أبيك تدري إني فيك اكتفيت

بارت 8<لا حول ولا قوة إلا بالله>🤍

.
>
..عقب ما وصل ذياب عندها..
رهف تركب السياره و تبتسم:السلام عليكم..
ذياب يبتسم:و عليكم السلام..ليش قلتي بتردين؟..
رهف:لانه محد فالبيت..
ذياب:غريبه!..
رهف:ف بيت يدوه..كلهم..
ذياب:همممم..
رهف:ذياب..
ذياب كان بيقول عيونه بس تذكر كرهها له:هلا..
رهف:ما ابا حد يعرف انه نحن فالبلاد..
ذياب بغرابه:ليييش؟..مستوي شي؟..
رهف:لا..بس خيفانه من ردة فعل اهلي..يعني و أنا راده من شهر العسل عقب ما كملنا يوم بس!..
ذياب:اللي تبينه..
رهف:و بلغ امك انها ما تييب طاري بعد..
ذياب:حاااضررر..بس نوصل ببلغها..
رهف ب ابتسامه لطيفه:شكرا..
ذياب:أنا زوجج..ما بينا شكر..
..تمت تطالعه عقب ما قال كلمة"زوجج"..
ذياب:ليش تطالعيني؟..أنا ريلج صدق..
رهف بدون ما تحس بنفسها:عيبتني الكلمه!..
..ذياب حس بشعور غريب..و يقول بداخله"تعبتني هالبنت!مشاعرها مب واضحه عدل اتجاهي!"..
ذياب:ما بنرد الشقه..أغراضنا كلها بالفله..
..رهف ضاقت ضيقه..
رهف:ماعليه!..بنشلها و بنرد الشقه..
ذياب يفرك عينه بتعب:ميت تعب..رادين من السفر و ما رقدنا..و اقرب مكان لنا الفله..
رهف اللي ودها تصارخ و تمنعه انه ما تسير الفله لكن:اللي تشوفه..
ذياب:كلتي شي عقب ما نزلتج؟..
رهف:لا..
ذياب:خافي الله بنفسج!..ما كلتي شي من امس!!!..
رهف:احس مب مشتهيه اكل شي..نفسيتي منسده..
ذياب:منسده من شو؟..
رهف:ما ادري..ما عليك لا تهتم..أنا دوم جي..
ذياب:ما اهتم؟!..انزين شو بخاطرج قولي..شو تبين تاكلين؟..
رهف:همممممم..خاطري ب كرك!..
ذياب:كرك بس؟..
رهف تبتسم:هي!..كرك بس!..
ذياب:اعنبوج اييب ابو الكرك بكبره..لو تبين 20 كوب كرك..
..رهف استحت و نزلت راسها..
ذياب:مع اني تعبان..بس فداج كل تعبي..و مره ثانيه لو بخاطرج شي ارمسي!..
رهف تطالعه و تبتسم بحب:ان شاء الله..برمس!..
..عقب دقايق وصلوا صوب المقهى..و ذياب دق هرانه للريال..
ذياب ينزل الجامه:مرحباااا..
الريال:مرحبتييييين..وين انت بابا..من زمان ما يشوف انت؟!..
(اللهجه🏃🏻‍♀️‍➡️)
ذياب:موجوود مووجود..بس اشغال الدنيا تعرف..
الريال:لازم فيه شغل..
ذياب:اكيد!..المهم..ابا 20 كوب كرك..
..رهف فتحت عينها بصدمه..عبالها يستهبل يوم قال مساعه..
ذياب يبتسم و يصد ل رهف:شدعوه محد ياخذ كلامي ع محمل الجد!..عطني كوبين كرك..
الريال:ان شاء الله بابا..
..راح الريال..و ذياب رفع الجامه..
رهف حاطه ايدها ع قلبها:مب من صدقك 20 كوب!..
ذياب بنبرة عذاب:قلت لج لو تبين ابو الكرك يبته لج!..
..يستوعب..
ذياب:يخسي ابو الكرك..اييبلج ام الكرك..
..ضحكت رهف..و تم هو يطالعها و هي تبتسم..و بدون ما يحس بنفسه قرب منها..و رهف توترت و عينها تطالع يمين و يسار..و ما تطالع ويهه..
رهف اللي حست بكتمه:كأنه حر؟..
ذياب سرحان بعيونها مع النقاب:يمكن انها حرارة قلبي الحين؟..
رهف بغياض:تقصد حرارة ويهك..
..ضحك بثقل..
رهف:لين متى بتم قريب من ويهي جي؟..
ذياب:لين ما أنا اقول..
..رهف غمضت عيونها..
ذياب:خيفانه من ويهي؟..
رهف:مستحيه!..
ذياب:انزين بطلي عيونج..
رهف:شو تبا منها؟..
ذياب:لاني أنا قريب منج الحين عشانها..سرحان فيها!..
..رهف لا إرادي بطلت عينها و خدها احمرررر من المستحى..و قلبها يرقص من كثر ما يدق..
ذياب:شو سويتي فيني يا عيون رهف؟..ضيعتي علومي..
رهف اللي تبا تنهي هالحوار:الكرك كأنه تأخر؟..شدعوه ترا إلا هو كرك!..
ذياب:الحين أنا أتمدح فيج آخرتها تفكرين بالكرك؟..
رهف:قلت لك مستحيه!..
ذياب:و أنا ما اباج تستحين مني!..
رهف:صقر بدال ما يتفلسف عندك..كان المفروض يقولك عن شخصيتي..تدري اني استحي وايد؟..لدرجه عادي اصيح؟..
ذياب يبعد عنها:لا..عيونج مب حلوه و انتي تصيحين..حتى شكلج..
رهف بشخصنه:رأيك خذه و حطه ب اقرب زباله عندك..
ذياب يبتسم:اوف اوف اوف..
..الريال يدق الجامه..
ذياب ينزل الجامه:خربت ام الموقف انت!..
..خذ عنه الكرك..
ذياب:كم حسابك؟..
الريال:عشان زوجه مال انت ما يدفع..
ذياب يقدم جسمه لقدام و يغطي رهف و بعصبيه يفر على الريال الفلوس:عينك تشلها عن محارم الناس..و ان طالعت فيهم!..اقلع عينك من مكانها..تسمع؟..يلا اذلف من هني قبل ما اموتك..
..رفع الجامه و حرك و هو معصب..
رهف:ترا ما يسوى!..الريال من طيبة نفسه قال جي..
ذياب يطالعها و يطالع الشارع شوي:طيبة نفسه مع نفسه..انتي حلالي و محارمي..محد له حق يتكلم عنج غيري!..
رهف ابتسمت من تحت النقاب لكن غيرت نبرة صوتها عشان ما يحس انها استانست من كلامه:فالك طيب!..بس دخيلك لا تعصب..
ذياب يرد طبيعي:حاضر..عشانج بس..
..ابتسمت له مره ثانيه..و خذت كوب الكرك..و بالغلط حرقت ايدها بالكرك..
رهف تغمض عينها ب الم:اخخخخ..
..ذياب خاف عليها و وقف السياره على ينب..
ذياب شل عنها الكوب و يتلمس و يتفقد ايدها بحنان:بسم الله عليج!..ليش ما تنتبهين؟..
رهف صدق تألمت من الحرق وايد:مادري سرحت ما انتبهت..
ذياب بعصبيه خفيفه:وقتج تسرحين؟..انتي على فكره وايد تهملين بنفسج!..و هالشي وايد يخليني اتنرفز و احاتيج!..
..فتح سدة السياره و طلع منها كريم الحروق..و تم يداوي الحرق اللي ب ايدها..اما رهف تطالعه كيف هو مهتم فيها و خيفان موت عليها..و تقول بداخلها"أنا بس احترقت و جي سوا!لو شي اقوى شو ممكن يسوي؟"..
.
..عقب ما داوا الحرق..
ذياب يبلع ريجه و بملامح حاده:ترا اي شي يضرج حتى لو بسيط!..يخليني مينون!..ماباج تتألمين ولا تتعورين..
رهف بجديه و هي تتذكر الجروح اللي بويهها و اللي ع ذراعها اللي تسبب فيهم ذياب:و الجروح اللي انت سببتها بنفسك لي؟!..
..ذياب تصنم مكانه و بلع ريجه و غيضه..و دعى على نفسه مليون مره..
ذياب:أنا ندمان..قلت لج ندمان وايد!..يعل ايدي الكسر لو فكرت امد ايدي عليج فيها مره ثانيه؟..
رهف بخوف عليه مسكت ايده بحنان و شهقت:ف العدو ولا فيك!..لا تقول هالكلام!..و أنا حماره يوم اتم اذكرك بالموقف كل شوي..السموحه منك..
ذياب يبتسم:انتي ليش جي وايد طيبه؟..قلبج رهيف على اسمج!..ترا الناس ما تستحق كل هالطيبه صدقيني..و أولهم أنا..
رهف بدون ما تحس بنفسها:شو ابا من الناس أنا؟..انت زوجي!..غير عنهم..صح من حقك تسوي فيني اللي انت تباه!..
ذياب يقاطعها:لكن بحدود!..
رهف:صح!..
ذياب:بتغير للأحسن!..ان شاء الله رب العالمين يهديني ولا يخليني اضرج بشي طول ما انتي زوجتي و على ذمتي!..
رهف تبتسم ب اطمئنان:آمين يارب..
ذياب:خلينا ننسى كل اللي صار لنا قبل!..و نتذكر الحين..
رهف:ان شاء الله..
.
..وصلوا الفله..و نزل ذياب و فتح الباب لرهف و نزلت..و عقب دخلوا ثنينهم الفله..
ذياب لاحظ انها متضايقه من شي:مضايقج شي؟..
رهف اللي ما تبا تبين له:لا ابد!..
..مسك ايدها بحنان..
ذياب:مب علي هالكلام!..لا تخشين عني شي..
رهف تاخذ نفس:أنا مب مرتاحه هني!..
ذياب:الحين بندخل و بنسلم و بنصعد فوق على طول..و اول ما نقوم الصبح!..اوعدج نرد الشقه على طول..
رهف:أنا عادي عندي!..بس امك؟..امك ما ترحمني يا ذياب..
ذياب:تقول اللي تقوله!..تهتمين لكلامها؟..
رهف تنزل راسها:اكيد اهتم!..أنا ما عمري جفت عدو لي ب هالدرجه!..
ذياب:امي مجرد انها مب قادره تستوعب انج ملكي!..لكن مع الأيام ان شاء الله بتستوعب..اللي اباه منج بس!..هو انج تاخذين راحتج معاها!..يعني..اي شي ودج تقولينه و تسمعينه لها سويه..عشان يبرد خاطرج اتجاهها..امي و اعرفها..ما يبالها إلا جي..
رهف ترفع راسها و تطالعه بجديه:لكن هذي امك!..و هي عمتي..نحترمها!..
ذياب:لو تبين الكلام اللي صدق لازم ينقال..ف بقولج امي بالذات ما تستاهل احترام من اي حد..
..رهف انصدمت من كلامه..
رهف:ذياب انت كيف جي بديت تقسي على امك؟..
ذياب يوقف مكانه و كان قريب من باب الصاله و يمسك ايدها الإثنين و يكلمها بجديه:أنا من عرفتج..مستحيل أتقبل اي شخص ما يرضى فيج!..حتى لو كانت امي!..رهف انتي ما تعرفين كيف غيرتي فيني!..حبيتج بسرعه..و الحين!..مابا اي شي مب زين لج..
..ابتسمت على كلامه..كلامه عيبها وايد..
ذياب يبتسم لها:يلا بنسير داخل..و على ما اعتقد انه امي الحين راقده..
..دخلوا ثنينهم..
ام ذياب:ف عينك راقده..ليش شو قالوا لك ديايه ارقد هالوقت؟..بعدني يالسه!..اسمع غرام ولدي ل زوجته..
..ذياب و رهف ماسكين ضحكتهم..
ذياب يقرب من رهف و يساسرها:ما شاء الله كل العيايز يكبرون و يخرفون..إلا امي..كأنها سحليه..
رهف:ممكن ما تنكت؟..لاني بنفجر من الضحك الحين!..مب ناقصين..
ام ذياب تتحرطم:شو عندكم واقفين هناك و تساسرون بعضكم!..عندكم شي قولوه عندي..
رهف تسير صوبها و تسلم عليها:نمدحج عموه!..لا تحاتين!..
ام ذياب بكره:إلا انتي..المدح منج احسه ذم..
..رهف تنكدت..و سارت صوب ذياب..
رهف:عشان ما ينقع الكف بينا!..احسن لي اصعد فوق عند شواقي..
ذياب يبتسم:ولا تكدرين روحج..سيري..
ام ذياب بقهر:اعنبوج ملزقه الريال فيج!..اعتقيه!..خليه بحاله!..
رهف ترفع نقابها من ع ويهها و ب ابتسامة غياض:اسمحيلي ما اقدر!..
..و صعدت عنهم فوق..و ذياب سلم على امه..
ذياب:بسج امي و انتي تتحرطمين عليها!..
ام ذياب:انت وياها بعد!..قاهريني..
ذياب:امي انتي من يومج ما يعيبج شي!..
ام ذياب تبتسم:المهم ما علينا!..عندي لك خبر وايد فرحني..
ذياب ب استغراب:خبر مثل شو يعني؟..
ام ذياب تبتسم بخبث و تتكلم بصوت واطي:حصلت لك حرمه سنعه!..انا احبها و راضيه فيها..قول تم..ترا الريال حلال عليه ياخذ اربع!..
..ذياب تقشعر جسمه بكبره!..و تم يطالع امه بعين كلها جمر!..مب قادر يستوعب كل افعال امه هذي!..
.
.
..اليوم اللي بعده..ع الساعه 2 الظهر..
.
..تلفون رهف يرن بشكل جنوني!..
رهف بخوف:صقر؟..بسم الله..اللهم اجعله خير..
..ردت عليه..
صقر بصريخ يخوف:ساعه لين تردين على التلفون؟..
..رهف ساكته مب عارفه شو تقول!..
صقر:الحين بسرعه اجوفج عندي!..بسرعه!..
رهف:عندك!؟..عندك وين؟..أنا مسافره ولا نسيت؟..
صقر:أنا فالبيت..تحسبيني غبي؟..بسرعه لا تطولين!..
..و يسكر بويهها..
رهف:من وين عرف اني فالبلاد؟!..مستحيل هزاع يتجرأ يقوله!..مستحيل!..
..قامت بسرعه من مكانها عشان تتجهز..
.
..و بعد ما تجهزت و لبست عباتها..
ذياب يدخل عليها الغرفه:على وين؟!..
رهف بتوتر:اخوي صقر عرف اني فالبلاد!..
ذياب:و كيف عرف؟!!!!..
رهف بهلع و شوي و تصيح:ما ادري ما ادري..
ذياب يقرب منها:متأكده مافي حد جافج يوم كنتي ف بيت اهلج؟..
رهف خافت لانها تذكرت هزاع:متأكده!..حتى الشغاله كانت محد!!!!..
ذياب:انت سمحت لج تطلعين؟..
رهف:دخيلك ذياب!..لا تسوي لي موقف مع اخوي صقر!..و تدري لو ما سرت له الحين شو ممكن يصير؟..عادي يذبحني و يذبحك..
ذياب:يخسي بس هالصقر..هالناقص!..يلا انزين بوصلج..
..شل مفتاح سيارته و طلعوا ثنينهم..و جافتهم ام ذياب..
ام ذياب بفضول:على وين ان شاء الله من الظهر؟..
ذياب:بوديها عند اهلها..
ام ذياب:هي زين..المهم انك ما تنسى الموضوع المهم اللي خبرتك عنه البارحه..
..ذياب توهق و يسوي عمره ما يعرف شي..و رهف لاحظت عليه انه متوتر..
رهف ب استغراب:عن شو الموضوع المهم؟..
..ذياب تم يطالعها و مب قادر يتكلم..
ام ذياب:ملقوفه..تبين تعرفين كل شي..بس ما عليج..بتعرفين قريب لكن بطريقه تعور قلبج وايد!..
..رهف تطالع ذياب بملامح مب مفهومه!..مشت عنه و طلعت برع..و هو لحقها..
رهف:شو هالموضوع اللي بيعور قلبي؟..احس الموضوع عني!..
ذياب:مب قلت لج لا تهتمين لكلام امي؟..الموضوع مب عنج نهائيا..بعيد عنج وايد..
رهف:مع اني شكيت وايد..لكن مثل ما قلت..ما بهتم!..
..طلعوا ثنينهم من الفله..و ركبوا السياره متوجهين عند صقر..
.
.
..عقب ما وصلوا..
ذياب:صقر اخوج ما يقدر يسوي لج شي!..و لو تبيني أنا بكلمه الحين..
رهف:لا لا..لا تتكلم معاه نهائيا!..يلا بنزل..
..فتحت الباب و نزلت و سكرته بسرعه و دخلت داخل..
.
..اول ما دخلت..
رهف:بسم الله شو مستوي؟..ليش جي وضعكم؟..
ام رهف دموعها تنزل و تطالع بنتها:كيف يعني انتي فالبلاد و ما تخبرينا؟..كيف؟!..
..تلومت ما قدرت ترد..
صقر بعصبيه:إذا ذياب ما قالي أنا بعد!..
رهف:اهدوا شوي!..أنا بس ما حبيت أخوفكم..
ام رهف:ليش رديتي بسرعه؟..شو اللي صاير بينج و بين ذياب؟..
رهف:مب صاير شي يا امي ليش كلكم مفزوعين؟..
خوله بخبث:مالج داعي يوم ما خبرتينا!..سوالف السبرايز هذي ما نحبها..
رهف:عبالج أنا مثل باقي البنات؟..او خلينا نقول مثلج انتي مثلا!..
صقر:ذياب راح ولا بعده واقف برع؟..
رهف:راح..
..عطاها نظره صارمه و تخوف..و طلع عنهم..
رهف تسير صوب امها و تمسكها من ايدها و تيلسها:اهدي امي!..ما صار إلا الخير!..أنا بس حبيت ارد البلاد لاني مب مرتاحه هناك!..و مشتاقه لج وااايد!..
ام رهف تمسح دموعها بالشيله:بس أنا امج!..لو ما خبرتيني تخبرين منو عيل؟..
..رهف تتذكر هزاع..لانه هو الوحيد اللي كان يعرف انها فالبلاد..
ام رهف تبتسم بوسط دموعها:ما علينا..المهم بنتي بخير و صحه و سلامه..
خوله بلوعه:شو هالغراميات..لاعت جبدي..
..استحقرتهم و صعدت عنهم فوق..
رهف بخبث:ولله لولا الخوف من الله..جان دفنتها ب ايدي!..
ام رهف:خليها تولي..طنشيها..المهم..متأكده ما بينج و بين زوجج شي؟..
رهف:صدقيني يا امي ما بينا شي!..ليش مصره انه فيه شي؟..ليش تحبين تعورين قلبج علينا؟..
ام رهف:انتي بنتي الوحيده..لازم اخاف عليج هالكثر؟..
رهف تبتسم:عمري انتي..
ام رهف:زين انج موجوده اليوم..
رهف:ليش؟..
ام رهف بحماس:اليوم يدتج تبانا نتيمع مره ثانيه بعد..
رهف بلهفه:اشتقت لكل حد صدققق!..
ام رهف:لكن هالمره بالعزبه بنتيمع..بأذن الله..
رهف:اخيرا!..الحين حسيتوا انه الشتا يا صح؟..
ام رهف:و لو انه الجو للحين حار!..لكن لعيون يدتج!..
رهف:الله يحفظها يارب..
ام رهف:آمين يارب و يحفظ غالينا..
.
.
(عند حنان)
..في المدرسه..و يالسه بغرفة الأنتظار تتريا الدريول يمر ياخذها..
حنان:ليش هالكثر تأخر؟..يحسسني انه المدرسه ب آخر الدنيا!..
الحارس يدق الباب و يدخل:فيه رجال برع يريد انت..
حنان تشيك من الجامه:اي ريال؟..
..السياره ما كانت واضحه لها..شلت شنطتها و طلعت برع..و يوم وصلت للسياره انتبهت له..
حنان تشهق و حاطه ايدها ع قلبها:راشددددد!..
..فتحت الباب و ركبت بسرعه..
حنان:حرك السياره بسرعه!..
..راشد حرك السياره..
حنان:انت فيك شي؟..كيف يعني ياي تشلني من المدرسه؟..
راشد:اول شي سلمي تخبري عني!..عقب سوي الدراما هذي كلها..
حنان:مب وقت برودك والله!..
راشد:اشتقت لج انزين!..قطعتج ليله كلها!..و صباح كامل!..بس خلاص ما اقدر اقطع اكثر عن جي!..
حنان:نسيت اتفاقنا ويا يدوه ولا لا؟..حرام تكسر ثقتها فيك عقب ما انكسرت مره!..
راشد:حنان انتي ليش ما راضيه تستوعبين؟..اقولج ما اقدر اصبر عنج!..و انتي شكلج مطوله لين تتخرجين!..
حنان:ما باقي شي!..طول بالك!..الحين دور لي حل!..الدريول بيي المدرسه و بيجوفني محد..و بيتصل ف ابوي و بيخبره!..عقب ابوي بيتصل ف المعلمه و بيسألها!..و بتقوله انها ركبت ويا ريال!..كيف أنا احل هالموقف؟؟؟..
راشد:سهله..بدق على خالي و بقوله الحين..
حنان تضربه ع جتفه:انت ولله مافي احقر و ابرد منك!..تبا توقف قلبي؟!..
..راشد يقول بداخله"بسم الله عليج انتي و قلبج"..
راشد:اسكتي اسكتي..مابا اسمع حسج..
حنان:بيجلطني هالولد!!!..
.
.
..عقب صلاة العصر..الكل تيمع بالعزبه..
اليده مريم:يازين الجو ولله!..لا هو برد ولا هو حر..
الخال عبيد:صدقج امي..
اليده مريم:عيل وين الرياييل؟..ماجوفهم؟..
ام زايد:كلهم بالخيمه عمتي..يلعبون ورقه..
اليده مريم:هي ما شاء الله زين زين..خلهم مستانسين..
.
(عند البنات)
حنان:ليش ما نستأجر دراجات؟..خاطري العب والله..
شمسه:تبين تموتين علينا نفس آخر مره؟..
حنان:بسم الله علي!..تبيني اخبر عليج اخوج راشد الحين؟..
شمسه:بتخوفيني فيه؟..خبريه لو فيج خير..
رهف:بسكم من النقاش البايخ هذا..
شمسه:انتي اللي بايخه مب نحن!..عيل انتي فالبلاد و مادري شو!..و ما تخبرينا!..
حنان:جفتي كيف!..و لو ما صقر اللي زخج جان ما جفناج اليوم بعد!..
رهف:صح بنات..فيه شي شاغل تفكيري!..مادري صقر من وين عرف اني فالبلاد..مع انه بس هزاع اللي يدري اني كنت موجوده!..
شمسه:هزاع بعد يدري و ما قالي!!!!..
رهف:مب وقتج شموس!..أنا بس ابا اعرف اهلي من وين عرفوا..و أنا موصيه هزاع ما يخبر حد!..اكيد ما بيروح يقول ل صقر بالذات!..
حنان:متأكده محد كان وياكم؟..
رهف:هي متأكده!..
شمسه:كلنا كنا ف بيت يدوه!..منو يعني بيكون هناك!..محد!..
رهف:الله و اعلم..
..شمسه تكح بتعب..
رهف:سلامات!..مرضتي؟..
شمسه تكح:مادري من اول ما قمت من النوم و أنا احس اني تعبانه..
حنان:تبيني اسوي لج شي حار يريحج؟..
شمسه:لا دخيلج ما ابا اتسمم..
..رهف تضحك..
حنان:مالت عليكم..
شمسه:المهم بنات..سيروا انتوا يلسوا وياهم برع..و أنا بنسدح هني شوي بالصاله..
حنان:تخيلي حد من الرياييل يدشون!..
شمسه:محد بيدش!..كلهم بالخيمه الحين..
رهف:ماعليج منها ريحي..و لو صار شي بييج أنا..
شمسه:طول عمرج مفضلتي!..احسن من حنان..
حنان:عدال اوكي؟!..
..ابتسمت لها شمسه..و طلعوا عنها رهف و حنان..و شمسه انسدحت بتعب ع الغنفه و غطت ويهها بالشيله..و من التعب ما حست بعمرها و رقدت نومه عميقه..
.
.
..بعد اللويه كلها و النقاشات..اقتنعوا الحريم بأنهم يستأجرون الدراجات..حنان خذت لها واحد و شمسه خذت لها واحد و ركبت وياها سعيد..و راشد بما انه يعشق الدراجات استأجر له واحد بعد..و عشان يكون مع البنات و يجوفهم..
.
..راحوا بعيد عن اهلهم..
شمسه:انتوا خبايل؟..اشك الصراحه..وين رايحين انتوا؟..ليش سايرين بعيد؟..
راشد:تبينا نسير صوبهم؟..عشان يهزبونا و تكون آخر مره نأجر فيها دراجات..
حنان:انتي لو مب عايبنج ردي..
شمسه:برد أصلا!..عشان يصفالكم الجو انتي و راشد!..بس عن تتمادون..
..و ردت عنهم..و راشد و حنان كملوا سواقه..
راشد:شوي شوي!..ناويه تطيرين؟..
حنان:هاهاهاها..وايد يضحك..
راشد:سخيفه..تبيني العوز فيج الحين؟..
حنان:لو قدها جرب تلعوزني..
..و سرعت عنه و راحت بعيد عنه بشوي..و هو سرع بعد و يبا يقرب منها لكن هي كانت اسرع!..
راشد اللي حس انه ممكن يستوي فيها شي ع هالسرعه:شوي شوي يا حمارههه..
..حنان ما كانت تسمعه او حتى تحس انه فيه شي بيستوي..
راشد يصارخ اقوى شي:وقفييييي الدراجه..
..و فجأه!..
.
..طططططااااااخخخخخ..
.
..و يسرع راشد ب اقوى ما عنده..لين وصل عندها..وقف الدراجه و نزل بسرعه و هو ميت خوف عليها..اما بالنسبه ل حنان..انقلبت فيها الدراجه..و طاحت ع ايدها..
راشد يشيك ع ايدها:ليش ما تسمعيني ليييش؟..
حنان دمعت بألم:رشود ايدي وايد تعورني!..احسها انكسرت!..
..راشد يقول بداخله"مب وقتج تقولين لي رشود و انتي تصيحين ترا نقطة ضعفي اسمع اسمي مع دموعج!"..
راشد:وين يعورج بعد؟..بس ايدج؟..
حنان تصيح اكثر:هيييي..اخخخخ والله الألم..افففف..
راشد:قلت لج لا تسرعين!..
حنان:والله ما سمعتك..
راشد:خلاص ما يفيد شي الحين!..بدال ما احاسبج..لازم اوديج المستشفى!..
حنان تطالعه:كيف بتوديني؟..
راشد:الشخص الوحيد اللي بيعرف يدوه!..اركبي الحين وياي الدراجه..و دراجتج بتصل فالريال ايي ياخذها..
..مسكها من ذراعها بحنان و شوي شوي عشان ما تتعور..و مشت وياه لين الدراجه..ركب راشد جدام..و هي واقفه تتطالع..
حنان:وين ايلس؟..
راشد ينكت:فوق راسي تعالي حياج الله..
..عصب عليها..
راشد:وين تيلسين يعني؟..اكيد ورا ع الكرسي!..ترا ايدج اللي مصابه مب عقلج!..
حنان:اويه وايد قاسي..عافان الله بس..
..ركبت وراه..و حرك الدراجه متوجهين للعزبه..
.
.
(عند فهد)
..دخل داخل..و سار قريب منها..
فهد يبتسم بحنان:حبيبتي اختي!..اكيد من ردت من السفر ما رقدت عدل..
..كان يسمعها تكح كل شوي..
فهد:بسم الله عليج..ليكون مرضت!..
..قرب منها اكثر..و شلها بكبرها..و دخل فيها الغرفه..و سدحها على الشبريه بحنان..و غطاها بالشرشف..و سكر ليت الغرفه..
رهف تدخل الغرفه و اتي صوبه:اقولك فهد..ما شفت شموووس؟؟..ادورها..
..فهد فتح عينه بصدمه و قفطه..و طبعا كان ظلام يعني رهف ما انتبهت ل شمسه اللي نايمه..
(الكاتبه قررت تغدر فيكم و تغدر ب فهد🏃🏻‍♀️‍➡️🤣)
فهد صد لها ب صدمه:اذا انتي هني!..منو اللي نايمه هني عيل؟؟!..
رهف فهمت و استوعبت و انفجرت ضحك:اويييييييييه..
فهد حاط ايده ع راسه:شوووو سويييييت!!..عبالي انتي اللي راقده هني مب شمسه!..
رهف:ليش شو سويت بعد؟..
فهد يحك راسه ب احراج و مستحى:شليتها بكبرها و سدحتها بالغرفه داخل..
رهف تضحك:شتتتتت شتتتتت..
فهد:حسبي الله عليكم!..انتي و شمسه وايد تتشابهون!..و هي مغطيه ويهها شدراني عنها!..ما انتبهت!..
رهف:يعني ما جفتني اليوم؟..لو جفتني بتقدر تفرق عالاقل بين لبسها و لبسي!..
فهد:ما جفتج إلا بالعبايه!..
شمسه تفتح عينها و تيلس:شو ما تخلون الواحد يرقد؟..
..خوزت الشيله من ع ويهها..و انتبهت ل فهد..شهقت و حطت ايدها ع حلجها..
رهف تطالع فهد اللي غمض عينه و نزل راسه:اطلع برع..
..و تضحك عليهم..
فهد:اضحكي اضحكي..ماعليه يا رهوف..
..قرص خدها و طلع برع و هو متفشل من كل شي..و ندم انه دخل الصاله..
شمسه بهلع:شو صاااار؟..أنا كنت راقده بالصاله!..شو اللي يابني هني..
رهف تبتسم بنغزات:حبيب قلبج و عمرج هو اللي يابج هني!..
شمسه تضربها:يا حيوانه جب..فهميني السالفه عدل..
..رهف خبرتها كل شي..
شمسه تشهق:اوييييييه!!!..لهدرجه ما يقدر يفرق بيني و بينج!..
رهف:عاد الموقف فنااااان..حبيتكم..
شمسه:عن الاستهبال!..
رهف تضحك:اول مره اجوف اخوي فهد يستحي جي..شكله بدا يحبج!..
شمسه:رهوف لو ما سكتي بقوم افصل عليج والله!..
.
.
(عند راشد&حنان)
..عقب ما استأذنوا من يدتهم و سمحت لهم..و محد جافهم او يعرف انهم مع بعض إلا يدتهم!..
.
..وصلوا المستشفى..
راشد:وين هويتج؟..
حنان:عندي بالشنطه..
راشد:عطيني اياها..
..طلعت الهويه من الشنطه و عطتها ل راشد..
راشد بجديه:سيري يلسي ب انتظار الحريم..و أنا بسير اخذ لج موعد..و عن اللعبان و حركات اليهال..بروحج مصابه!..
حنان:انزين..
راشد:ان شاء الله يقولون؟..كم مره بعلم فيج؟..
حنان:ان شاء الله..
راشد:لا قوليها عدل..
حنان:شو اغنيها مثلا؟..تراك فاضي!..روح خذلي موعد ترا والله ايدي تعورني مووووت!..
راشد:سيري انزين يلا!..
..سارت عنه و يلست ب انتظار الحريم..و هو سار خذ لها موعد..و عقب يا عندها و يلس صوبها و بينهم طاوله!..
حنان ب احراج تكلمه:راشد!..ترا هذا انتظار حريم!..ليش ياي انت؟..
راشد بجديه و بكلامح حاده:ما علي من حد!..يقولون اللي يقولونه..
..سكتت عنه حنان..و تموا ساكتين فتره..
راشد:ايدج للحين تعورج؟..
حنان:هييي..
راشد:من حركات اليهال!..
حنان:جب جب!..
راشد:تقولين حق زوجج جب؟؟..
حنان:زوجج!..
راشد:هي مب انتي زوجتي!..حتى لو ما صار بينا شي رسمي..انتي زوجتي من الأساس..
حنان تبا تقهره:انزين تخيل اخذ واحد غيرك!..
راشد:انزين تخيلي اقوم اذبحج هني قدام خلق الله كلهم عقب هالرمسه!..أنا عادي عندي دامنا بالمستشفى..بيعالجونج على طول..
حنان:استهبل!..كفايه ايدي مكسوره بعد تذبحني!..
راشد:عيل اسكتي و مابا اسمع حسج..
حنان:ترا انت قلبك حجر قسم بالله!..
..الدكتور زقر اسم حنان..قامت و مشت بتسير عند الدكتور و راشد لحقها..
حنان:ما يحتاي اتي وياي!..بخلص و بتعالج و بييك..لا تتعب عمرك..
راشد:اخليج بمكان عام و بروحج؟..خير يا طير؟..أنا ريال ما أسويها!..اخلي محارمي بمكان بروحهم بدون محرم!..
..صدت عنه و ابتسمت..و هو انتبه انها ابتسمت لانه شاف خدودها اللي طلعت يوم تبتسم..
.
..دخلوا عند الدكتور..
الدكتور يطالع حنان:مالك يا قمر؟..
راشد بصوت خفيف يكلم نفسه لكن حنان سمعته:لو ما سكت و تم يتمادى..بقوم اقلب المستشفى على راسه قليل الادب!..يتغزل بعد..
حنان:ايدي..
راشد يقاطعها و يطالع الدكتور بنظرات جمر:ايدها مكسوره..طاحت على ايدها..
الدكتور يوقف و يسير صوب حنان:ممكن اشوف الكسر؟..
..الدكتور كان ياي يرفع كم العباه من ع ايدها..لكن راشد يا قريب منهم و مسك ايد الدكتور..
راشد بعصبيه:عسى ما شر يالطيب؟..كأنك تماديت؟..
الدكتور يطالع راشد ب استغراب:لازم أشوف الكسر!..عشان اعرف أعالجها..
راشد:لا مب لازم..روح ازقر لي اي دكتوره..هي بتشوف الكسر..
الدكتور:مافي دكتور لأشعة العظام هنا غيري!..
راشد:اهاااا..عيل توكل ما نبا علاجك..
الدكتور يطالع حنان:دا زوجك؟..
..حنان كانت يايه تقول لا..
راشد بجديه:هي أنا زوجها عندك شي؟..
الدكتور:انت فاهم غلط!..دا شغلي!..
راشد:شغلك مع نفسك..أنا ريال اغار على محارمي!..
..حنان يالسه و بس تطالع الموقف و مب قادره تسوي شي..لكن اكيد راشد معاه حق..
حنان:راشد خلاص!..هو دكتور!..ياما دكاتره جافوا اكثر عن جي!..
راشد:عايبنج انتي ولا شو؟..تبيني اعطيج كف؟..
حنان:أستغفرالله!..
..راشد طلع بعصبيه برع و يسير صوب الرسيبشن..
راشد يكلم الحرمه اللي مسؤولة عن الرسيبشن و ماسك أعصابه:ممكن اطلب منج طلب؟..
الحرمه:آمرني!..
راشد:ابغي دكتوره مسؤولة عن أشعة العظام..
الحرمه:اللي موجود دكتور مب دكتوره..هو الوحيد المسؤول هني!..
راشد:يعني اخلي قليل الادب يلمس..
..يبلع ريجه..
راشد:يلمس زوجتي!..
الحرمه تبتسم:انزين ماعليه!..خله هو يقولك شو المطلوب و انت شيك على ايدها و هو بياخذ علاجاتها!..
راشد ينزل راسه و يتلعثم:أنا..أنا بعد ما اقدر المسها!..
الحرمه:انت زوجها!..
راشد:يعني مب زوجها رسميا..يعني..
الحرمه ما حبت تحرجه:فهمتك..عشان ترضى..بتصل الحين ل اي دكتوره فاضيه و بخليها هي تقوم بالواجب..
راشد بدأ يهدأ و ابتسم:مشكوره ما تقصرين..
الحرمه:العفو..
..مشى عنها و سار ل حنان..
راشد:الحين بتي دكتوره تشوفج!..
..عقب ما يت الدكتوره..و شيكت على ايد حنان و خذت علاجاتها..
الدكتوره تبتسم و تطالع حنان:زوجج وايد يغار عليج!..
حنان:مب زوجي!..ولد خالتي هذا!..
..راشد صد عنهم و انحرج..و الدكتوره ضحكت..و حنان ابتسمت ب انتصار..
الدكتوره:حصل خير..الحين بلف ايدج باللف الطبي و عقب بحط الجبيره..و لو صار شي طارئ تعالي لنا المستشفى..
حنان تبتسم:شكرا..
الدكتوره:العفو..
..و طلعت عنهم..و حنان قامت و سارت صوب راشد..
حنان:وايد فشلتني!..
راشد ماسك أعصابه:امشي خلينا نرد العزبه قبل ما اطلع كل عصبيتي فيج!..
حنان:هالناقص!..لو اختك ما سويت فيها جي!..
راشد بعصبيه:شو قلتي حنان؟..عيدي اللي قلتيه؟..
..حنان مشت عنه بسرعه جدام..و هو لحقها و مسك ايدها..
حنان:هد ايدي!..
راشد:لا خليني اكسر هالأيد بعد!..عشان اعلمج شو اللي قلتيه!..
حنان:يعني من حقي ترا!..انت وايد تتمادى!..
راشد:خلج بنفسج..لا تكلميني نهائيا..عشان ما افشلج اكثر جدام الناس..
..و طلعوا من المستشفى و ركبوا ثنينهم السياره متوجهين للعزبه..
حنان بعصبيه:وايد أحرجتني!..و خاصتا جدام الدكتور!..
راشد بعصبيه حاده:ما شاء الله خايفه عليه؟..
جنان:ما يخصه!..لكن حركاتك ما كان لها داعي!..الريال كان بس بيكشف ع ايدي بيجوف شو الكسر اللي فيها!..ما كان يقصد يسوي شي غلط!..
راشد:عدلي كلامج و ثمنيه..عشان ما اسمعج كلام ما تبين تسمعينه طول عمرج!..
حنان:انت وايد اوفر!..الله يعيني عليك..
راشد:مب متحملتني حتى؟..
حنان:لانه حركاتك اوفر صدق!..عالاقل لو تحترم الناس كان احسن بوايد..
راشد يصارخ عليها:قلت لج اسكتي عشان ما اضطر اسوي فيج شي ما يعيبج!..
حنان:بسكت و ما بسوي لك اعتبار!..
..تموا ساكتين و هادين و ولا واحد فيهم خاطره يبادر..
راشد بعد صراع مع نفسه و بنبره هاديه:أنا آسف حبيبي..ما قصدت احطج بموقف محرج نفس هذا..لو ادري انه بيحز بخاطرج هالكثر جان ما وديتج المستشفى من الأساس!..لكن قلبي اشتعل غيره!..الريال يوم يغار ما يقدر يتمالك عمره!..و كيف ترضيني اخلي واحد غريب يلمسج!..صح اني أنا المسج ساعات لكني ما احس بنفسي..و أنا اوعدج انج بتكونين ملكي!..عشان هالسبب أنا عادي المسج..لانه بتنتهي قصتنا بزواج!..
حنان بعد ما فهمت:حصل خير..أنا بعد ما اقصد شي..و مشكور لأنك وديتي المستشفى أتعالج!..
راشد:تدرين اني مستانس اليوم وايد؟..احلى يوم بحياتي كلها!..لانه قضيت هاليوم كله معاج..يوم خذتج من المدرسه!..و الحين يوم خذتج للمستشفى..
حنان تبتسم:عقبال ما تاخذني من بيت اهلي..
راشد يبتسم:آميييين يارب..و اوعدج ايي هاليوم و ما أخيب ظنج نهائيا..بس الحين خلينا من كل هذا..أنا كيف بتحمل اكثر و بصبر عليج؟..
حنان بعفويه:بركب الدراجه مره ثانيه و بكسر جسمي بكبره عشان ترجع تجوفني مره ثانيه و توديني انت المستشفى بنفسك!..
..ابتسم بكل حب على كلامها..
.
.
(نرجع للعزبه)
ام رهف:امي رهف..سيري سيارة اخوج فهد..هاتي الاغراض اللي ورا..
رهف تقوم:ان شاء الله امي..
..سارت صوب سيارة اخوها..فتحت الباب و خذت الاغراض و عقب سكرت الباب..و ب هالوقت طلع هزاع من الخيمه..و لمحها و يا صوبها..
هزاع يشل عنها الاغراض:هاتيها عنج!..وايد ثقيله عليج..
..ابتسمت له..
هزاع يهمس لها بصوت خفيف:وحشتيني!..
..ابتسمت اكثر..
هزاع:حسافه و قهر ما اقدر اجوف ابتسامتج اللي مثل الدوا لي..
رهف:هزاع ممكن اسألك سؤال و تجاوب علي بكل صراحه؟..
هزاع:اسألي يا طوايف هزاع انتي..
رهف:انت خبرت حد اني أنا فالبلاد؟..
هزاع:لا والله ما قلت ل حد ولا يبت طاري و ولا بينت ل حد!..
رهف:عيل اهلي كيف عرفوا؟..
هزاع:غريبه!..اصلا انصدمت من وجودج هني بينا!..
رهف:لأنهم عرفوا!..ف ماله داعي اخش عنهم اكثر..بس اللي مخوفني انهم من وين عرفوا عني!..منو عرف غيرك اني فالبلاد!..
هزاع:يمكن حد من اهل ذياب!..
رهف:ما أظن!..
خوله اتي صوبهم:أنا اللي خبرت اهلج..
..تبتسم بخبث..
خوله:حبيبتي انتي والله..تخافين على اهلج؟..لأنهم يحاتونج وايد!..يا عمري انتي..
..رهف تطالعها بكل غيض..مب مستوعبه كيف هالانسانه مقرفه لأبعد درجه..
خوله:لو تبين تعرفين من منو عرفت!..عرفت من عمتج!..اللي هي ام ذياب..يحليلها ع نياتها!..كانت ناويه تسوي لنا سبرايز..
هزاع:حلو!..الخبيثون للخبيثات..
..مشى عنهم و راح يودي الاغراض..
رهف بعصبيه:صدق انج وحده حقيره و ما تستحين على ويهج!..انتي شو تبين مني؟..شو تبين مني أنا بالذات؟..
خوله بقهر:اكرهج!..اكرهج لدرجة ودي اموتج ب ايدي و انتقم منج!..مع انج مب مسويه فيني شي..لكني اكرهج..يوم اشوفج اشوف خيبتي!..لانج انتي احلى مني و احسن مني و فيج قبول الدنيا كلها!..و كل الناس تحبج و تقدرج..و اهلج وايد يدلعونج..و الأهم من كل هذا!..
..تطالع هزاع اللي يالس بعيد عنهم بنظرات حقد..
خوله:انه هزاع يحبج و هايم فيج!..و ما يبا إلا غيرج!..بس اللي يغث..انه اللي يحبج و اللي هو هزاع!..انه ريال عن الف ريال!..فيه كل المواصفات اللي تحلم فيها كل بنت!..و تتمنى شريك حياتها يكون عندها نفس هالمواصفات..و عشان جي احب اقولج!..انه اللي شجع صقر اخوج على انه يزوجج ل صديقه ذياب..هو أنا!..لانه احب استانس يوم اجوفج متضايقه و زعلانه و حياتج منقلبه فوق تحت..بسبتي!..لاني زوجتج ل ذياب!..وايد ارتاح يوم اجوف ضيقتج او اي شي مب زين لج!..عشان جي خربت عليج انتي و هزاع!..خربت اللي بينكم!..لانه حياتج كانت كامله!..كل شي فيها حلو..و فيه شي نسيت اقوله بعد!..محد مخرب صقر عليج غيري..أنا اللي اخليه يمد ايده عليج و يكرهج حياتج..
..رهف تطالعها بصدمه محد يقدر يوصفها!..كل هالدمار اللي بحياتها كان بسبب هالحقيره اللي جدامهم!..
رهف تقرب منها و تبتسم بقوه و على ينب:انتي عبالج ممكن اتأثر عقب كلامج هذا؟؟..لا حياتي غلطانه!..مستحيل اخليج تجوفين قهري..او دموعي..و كسرة قلبي ع كل شي حلو خذتيه مني!..
..تصد و تطالع اهلها و تأشر عليهم..
رهف:تبيني اسير لهم الحين!..كلهم موجودين جوفي..بالنيابه عن راشد و حنان اللي ما ادري وينهم!..المهم..تخيلي اسير عندهم الحين و أقولهم عن السر اللي ماسكتنه عنج طول هالخمس سنين؟!..و الحلو انه صقر يالس معاهم بعد..
خوله بخوف و بدت ترجف:ما تسوينها!..
رهف تبتسم بخبث:خفتي؟..شرايج اسير اقول لهم عن سرج و افضحج؟..
خوله تترجى رهف و دموعها نزلت:دخيلج رهف!..انتي قلبج رهيف و طيب!..ما اهون عليج انكسر!..
رهف بعصبيه:عقب كل اللي خربتيه بحياتي!..ما تبيني ادمر حياتج؟!!!..
..مشت رهف صوب اهلها..
رهف بقوه:ممكن أقاطعكم شوي..لانه عندي خبر مهم لازم تعرفونه..لأنكم طول عمركم بتنغدرون..
اليده مريم ب محاتاه:شو مستوي يا بنتي؟..
خوله تقرب من رهف و تصيح:دخيلج رهف دخيلج!..خلينا نتفاهم شوي..
صقر بفضول يذبح:شو مستوي؟..وحده منكم تتكلم و تقول؟..
رهف:اهدوا!..بخبركم بكل شي!!!..
خوله تصيح:رهفففف..خلينا نتكلم شوي..
صقر يصارخ بويه خوله:شو هو الشي اللي خاشتنه عنا؟؟؟!!..
خوله:مب خاشه شي صدقنيييي!!!!..
رهف:لج ويه بعد تجذبين على اخوي عقب اللي سويتيه؟..اساسا عقب اللي اقوله..محد بيحط لج اعتبار و محد بيصدقج!..
..خوله تتمنى انها تموت ب هاللحظه..و رهف خلاص حاطه خوله براسها و ناويه تفضحها هالليله!..
.
.
.
.
<