اولاد الحكم

البارت ٥٥

#اولاد_الحكم
للكاتبة روشان ( مروج الشمري)

مساء الورد وجمعة مباركة عليكم ورداتي ، اعذروني على ايام غيابي والله شاهد ماغبت عنكم الا لظروف قوية اجبرتني عالغياب
وان شاء الله هالايام راح اعوضكم ببارتات يملأها الخير والاخبار الحلوة

قراءة ممتعة وان شاءالله تكملة البارت بأقرب وقت

البارت ٥٥

المحامي : بس اكو شغلة حيرتني هنا بالسجن وكلت اسألك بيها

بدر : كول استاذ خير ان شاء الله ؟!

المحامي : من انطيت اسمه لأبو الحاسبة هنا ،ودخل معلوماته
طلع عنده تشابه  اسماء ويا شخص ثاني بالسجن واغلب المعلومات متشابهة بينهم
كلت اسألك تعرفه لو لا ... اسمه بشير الحكم سلمان

فلة : بس كمل المحامي  نطقه للاسم جسمي اقشعر من هول الموقف وفزيت على على صوت الصياح من كل مكان

وارث خطف بكل سرعته من كدامي ما شفته الا سحب الموبايل من ايد بدر ويحجى بصوت عالي مليان رجفة

وارث: متأكد ، متأكد من اسمه ؟! ارجع اقرالياه

المحامي : بشير الحكم سلمان من مواليد محافظة الانبار ...سنة ١٩٨١
نفس معلومات بتار بالضبط بس اسم الام طلع عندي مختلف ،امه اسمها سنية محمد فرحان

فلة: بس كال معلوماته خالة سنية حطت ايدها على صدرها وصرخت بصوت موجوع ،ومبحوح من الشهكة والحرگة الي بي 
سنية: يممممه وليدي بشييييير !!!

الولد واحد يباوع للخ عيونهم غرغرت  وروحهم مفرفحة ،ميدرون شيسوون وارث يصيح  ويكرر

وارث : لك الحمد يا الله ، لك الحمد يا الله

كعد بحيل مهدود عالقنفة وشمر التلفون بصفه حتى نسى المكالمة ، المحامي يصيح الو ومحد جاوبه وصوت صياح البنات وحدة تكول للخ بشير عايش ودموعنا تتساقط بسباق كل وحدة بينا بجت اكثر من الثانية ...وبدر صافن رايح بعالم ثاني من صدمته بالخبر حسيت عقله ما مستوعب لحد الان ....

رجع وارث اخذ التلفون بسرعة وطلع برة حتى يكمل حجي ويا المحامي
اسمعه يصيح
وارث:اييي استاااااذ وياك وياك ،الله يبشرك بالخير على هالخبر ، بشير  اخوية وصار سنتين مفقود مندري بي بالسجن

فلة: اختفى صوت وارث بعد ما طلع للطرمة ، وبقى بدر على وكفته انداريت لكيت مريم كاعدة يم الباب روحها ذايبة مثل قطعة ثلج وذابت ، بس عيونها التعبانة تنكت دموع بدون اي ردة فعل ... ركضت عليها ياقوت سندتها واخذتها للتخم كعدتها عالكرسي وجابتلها مي
بسرعج انطتها حتى تشرب  ...

وكفت بنصهم حايرة على منو اسأل ، واني كل جسمي يرجف من سمعت الخبر لحد الان
منا خالة سنية ودموعها ومنا مريم الي تريد تتخربط وبدر الواكف مصدوم والبنات سلا وايمان حايرات يركضن ورى الجهال خاصة يوسف ويسر الي  هستوهم جاي يمشون ويخطون ويحبون اللعب بكلشي