الخَميس | نوڤمبر | 7 .
غَيـم ومطر، لَـيت ثالِثهم لِقاء .
ــــــــــــــــــــــــــــ
يوم طَبيعي مِثل باقي الايام
لا جَديد گعدتني الوالدة الصبح بالسحلات و المعارك چنت ما نايمة الليل لان سهرت علىٰ بارت ابناء الحَسوم.
گعدت مالي خلگ و دوامي چان ظهري، امي طلعت لشغلها و ابوي كذلك و اخوي راح للدوام، بقيت وي اخوي الصغير واني ضاايجة و طاگةة روحي ولازم اراجع للامتحان.
الي رجعلي واهسي بـ هـٰذا اليوم هوَ الجو، چان فد شيء يخبلل !
تريگت و راجعت للامتحان و راجعت الدروس الي چانت عندي بعدين فتحت المُبايل گلبت بالتيك شوي
ضوجة و مابي شيء يسوي واهس طلعت و دخلت للواتباد، چنت توني مخلصة "نوائب شام" و حايرة بيا رواية ابلش، گلت ابلش بـ "جذبني فمك البُني"
ما حَبيت الرواية بس للاسف ابتليت بيها بعد.
قريت كم بارت بعدين سديته گلت اروح اراجع مرة ثانية و هكذا لحد ما صارت بـ 11:00 اجه ابوي و سد الضوجة الي بيَ شوي.
بدلت و لمن اذن صليت و رحت امر بصديقتي "رقية" الحُببب.
وصلت لبيتهُم فتحتلي امها الباب سلمت عليها و سلمت علىٰ رقية و طلعنه نرووح للمدرسة (لمن اروح و اشوفهن بهيچي اجواء ترجعلي الحياة مرة ثانية).
چانت تمطر واحنه نمشي و هيَ تشكي واني اشكي و واحدة تبچي علىٰ ضيم الثانية😭😭.
رقية؛ خاايبةة الاحيااء ولا تدخل بالعقل متت من عدهاا !
_اتتفقق وياچ طلعت روحي الف مرة يالله فهمتها ماكو هيچي شيء، يعني خمس صفحات؟؟ خمسة يا ظالمة النفس زين ماگلتي وين يلحگنن !
(والله نلحگ بس نريدلنه حجة حتىٰ نسولف علىٰ المُدرسات)
دخلنه للمدرسة و تعال و جيبلك خلگ للاصطفاف، هسه لازم نسمع سوالف المُديرة و رزايلها ياا بويااا
المُديرة؛ گاللي المُدرسات لا ترزلينهن مو زعاطيط هنَ بس انتن مايفيد وياچن بس الرزايل، ماكو هيچي شيء زعاطيط انتن بس فهمني؟؟؟ حتىٰ الابتدائية ما يسوون عملاتچن هاي !
خلصت رزايلها و حچيها و لا فوگاها کالت يلا صفگولي 🤡🤡.
خلص الاصطفاف و دخلنه للصف و فرحانات لان طار درس الرياضيات اشو علىٰ غفلة و ينفتح باب الصف و تدخل مُدرسة الرياضيات؟؟؟؟؟ خخيرر يا طير شعندچ مو طار درسچ؟؟ عجيب وين كرامتچ بس اريد افهم؟
المُدرسة؛ مكيفات عبالچن ما اجيچن؟ وراچن وراچن لو وين ماترحن، تقدمت الدروس و اليوم يجوز يطلعوچن من وكت.
و نسمع البنات يتأفأفن ما عاجبهن الوضع (واني منهن اكيد!) خلص درس الرياضيات طبيعي و ممل جداً.
وراه درس شاغر لان المُدرسة غايبة واحنه طايرين من الفرح لان مطرت بنص الدرس و طلعنه للساحة، احىٰ شعوور وربيي، انُ تمطر واني وي الناس الصحح🥹🥹🤏🏽.
بعدها درس فيزياء، الدرس الي احبه و اععششقهههه بسبب مُدرسته النسنسسننسنسسسسس كلش احبهاا تونس و تسوي واهس للدرس، دخلت سلمت و طلعنه الكتب ندرس، بنص الدرس و سمعنه صوتت طلق عالي!! سترك يارب؟؟
المُدرسة گالت؛ وجتت وجتت
و وحدة من الطالبات صاحت: فرججج الددوونيي مو ولد ههااشم الينطون خووااتهُمم.
(هاي لهسه متأثرة بالجنة و النار)
ورقية ختلت بضهري
_شگلولچ عَليه،شني جنات مسويتها كبش فداء گدامچ؟
_حَبيبي جنة غلسي كلت لا انضرب طلقة و اروح بيها، شلون بيَ واني حتىٰ اللمبرغيني ما مشتريتها ليهسه؟
_اي و ترديني اني اموت بدالچ؟ بعدني شابة عندي احلام و طموحات و الجي كلاس الي اشتريها ورىٰ ما اتخرجج!!!
رقية؛ دَنچبي منو گلچ راح تتخرجين؟
(عجن الخواطر)
دخلت المُدرسة و گالت
_هدوء بنات، هاي عركة عشائرية بين آل عبس و مَدي ياهو بعد، هسه ينطمون وحدهُم.
خلصنه هالدرس بالضحك و السوالف و ماحَسينه علىٰ الوقت وي مُدرسة الفيزياء لان بدرسها مانريد الجرس يدگ.
الدرس الي بعدو چان اخر درس (الاجتماعيات) ما چان عدنه بي هواي شرح، شرحت و طلعت گالت لحد تطلع لحد ما يدگ الجرس، و ضلينه بس احنه و اصوت بالصف عالي و كل وحدة تسولف وي صديقتها و احنه شله من ثمن بنات، دوم نمسلت سوىٰ
نور؛ بنات شرايچن نسوي هـٰذا الترند مال ذوق الشلة بالاغاني؟
احنه قبلنه و ياريتنا ماقبلنه دَسمعوا ذوقنه🥲😂:
نور : سيد وابن سيد وأُمه علوية
يداوي گرصة العگرب و حتىٰ گرصة الحية.
اني : مَريت بديار الولف لن ولفي غايب
من اسعد ايام المُحب ملگه الحبايب.
رقية : نسيت شكاتبه.
نرجس : لَتسولف علينه من يسألون
عُيون الناس لا تحسد عشگنه.
رقية الثانية : العب غيرها يَحضرة الأُستاذ
غزال الرافدين يصيد ما ينصاد.
عُهود : و الخيل تلاکت وي الخيل
و صاحن طربگ طربگ.
متتتتتتتتتت ضحك على عُهود و نوور، و هيچي خلص اول يوم دراسي حلو
ليش اول يوم؟
لان مطر
و شفتهن
و سولفنه سوىٰ
لو مو هنَ وياي منو راح يصنع يومي بهَالطريقة؟
ـــــــــــــــــــــــــــــ
بحِفظ الرَحمـٰن🤍🤏🏽.
أنت تقرأ
يَـوميات طالِـبة🎀✨.
Randomمو قصة، اكتب لان ضايجة لا غير مَمجبورين تقروها اذا ماتردون🤷🏼♀️.
