في استديوا في الرديوا كان جالس المذيع والاستاذ الدكتور النفسي وخبير الروحاني وخبير علوم الطاقة الدكتور محمود
المذيع :لو مرت بشيء غريب لو مرت بشيء غير منطقي لو شفت حاجه ومش عارفها تفسير لو حاسس ان في حاجه جوه المرايا بتكلمك لو حاسس انك مش لوحدك مع انك لوحدك اتصل بينا ومتردتش واحكي حكايتك واحنا هنعرضها علي الالف المستمعين ال بسمعونا
يرن جرس الهاتف
:الو
المذيع: اهلا وسهلا اتفضلي
:مش هقول اسمي
المذيع:تحت امرك اتفضلي
:انا عايزة اتكلم مع الدكتور محمود
المذيع:الدكتور معاكي
محمود :اهلا وسهلا اتفضلي انا معاكي
:دكتور انا متجوزة وفي مشاكل كبيره جدا مع جوزي
محمود :مشاكل ايه
:مش عارفه انا فعلا مش عارفه بتلككلي علي اي شيء المشكلة بتبقي تفه هو بقعد يكبرها ويتعارك معايا وكلامه بعصبني فانا برد عليه هو يرد عليا المشكله تكبر اكتر يقوم ضربني أو يكسر حاجه واهي الدنيا
محمود :طيب منا مش فاهم ايه انواع المشاكل
: حاجات كتير واحيانا تلكيك واحيانا فاضي بطلعهم عليا دكتور احنا كل يوم كده
محمود :انتي ازاي متحمله كده
:مش عارفه انا تعبت مبقتش حمل مشاكل
محمود:طيب كملي
: دكتور ده كان هيحرق البيت جاب جاز وانا نايمة في الاوضة وحط الجاز عليا وعلي السرير وحط الجاز في الاوضة كلها وكان هحرق الاوضة ويحرقني انا قمت علي اخر للحظة نطت من علي السرير لاقته مسك عود لكبريت وثانية وهولع مسكت الكبريت من أيده بسرعة دكتور انا تعبت كان هيحرقني
محمود :ايه ده !ازاي كده طيب عملتله ايه علشان يعمل كده
:ولا حاجه اصل انا جميلة هو ده المبرر عنده
محمود:لا حول ولا قوه الا بالله
:اخويا منعني أكلمه وبقوله هروح لاخويا بقولي مش هتروحي ليه علشان هو زعلان منه فاعايزني مكلموش علشان هو مش بيكلمه طب انا مالي بالخلاف ال معاه وهو اصلا من حته تانيه مش عايز اني اروح علشان ابن عمي بقي هناك طب ابن عمي ده متجوز
محمود :ايوه عايز تزعلي علي زعله وكمان غيران عليكي
:ايوه ومشاكل من دي كتير بقي وانا خلاص جبت اخري منه
محمود :طيب انتي عندك اطفال
: عندي تلات بنات صغيرين
محمود :الله يبارك فيهم طيب انتي بتحبيه
:مش عارفه اقول ايه
محمود :انتي بناتك كام سنه
:١٠سنين و خمس سنين وسنه
محمود ؛ماشاء الله الله يحفظهم
:تسلم
محمود :طيب هو اصلا كان كده في أول الجواز ولا اتغير
:لاء لاء هو كده من اول الجواز بس انا ال مكنتش عايزة اطلق علشان كنت لسه عروسة وكده
محمود :طيب هو انتوا كده غالبا مش متفاهمين مع بعض اصلا مفيش تفاهم بينكم ولا انسجام بتقوليلي كان هحرقك الأفضل انكي تحاولي تتفاهمي معاه وأرضيه شوفي ال حاجه ال بترضيه واعمليها وقوليله حاضر وخلاص حاضر بتريح بس انا مستغرب انتي ازاي لسه عايشة معاه بعد محاولة حرقك
:دكتور هو عامل مشاكل مع اخويا ومقطعني من أهلي وحاجه نيله وكمان اخويا متجوز هو لما كنت اتكلم مع اخويا يتعصب ويقولي مش تكلمي معاه بعد كده راح لاخويا واتبلي عليا وقاله اني شتمتهم وقلت كذا وكذا علشان يقطعني من اخويا وانا اصلا مش قلت الكلام ده عليهم اقسم بالله
محمود :اخوكي كمان غيران عليكي منه
علشان كده انتي مش قادره تمشي والله الله يكون في عونك واخد بيدك بس حاولي ترضيه وخلاص كلمه حاضر بتريح وتجنبيه وحاولي مترديش عليه كتير
:حاضر هحاول
محمود:انتي متجوزة بقالك كام سنه
:١٤سنه
محمود :ايوه طيب وهو خلال ١٤ سنه دولات متغيرش
:لاء لاء
محمود :هو حاول يذيكي بعد موضوع الجاز وكده
:ايوه برضوا حصلت مشكله بينا وانا واقفه رمي الجاز عليا ومسك عود الكبريت وكان هولع فيا برضوا وانا شدته من أيده بسرعة
محمود :دي مره تانيه هو في ايه هو مصمم يحرقك
:ايوه ده مريض في دماغه سمعته بقول لصحبه في التليفون هي جميلة وجمالها ده هو السبب في كل حاجه
محمود :يا نهار ابيض ده انتي لازم تخافي علي نفسك منه ده عايز يشوهك علشان انتي جميلة بس يشوهه ايه انتي لو ولع فيكي ممكن تحرقي وتموتي
:والله الحمد لله الاعمار بيد لله يا دكتور
محمود :ايوه اكيد بس خلي بالك علشان ممكن يرمي علي وشك حاجه او كده
:حاضر هو بقولي انتي جميلة جدا وده مش هينفع كده جمالك ده مش هستنه عليه انتي جمالك جمال مستفز
محمود : خلاص يلبسك النقاب إنما يحرقك ده مريض في دماغه مش عاقل ده
:مش فارق معاه النقاب هو عايز يشوهني
محمود :خلي بالك علي نفسك انا خايف عليكي
: علي الله خليها علي الله
محمود: اكيد بس احذري منه
:حاضر يا دكتور كمان مش بيخلني اكلم صحباتي البنات ال زيا يقولي متكلمش معاهم ولو سمعني بكلمهم يضربني ومنعهم يجوا البيت
محمود :غيران عليكي بس مش كده يعني الموضوع وصل معاه أنه عايز يشوهك احذري
: كمان مره كنت بوري صحبتي لون شعري علشان تعمل نفس اللون لما عرف ضربني وقص شعري
محمود : ياخبر بقولك هو غيران عليكي بس قلب معاه بجنون احذري منه بقولك
:ايوه دكتور انا كنت اشترت خاتم صحبتي شفته قالتلي حلو جدا علي ايديك هو سمع مسك الخاتم كسره وضربني
محمود :يا نهار ابيض انا قلت لكي هو غيران عليكي وقلب بجنون علشان كده عايز يذيكي و يحرقك و يشوهك الغيرة قلبت بجنون احذري منه
:دكتور ده قبل كده كان بغلي مياه وانا كنت في المطبخ عمل نفسه هيقع علشان يرمي المياه المغليه عليا بس انا خرجت بسرعه من المطبخ ومياه وقعت علي الأرض
محمود:يا خبر انا قلت لكي ده خطر عليكي ده هو الغيرة عليكي واكله وجننته خلاص ومن الحب ما قتل ارجوكي خلي بالك من نفسك في جانب من الحب جانب دموي وده طريقة حبه ليكي
:دكتور انا عادية انا مش حلوه لدرجدي
محمود :انتي بنسبلك شايفه نفسك مش حلوه بس بنسبله هو شايفك جميلة جدا هو شايفك حلوه وغيران عليكي هو بحبك بجنون وغيران عليكي بجنون علشان كده وصل أنه عايز يذيكي علشان محدش يشوفك حلوه وده بدافع الحب شايف أنه اذيتك هيلبي عنده الشعور بتملكك الحب ده بقلب باذية هو حب مؤذي بدافع الحب الحب ده مميت احذري منه
:حاضر يا دكتور هو كمان لما بكلم خالتي ست كبيره في سن بعتبرها امي لما بتكلم معاها في التليفون يتعصب ويقولي متكلمش معاها
محمود :غيران عليكي من خالتك
:ايوه ومنعني اروح لها اصلا من غير سبب هو كده
محمود : ايوه خلي بالك من نفسك هو شغال ايه
:شغال في شركة
محمود :ايوه خلي بالك من نفسك
:دكتور والله انا مش حلوه لدرجه دي انا عادية جدا بالعكس في بنات احلي مني
محمود :بس هو شايفك جميلة بقي هتعملي ايه انتي جميلة في عينه ومفيش اجمل منك عنده الجمال اذواق هو شايفك جميلة انتي شايفه نفسك لاء مش هتقدري تغيري نظرته ليكي
: ايوه
محمود: طيب هو شكله حلو أو مقبول
: هو شكله حلو وهو استايل جدا في لبسه
محمود: ايوه
: طيب ايه رأيك لو اطلب الطلاق
محمود :طلاق مين لاء طبعا اوعي تعملي كده لو طلبتي منه الطلاق هقتلك هموتك انا فاهم دماغه
:طيب تمام طيب لو اشتكته
محمود :مش هفيد مش هيعملوله حاجه لانه هو محرقكش محاولات و مش تمت وانتي معاكش دليل بالكلام ده عادي هقول انا معملتش كده دي بتبلي عليا مفيش اي اثار في جسمك هيطلع منها بربع جنية انتي سليمه هو ملوش حل لانك لو حاولتي تبعدي عنه هقتلك انا ممكن اقولك اخلعيه وجو ده بس مش مع الشخصية دي انا كده هيبقى بذيكي لانه هقتلك عارفه هيبقي عايز ينتقم منك هستهدفك نزله في الشارع مثلا يضرب عليكي رصاص أو يدبحك او يضربك بالسكينة او مثلا يجي عند بيتكم ويرمي بنزيم ويولع فيكم انتي واهلك انا عارف شخصيته هو مش هيفرق معاه يتسجن أن شاء الله يتعدم فيكي ولا فارق معاه اصلا عادي انتي ال هتخسري
:حاضر هو كده فعلا دكتور هو سجني في الاوضة اسبوع قبل كده وقفل عليا الباب تخيل حبسني
محمود : ليه عمل كده
:علشان مخرجش هو احيانا الحاله بتزيد معاه جدا يسجني يدخلني الاوضة ويقفل بالمفتاح الباب عليا بالايام بقي علي حسب مزاجه
محمود :طيب هو عملك سجن في البيت طيب لما بسجنك بضربك او بحاول يذيكي
:ايوه يضربني هو عامل لي اوضة مخصوص في البيت عملها سجن ليا
محمود :الله معاكي خلي بالك من نفسك تاني بقولك هما فين أهله
:عنده ابوه واخين مامته متوفيه
محمود :طيب انتي ليه مش بتشتكيه لابوه ده يكلم معاه
:ابوه ملوش لازمه اصلا كلمته كتير يقولي انا مالي يابنتي باللي بينكم انا مليش دعوه بس علشان خاطرك حاضر هتكلم معاه ومش بيكلم معاه اصلا هو جوزي انا بسمعه بتصل بابوه ويقعد يشتكيله مني دي عملت وعملت هو بيحكي لابوه كل شيء بيحصل وابوه عارف كل شيء وبنسب له عادي
محمود :يعني بقوله ايه
:هو عنده مبرر لكل ال بعمله معايا عنده مبرر انا بعمل فيها كده علشان كذا كذا مبررات علي طول وابوه مقتنع بكلامه وأفعاله عادي جدا هو انا كلمت ابوه وقلت له أنه هو بيسجني في الاوضة ويقفل عليا بالايام عارف ابوه رد عليا قالي ايه
محمود :قالك ايه ابوه
:قالي معلش يا بنتي اصل الدنيا مش امان بقولك يا بنتي انا عندي السكر والضغط قلت له ابنك مش بيخلني اكلم صحباتي البنات ولا اقابلهم يقولي وانتي عايزة تصحبي علي البنات ليه مش هفيدوكي اتصحبي علي بناتك
وانتي بتوري شعرك لصحبتك ليه عملتيه لون جديد لنفسك بتوريه لصحبتك ليه انتي بتستعرضي بشعرك ايه يابنتي ده قلت له هو بحاول يحرقني ابنك هموتني يقولي يابنتي يحرقك محرقكش وانا اعمله ايه يعني انا ايه دخلي يابنتي شوفي انتي بتعملي ايه الاول قبل لما تجي تكلمي عنه رجعي أفعالك
قلت له ابنك مجنون قالي يابنتي مجنون او عاقل انا نفسي اعرف انا ايه دخلي في ال بينكم يابنتي انا مريض بالقلب قلت له الف سلامه عليك يعني انت هتسيبه يحرق في بنات الناس يقولي يابنتي وانا اعمله ايه يعني
