နောက်တစ်နေ့မနက် လင်းကြက်တွန်ချိန်ရောက်တော့ ထုံးစံအတိုင်းရှင်ဘုရင့်စားဖိုဆောင်ထဲဝယ် ကြော်လှော်ချက်ပြုတ်သံများဖြင့်အလုပ်ရှုပ်လို့နေသည်။ ဝတီတစ်ယောက်မှာလည်း စားဖိုဆောင်အလုပ်များကိုကူလုပ်ပေးရင်း ညကသခင်မပြောတဲ့စကားများကိုသာကြားယောင်မိတော့သည်။ ဒေဝဘုရင်ရဲ့နောက်ထပ်ပစ်မှတ်တိုင်းပြည်က မိမိတိုင်းပြည်ပင်မဟုတ်ပါလား။ ထို့ကြောင့် ဝတီတစ်ယောက် ဒီသတင်းကို ဖခမည်းတော်ပြည့်ရှင်မင်းကြီးထံသို့ပေးပို့ရန်လိုအပ်ပါသည်။ သို့မှသာ ဒေဝဘုရင်ရဲ့ရန်ကနေကာကွယ်နိုင်မည်မဟုတ်ပါလား။ ထို့ကြောင့် ဝတီလည်း စားဖိုဆောင်ကနေအပြင်သို့ခဏထွက်ခွာမည့်နည်းလမ်းကိုစဥ်းစားနေလေသည်။
"ဟေ့ ဒီနေ့အပြင်ထွက်ပြီး စျေးဝယ်ဖို့အလှည့်ကျတာကဘယ်သူတွေလည်း"
စားဖိုဆောင်အကူတာဝန်ခံဖြစ်သော မယ်ရွှေမိထိုသို့ဆိုလိုက်တော့ ဝတီရဲ့မျက်နှာကဝင်းလတ်သွားလေသည်။ ဟန်ကျလိုက်တာ။ ငါက အပြင်ကိုထွက်ချင်နေတာလေ။ အခန့်သင့်လိုက်လေခြင်း။ သို့သော် အပြင်ထွက်ရမည့်အလှည့်မှာမိမိမဟုတ်ပေ။ ထို့ကြောင့် ဝတီလည်းဖြတ်ထိုးဥာဏ်သုံးရလေသည်။
"မမရွှေမိ အကျွန်ုပ်လည်းလိုက်လို့ရမလား။ အကျွန်ုပ်ကအသစ်ဆိုတော့ နားမလည်သေးလို့လေ။ နောက်တစ်ခါအကျွန်ုပ်အလှည့်ရောက်လာရင် လုပ်တတ်ကိုင်တတ်အောင်လို့ပါ"
ဝတီ့ရဲ့စကားကို မယ်ရွှေမိက ခေါင်းငြိမ့်ကာထောက်ခံလိုက်လေသည်။
"ကောင်းပီလေ အသစ်ကလေးရဲ့။ လိုက်သွားချင်လိုက်သွားပေါ့ စျေးဘယ်လိုဝယ်ရတာလည်းဆိုတာကို သိသွားတာပေါ့။ ဒါဆို မယ်ဘုတ်နဲ့အတူလိုက်သွားနော်"
မယ်ရွှေမိစကားအဆုံး၌ ဝတီရဲ့မျက်နှာလေးကပြုံးယောင်သန်းသွားလေ၏။ ဒါဆိုရင် ဖခမည်းတော်ထံ ဒေဝဘုရင်ရဲ့သတင်းကို တနည်းနည်းနဲ့သတင်းပေးလို့ရပြီပေါ့။
သို့ဖြင့် ဝတီ၊မယ်ဘုတ်နဲ့ မယ်စာဥတို့သုံးယောက်သား စျေးဝယ်ရန်အတွက်ရှင်ဘုရင့်နန်းတော်မှ မြင်းလှည်းဖြင့်ထွက်ခွာလာခဲ့ကြသည်။ စျေးကြီးထဲသို့ရောက်သောအခါ မယ်ဘုတ်နဲ့ မယ်စာဥတို့က ဦးဆောင်ပြီး အသီးအရွက်တန်း၊ အသားငါးတန်း၊ ဟင်းခတ်အမွှေးအကြိုင်တန်းစသည်စျေးဆိုင်တန်းများသို့သွားကြကာ လိုအပ်တာများဝယ်ယူကြလေသည်။
YOU ARE READING
ဒေဝီသခင်မ
أدب تاريخيလူတစ်ယောက်ရဲ့ အတိတ်နဲ့လာမယ့်တစ်နှစ်တာအတွင်းဖြစ်ပေါ်လာမယ့် အနာဂတ် သို့မဟုတ် ယခုလက်ရှိပစ္စုပ္ပန်ကာလကိုကြိုတင်သိမြင်နိုင်စွမ်းရှိသော၊ စစ်ပွဲများ၏ အနိုင်အရှုံးကိုကြိုတင်ဟောကိန်းထုတ်နိုင်စွမ်းရှိသော နတ်ဆရာမလေး နန်းဒေဝီနွယ်။ ရဲစွမ်းသတ္တိသာမက လက်ရုံးရည်၊နှ...
