمد ينطق: جاي جاي
ورجع ينطق لسِهام: الحلم انتي والواقع ابو جسّاس الله يصلحه
ضحكت سِهام من قلبها ونطقت: ابووك تراا
تنهد احمد ينطق: الله يعجل بك بس
ضحكت سِهام تنطق: بااي بروح اشوف وش ناقصني
نطق احمد بسرعه يرفع حاجبه: كااامله ، كااامله علي بالحرام والكامل الله
ضحكت سِهام وقفلت ترمي الجوال جنبها وتميل راسها على المخدّه تفكر فيه وهي تضحك ، دخلت تِذكار تنطق: من يوم كلمتيه وحنا مانسمع غير صوت ضحكاتك ، مالت إلا
شمقت لها سِهام ورجعت تصد تناظر السقف وهي مبتسمه ، فزّت من صرخت اسماء تنطق: ماكن وراكن عرس انتي وياها ، امشن احجزن اموركم
زفرت سِهام تقوم من مكانها وطلعت للصاله تناظر امها واطقم الذهب الي قدامه وضحكت تنطق: اللهم اجعله خير ماما ، لايكون بتلبسيني ذهب؟ اوفر ابي البس الماس
نطقت اسماء: اسكتي بس ماحد درا عنتس ، الذهب هذا بكشخ فيه انا ، مايليق الا بمقامي
رفعت حواجبها سِهام وضحكت تِذكار تناظرهم ،
ونطقت اسماء: وش بتلبسين انتي ؟
نطقت سِهام تجلس: فستاني السماوي
نطقت تِذكار: اويلي ، خيّتو يجنن
نطقت سِهام: اي ، وبلبس معه فضّه
سكرت اسماء طقم الذهب تنزله على الطاوله وتناظر في سِهام تنطق: زين ، يالله قومن اخذوا لكم نومه خفيفه عشان لا جت الساعه عشر الليل نسري
وقفوا البنات يدخلون غرفهم وكل وحده تستسلم للنوم بعد يوم مليئ بالتوتر والتفكير واختيار اللبس والاكسسوارات والحجوزات ،
،
«الديره ، مع شُروق الفَجر »
دخلت سيارات سلطان وعياله يعلنون وصولهم ، ابتسم احمد من وقفوا بنص الحوش ينزلون وتركهم يناظر سِهام تنزل وبيدها سماعاتها وايبادها وجوالها ، وتقدموا يسلمون على بعض ونطقت خزنه : يا اسماء شوفي بيتك نظفناه لكم ورتبناه ، ارقدوا وعينوا من الله خير
نزل فواز من سيارته ومعه هِتان ، اخذ الشناط فواز يدخلها لبيت ابوه
وتبعته هِتان تدخل البيت معه ،
دخلوا كلهم لبيوتهم يريحون ، ماعدا جسّاس والجوهره الي جالسين بأحد اطراف الحوش ، سَند فكه جسّاس على باطن يده يناظر الجوهره وابتسمت تنطق: استح على وجهك وانقلع نام
نطق جسّاس: ليش استحي زوجتي ترا
ناظرته الجوهره تفهمه ونطقت: جسّاس عِرق النذاله ذا من وين ؟
ضحك جسّاس يعتدل بجلسته ونطق: عيالي وين بس
ناظرته الجوهره بطرف عين تضحك: يع جسّاس صرت تقول عيالي ، والله وشيّبت
ضحك جسّاس ينطق: ترا حتى انتي شيبتي معي
ناظرته تلف خِصل شعرها على اصبعها تنطق بدلع: لا حبيبي انت لحالك شيّبت انا لا
ابتسم جسّاس ينطق: انشهد ، للحينش ورده
ابتسمت تنطق: شرايك تمشيني بالديره؟ ابي استكشف
اشر باصبعه على خشمه ينطق: ماطلبتي شيء ، وفيه شي بعد بوريش اياه لارحنا نتمشى
ابتسمت الجوهره بحماس ، ومشت لبيت راجح تدخل واخذت شرشفها تلبسه وطلعت لجسّاس تناظره واقف ونطقت: عالسياره؟
هزّ راسه بالنفي يلعب بسبحته وهم يمشون وطلعوا من البيوت والحوش وهم يتمشون بانحاء الديره ،
مشى جسّاس وبيده ماسك يد الجوهره ، ووصلوا للبقاله وناظر جنبها غرفه من قزاز وداخلها الهاتف الثابت ، وناظر جدار البقاله الي مكتوب عليها رقم وتحته حرف ن ، وناظرها ينطق: خمّني من الي كاتبها ومن المقصوده
ناظرت الرقم الجوهره ونطقت: همم ، ماعرف من ؟
نطق جسّاس: الي كاتبها عمي سعود ، ابوك والمقصوده خالتي نوره الله يرحمها ، ترا كانت حركاتهم حركات مراهقيييين
"لا إله الا انت سُبحانك اني كُنت من الظالمين "
"صلّوا على النبي واذكروني بدعوه "
بارت ثاني بنفس اليوم❤️❤️❤️
