အခန်း ၄၇၉ ။ တောင်ပိုင်းမြေတိုက်ခိုက်ခံရ
တစ်စုံတစ်ယောက်သောသူနဲ့ အတူတူ ဒုက္ခခံပြီး ကျင့်ကြံနေခဲ့ရတဲ့ယုန်က အနည်းငယ် မှင်တက်နေမိတယ်။ သူတို့ အစက ဓားအင်းကွက်တွေကို ကိုင်တွယ်ချိန် ဖက်တီးက ပထမအဆင့်ကိုတောင် မဖြတ်သန်းနိုင်တဲ့ ငပျော့လေးလေ။ အင်းကွက်ထဲ ဓားချီလိုက်ခံရလို့ အော်ဟစ်နေသံတွေကို အင်းကွက်၁၀ခုလုံးအနှံ့ကြားရနိုင်တယ်။ လွန်ခဲ့တဲ့နှစ်ပိုင်းကတင် သူ ဒီညီကိုဝတုတ်ကို တိတ်တိတ်လေး သနားနေခဲ့တာ။ သူ့ကျင့်ကြံဆင့်က ကြီးမြတ်တဲ့အမတရဲ့ ဖိအားပေးလေ့ကျင့်မှုတွေအောက် အင်မတန်မြန်ဆန်စွာ တိုးတက်နေတုန်း ညီကိုဖက်တီးကတော့ တစ်ချိန်လုံး အဆင့်က မပြောင်းမလဲ။ အရမ်းကိုသနားစရာကောင်းတယ်လို့ ယုန်ကတွေးနေခဲ့တာ။
ယုန်က နဝမအဆင့်ထိ မြင့်တက်သွားချိန် ဖက်တီးက အဆင့်နိမ့် ဓားအင်းကွက်ထဲမှာ။ ဒဿမအဆင့်ရောက်ချိန် သူက အဆင့်နိမ့် ဓားအင်းကွက်ထဲမှာ။ ဧကဒဿမအဆင့်ရောက်ချိန် သူက... အဆင့်နိမ့်ဓားအင်းကွက်ထဲ ရှိနေသေးဆဲ။ အစကတော့ ဒီညီကိုဖက်တီးက တကယ့်ကို ကျင့်ကြံခြင်းအတွက် တကယ်ကို အရည်အချင်းမရှိဘဲ တစ်ဘဝလုံး ဓားအင်းကွက်တွေထဲ တိုက်ခိုက်ရင်းဖြတ်သန်းရတော့မယမ ထင်ခဲ့တာ။ ဒါပေမဲ့ သူ ဓားအင်းကွက်တွေထဲက ထွက်လာချိန် အဖြစ်အပျက်တွေက ရုတ်တရက် ကြီးမားတဲ့ပြောင်းလဲမှုတွေ ဖြစ်ကုန်တယ်။
ဖက်တီးက စိတ်ပိုင်းဆိုင်ရာ ကျင့်ကြံရေးလေ့လာချိန် ယုန်က ဧကဒဿမအဆင့်ဖြစ်ပြီး သူက အဆောင်ကျင့်ကြံရေးစချိန် ယုန်က ဧကဓသမအဆင့်ဖြစ်နေဆဲ၊ သူ သက်စောင့်ဆေးကျင့်ကြံမှုကို လေ့လာချိန် ယုန်က... ဧကဒဿမအဆင့်ဖြစ်... ဖြစ်နေဆဲ။ နောက်ဆုံးတော့ မနက်ခင်းတစ်ခုမှာ သူနိုးလာပြီး ဖက်တီးက တစ်နည်းနည်းနဲ့ နတ်ဝိညာဉ်ဖွဲ့စည်းခြင်းအဆင့် ကျင့်ကြံသူဖြစ်နေပြီဆိုတာ နားလည်သွားခဲ့တယ်။ သူ့ကိုယ်ပေါ်က အရှိန်အဝါက ပြင်းထန်လွန်းလို့ အသက်ရှူဖို့တောင် နည်းနည်းခက်လေရဲ့။
ယုန်က သူ ဂါထာတစ်ခုခုအောက် ကျရောက်နေလားတောင် သံသယဖြစ်မိတယ်။ ဒီလို ကိစ္စကြီးတစ်ခု ဖြစ်နေချိန် အိပ်နေမိခဲ့လို့လေ။ မဟုတ်ရင် ညီကိုဖက်တီးက ညတွင်းချင်း အဲလောက်ကြီး ခုန်ကူးသွားမှာလဲ။ သူ လုံးဝသတိမထားမိတဲ့အပြင် ဝဋ်ကြွေးချေမိုးကြိုးသံကိုတောင် မကြားမိတာလေ။
