موجات حارقة

الجزء 8

الحلقة 58
بقلم لينا صبرينة
لغدوا نضت مدمرة حرفيا على لخر وفي راسي الف حاجة وفي قلبي جرح يدبح ودبحتي مايعلم بيها غير ربي دموعي ماحبسوش وغير نسأل ونجاوب في روحي وحدي دخلت في عقلي .حالتي ماعرفتها صدمة او خدلان من غدر . لبارح برك كنت نحاول نتغاضى على حياتي المرة ليفت عليها وكنت نتناسى ونصطنع في شخصيتي وليوم حالتي واضحة تفرضت عليا الحزن ماقدريش نمثل اكثر دور القوية ومايغلبني شيئ .الخبر ليسمعتو انو هادوك الناس أهلي عيشني صدمة في وسط خذلان __ماقدرتش نحط لقمة في فمي وهو غير معايا مقابلني عيا فيا باه نهدر معاه بصح والو مطنشتو على لخر وباقيا في سكاتي وفي عالم التساؤلات_دخل عندي في يدو بلاطو تاع ماكلة .هيا كولي شوي من لبارح مازدتي كليتي حاجة ماش مليح ليك خمي في بنتك شكون بيها .جاء يوكلني بعدتلو يدو .بقا يحاول فيا مالقا مني حتا ردة فعل .ولا هز لبلاطو بعيد ورجع ليا بقا على الكرسي تاع لقوافاز مقابلني وانا قاعدة فالسرير غير نشوف برك وكأنو انسان جاء وقتل روحي _فردوس وشبيكي والله مانحب نشوفك هكذا ياك نعرفك قوية قد روحك وتعرفي تحلي مشاكلك وهذي لحاجة مميزة فيك _ نتا مراكش فاهمني وموحال تقدر تفهم واش راني نحس من داخل _  والله غير راني فاهمك علابالي صعيبة عليك وماش ساهلة عليك بصح خليك كما نعرفك ديمة قادرة تتخطاي المعانات _ علابالك شحال تعذبت في حياتي  بلا بيهم علابالك واش معناتها طفلة تعيش بلا اهل وتترمى من فوقها معلابالكش نتا معشتهاش قتلك ماش راح تفهمني انا لتجرعت لمرار انا ليكنت نشوف لمرا ليرباتني كيفاه تعامل وليدها وكيفاه تعاملني وتفرق بيناتنا وحرمتني انا ليكنت نشوف لحنانة غير بلعين كنت نشوف الحب ولحضن تاعهم لغيري  انا هادوك مانشفاش على روحي بلي عشتهم ولا حسيتهم تحرمت منهم تحرمت تفهم يعني حرمااان عشت طول حياتي ليفاتت محرومة من كلش علابالك واش معناتها تترمى ونتا ماعندك حتى ذنب عالابالك واش معناتها كينعرف بلي بنت خالي هي نفسها لكانت تعاشر في راجلي قدامي وكانت عارفة بلي انا وهيا عندنا قرابة كأنا خواتات وهكدا وكانت نقهر فيا عيني عينك ولا الأهل ليقبلو بنتهم ليرباوها على بنتهم الحقانية تتربى في وسطهم مقابل بنتهم بعيدة وحتا كيكبرت زادو رماو عليا بنتهم ضرة وقابلين عادي  واش نزيد نحس كثر من هذو الاحاسيس واش نزيد نعيش كثر( كنت نهدر ونبكي) علابالك واش درت فيا نتا كامل نقدر نتخطاه ونقدر ننساه باسكو براني غريب ماناش نفس الدم  بصح هوما الشيئ ليداروه فيا جامي ننساه ولا نتخطاه وحتا جامي نسامحهم ونبررلهم ياعجبة ياربي هاديك أم انا رماتني وصوفيا قابلتها بالأحضااان وزيد وقفت معاها ضدي علاااه هادا الظلم ربي ياخذ فيهم لحق الله يلعنهم الله لا ... _ (لقيتو حط يدو على فمي) _اششش خلاص خليك منهم علابالي لحياة قسات عليك بزاف ومام انا ضلمتك وضلماتك عايلتك بصح نوعدك انا لنوعوضك علي كلش راح نكون انا كلش بالنسبة ليك افتحيلي قلبك برك واعطيلي فرصة جديدة خلينا نعيشو كما ناس وفي وسطنا رفيف ولا حابة بنتنا تعيش كما عشتي نتي ؟_سكتت وأول مرة كنت نسمح لقلبي يتغلب و يفوز على عقلي خليتو هو ليداوي جروحي بلا مانفيق وتغاضيت على كلش خليت حبي ليه يتحكم في عقلي باسكو كنت مجروحة وضعيفة ولا حول ولا قوة لي كنت بزاف محتاجة انسان يخفف عليا ياولوكان شوي من همومي ولقيتو سند قوي في اصعب أيامي وسمحتو يتهطى الحاجر ليحطيتهولو جيهتو بصح ماقدرتش نمدلو كل الثقة وخليتها ليام تبين وتوضحلي الصواب من الغالط _لغدوا على صباح جات وداد قالها هيثم اقعدي معاها ماتخليهاش وحدها  مازالت داخلة في حالة صدمة وانا لازم نروح للخدمة _لقيتها جات قعدت قدامي . فردوس حبيبتي شوفي فيا علابالي لسمعتيه واعر ويجرح بصح متبقايش هكذا رفيف تحتاجك وهيثم يحتاجك _وداد علابالك أهلي هوما نفسهم هادوك ليدخلو بنتهم ليرباوها ضرة عليا نفسهم ليرماوني وانا صغيرة -ياعمري نتي علابالي بكلشي مانبقايش تخمي فيهم _خيرو يفرحوها هيا وانا يقهروني .شفت في عينيها دموع عليا وليت جبدت لعندي رفيف قدامي تلعب وحطيت راسي في حجر وداد وغير نهترف مع روحي حتا غفيت رقدت .كينضت كانت ضلمة غير فيوزة شاعلة باينة طاح ليل ورفيف ماش في بلاصتها بقيت مدة وحدي وليت خرجت لقيت وداد فالكوزينة دير فلعشا ورفيف مقعدتها فالكرسي دخلت شافتني ضحكت معايا .أرواحي قعدي درك يوجد لعشا .قعدت وبقات غير تشايخ وتهدر فيا وتضحك تنحييلي في جو الإكتآب ليدخلت فيه حتى جاء هيثم كيشافني قاعدة تم قدم باسني على راسي .لاباس عليك _هززت راسي وهو راح غسل ورجع  تعشينا مع بعض كيكملنا جاو عمي وخالتي قعدو ثاني يهدرو معايا وقفو معايا بزاف ومخلاونيش وحدي وفهموني بلي ماعندهم حتا علاقة بيهم وعمي جامي حوس يروح يتعرف على أهلي الحقيقيين ولو المديرة مدتلو الاسم كامل ولادراس بصح كيلقاني مسنطحة وماش قابلهم لا من قريب ولا من بعيد مام هو ماحوسش عليهم وقالي كون جيت نعرفهم والله مانسمح بهادا الشيئ يصرا .
الحلقة 59
بقلم لينا صبرينة
بعد ماسهرو معانا وحاولو ينحولي على خاطري راحو وخرج معاهم هيثم قالهم محتاجكم في أمر وانا ماهتميتش كيخرجو  كانت رفيف راقدة دخلت دوشت وصليت كيكملت بقيت قاعدة على سجادة ونخمم راح نحرق أعصابي وادا بقيت نخمم فيهم هكدا وفي هادي الحالة ندخل في عقلي أكيد ونضر غير روحي بركااات صايي فردووس ياسر فيك هذا الهم انتي تستاهلي تعيشي تستاهلي تفرحي ووجوه االهم هاذوك ميستاهلوش دمعة تاعك طيح نهار كنتي تتعذبي كانو فرحانين ونهار كنتي ماترقديش ليل وتموتي في نهار الف مرة من لعلاج الكميائي ومن سطر كانو هوما عايشين لباس بيهم ويرقدو بضمير سباتي وليام ليدخلت كومة واحد ماهز روحو وجاء ستناك تفطني حتا نهار تشليت ماجاوش رفدوك وعاونوك توقفي على رجليك كنت نبكي ونضحك لوحدي ولنفسي كنت حتى ننسى روحي شكون أنا وهكدا نعاود نرجع ذاكرتي وحدي مانكدبش على هيثم وفاميلتو ليوقفو معايا بصح هاذوك مايعتبروش والدين ولا أهل مادام سمحو فيك ورماوك وتخلاو عليك يعني مايستاهلوش حتى شوفة من شوفاتك انتي درك عندك بنتك وبس و الباقي طيشي عليك والله مانزيد نغم روحي على جال زريعتهم كما بكري كما ليوم ماعنديش اهل ولا والدين ولا خواتات ماتو وانا يتيمة وخلاص .زدت صليت ركعتين لربي دعيت فيها يخفف عليا ويعطيلي قوة من عندو نقدر نوقف على رجليا ومايهززني شيئ .حمدلله دايما كينلجأو لربي سبحانو نحسو براحة كبيرة من يكون الصدر ضيق علينا يتوسع وينشرح . ناضت رفيف تبكي رحت درتلها بيبرونة شربت حليبها وحسيت روحي متوحشتها بزاااف بقيت نلعب معاها ونضحك .كيطلعت راسي للباب لقيتو متكي على الباب ومربع يديه يتفرج فينا ويتبسم ماحسيتش بيه كيدخل  . اوو يالعميرة تاعي راهي تضحك واخيرا واش لباس عليك درك _لباس لحمدلله ونتا_كيلقيتك هكذا وليت لباس حمدلله _قرب ليا كتر وجهو وحط يدو على خدي ويشوف ليا بنظرة شوق .فردوسة والله واحد مايستاهل دموعك وانا واحد منهم غيرك اعرفي كيفاه تعيشي مرتاحة ومهنية وفرحي روحك هادي الدنيا ماش دايمة _هززت براسي وهو كيشافني مبتسمة معاه ومابعدتش روحي منو قرب باسني من خدي وبقا لاصق وحسيت بنفسو القاوي والعالي حسبتو راح يزيد يتجرأ كتر بصح بعد مني . هيا حطي رفيف في نص سرير درك ندوش ونجي نقابلكم .خرج من البيت بصح حسيتو شغل تهرب مانعرف . طفيت الضوء وحطيت رفيف وهو دوش وجاء لسرير معانا بقيت نشوف معاه _فردوسة مانشوفيش هكدا جاي نقابلكم شوي غير من بعيد متواحش فيكم _سكت ماجاوبتوش ورقدنا _نضت مع لفجر لقيتو ماكانش معانا كيخرجت شفتو راقد فالصالون مانعرف علاه جاء هنا .رحت توضيت صليت ومام هو فطن وراح دوش وصلى ماش موالف بصح مادابيا يحكم في صلاتو _كيطلع نهار درت لفطور جاء فطر كيكمل بقا يوصي فيا باه مانخممش فيهم ونغبن روحي ونديرهم شغل ماكانش كما من قبل وراح لخدمتو .كيلحقت 11 تاع صباح كنت فالكوزينة سمعت الباب تاع برا تفتح .علاه رجع بكري ليوم بصح موالف كيدخل يعيط علينا!! _خرجت لعندو تفاجأت كيلقيتها صوفيا في وجهي ولابسة جلابة نوار ولمفاتح في يدها ومن وجها تبان ناوية على شر _نتي كيفاه دخلتي لدار منين ليك لمفاتح _دار راجلي ونسال فيها اذا نسيتي راني فكرتك _اخرجي من دااار لا نلم عليك الجيران ليوم _ماكالاه انا لينلمهم ونسمعهم بلي راكي بنت حرام وحدة كلبة رخيسة كيفك بنت شارع تواجهني وتخربلي داري _غمي فمك مانيش بنت حرام انا بنت ناس ماعندهمش ضمير ونفسهم الناس ليربوك ياساقطة يالمرهوجة كيفاه عطاك قلبك تدخلي على بنت عمتك ولا نقدرو نقولو دخلتي على ختك ضرة كيفاه قبلتي تتزوجي راجل ختك و تعاشريه قدام عيني تقول برانية كيفاه قدرتي تبيعي شرفك ياخامجة _(من غير قلتلها هادا لكلام تحولت وبدات تعيط بأعلى صوتها وليفيك وليفيك ماخلاتش سبة ماقالتهاليش حسيتها ماش في وعيها وجها رجع يخوف حتا خفت كاش مادير وزيد رفيف راهي فالبيت تبكي تخلعت )_ماكيش ختي ماكيييش ختي مانحبش نسمع كلمة انو نتي ختي الله يلعنك ونقولك غير ماتفرحيش كيحاوزني والله غير نخرج فرحتك من عينيك ومانخليك ترتاحي نهار ولا تشوفي لهناء في حياتك حتى ورميناك باش نتهناو منك رجعتي وسمطتي علينا حياتنا _ علاه تحسبو رواحكم حاكمين لهواء عليا رميتوني بصح ربي كاين مايخلي عبادو .كون جيتو خير بالنسبة ليا كون ربي خلاني عندكم بصح شاف بلي ماش راك نتربى مليح معاكم وراح نخرج غير كيفك بلا اخلاق بلا تربية تلفني عليكم وعوضني بعقل واعي ورزين ويخافو ويهابو ودايما يوجهني لطريق صحيح وعوضني بناس عندهم ضمير خير من وجوهكم _كون جاء عندك عقل ماتبقاي مع راجل كما هيثم شفتيه بعينك يجيبني قدامك وقال بلي انا حبيبتو وهكدا بقيتي تشوفي وماتحرك منك شعرة ياالمذلولة_اذا انا نذليت فنتي رخستي بروحك راجل يحوس عليك غير على جال فراشو وقبلتي بعيشتو باه تكوني ليه غير للمتعة ماشفتتش ارخس وأوقح منك هو يرمي فيك ونتي لاصقة بلا حياء وماتدري طفل لي في كرشك شكون باباه .
الحلقة 60
بقلم لينا صبرينة
رحت عند رفيف هزيتها لقيتها فاحمة من لبكى وهيا لحقتني ودورتني ليها بدراعي _اطلقي يدي واخرجي من دار هيااا _اسمعي انا ولو قليلة حياء وقبلت بمعيشتو بصح البيبي لي في كرشي وليدو حبيتو ولا كرهتو ونهار نولد وتشوفو بعينيكم الحقيقة ولتم نشوفها ادا زاد بقا معاك باسكو هيثم يحبني انا وغير رفيف ليجات فنص بدلتو من بكري يحبني ونتي دخلتيييي بيناتنا وندمت نهار ليشفتك في فسبيطار وقابلني اسمك ورحت حكيت ليما عليك بلي بنتها راهي مريضة .مانكدبش جات طايرة عندك ونتي كنتي راقدة ومن وراها هيثم رجع لبلاد وزادت لاقاتنا الخدمة مع بعض بصح انتبهت شحال مهتم بيك لدرجة غير بدا الخدمة بدا بيك وكينبات انا فسبيطار نخدم يظل يعيط يسقسي عليك مايحبسش وانا من بكري حاقدة عليك وزدت _علاه حتا تحقدي عليا واش عملتلك ياربي سيدي كنت صغيرة في واش نقدر نضر _بكري كيماتو والديا وتحتمت نروح لعند يما وراجلها عشت معاهم باسكو واحد ماقبلني من غيرهم وتبقى يماك هيا يما باسكو رضعتني مع ختك .ورحت ليهم لأنو عمي كلالي حقي كلو مام دار وقالي مانسالش فيها عليها باباك داني عندو وتكفل بيا ودخلو فشروعات باه نهز حقي كلو .كيعشت معاهم غير في براكة شفت فيها الويل الفقر والميزيرية نباتو بالشر وفاالبرد والماء يقطر علينا وفصيف ندودو من الجفاف ومن فوقها الضرب والعنف تاع باباك لينشوفو في خواتاتي وفي يما وانا كان مايمسنيش بصح نتي جيتي فطريق وكيسمع باباك نوض القيامة على يما وعلينا ماقبلكش نهائيا الحمل تاعها لدرجة يضرب فيها ليل مع نهار باه يطيحلها البيبي وحنا نفس الشيئ اول مرة يرفد يدو عليا ويعدبني شواني فالحيااة تشويت وتكويت منو بصح فرميت فمي كنت قابلة هاديك لمعيشة حتا نكبر ونهز حقي ونروح كنت دايما نلوم يما ونلوم البيبي لي في كرشها ولي هيا نتي بسبابك دقت لمرار المر باسكو كنت على الأقل عايشة لمرار بصح نتي زدتي قسيتي على حياتنا .وكيخلقتي وسمع باباك بلي طفلة جهل ودخل في عقلو وغشو كامل جابو فينا طاح فينا بالضرب حتا غاشانا تعرفي غاشانا بالضرب اي حاجة يلقاها قدامو يضربنا بيها ماخلى يدو ورجلو ولا سبتة ولا عود ولا حديد لحمنا تهرس وعضمنا تكسر قوليييلي  درك انا واش كان ذنبي مانيش بنتو كنت يتيمة صغيرة واش داه يوصلي ويقسى عليا .وغير خرجت يما من سبيطار وجابتك كامل كما رانا شفناك بلي نتي هيا عدوتنا وبابا ماقبلكش وقال ليما غدوا تديها ترميها عليا مانحتاجهاش في حياتي _(كانت تهدر وتبكي وانا مصدومة واش راني نسمع يعني بابا ماقدرش يحمد ربي على رزق ليجاه وحتا وصل يعدب بنات ماعندهم ذنب ) _صوفيا انا ماش عدوتكم كنتو قادرين توقفو مع يماكم ضدو _هاداك باباك كيكان على ديدانو كان وحش ماش انسان حنا كرهنا وماقدرناش على الضرب عليها وقفنا في صف بابا وماقبلناكش بيناتنا ووموراها داتك يما وكيرجعت رجعت بلا بيك لتم ذقنا النفس الطبيعي ورخا يدو عليا بصح يما بقات طول هادي سنين تجيب سيرتك واش راهي دير فردوس واش راهي تقرا ادا مريضة ادا قادرة ادا حقروها كرهتني في سيرتك باسكو كينتفكرك نتفكر لعداب ليجوزتو مع باباك .حتا كبرت وهزيت حقي كامل مكمل وانا ليهزيت والديك ودخلتهم داري ووكلتهم بشهريتي وحتا زوجت نص من لبنات اما الباقي هو زوجهم ولا تقدري تقولي رماهم باعهم باطل وبالمختصر باباك يكره جنس الأنثى بصح في كبرو مالقاني غير انا ليهزيتو وعلى وجه يما قبلتو وهيثم هو حياتي عشقي نموت عليه ماتتصوريش واش درت باه خليتو يحبني ويجري مورايا بصح نتي لدايما تحرمي عيشتي كيسمعت يما بلي هيثم تزوجك ماقبلتوش يتزوجني وقاتلي حرام وكدا وكدا غير جابتها سبة ومن وراء ماتزوجتو كلشي درتو معاكم ماش صدفة يعني درتو بكل ارادة وقناعة واصرار خططت غير باه نتقرب منكم مام دار وبعت ليكنت فيها وشريت قدام والديه باه نتقرب منهم ويحبوني و.يما قنعتها باه نقربها ليك ومنها باه تقبل زواجنا وقعدت نقنع فيها بلي كون نتزوجو حلال وحتا ديتها عند ايمام وفتالها وهكدا بقات رافضة باسكو نتي بنتها الحقانية نتي فسدتي عليا بصح فالأخير قدرت نقنعهم كامل وشفتي العرس ليدارهولي ودخلني عليك وكان يبات معايا ويخليك ووليدو في كرشي راه يكبر وغير نولد تشوفيه كيفاه يطلقك ويرجع ليا وبنتك نقبلها نربيها بكل حب نمدلها حنانتي كلها غير باه نحرقك نخليك تشوفي كبدتك بعيدة عليك وقريبة ليا . هيثم كيلقاني قابلاتو بيه ببنتو وزيد معايا وليدو يحطني على كفوف الراحة وتفكري كلامي هيثم ليا وحدي وراح يرجعني ونتي يحاوزك من حياتنا بيديك فارغين _نتي صح مريضة من عقلك اخرجي عليااا براااا _بقات تشوف فيا نظرة تاع موت وليت حطيت رفيف في بلاصتها وطبعتها تخرج ونسيت عليها بلي اونسات كيوصلت للهول طاحت وكيناضت تقول جن وسوطا عليا تضرب منين جاها وتسب وليت طبعتها بكل قوتي جات طايحة فالحيط فالأرض .زادو شعلو نيرانها ودخلت للكوزينة جابتلي موس ووجهتو جيهتي هنا عرفتها صح مريضة وناويا تقتلني لا محالة  .
الحلقة61
بقلم لينا صبرينة
ليوم نشرب من دمك ليوم نق ت لك (هنا صح ماش صوفيا هادي متلبسها شيطان )_ وشبيكي نتي هبلتي نحي الم وس من يدك كون جاء يحبك يطلقني انا علاش حتى يطلقك راح تضري غير روحك حطي لم وس ليراه في يدك _ اسكتي كان يحبني انا برك ودرت كلش باش يبقى معايا حتى عطيتلو شرفي وكنت انا هيا ال#### في فراشو وحياتو كان يموت عليا يوميا يجيني ويطلبني ومفرشلي ايامي حرير بصح نتي كنتي سوسة ودخلتي حياتو برفيف لتم بدلتيه عليا وانا نموت خير مانشوفو بعيد عليا _كانت تهدر وتقدم ليا بشوي وانا نبعد وكل تخماني في بنتي خفت تغفلني وتروح تآديها. من غير دخلت للبيت شوي خطفت روحي بالزربة باه نغلق عليا الباب بصح قدرت تقيسني بالم وس في يدي وانا ربي عطاني قوة وقدت نغلق الباب وهيا بقات تخبط فالباب وتعيط وتسب .شفت مع يدي الدم يسيل منها وتوجع فيا عدت نبكي منها باسكو تسطر وزيد نرجف من الخوف صراحة خفت منها  _رحت هزيت ثلفون لمزية كان فالبيت وهزيت رفيف ليكانت تبكي وعيطت لهيثم_اهلا فردوسة لاباس _هيثم ارواح لدار _ خير واش كاين وشبيكي _صوفيا راهي فدار _واش جابها هادي كاش مادارتلك _ماهيش ناويا على خير وراني فالبيت غالقة على روحي_ اوك ابقاي تم ماتخرجيش ليها ودرك نجي_كوبا وبقيت نسكت في رفيف ويدي مازالت تنزف وحتا صوفيا مازالها تخبط وتهدر سمعتها قاتلي _واش داك تدخلي بيناتنا انا تاني حبيت نعيش فرحة لعمري وكان هيثم هو لينورلي حياتي وينسيني في عداب صغري وعيشتي لي فيها كل الحرمان بصح نتي فسدتي عليا وهدمتيلي أحلامي بصح نوعدك يافردوس غير نولد هادا طفل يتبدل كلشي ونتي تشوفي بعينك بلي يطلقك نتي ويرجعني انا ولتم نربطو ليا طول لعمر ونتي ينساك اصبري عليا برك ونشوفو الرابح فالأخير_كنت نسمع فيها وماحبيتش نجاوبها حتا سكتت ومازدتش سمعت حتا صوت.  فات شوي وقتت سمع صوت هيثم_فردوووس وينكم_  لثم رجعت فيا الروح رحت فتحت الباب قابلني قدم ليا هز رفيف و ضمني لصدرو .راكم لاباس وينهي الكلبة _مانعرف تبان راحت _هبط عينو شاف جرحي تخلع  _وشبيها يدك ؟_ قاستني
بالم وس_ضرباتك والله غير نرشيها رخيسة ارواحي قعدي درك نجيب نغسلك جرحك نشوفو ادا تاع سبيطار ولا تعقيم برك _قعدت وهو حط رفيف قدامي وراح جاب باه يغسلي جرحي .قعد قدامي ويداوي فيها وروحي تتقطع من سطر قالي لمزية ماش غامقة ماش تاع خياطة .عقمها مليح بدواوات وحطلي الفاصمة  وحتم عليا نحكيلو واش صرا .حكيتلو بصح راح يتفلق بالغش _الحيوانة تما لقات مفتاح الدوبل وهزتو معاها نهار راحت ليوم نهارها رخيسة نربيها كيفاه تدخل لدار وانا محدرها من قبل هادي دار تنساها وزيد تتهجم عليك_ هيثم خلاص هدن روحك ماصرا والو _ واش لازم يصرا ونتي تقولي كانت ماش في عقلها  كون دكتلك الموس فيك ولا كاشما دارت لرفيف واش راح ندير انا كيفاه راح نكمل حياتي بلا بيكم_خلاص رانا ملاح وزعاف ماعندو فايدة. ناض وبقا غير يعيط ونديرلها ونعمللها وندير وندير .هيا نوضي لبسي نديرلك سارتيفيكة بمعرفتي و اشكي بيها _كيفاه نشكي بيها قتلك خلاص فاتت روح خوفها بفمك برك وخلاص ماتقربش منها_درك نفسدلها خليقتها _هيثم ماتنساش راهي رافدة روح في كرشها _ماش ولدي مايهمنيش_بصح على حساب كلامها واثقة من روحها بلي طفل وليدك وقالت غير نولد تشوفو الحقيقة يعني مانضنش تكدب _ماش عارف ماش عارف وندمت على هاداك نهار ليرحت ليها _سكت ماحببتش نجاوبو ولا قدم قعد قدامي .فردوس زعفانة مني كيسمعتي بخبر الحمل تاعها _مايهمنيش فيك نتا درت اكبر من هكدا يعني الحمل تاعها جاني عادي ومتوقع بصح حاجة ماش فاهمتها علاه قاتلي كيتولد تخيرها هيا علاه ماقالتش يرجعني لعصمتو ولا لدار .
الحلقة 62
بقلم لينا صبرينة
خليك منها ماتخميش في كلامها وأنا عندي غير نتي ونتي لينكمل حياتي معاها ولو طفل لي في كرشها وليدي ماش راح نسمح فيك وراح نصحح أخطائي كامل وقبل خلينيي نروح ليها نحيلها المفاتح ونوريها عزرين كيف داير باه ماتزيدش تتجرأ تقرب منكم _هيثم خليني انا هاد المرة نتصرف معاها نتا تعرف غير الضرب والعنف _لالا انا نتصرف انتي مدخليش روحك ابقاي بعيدة عليها وعليهم _ خليني انا نتصرف ومبعد دير واش تحب_ واش راح ديري_لازم نواجهم ونحي هادي العقدة مانبقاش متخبية وراح تكون أول مرة وآخر مرة_حط يدو على يدي وقالي اوك وانا نوعدك نوقف معاك _تغدينا وهيثم رجع للخدمة ووصاني نغلق الباب من داخل وعارفة بلي راح ليها ماش راح يوفتهالها على خير _ عيطت لوداد حكيتلها واش صرا وقتلها عيطي غدوا لصوفيا ولياماها وهاداك ليتسمى أب يجو لداركم ونواجهم_كون تاخدي رايي خليك منهم اذا راح تحاسبيهم غير خليها لربي يتولاهم _ ديري كما قتلك برك علابالي راح نتضر بصح لازم ندير هاذي لخطوة باش نرمي كلش ورايا ونكمل حياتي كأنو غير موجودين _كيجاء فليل حكيتلو ماعجبوش الحال من قراري بصح قالي خليني نكون معاك ماتروحيش وحدك _لغدوا بكر لسبيطار وخلى واحد يحكملو بلاصتو ورجع ليا داني رحنا لدارهم  سلمت عليهم وقالولي عمي وخالتي خليك منهم خليهم لربي يخلص فيهم _متخموش في السلبي انا من غير حابة نجمد قلبي من جيهتهم ونبرد أسئلتي _كيسمعت الباب طبطب عرفناهم هوما مديت رفيف لهيثم وانا ووداد دخلنا للكوزينة .سمعنا صواتهم كيدخلو بصح ماقدراش نطل عليهم قلبي ضرني ماعرفتش كيفاه نقابلهم .دخلت علينا خالتي قاتلي جاو كامل حتا خواتاتك في 6 ومعاهم صوفيا من غير باباك ماكانش هيا دخلي لعندهم _روحي درك نجي .هيا خرجت وانا دورت لوداد لقيتها توجد فضيافة قاطو وباتيسري والعصير والفاكية وحليب وقهوة .اسمعي لمن درتي هادا الخير _ليهم علاه؟_منك بصح نحي كلشي مديلهم غير قهوة كحلة تسودلهم ايامهم _بقات تايهة فيا _هيااا واش تشوفي حطي غير قهوة وديرها بلا سكر مرة كما مرولي حياتي ليوم نهار تصفية لحسابات _بقات تضحك عليا ودارتها كما بغيتها وداتهالهم .دخل عندي هيثم جبدني لحضنو _فردوسة نوارتي واجدة ؟_ايه _هيا مالا ندخلو _درت شهيق وزفير وهو حكم يدي بالقوة .فردوسة ماتخافيش راني معاك وماش نسمحلهم يضروك ولو بنظرة _تبسمت معاه ودخلت ليهم بكل جرأة وثقة فألنفس وكأني امرأة قوية مايهزها جبل _ لقيت صوفيا وامها وبناتها كامل وكل وحدة وعمرها  _ناضو لبنات سلمو عليا كامل حتا لقيت يماهم قربت مني  كيلقيتها تقرب وتعكز برجلها حكمتني الخنقة وماقدرتش بقيت نتخيل كيفاش عطالها قلبها ورماتني وانا بيبي معندي لاقوة ولا شيئ .من غير حطت خدها على خدي نفرت منها بشكل رهيب ماحملتهاش _ وش راكي بنتي _من عند ربي لباس شوفي عبادو لمخلاونيش نعيش _خليتها واقفة ورحت قعدت جنب هيثم ليبقى حاكم يدي حتا هيا قعدت وصوفيا قدامها كون صابت هجمت عليا _نطقت يما ولو هادي الكلمة ماتستاهلهاش_ يابنتي اسمحيلي على واش دارت صوفيا وعلابالي عرفتي بلي حنا اهلك ماتقوليش بلي كرهناك بصح زواج صوفيا وهيثم كان لازم يتم على الأقل على جال الناس ونتي ولو كنتي بعيدة بصح بقيتي في قلبي قريبة  نتمنى تسمحيلي مام انا ولية وماعرفتش نتصرف  .شفت دموعها يسيلو بصح ماحركو فيا والو _شوفي ليوم ماجبتكش باش تطلبي مني سماح حبيت برك تجاوبيني على أسئلتي حابة نعرف علاه رميتيني كاين ام تفرط فضناها _ناضت تبكي بالصوت و قاتلي هذاك لوقت كنتو بزاف وباباك ماقبلكش وكيزدتي نتي مقدرناش على مصاريفك وزاد باباك كان يحوس على طفل وكجيتي طفلة قلب حياتنا معجبوش لحال وكان يوميا يعطينا طريحة وفرض وحتم عليا نرميك ماعنديش حل يابنتي من غير درت رايو وكيمرضتي اول مرة جاو عندنا المسؤولين تاع المركز باه نتكفلو بيك بصح باباك صدهم وحاوزهم وانا كنت كل يوم نموت الف موتة كيعدتي بعيدة ومريضة وحتا بعت ناس نعرفهم كانو يجيبولي خبارك وحتا المرة الثانية كيمرضتي جاونا ولقاو نفس الرد من باباك حتا قاتلي صوفيا بلي لقاتك وجيتك شفتك شحال من خطرة عارفة ماتقبلينيش كون تعرفي انا يماك بصح صدقيني ولا يوم رحتي من بالي تبقاي نتي بنتي كبدتي ليتحرقت عليها_(  كانت هي تهدر وتبكي وانا قلبي يتزير حسيتو راح يخرج من بلاصتو كلامها لقيتو متناسق مع كلام صوفيا .خلاتني نتقهر من ااحقيقة ليمالقيتش منها مبرر يشفعلهم ) -مالا  كنتي تحوسو على طفل وخفتو من مصاريفي . سبحان الله عذر اقبح من ذنب والله انا راها رفيف كون تخطيني غير دقيقة نفس تقطع فيا انتي كنت تاكلي عادي ترقدي تتنفسي تعرسي تزهاي تعيشي عادي ولى علابالك ودرك جايا تطيحي غي هادو دموع وتبرري  ونتوما يا خياتي واش درتلكم انا في حياتي حتا درتوني عدوتكم وليوم بكل وقاحة جايين مقابليني وتسلمو عليا .علابالكم  ماشفتش عايلة كما نتوما عندكم مشاعر باردة _نطقت وحدة فيهم_ واش خصك ياختي و حتى ورميناك وهاكي عايشة خير منا متزوجة طبيب جراح وجايبة معاع طفلة ووالديه سكنوك في فيلا ماتحلميش بيها وراجلك دايرلك دارك وحدك وشوفي غير روحك بوبية ماشاءالله كون قعدتي عندنا كون راكي صديتي كيفنا بعد وكيراكي تحاسبي فينا دمعة مطيحتيهاش علينا محوستي علينا ماشقيتي روحك.
الحلقة63
بقلم لينا صبرينة
ااا يعني عاجباتك حياتي تحسبي جاتني واجدة بصح وين راح تعرفي نتي واش فات عليا باش وصلت هنا باش راني هكذا ليوم غير بفضل ربي وعمو رابح ليلقيت فيه الخير ولحنانة خير منكم واذا على زواجي بهيثم فختكم صوفيا دارت واجبها كلو معايا مع سي راجلي وماخلاتنيش نهنى (في هاديك اللحظة نحيت يدي منو شغل زدت تفكرت وتفس تاعي عاد عالي من الغش) شفت ليها وزدت قلتلها واذا على دموعي متستاهلوش دمعة مني انا دموعي غاليين منطيحهمش على عيباد سمحو في طفلة في مهدها وزاد مانشقيش روحي نحوس عليكم مايشرفنيش تكون وحدة كما هاذي الأم تاعي. ليترمي ضناها موحال تكون ام فهمتو  .شفت فيها هيا و قتلها ودرك راه كلش على المكشوف مذابيك تحكمي بنتك عليا و مادام قدرتي تخيريها هيا تربيها وتسمحي فيا انا يعني تقدري  تزيديي تربيها من أول وجديد ومنا تولد هيثم راح يتصرف معاها اامهم ماتقربش منا هادي المرة فوتهالها بصح المرة الجاية نشكي بيها _ماش راح تزيد تبان في طريقك صايي درك غير تولد يطلقو فالمحكمة وغير طفل يبقى يربطهم مع بعض _ناضت صوفيا قالت الطلاق مستحيل يصرا وغير نولد نزيد نفكرك يافردوس شكون يطلق انا ولا نتي _خرجت وهيثم قالهم درك فردوس ديروها شغل ماش بنتكم اصلا ماشافت منكم والو غير المر ومامبا يوم تنازلتو وقربتو ليها مافهمتش كيفاه تخمو المهم كما قالت مرتي حكمي في صوفيا وماتخليهاش تزيد تقابلني لبارح رحمتها غير على جال ماش فارغة عليها راني حاكم روحي عليها وغير تولد وياااربي ونلقى البيبي ماش ولدي ساعتها ندفنها حية باسكو نعودو في قصة شرف وخيانة _نطقت يماها قالت لالا طلقها ياولوكان وليدك وماتقيسهاش تبقى صوفيا بنتي ليرضعتها وبنت خويا ليخلاهالي أمانة _(كيقالت هكدا زادت شوكاتني يعني لهادي درجة صوفيا تهمها كتر مني وماتسمحش لخدش يقيسها وتدافع عليها قداني وكأني ماش موجودة ) . هزيت روحي وخرجت وخليتهم رحت للكوزينة شربت الماء ورجعت اتفاسي بصح كيواجهتهم تهنيت حسيت براحة كبيرة وهم ونزال عليا .حتى لقيتو حضني من لور عرفتو هيثم حط وجهو في خدي . يالعميرة ليتعرف تهدر وتواجه فرجتيهم وقتلتيهم بلقدر وماقدروش يهدرو لازم تبقاي ديما قوية ماتخلي حتى واحد يكسر قلبك مهما كانت صيفتو _ اكيد هاذي هيا لحياة الدنيا مع لواقف لازم تكون ذيب باش تعيش في مجتمع كما هذا_وي عندك الحق .بعد مني وقالي هيا انا نروح نخدم راح لحال عليا ونتي تحبي تبقاي حتا ليل نجي نديكم _ايه _مالا اتهلاي في روحك _خرجت معاه راح وانا دخلت لقيت يما مع لبنات رايحين قدمت ليا قاتلي فردوس بنتي باباك ماجاش باسكو مريض _مايهمنيش_ والله كون ماش هو جامي نفرط فيك_نسقسيك كيعرفتي انا بنتك وجيتي لهنا سكنتي قدامي علاه ماجيتيش خبرتيني واش من قلب عندك بقيتي بعيدة وباردة من جيهتي_باباك ماحبش قالي راهي ساكنة فالعز خليها ماتخبريهاش ودرك نقولك يابنتي باباك طماع وحتى طمع في صوفيا من كانت صغيرة عليها قبل نربوها عندنا ودرك كما تقول هيا هو يقبل باسكو مسكنتو وموكلتو فهمتي درك وانا الله غالب عليا كون تخطيني صوفيا وين نروح حتا خواتاتك قدهم قد رواحهم _ماعليش درك مايهم والو ديروني شغل ماتلاقيتوش بيا _درك راكي براجلك وبنتك وكبرتي  حنا ماش راح نفيدوك كتر ماراح يفيدك راجلك _نطقت وحدة من لبات قاتلي ايه وجامي تعولي ولا تخمي ترجعي لعند باباك من لخر ماش راح يقبلك امرأة مطلقة عندو وفهمك كفاية _ماش معولة لا عليكم لا عليه نعول على نفسي ومعايا ربي نموت ومادخلش دياركم _كلامي ماعجبهمش ويماهم راحت قالت ماش قادرة توقف كتر وحتا قاتلي من ليوم نعودو نشوفو بعضنا بزاف وردي عليها في وجها كان الرفض وخلاتها على ربي . ولبنات كل وحدة واش هدرت معايا بصح مالقيتش منهم لحنانة كانت معاملتهم ناشفة وجافة كأني ماش ختهم ووجودي وعدمو نفس الشيئ وبالمختصر فهمت منهم يصرا واش يصرا مانروحش ليهم ماش راح نلقى الاستقبال إلا ادا كنت بدراهمي فهمت انو الطمع يمشي في عروقهم وهو السبب الوحيد ليخلاهم يتخلاو عليا وموحال نقدر نغفرلهم والشيئ ليصدمني فيهم مالقيتش محاولة منهم باه نسامحهم او يخلوني نتقرب منهم كان كلشي العكس ماش قابليني غير يماهم كانت ليها محاولة صغيرة بصح حسيتها عايشة غير باه تتنفس ترقد وتنوض ماعندهاش هدف أو شعور الأمومة ولقائنا تاع ليوم كان ماش مفهوم بلا احساس لو غيري ممكن راهي تبمي وتنظب وهونا يطلبو فسماح بصح حنا بدون تعليق __بعد ماراحو تهنيت جابلي عمي رفيف كانت عندو _نستعرف بيك بنتي قدرتي تواجهيهم ومتضريش نفسك _باسكو مايستاهلوش كانو أسئلة في راسي ولقيت أجوبتهم وخلاصت حكايتهم_مور الظهر دخلت لشمبرة رقدت رفيف ورقدت معاها حتا نوضت لعشية خلاص لقيتو ديجا العصر حتا من رفيف مازالها راقدة بديت نوض فيها بشوي حتا ناضت .
الحلقة 64
بقلم لينا صبرينة
بدلتلها وخرجتها حكمتها عليا وداد درتلها بيبرونة شربتها وخليتها تلعب قدام عمي ورحنا للكوزينة نتعاونو فلعشا و دايرين جو يهبل نشايخو ونضحكو وانا فعليا من هذيك للدقيقة ليخرجو فيها من دار رميت كلش ورايا وفتحت صفحة جديدة لحياة جديدة حتى ولو القدر ديما عندو رأي آخر__ فليل كيجاء هيثم تعشينا في رحبة ودرنا سهرة مع بعض وغير رقدت رفيف قالي هيا نروحو .غطيتها مليح خرجها لطونوبيل وانا لبست وبقيتهم على خير وخرجت لعندو ورحنا لدار .دخلنا هو حطها في بلاصتها وانا فتت دوشت بعدها خرجت نشفت شعري غير بالمنشفة وهو قاعد على سرير مقابلة لمرايا تاع لقوافاز _فردوسة_ممم_ راكي مليحة _ايه راني مليحة علاه تسقسي_ مانعرف شفتك هادية برك كأنو ماصرا والو ليوم _ ايه راني مليحة بزاف لدرجة راني خايفة _ ناض وقف قدامي قدام لاقوافاز .خير علاه تخافي _ماعلاباليش الهدوء ليراني فيه من داخل ماش مريحني وزيد والفت حياتي كلها دراما واكشن متوقعة مصايب جدد _ا ستغفري وبطلي من لخوف ونحي هادا تخمام كاين ربي فوق عبادو يحميك ويسرلك أمورك_ سبحانو_ بقا يشوف ليا وساكت .هززت براسي وشنو .قدم ليا نحالي المنشفة رماها وحكمني من خصري وحشرني مع لاقوافاز ويد يمشي فيها مع شعري ووجهي وتايه فيا وزيد قريب مني بزاف لدرجة انفاستنا تخلطو في بعضهم وبلا لمساتو ليكانت حنينة عليا وعلى قلبي البريئ ورجع من جديد يضرب فالألف_فردوسة علابالك الحاجة لينحبها فيك ومالقيتها في حتى انسان هي انك تعرفي تتغلبي على همومك وأحزانك وتقلبيها من ضعف لقوة هذي الحاجة ليخلاتني نعشق فيك اصرارك ومواجهتك ليا بالبرود المستفز خلاني نخمم فيك ليل ونهار .حبيت اسلوبك وقفتك وكلامك وعدم خوفك في وجهي تحديتيني فالوتر الحساس وقدرتي تملكي قلبي ليك وتحبسيه لهبيته بنارك وماشففتيش عليا كل خطوة وحركة منك كنتي ديريها انا كنت نحفظ فيها ونتابعها ولقيت عندك صبر لا حدود ليه وعندك قدرة تحمل كبيرة ورغم ضربي وعتفي ليك وفوق أوجاعك وآلامك بصح صلاتك ماتفرطيش فيها ومخلية ربي سبحانو يسر امورك وعارفة كنتي تدعي عليا وماش راح نلومك لأنو حقك ومالقيتش الشدة غير في ربي ومادابيا مام انا تقرب لربي سبحانو ويغفرلي ذنوبي _هيثم واش فايدة هادا لكلام _ حط صبعو على شواربي اششش ماتهدريش راكي تزيدي تشعليني ونزيد نتحرق كتر ونتعدب .نتي يافردوسة مرا قوية في تحدي مشاكلها نتي ماعندكش قوة الشخصية نتي هيا نفسها المرأة الجليدية الصنديدة خارجيا ليشوفك درك يقول راكي ماش ساهلة ويديرلك ألف حساب بصح داخليا نتي حنينة وطيبة بصح تصطنعي القوة وهاد الشيئ خلاك في عيني مرا قوية بمعايير قياسية _(من كلامو توضحلي انو هيثم قاريني وفاهمني وعطالي قيمة لنفسي عكس ناس ليتلاقيتهم صباح هنا قاسني مام انا فالوتر الحساس)قدم همسلي في وذني . فردوسة حبيبتي راني متواحشك موت سامحيني وعطيلي فرصة وقبل ماتمديهالي مدي فرصة لنفسك خلينا نبداو حياة جديدة وكلشي جديد محتاج منك رد درك غير بحركة وحدة منك باه ندخلك لعالمي الخاص الجديد ليكلو حب وحنانة وعاطفة وصدق _ في ثانية وحدة خممت في نفسي انا تاني من حقي نعيش سعادة وهادي الفرصة راح تكون خير ليا وراح نعيشها بكل هدوء وبكل تفاصيلها ونزهر حياتي بإطلالة جديدة. كيحس بيا بلي حطيت يدي على دراعو وشافني مستسلمة ليه قرب باسني وكانو مشاعر جدد بصح ماكملش وبعد مني متبسم وصدمني كيقالي مانقدرش لازم نعاودو حساباتنا .راح هز الفيستا ومفاتحو وخرج لبرا وخلاني في بلاصتي محجرة متحيرة مافهمتش علاه دار معايا هكدا .في دقيقة شبعت ندامة اني قبلت نمدلو فرصة ونسلملو نفسي والشيئ ليمحيرني ساعة وهو يتغزل بيا ويحاول باه نتقرب منو وفالأخير كيوصل من اجابة ايجابية مني تراجع وخلاني .بقيت كتر من ساعتين وانا نغلي وحدي من داخل راح ننفجر ماش منو من نفسي انا حمارة بغلة رجعت صدقتو حتا زاد هدم الثقة ياربييي العالي ويييين رااااح وييييين هبلت من الجاست تاعو وزيد مارجعش وييين همل  .وانا غارقة في تخمامي وصلني ميساج كيقريتو رجعني لنقطة الصفر .
_______
الحلقة 65
بقلم لينا صبرينة
بعد ماحسيت بالخدلان والغدر للمرة الثانية وانا في وسط ندامتي وصلني ميساج كيقريتو استغربت وتفاجأت وفي نفس الوقت رجعتلي روحي وريحت (فردوسة نوارتي غدوا راح نرجع نفتح عليك من جديد وجدي روحك ومنها تكون بداية جديدة ونرجعو لنقطة الصفر ونعيشوها في حب ومودة ورحمة ) ميساجو فاجأني صح بصح علاه ماعيطليش وعلاه يرجع يفتح عليا مافهمتش؟ عاودت عيطتلو هز عليا ديراكت _علاه تعيطي فردوسة انا غير نصبر في روحي وقتاه تخلاص هادي ليلة ونتي تعيطي تسمعيني في صوتك باه تهيجيني _اصبر ساع واش هادا الميساج علاه تعاود تفتح عليا _خلي لغدوا ونفهم حبيبتي _نن درك _ اوك مالا سمعيتي وماتقاطعينيش راح نرجع تفتح عليك باسكو كاين ناس فتاولي وكل واحد والفتوى تاعو قالك زواجي بصوفيا من البداية باطل لأنو تعتبر ختك برضاعة ولو مارضعتوش في نفس الفترة ويماك قاتالي بلي رضعتك وماشفاتش شحال من رضعة وهادا سبب ليخلى يماك فالأول ترفضني خافت من لحرام بصح شيخ فتالها بلي حلال عادي يصح زواجنا عليها فالأخير قبلت واصلا حساب كلامها حبتني نتزوج بنتها ياولوكان فلحرام نستر عليها قدام ناس ومبعد نطلقها المهم ناس مايهدروش عليهم وعلى شرفها لي أنا سلبتو _كل مرة هادي الأم نزيد نكرها بيها بهاديك الخبيثة_خلاص فردوس هوما ماش موضوعنا المهم مادام فيه شك انو زواجي من صوفيا باطل ودخلتها لدار وشفتيني معاها قدام عينك تعتبر زنى وهنا انا عصيت ربي بلا مانفيق ونتي كاين شك انو تحرمتي عليا لانو العلماء كيفتاو إختلفو فالرأي يقولو ادا الراجل زنى بمرا خلاف يعني فهنا مرتو تحرمت عليه عليها درك باه نحو الشكوك كامل لازم نعاودو كلشي من جديد وقبيل برك كنت انا وبابا مع شيخ كبير وجهونا ليه قالنا نفس الهدرة باه نرتاح نرجع نفتح عليك وخلاص هكدا نعيشو فلحلال وربي يباركنا غي زواجنا وحياتنا _اوك فهمتك بصح كيفاه درك صوفيا ماهيش مرتك وكنت معاها فلحرام _ايه هكدا فتاولي بصح ماش راح ندي ذنب عليها ماكنتش عارف غير هيا ويماها ليعلابالهم يدو ذنوب وحدهم وانا كيعرفت حاوزتها من دار وحاب نطلق وهاد ليام نرفع قضية طلاق ونحط فالعريضة بلي خت مرتي بالرضاعة مايصحش نكملو زواجنا ولو عارف بلي يطولو باسكو هيا رافضة طلاق _درك وين فهمت علاه كانت تقولي بلي راح تخيرها هيا ماش انا يعني علابالها بلي لازم تختار وحدة فينا باه يصح زواحك _ايه واكيد بلا تخمام ختارتك نتي وهيا ولو طفل لي في كرشها ولدي مانحتاجهاش و ماش راح نسمح فيك _ربي ورحمتو ودرك نتا وينك _روحي طلي من تاقة تاع شمبرة تشوفيني تحت دار _ رحت دخلت لشومبرة تاعو وطليت شفتو مقاري لتحت ومخرج راسو دارلي باااي _واش دير اطلع _واش كنت نهدر من قبيل حتا نفتح عليك باه نجيك كون نطلع عارف ماش راح نحكم روحي عليك _دخلت وقعدت على سرير .وين تبات مالا _فطونوليل ماش حاب نبعد عليكم خليني نعيش معاك الحب والعشق من لبعيد وتكون هادي الليلة ليلة العزوبية _راك من نيتك _بيانسور من نيتي كون تعرفي شحال سقسيت من شيخ رحت ليه وعيطت وكل واحد واش يفتي بقا غير الشيخ شمس الدين ماسقسيتوش عارف كون وصلت ليه وسقسيتو يقصفني قصف ثلاثي الأبعاد ويبخص بيا ويدير بيا نكتة طويلة عريضة وفالأخير يرمي عليا دعوة شر والمشكل مانلقاش اجابة  _تستاهل وزيد مستعرف بروحك _ايه عارف بلي غالط وظلمتك وعدبتك وراني نادم وطالب العفو والمغفرة _ربي يسامحك _ ونتي ؟؟_ماتضغطش عليا نخلوها ليام _اوك فردوسة رجعتي لبيتك _نن راني فشمبرة _روحي لبيتك خير _علاه _ديري واش قتلك برك _خرجت من الشمبرة ورحت للبيت شغل فهمتو ماش حابني نبقى فيها باه مانتفكرش هادوك ليام السود _فردوسة غدوا انا عريس وعروستي هيا نتي واجدة نبداو من جديد _ان شاءالله _عارفاك مازلتي خايفة بصح اطمني ماش راح نزيد نخون ثقتك فيا وراح نعوضك على كلشي فات وكما قتلك فرحي روحك قبل ماتفرحيني اوك متفاهمين _ايه _ اااه يافردوسة رجعتي قلبي غارق فيك شعلتيه بنارك وخليتينيي نجري باه تطفنيي بقيت نحلل ونحاول فيك واش عملتي فيا رجعتيني صغير في كبري قلبي راه فرحان وفراشاتو يطيرو والليلة راني سهران معاك مهموم وسارح في خيالك جربت سنين طويلة ماقدرتش نحيك من بالي _ضحكت من قلبي كيقال هكدا . هيثم راك تشعر وتتغزل ولا راك تغنيلي في اغنية سهران معاك تاع احمد شريف .من قلتلو هكدا ناض يضحك بالصوت _فقتيلي يامحاينك حاجة ماتغيب من بالك ايه هيا كنت نسمع فيها قتلك طيرتيلي قلبي والفيوزات لي فيراسي حرقتييهم .هيا فردوسة والله صح روحي ترقدي غدوا يستنا فينا يوم طويل وليلتنا راح تتجدد واكيد برضايتك _اوك مالا تصبح بخير _ونتي نن اهل الخير نوارتي بوسيلي رفيف _ان شاءااله .كوبيت وبقيت نخمم في كلامو يعني قبيل كيسلمتلو نفسي جاتني ساهلة بصح كيبقيت نخمم فيها بلي راح تصرا غدوا جاتني صعيبة وبديت نخاف ونرجف من رجوعنا باه نجددو علاقتنا من الصفر ومنها خوف كبير اني مانقدرش نكون ليه زوجة وعقلي يحارب فالماضي المر ليعشتو معاه .