طفولتي چانت قاسيه بحكم اني الحفيد الأكبر من ناحية عائلة الاب والام طفولتي چانت عباره عن مشاكل ومسؤوليه چبيره بس تحملت وصرت قدوة لاخوتي وأولاد أعمامي واخوالي، چان حلمي أكبر واتخرج واصير ضابط مثل ابوي وفعلا درست وتعبت وصرت ضابط مع انه چانت مشاكل بخصوص هالشيء امي تخاف عليه وابوي يريدني اصير نفسه وكبرت المشاكل بين امي وابوي بحيث رادت توصل للطلاق بس ربي ستر بالأخير امي اقتنعت وصرت ضابط بعمر 23 سنه تحملت مسؤوليه أكبر من عمري بهواي وعرفت معنى جملة "الحياة العسكريه" وأخذت رتبة الملازم بعمر 25 سنه وبعدها ترقيت ملازم أول... الخ، إلى بهذه السنه صارت فاجعه كبيره وهي موت ابوي واختي وزوجة اخوي بحادث سير عند رجوعهم من محافظة كربلاء المقدسه ما انسى وقتها انا بالشغل وتعبان تعب ماصاير واتصل علي عمي الجبير وگال آسر البقيه بحياتك ابوك واختك وزوجة اخوك توفوا وحاليًا احنه بالمستشفى تريد تاخذ اجازه وتجي تشوفهم تعال بسرعه ولاتتأخر... جان هذا الاتصال اللي تمنيت ميت ولا سامعه وبحكم شغلي بمحافظة الناصريه وأهلي جانوا بالبصره جان الطريق طويل علما أوصللهم اقل شيء 5 ساعات يلا اوصل وطبعا مستحيل تبقى الجثث لهذا الوقت بدون تغسيل وتشييع، بالطريق جنت مصدوم لدرجة دمعه وحده مانزلت مني طمنت روحي وگلت هسه اروح ويتلگاني ابوي واختي مثل كل مره انزل بيها من الشغل بس صار العكس وصلت وياريتني ماوصلت وصلت للبيت وسمعت صراخ نسوان ورجال وبيارغ وناس بعدد كبير وايضا دوريات شرطه وجيش بحكم ابوي جان عقيد هنا تأكدت هم ماتوا شلون تأكدت؟ شفت 3 توابيت واحد بيه اختي الشابه وواحد بيه ابوي حبيب گلبي وواحد بيه زوجة اخوي العروس بوكتها تركت أعمامي والتشييع والناس والهوسات اللي صايره كلها ورحت لغرفتي اول ماوصلت سديت الباب ونمت على جربايتي وانهاريت بالبكاء جانت اول مرة ابجي بيها من بعد 4 سنوات تقريبًا لان المعروف عني شخصيتي قويه وصبور واتحمل كلشي يصير بس هنا ماتحملت ماگدرت الزم نفسي معقوله؟؟ معقوله ابوي يروح؟ اختي وزوجة اخوي يرحن ؟ شلون ماگاعد استوعب والله قبل الحادث ابوي يتصل عليه يگلي بويه اسوري حبيبي انتبه لنفسك ولا تسوي أخطاء واختي تتصل تگلي شتريد اجيبلك من كربلاء وانا اگلها اريد بس سلامتج، المهم عدت هاي الايام ومادري شلون عدت واجه الوقت اللي استلمت بيه رتبة العقيد بعمر 39 سنه صح جان عمري صغير على هالرتبه بس شافوني گد المسؤوليه رحت للمگابر ورحت يم گبر ابوي گتله بويه صرت نفسك معقوله ماتگعد تبوسني من راسي وتگلي عفيه وليدي الرافع راسي معقوله بويه؟ واختي ماتگعدين مثل كل مره تتلگيني من اترقى لرتبه وتذبين فوگي جكليت وورد وتگليلي خويه رفعة راسي انت؟ ليش ياخويه هيج ليش والله بعدج صغيره وماشبعنه منج والله
الدعاء والفاتحة جزاكم الله خير الجزاء
اوووه! هذه الصورة لا تتبع إرشادات المحتوى الخاصة بنا. لمتابعة النشر، يرجى إزالتها أو تحميل صورة أخرى.
