أرويني بدماء جحيمك [Quench me with the blood of your hell]

𝑃𝐴𝑅𝑇❀115

🩸أࢪوينـــــــي بدمــــ♡ـــاءِ جحيـــــــمكَ🩸     

🫀الفصـل الثالــث و الأخيـࢪ:دَع القَلْـبَ يَهْـــوَى🫀

     ♡لَـوْ ذقـت يا غزالـي،ما ذُقْــتُ في هـواك♡

✎𝑆ℎ𝑒 𝑊𝑜𝑙𝑓
𝑃𝐴𝑅𝑇❀115

توقف عن الحركة بل توقف حتى عن التنفس، فقط بؤبؤ عيونو لي كي تحركو بوثيرة سريعة و هو كي حقق فيها بتمعن و كي حاول يلقا فيها اختلاف واحد فقط و يقنع راسو بلي ماشي هي، لكن كلشي فيها كي دل بلي ديك لي فالبالكون هي ليليان، طولها، شعرها القصير و لونو، ملامحها و حتى جسدها...

بلع ريقو ملي بداو مشاعر الغدر و الخيانة كي حاوطو حواسه، بدا الغضب كي تملك قلبو و الاستياء كي سيطر على عقلو، و من الحرقة لي كي حس بيها فهاد اللحظة اول حاجة فكر فيها هي يضغط على الزناد و يتيري فيها...

حط عليه صبعو ناوي يزهق روحها ملي لقا راسو ما قادرش يتحمل حقيقة انها طوال هاد الوقت كانت كاتمثل عليهم، طيبتها، حنانها، خدمتها و كلامها ، كلهم مجرد أكاذيب لا أكثر...

تشنجو ملامحو و زير على فكو حتى برزو عظامو، غمض عين و ركز البندقية على الهدف و لي هو ليليان، صبعو على وشك يضغط على الزناد و غير لمح البنت لي دخلات من وراها و هو يحيد يديه بالخف و عقد حواجبو بإرتباك، بقا كي شوفيهم و هما واقفين حدا بعضياتهم و كي دويو و من ملامحهم باين بلي كلامهم جدي...

هنا عتادل فالوقفة و هز تيليفونو كي صوني على پاردو باش يتأكد من المعلومات لي صيفط ليه، هاد الاخير لي من ورا لحظات قليلة جاوب و نطق بتساؤل...

پاردو: لقيتيه؟

العقرب(بإستفسار): متأكد من داك العنوان لي صيفطتي ليا؟

پاردو: واقيلا اه علاش؟

العقرب(زير على تيليفونو و نطق من تحت سنانو معصب): كيفاش واقيلا؟ تأكد ليا ا ز بي الدار فيها جوج بنات...(وجه انظارو لليليان) و وحدة منهم مستحيل تكون هي...

پاردو(حك حاجبو بحيرة): بنات؟ بلاتي نشوف گاع...

قطع معاه و دخل يتأكد من المعلومات لي وصلوه في حين العقرب تقابل مع المبنى لي قدامو و بقا كي حقق فليليان و العرق من جبينو هابط من فرط التوتر و الخوف، و بينو و بين نفسو كي دعي لله باش ما تكونش هي، حتى سمع صوت الهاتف ديالو كي صوني و سرط ريقو بذعر شديد قبل ما يجاوب و ينطق برجفة صوت...