Juda Hoke Bhi Tu Mujhme Kahin Baki Hai

Epilogue

"Ishita...Ishita..."

"Ishita yaar kahan ho?"

"Kya hua Raman? Itna kyun chilla rahe ho?"

"Yahi kaam reh gaya hai na ab mere paas ke chilla chillake gala phaadun. Tum to mahan hasti ho. Tumko milne keliye to appointment lena padta hai"

"Kya bole ja rahe ho Raman aap?"

"Bhagwan ka PA bhi itna busy nahi hota hoga jitni busy tum hoti ho"

"Bhagwan ka PA Raman? Seriously? Kuchh bhi bolte rehte ho"

"Kya kuchh bhi...Kabse bula raha hoon tumhe. Waise kar kya rahi thi Jagga jasoos?"

"Raman bhool gaye aap? Aaj Adi ki shadi hai"

"Mai nahi bhoola. Isiliye to tumhe bula raha tha ke sath baithke dekhte hain ke neeche kya chal raha hai"

"Mai bhi to yahi dekh rahi thi. Sab tayyariyan to achhe se chal rahi hain. I just hope ke aaj ke function me koi drama na ho aur sab achhe se nipat jaye"

"Ye to pakka hai ke aaj koi drama nahi hoga"

"Aap itne confidently kaise bol sakte ho?"

"Kyunki tum nahi ho na us function me"

"Kya matlab?"

"Matlab bilkul saaf hai. Jis function me tum jati ho wo bigad jaatha hai"

"Aap mujhpe ilzam laga rahe ho?"

"Meri itni jurrat ke tum par ilzam lagaoon. Nahi baba. Mai to bas sach bol raha hun. Fact is fact"

"Satyavadi Harishchanadra! Prove karke dikhao ke jo aap bol rahe ho wo soch hai"

"Isme prove kya karna hai. Sach to sabke saamne hai. Aaj tak jitne bhi functions bigde hain wo sab tumhari wajah se hi to hue hain"

"Wakalat mat karo. I want proof"

"Aisa kya? Theek hai. To suno. Kahan se shuru karun???? Ummm....Haan...Mihir ki tilak ceremony...Wo kaise bigda? Kyunki TUM Sanjana ko wahan le ayi thi. Shagun ki mehendi me jo hungama hua o bhi tumhari wajah se . Kyunki TUM ne Ruhi ko wahan le jane ki zid ki thi. Shagun ki sangeet par bhi TUMHARI wajah se hi hungama hua tha. Rinki ki shadi me, Adi ki dance party me jo bhi drama hua sab TUM ne create kiya. Filhaal itne proofs kafi hain shayad. Aur chahye to bhi bata sakta hun. List kafi lambi hai"

"Bol to aise rahe ho jaise khud ki wajah se kabhi koi problem hi nahi ayi"

"Mai tumhari tarah har jagah apne sath problems le kar nahi jatha"

"Haww bade bhole bante ho. Bhool gaye hamari engagement? Usme AAP der se aye the"

"Uski wajah bhi tum hi thi"

"Kuchh bhi mat bolo Raman. Apne galti keliye mujhe kusoorwaar mat banao"

"Mai tumhari tarah nahi hun ke apni galti kisi aur ke sar daalun. TUM hi ne Mihir ko jail bheja tha jiske wajah se mai poori rath police station me raha. Is wajah se engagement wali din mai gadi me sogaya aur mujhe der hogayi"

"How mean? Achha wo chodo. Ye batao ke Asia Business Head honour wali party ko kisne bigada tha? Bhool gaye 'Meri kamyabi ka shrey meri Ex-wife ko jata hai' wali speech? Apne function ko khud bigada tha aapne"

"Uski to yaad hi mat dilaao. Us party ko bigadne ka saara shrey mai tumhe deta hoon"

"Ab isme bhi meri hi galti?"