سبحانك اللهم لا إله إلا أنت اني كنت من الظالمين.
.
تسنيم: غر فوتي خلاص يا وجدان ..
وجدان: انتي مشفتيش منظره كيف وهو يتكلم .. موووقف باااايخ ..
تسنيم: خلاص معش تنقي .. وبعدين فكري في ان الولاد شافوك تتكلمي معاه...
وجدان: ينحرق هو وياهم .. هالحقير هاده .. المشكله حاولت نقصفه ونحرقله دمه بس شيء بارد يتبسم وخلاص...
تسنيم مسكينه تنهدت .. معش في امل وجدان ليها ساعه كامله مره تبكي مره تعارك ومره متحشمه ..
هي سعدي كاين حارقلها دمها .. ولقت فيه فرصه ..
بالذات لما عرفت انه غصب بنته على الخطوبه على خاطر يقهر زيد واسعد ..
وجدان: عارفه لقحلي بإني قليلة ادب ومتربيتش!!
تسنيم: اي هو موقف قليل ادب..
وجدان عيطت فيها: شووووفي شن تقولي انتي..
تسنيم رعشت..
وجدان: المفروض توقفي معاااي انااا مش هووو ..
تسنيم: انتي شن قاهرك توا؟؟ .. مكنتيش تبيه يشوف الموقف ؟؟ .. ولا لأنه خبر الولاد على اللي درتيه.
وجدان: منعرفش .. منعرفش..
هي وجدان شافت النقال ولقت حسن يتصل .. ردت عليه وقاللها بوك يبيك..
تأففت بقوه ووقفت .. في حد باعها وخبر بوها ..
لبست شيء كويس وطلعت وهي مكشخه .. لما وصلت للصاله لقت خوتها وولادهم وبوها قاعدين..
بتحصل تهزيبه قدام هادم كلهم ...
جمعه اشرلها على الصالون الفاضي وقعمزت فيه بكل هدوء..
وجها كاين احمر .. وواضح انها متعفلقه بس عكست البرود ..
ملامح تقدر تحطهم في اي وقت..
هي ثبتت عيونها على بوها ..
جمعه: بالغلط نطرتي الميه على سعدي ولالا؟
وجدان: قصداً ...
جمعه انصدم وكذلك رياض اللي مباش يصدق ولاد خوه اللي يحلفوله كانوا ..
جمعه: علاش؟؟
وجدان: جي في خاطري نديرها ..
جوابها خلاهم كلهم يضحكوا وهي تنرفزت ..
مفيد: يا وخيتي مش كل شيء يجي في خاطرك اديريه؟
