သို့ဖြင့် ညနေစောင်းသို့ရောက်သောအခါ ဝတီတစ်ယောက် မြင်းတင်းကုပ်ရှိရာသို့သွားလေ၏။ ပြီး မြင်းစာကျွေးနေသော ခင်မင်ရင်းနှီးတဲ့မြင်းထိန်းတစ်ယောက်ကိုတွေ့ဆုံပြီးစကားဆိုလိုက်လေသည်။
"ဒီမှာ အသင် အကျွန်ုပ်ရဲ့မြင်းကြီးငွေတောင်ပံ ရောကျန်းကျန်းမာမာရှိပါရဲ့လား"
ဝတီကထိုသို့ဆိုလိုက်တော့ ထိုမြင်းထိန်းက ဝတီ့ကိုစကားဆိုလိုက်လေ၏။
" ငွေတောင်ပံက ကျန်းကျန်းမာမာရှိပါရဲ့ မိန်းကလေးရဲ့။ မိန်းကလေးရော စားဖိုဆောင်မှာအလုပ်လုပ်ရတာအဆင်ပြေပါရဲ့လား"
"အကျွန်ုပ်အဆင်ပြေပါတယ်။ ဒီအတောအတွင်းငွေတောင်ပံကိုစောင့်ရှောက်ပေးလို့အသင့်ကိုကျေးဇူးတင်ပါတယ်။ အကျွန်ုပ်ထပ်ပြီးအသင့်ကိုအကူအညီတစ်ခုတောင်းချင်ပါသေးတယ်"
ဝတီကထိုကဲ့သို့ဆိုလိုက်တော့ ထိုမြင်းထိန်းလည်း လုပ်လက်စအလုပ်ကိုရပ်လိုက်ပြီး ဝတီ့ကိုစကားဆိုလိုက်လေသည်။
"မိန်းကလေးအလိုရှိရာကိုသာပြောပါလေ။ အကျွန်ုပ်အတတ်နိုင်ဆုံးကူညီပေးပါ့မယ်"
"ဒီလိုပါ အကျွန်ုပ်ရဲ့မြင်းကြီးငွေတောင်ပံကို ဒီနေ့ည အနောက်ဘက်မုဒ်တံခါးဝကနေအပြင်ဘက်ကိုခေတ္တခဏလွှတ်ပေးထားချင်လို့ပါ။ သူ့ကိုအပြင်မှာ နှစ်ရက်လောက်လွတ်လွတ်လပ်လပ်ထားချင်လို့ပါ။ အဲဒါ အသင်ငွေတောင်ပံကိုအပြင်ကိုခေါ်ထုတ်ပေးနိုင်တယ်မလား"
ဝတီကထိုသို့ဆိုလိုက်တော့ ထိုမြင်းထိန်းလည်းဝတီ့ကိုဇဝေဇဝါကြည့်ကာစကားဆိုလိုက်လေသည်။
"အပြင်ကိုလွှတ်ပေးထါးလို့တော့ရပါတယ် မိန်းကလေး။ ဒါပေမဲ့ ငွေတောင်ပံကိုအပြင်မှာလွတ်ထားရင် တစ်ယောက်ယောက်ကဖမ်းခေါ်သွားမှာစိုးရိမ်ရပါတယ်"
"အဲဒီ့ကိစ္စအတွက်အသင်မစိုးရိမ်ပါနှင့်။ အကျွန်ုပ်ရဲ့မြင်းကြီးက သူ့သခင်ဖြစ်တဲ့ အကျွန်ုပ်ကလွှဲရင်ဘယ်သူ့ကိုမှအကပ်မခံတာအသင်လည်းသိပါတယ်။ အကျွန်ုပ်ရဲ့မြင်းကြီးကို အပြင်မှာနှစ်ရက်လောက်လွတ်လွတ်လပ်လပ်နေပေးချင်လို့ပါ။ ဒီမှာ ဒါကအသင့်အတွက်လက်ဆောင်ပါ"
YOU ARE READING
ဒေဝီသခင်မ
Historical Fictionလူတစ်ယောက်ရဲ့ အတိတ်နဲ့လာမယ့်တစ်နှစ်တာအတွင်းဖြစ်ပေါ်လာမယ့် အနာဂတ် သို့မဟုတ် ယခုလက်ရှိပစ္စုပ္ပန်ကာလကိုကြိုတင်သိမြင်နိုင်စွမ်းရှိသော၊ စစ်ပွဲများ၏ အနိုင်အရှုံးကိုကြိုတင်ဟောကိန်းထုတ်နိုင်စွမ်းရှိသော နတ်ဆရာမလေး နန်းဒေဝီနွယ်။ ရဲစွမ်းသတ္တိသာမက လက်ရုံးရည်၊နှ...
