Chapter 432 : မင်းသားလေး
အကာအကွယ် ပေးမည့် လူကြီးလူကောင်း များစွာရှိသော ဤမုံ့သခင်လေးသည် သေချာပေါက်ပင် မင်းသားလေးတစ်ပါးကဲ့သို့ သွားရှုပ်၍ မရသူဖြစ်သည်။ နင်းမြို့တော်ရှိ အကြီးအကဲ ထန်သည်ပင် သူ့အား မထီမဲ့မြင် ပြုရန် မလွယ်ကူပေ။
ထို့ကြောင့် ယခုအချိန်၌ ပိုင်ယွီအန်း၏ ခံစားချက်များသည် အနည်းငယ် ရှုပ်ထွေးနေ၍ သူသည် ဤမုံ့သခင်လေးနှင့် ရင်ဆိုင်ရန်သာ တတ်နိုင်၏။
"သခင်လေးက ယဥ်ကျေးလွန်းနေပါပြီ။ ဒါနဲ့ သခင်လေး ကျွန်တော့်ကို ဘာကြောင့် လာရှာမှန်း ကျွန်တော် မသိဘူး။ ကျွန်တော် ကြားတာကတော့ လူကြီးမင်း မုံ့က ကျွန်တော့် ကုမ္ပဏီက ဝိုင်ကို သဘောကျတယ်ဆို။ ဒါဆို ကျွန်တော့်ဆီမှာရှိတဲ့ အကောင်းဆုံး ဝိုင်ပုလင်းတွေ အခုချက်ချင်း ပို့ခိုင်းလိုက်ပါမယ်"
ပိုင်ယွီအန်းက ဝိုင်တစ်ငုံ သောက်လိုက်ရင်း မျက်လုံး လှန်ကြည့်၍ ပြောလိုက်၏။
သူသည် ဤမိန်းကလေးများကိုတော့ လုံးဝ ထိလိမ့်မည် မဟုတ်ပေ။
ယခင် အိမ်ထောင်ပျက်ပြီးသည့်နောက်တွင် သူသည် အမျိုးသမီးများကို အကြောက်တရား ကြီးစွာဖြင့် ရှောင်ရှားခဲ့၏။ ထို့အပြင် ဤအမျိုးသမီးများကို သူ အမှန်တကယ် သဘောကျ နှစ်သက်လျှင်တောင်မှ အနည်းငယ်မှပင် မပတ်သတ်မိစေရန် ဆုံးဖြတ်ထား၏။ ထိုသို့ မဟုတ်ပါက နောက်ပိုင်း၌ မုံ့သခင်လေးသည် ဤကိစ္စအား အသုံးချ၍ သူ့ကို ခြိမ်းခြောက်လာနိုင်သည်။ ထိုသူများသည် ဘယ်သောအခါမှ လူကောင်းများ မဟုတ်ခဲ့ပေ။ ဤအမျိုးသား၊ အမျိုးသမီးနှင့် ချဥ်းကပ်ရန် ရည်ရွယ်ထားသည်ဖြစ်စေ၊ မရည်ရွယ်သည်ဖြစ်စေ သတိထားစောင့်ကြည့်နေရန် လိုအပ်၏။ ထိုသို့မဟုတ်ပါက အနှေးနှင့် အမြန်ပင် သိမ်းငှက်များ အစာကုပ်သကဲ့သို့ အလစ်ဝင် တိုက်ခိုက်ခံရမည်သာ။
အကယ်၍ ယခင်က ကြိုးစားအားထုတ်မှုများအားလုံးသည် စကားတစ်ခွန်းကြောင့် အလဟဿပျက်စီးသွားပါက ပို၍ များပြားသော ဆုံးရှုံးမှုများကိုသာ ရရှိလာလိမ့်မည် ဖြစ်သည်။
