بنت الاوراس 🤍💎
للكاتبة جنة
.
.
.
.
.
.
.
السلام عليكم انا بنت الاوراس هكا تعيطلي ماني
وسمي فالاصل صفية عشت حياتي من وانا وصغيرة مع بابا وماما في فرنسا
بابا شاوي من الاوراس وماما قبايلية
بابا هو الصغير فخاوتو مدلل جدي خلاه يكمل قرايتو عكس عمومي لي كانو مهتمين بالارض والفلاحة
بابا راح لفرنسا وثما تعرف بماما وتزوجو ورجعو للبلاد .
جدي ثما قاطع بابا ودابزو باسكو عندهم العروشية وممنوع يزوجو ببرانية
ايا متفاهموش وجدي طرد بابا من الارض ورجع لفرنسا مع ماما وكملو عاشو ثماك حتى جيت انا للدنيا بعد 3 سنين من زواجهم انا الوحيدة تاعهم عشت وكبرت بيناتهم لي نتمناها تحضر جامي بخلوني بحاجة. عشت وسطهم فالقطن حتى لي جا النهار وماما مرضت ودخلت لسبيطار مدة شهر والسبب مجهول بالاحرى هوما خباو عليا حتى سمعتهم صدفة .
يما كان عندها السرطان عافانا الله واياكم بدات تدير فالعلاج الكيميائي وحالتها كل يوم تروح للاسوء كنت انا وبابا داعمين ليها حاولنا بكامل واش نقدرو نكوراجيوها باه تكمل العلاج وين وصلت لمرحلة زادت حالتها سوء وطلبت منا نرجعو للبلاد بين اهلها وناسها . كيما كان الحال رجعنا لدزاير لبيت جدي ام ماما فالجبال المناظر بزاف شابة مالقري ماش موالفة المعيشة هنا مي يما ساعدها بزاف الجو هنا حتى ملامح وجهها تحسنت شوي
صفية: ماما راكي شابة اليوم
فادية : وعلاه يا بقرة وقتاه كنت ماش شابة
صفية : هكدا اماما انا بقرة
فادية : ايه والكيلوات الزايدين هاذوك وقتاه تنقصيهم
صفية: ههههههه ياه مالا غير ارتاحي انت ونوعدك نولي توب تا قازوز ماش مونش بالي برك
فادية : توقعي كلش من هاذ الدنيا ابنتي وفنفس الوقت خلي ايمانك بربي كبير
صفية : ماما حبسي ماتهدري هاذ الهداير صحتك رايحة وتتحسن وبابا قال راح يديك لالمانيا ثما ترتاحي بيا وترجعي فدوووش تا قبل غير متزيديش تخمي هاك
فادية : قدمي عندي نحضنك كبرتي ووليتي تعرفي تهدري .
فهاذيك اللحظة عنقت يما بقوة وحبيت نخبيها داخلي ونحتفظ بيها للابد بقيت فحضنها وهي تلعب بشعري احساس انك تفقد شخص تحبو وانت عاجز تدير اي حاجة باه تمنعو صعيبة بزاف هاذاك الاحساس عدويا ومنتمناهالوش .
بقينا شهر فدار ماني ام يما ستقبلونا وفوت يامات شابين مع بنات خالاتي لي عرفتهم مؤخرا برك وبعد بابا قرر يزور اهلو ويشوفهم رحنا كامل فالاول ماما رفضت مي بابا سيف عليها ورحنا للشرق طريق كامل راقدة عند ماما بعد ساعات وصلنا لبلاصة وسط شجر محاوطين بيها بزاف طوموبيلات انواع اشكال ودار كبييرة بزاف والحيوانات ترعى فبلاصة خضراء بعيد بقيت غير نشوف اييه بلادي شابة هاذاك الاخضرار وصوت الشجر تتحرك بقيت غايسة فيه حتى حبسنا قدام هاذيك دار دخلنا طبطب بابا وفتح الباب شاب طويل قالو بابا انا عمك تسالمو ودخلنا كانو بزاف ناس رجال ونساء بابا يسلم وحنا وراه خدودي راحو فيها وصلنا لمرا كبيرة قالي بابا. هاذي جداتك سلمي عليها سلمت وهي ساكتة وتشوف برك بعدها قعدنا تحاكات هي وبابا وتعانقو بزاااف حتى بكيت وانا نشوف مافهمت والو من هدرتهم غير الشاوية بعدها راح بابا البرا وقعدنا حنا النساء في بزااف .
حكات جدة مع يما مي واحد ما فاهم الثاني ماما قبايلية وجداتي شاوية
حتى ترجمتلها عمتي
عمتي : قاتلك على سلامتك كفاه جابتكم الخطاوي لحتى هنا
ماما : ظروف خلاتنا نرجعو للبلاد وجينا نطلو عليكم
جدة اليامنة : مرحبا بيكم
