اولاد الحكم

البارت ٥٤

#اولاد_الحكم
للكاتبة روشان (مروج الشمري )

البارت ٥٤

بدر : دار عينه عني وحجى بقهرة

-كيفت من شفتك عبالي بشير عايش

بدر : اريد ابلع ريكي ما كدرت ، رديت امتمت من الرعب الي انتابني
شنوو عبالك عايش ؟!!! بشير وين ؟ اخوية وين ؟

رد متألم ونزت دمعة من طارف عينة
-اني جنت مصدر للدولة مندس ويا التنظيم الارهابي اخر مرة شفته بيها قبل اربع شهور تقريباً من حكم عليه التنظيم بالموت واخذوه عالمحرقة ، واني طلعت ويا مجموعة بعملية ماعرف شنو صار بي بعد

بدر : محرررقة ؟!!!! ،اختضت ايدي بقوة وكعت عدة التضميد مني للكاع
عيوني غوشت اريد مكان اكعد بي ما لحكت، وكعت على ركبتي بالكاع واحس الكلمة جانت سيف وفتح راسي بالنص مو مجرد كلمة

اجه علية المضمد يركض وهو يصيح ...
-سلامات دكتور

بدر: دنك عليه سندني من الكاع وكعدني عالسدية بصف الولد المصاب

-خوما بيك شي دكتور اجيبلك شي تشربة

بدر : رفعت ايدي الجانت ترجف اشرتله بيها، لا لا اشكرك ،كمل شغلك اني زين

رجعت انداريت للمصاب الي جان يحاول يضم عيونه عني بإي طريقة ، سألته برجفة وضعف

يعني بشير مات؟!! شفته بعينك مات ؟هزلي راسه برفض

-لا ما شفته ولا كدرت ارجع مرة ثانية حتى اتأكد
باللحظة الي اخذوه بيها حتى ينفذون حكم الموت او الحرك بمنطقة ثانية بعيدة عن مكان المعتقلات مالتهم ... بهالوقت احنا طلعنا بعملية
وهالعملية جانت اخر عملية الي ويا التنظيم لان جنت مبلغ عليها وهجمو علينا الجيش وفشلت العملية واني رجعت ويا الجيش
مكدرت ارجع بعد للدو١١عش لان مليون بالمية انكشفت اني المبلغ

بدر مدنك راسه ،وظهره محني بقوة وكأنما انكسر من اللحظة الي سمع بيها حكم الموت على بشير ... حجى بصوت يكاد يختفي من قوة الالم وحرگة الگلب الي حاس بيها

بدر : ليييش ما انقذته ؟ لييش عفته بيدهم وانت مبين عليك جنت قريب منه لدرجة خلت وجعك عليه يبين من نظرة عيونك

دنك راسه بأسى ورد بقهرة
-ماكدرت علمود الواجب الجنت بي ... ولا تنسى جاي نححي عن د١١عش ، يعني چلاب نجسة عالكاع ما تفوتهم فايته ومستحيل احد يكدر يطلع من ايدهم صاحي ، لا اني ولا عشرة مني نكدر نخلص بشير من ايدهم

بدر : بشير عايش اني متأكد

(اتنهد المصاب بحسرة وكمل كلامه)
هي توجع بس راح اصارحك بيها، صح ما كدرت اشوف بشير من مات بس اني على يقين ان الي يحكم عليه التنظيم بالموت مستحيل يبقى عايش بعدها ..

هز بدر راسه برفض قاطع ، وهو يحاول يكذب كلام الولد ويصدك احساسه الي ما كادر يصدكه من الاساس ... رد بوجع