𝗘𝗩𝗔𝗡 [ 𝗁𝖾𝖾𝗃𝖺𝗒 ] ✔️

E

​ရှေ့​မှောက်၌ရှိ​နေ​သော Laptop screen ​ပေါ်သို့ အလုံးစုံအာရုံစူးစိုက်​နေတဲ့သူဟာ ​ဘေး​ဘောင်​တွင်တင်ထားလျက်ရှိ​နေ​သော လက်တို့မှာလည်း သတိလက်လွတ်ဖြစ်စွာ အနည်းငယ်တုန်ရီလျက်ရှိ​နေခဲ့တယ်။

Bluetooth mouse ​​အ​ပေါ်သို့လက်​ချောင်းများ ​နေရာယူ၍ လက်ညှိုး​လေးဖြင့် တစ်ချက်​တောက်လိုက်သည်နှင့် ​ပြောင်းလဲလာ​သော screen ထက်က စာ​ကြောင်းသည်မှာ သူ့ကိုစိတ်​ကျေနပ်မှုအပြည့်​ပေးနိုင်ခဲ့သည်။

# 2019ခုနှစ် ရဲတက္ကသိုလ်ဝင်ခွင့်စာ​မေးပွဲ ​​အောင်မြင်ခြင်း #

​မျှော်လင့်ထားသလိုဖြစ်လာ​သောအခါ သူ့ရဲ့​ပျော်ရွှင်မှု​တွေမှာ လှိုင်လှိုင်လှဲလှဲပင်။

ရဲမှူးချုပ်ရဲ့တစ်ဦးတည်း​သော သားပီသစွာ ဒီတစ်​ခေါက် ဝင်ခွင့်ကို အမှတ်အများဆုံး​ကျောင်းသားအ​နေဖြင့် ဝင်ခွင့်ရခဲ့ပါတယ်။

ညစာစားပွဲ၌ အ​ဖေဖြစ်သူ ရဲမှူးဟာ သူ့ကိုချီးကျူးတယ်။ နှစ်လိုဖွယ်ပြုံးလိုက်သည့်သူသည် အ​ဖေ့​ခြေရာကိုနင်းလို့ ပြည်သူ​တွေကိုကာကွယ်​ပေးနိုင်​တော့မည့် ရဲသားတစ်​ယောက်ဖြစ်လာ​အောင် ကြိုးစားသွားမည်ဟု အသိစိတ်ထဲ၌ ကျမ်းကျိန်ရွတ်ဆိုလိုက်ပါသည်။

နွေဦး ။

ပူပြင်းလွန်းတဲ့ရာသီဥတုဒဏ်​က လူသား​တွေရဲ့ ​တစ်​နေ့တာလုပ်​ဆောင်ချက်​တွေကို အ​တော်​လေးဒုက္ခ​ရောက်​စေတယ်။

တစ်ခါတစ်ရံ ရုတ်တရက်ဆန်စွာ မလိုက်မသိရွာချတတ်တဲ့ မိုး​ရေ​တွေ​ကြောင့်လည်း တစ်ဖန်အ​နှောင့်ယှက်ဖြစ်ရပြန်တယ်။

​မိုးရွာချပြီးလျှင် ပြန်​ပေါ်လာတတ်တဲ့ ​နေရဲ့အပူချိိန်ဟာ သာမန်မဟုတ်ဘဲ ပူစပ်စပ်ဖြစ်​စေတာ​ကြောင့် ထိုခံစားချက်ကို သူအလွန်မှမနှစ်မြို့ပါ​ချေ။

ထို့​ကြောင့် ​နွေဦးကို သူမုန်းခဲ့တယ်။

သို့​ပေမယ့်လည်း မတတ်နိုင်ပါ။

ရဲတက္ကသိုလ်ရဲ့ အတန်းချိန်​တွေမှာ ​နွေဦးကစသည်​ကြောင့် ​လေ့ကျင့်​ရေးဆင်းတဲ့အချိန်​တွေမှာ ပိုပင်ပန်းရသဖြင့် ​နွေဦးကို သူ အရင်ထက်ပိုမုန်းခဲ့မိပါ​သေးသည်။

သူ ဒီ​လောက်မုန်းရတဲ့ ​နွေဦးကို တစ်ကြိမ်​လောက်​တော့ သူ သ​ဘောကျမိသွားခဲ့မိတယ်။ ဒါ​ပေမယ့် သူက ​နွေဦးကို သ​ဘောကျခဲ့တာမဟုတ်ခဲ့ပါဘူး ။

သူချစ်ရတဲ့လူတစ်​ယောက်ဟာ သူ့ဘဝထဲကိုဝင်လာခဲ့တဲ့အချိန်က ​နွေဦးဖြစ်ခဲ့တယ်။

​နွေဦးကို သူမုန်းခဲ့​ပေမယ့်
​နွေဦးမှာ သူ့ဘဝထဲကိုဝင်လာခဲ့တဲ့ လူကို​တော့ သူဟာ မမုန်းနိုင်ခဲ့ပါဘူးတဲ့။

-

အနည်းငယ် ဆူညံ​နေလျက်ရှိတဲ့ ပတ်ဝန်းကျင်ဟာ ရုတ်ချည်းတိတ်ဆိတ်သွားတယ်။ အခုနကအထိ ရှုပ်​ထွေး​နေတဲ့ သူ့အ​တွေး​တွေဟာလည်း အခုအချိန်မှာ​တော့ ဗလာကျင်းသွားသလို။ ကျုံ့လက်စ မျက်​မှောင်​တွေမှာလည်း တဖြည်းဖြည်းချင်း ​ပြေ​လျော့သွား​ခဲ့​လေပြီး ..