ابو شما (وهو يشيل الاكياس بتعب): زين سيف ييت الله يابك لأنه ما عندي مكان فالسيارة كلها سامان شل شما اختك وياك
سيف : ما أقدر والله انا مب راد البيت الحين بعد شوي بروح ويا ربعي و كان السوق على دربي ف ييت لكم و لانه من متى ما شفت شما الخبله
ابو شما : خلاص مالنا إلا علي يساعدنا
علي : أمري عمي أنا فالخدمه أي شي تامر فيه بسويه
ابو شما (وهو يبتسم): ما يأمر عليك عدو بس شل الأغراض في سيارتك و انا بشل شما دام اخوها ما يقدر
علي : إن شاء الله عمي
و خذ علي الأكياس من ايد ابو شما و الأكياس من ايد العامل اللي كان ويا ابو شما و كان ف سيارة ابو شما بعد اغراض وبدا يشيلها لسيارته
شما تراقب الوضع بصمت و علي كل شوي يصد يشوفها و يبتسم لها لين ما خلص و شل كل الاغراض لسيارته قال علي لابو شما اتريا عمي شوي بيب شي لكم بسرعه و برد ما بطول عليكم مرت الدقايق و رد علي معاه كيسه متروسه حلويات
علي (وهو يعطي الكيس لأبو شما): هاي لكم لأنه قبل لا تيي كنا انا وشما ناوين ندش محل الحلويات بس انت دقيت عليها و ما لحقنا ندش المحل
شما تفاجأت و ابتسمت بخجل
شما (وهي تحاول تبعد أفكارها عن علي وتلتفت لأبوها): يلا ابويه خلنا نروح بيأذن المغرب و نحن بعدنا فالسوق
ابو شما :خلاص يلا نروح
علي ركب سيارته و لحقهم
علي كان في سيارته يفكر في شما ما قدر يطلع صورتها من باله كان يقول بينه و بين نفسه : "هل هي نفس الشيء تحس؟" هو ما قدر ينكر و يجذب على نفسه إنه بدا يحس بشيء كبير تجاهها طول الدرب و هو يفكر لين ما وصلوا عند بيت ابو شما
عند بيت ابو شما نزل علي الأغراض من سيارته و دخلها البيت شافته ام شما
ام شما (وهي مبتسمة): اهلاً علي ما قصرت تعبناك ويانا دام انك وصلت لبيتنا خلك تعشى ويانا
علي: لا مشكوره عمتي
دش ابو شما و اصر عليه يتعشى عندهم ما قدر يرده علي و قعد وياهم
وفي نفس الوقت شما كانت في غرفتها صلت ولبست مخورها المفضل و وقايتها تذكرت كيف كان علي يشتري لها العطر في السوق تعطرت بالعطر اللي يابب لها علي وكان العطر كأنه ذكرى صغيرة
شما بعد ما خلصت نزلت الصاله وابوها وامها كانوا قاعدين مع علي و علي كانت عيونه كل شوي تروح ناحية شما ما يقدر يبعد نظره عنها
علي (يتكلم مع ابو شما): الشركه كيف هالأيام؟
ابو شما (بأبتسامة): الحمد لله تمام شما ما شاء الله ما تقصر دايمًا مجتهده
