"القطار ٢٠١" ©

"الختام"

أهلا بأي حد قرأ الرواية يا رب تكونوا بخير ،وياريت تكون عجبتكم الرواية ❤️

أنا ما رضيتش أتقل عليكم أكتر من كدا في الرواية الأولي ليا ،الرواية منتهيه ،ومالهاش أجزاء تانية،ولكم أن تتخيلوا ايه الـ حصل بعد كدا.

"عايزة أقولكم شوية حاجات كدا ،لعل و عسي تفيد حد في حياته."

-لو هدي تلخيص للرواية هيبقي تحت بند "عواقب الاختيار الغلط" ،والمثال عليه طبعا الرأس الكبيرة "رودينا " وبعد كدا "نيرة " ،أولا "رودينا " ماكنش لازم تصبر علي "أحمد" أو تخليها مرتبطة بيه بعد ما لاحظت تدخل أخته اكتر من مره ،في حاجات ما ينفعش حد يتدخل فيها غير العروسة ،ذي دهانات الشقة، لبسها، وبعد الجواز بقت بتتدخل في حاجات أكتر وخصوصاً إنها معاهم في نفس البيت ،وبالمناسبة كانت حركة غلط جدا من "رودينا" إنها ترضي أنها تقعد في البيت مع مامت أحمد وأخته،لإن ببساطة هي عارفه نواياها من الأول وهي كمان كانت بعيد عنها ،أمال لما تقعد معاهم إيه الـ هيحصل🤷🏻‍♀️.

ثانياً وهي "نيرة" هي كانت متجوزه "لؤي" وعارفه إنه كان متقدم لبنت خالته وهي رفضته ،ودا الكلام الـ قالته له قبل ما تموت،يعني كانت تحاول ما ترتبطش بيه أصلا ، حاولت تغيره وتغير طباعه ودا مستحيل والطبع بيغلب التطبع يعني لو كانت اتشقلبت قرد كان هيخليه ذي ما هو بردو.

-أنا قصدي علي الإختيار الغلط إن احنا نسكت أو نتغاضي عن حاجات بتحصل ونقول هتتغير بعدين،لكن مش كل حد هـ يقابل مشاكل في حياته يقول أنا اختارت غلط.

-أحداث الرواية كلها حقيقية وحصلت مع ناس،بإستثناء بعض الحاجات الـ تبع حبكة الرواية ،مش كلنا بناخد الفرصة التانية في حياتنا، علشان كدا قبل ما نأخد أي قرار بشأن أي حاجة،لازم نفكر في عواقب الاختيار بعدين،هل ليه مميزات وعيوب ايه الاكتر مميزاته ولا عيوبه،وبناءً علي ذلك بنختار.

-يا ريت مانحكمش علي حد من جهه واحدة،أو من باب الرفض وخلاص،لازم نتكلم معاه الاول ونشوفه مناسب ولا لأ ، خصوصا لو في حاجة رسمي ،لكن قبل كدا حرام أصلا.

-ما نعشمش الناس بحاجة احنا عارفين انها بالنسبة لنا مش هتحصل،زي مثلا جواز القرايب ،في ناس بتبقي رافضة الموضوع من الأول ،علشان ما يبقاش في مشاكل بعدين ،فـ خلاص بيبقي الطرف التاني عارف كدا،لكن نعشم الناس وبعد كدا نقولهم مع السلامه ،دا بيجيب مشاكل كتير جدا قُدام،
وليه جواز القرايب أصلا ليه اتجوز واحد شبه أبويا ولا أخويا يعني 😂

-لو حد بقي بيسمح بجواز القرايب أصلا ،يبقي ندي للناس فرصة ولو كويس يبقي علي خيرة الله والـ نعرفه أحسن من الـ ما نعرفوش ،مع إن أنا معارضة للمقوله دي في معظم الأحيان ،لإن بجد ساعات الـ ما نعرفوش بيبقي أحسن ِميت مره من الـ نعرفه😂

-الحب ما بيجيش قبل الجواز ،أي حاجة قبل الجواز اسمها "إعجاب" وخدوا بالكم من الكلمة دي،إعجاب بقي بالشخصية أو بالطابع أو بطريقة اللبس وحاجات تانية كتير،حتي خطيبك أنت بتبقي معجبة بيه مش بتحبيه لإن هو مش هيبين كل عيوبه قدامك، الحب بينبع من المعاملة و العشرة الطويلة ،مثال بسيط خالص علي كلامي،احنا لو سألنا بنت عن باباها وهو معيشها ملكة هتقول فيه شِعْر،لكن لو بنت باباها بيصبحها بعلقه ويمسيها بعلقه ،هتقول ربنا يأخده وهكذا،وياريت ما نتخدعش بالشكل ،ممكن يبقي وسيم وكل حاجة ،بس أخلاقه مش كويسة.

-"رائف" و "شذي" حكايتهم أنا عارفة إنها اتكروتت شوية،بس هما والله اتفرضوا عليا في الرواية ما كنتش كاتبة قصة لهم في الأول😂😂

وبس كدا ،يا ريت ناخد بالنا من الحاجات البسيطة دي،ونعتبر كل فرصة في حياتنا كأنها فرصة آخيرة، سواء كانت في الدراسة ،في الشغل ،أي حاجة في حياتنا.

في بعض الأشخاص عايزة أشكرهم بعد انتهاء الرواية.

أولاً،أختي "ريجا" صاحبه الفكرة الأساسية للرواية.

ثانياً، حبيبة قلبي وكاتبتي المفضلة،الـ دعمتني في أول الرواية Nehal_mostafa

أخيراً، أي حد قرأ الرواية وضغط علي الڤوت وشجعني إني أكمل،وياريت تكتبوا لي كومنت تقولوا رأيكم في الرواية علشان الحاجات دي بتفرحني أوي وبتشجعني أكمل،ولو عجبتكم يا ريت حد يعمل عنها ريفيو علي أي جروب فيسبوك خاص بالروايات،علشان تتعرف أكتر.

بجد شكرا لكم من كل قلبي،ونلتقي في عمل قريب إن شاء الله 💘.

ودائما وأبدا "دمتم في حفظ الله"❤️

#آلاء شريف.