اوتار الهامور"

part22🍂

احياناً مَشاعرنا
تَوهمنا بمَشاعر ناس
يخَطئون بأسَامينا
نجَيهم روحَنا تزخ شوك
نَرجع مَادري شَبينا
مِن مَلگاهم الـ بَارد
نحَچي وبَالهم شَارد
هِاي الـ لحَظة بيها نَشوف
كُلشي مِن طَرف واحد .

ــــــــــــــــــــــــــــــــــــــــــــــــــــــــــــــــــــــــ

اسيـل "

الـايام تعدي ليحد ما صارت ثلاث اشهر ونص اني ما احچي وياه ولا هو يحچي ..حچينة قليل
طول هل فترة هو ما تقربلـي ومن يوم الـ شردت هو ما حاچي وياي وكلامنا قليل

الـي سويتة لمن شردت جان اكبـر خطأ ...لأن هَو كام يعاملني وگأنما اني چبيرة يقـسي وياي بـ شكل بَس مايضربني .... اهلة گامو يكولون آلة انتَ الصح ولازم تشد العقاب عليها ولا ترخيلها الحَـبل لا تخليها تستگوي عليگ

ساعـة 3 ضهـَر

گاعدة انضف واشتغل بالـبيت...تارسة الگاع مي وزاهي وانضـف
اجتـني ام هامـر ...وكفت بصفي تباوع على الگاع
ام هامر:- خلصتي؟!

ـ لا والله عمة بعدني

ـ اليوم زلم هواي راح تجي نضفي زين

ـ عمَة خل وحدة تجي وياي والله ضهري نكسر عاد هي تلم شي واني اللم شي وخلصنا مو كل الشغل علية

ـ نغم ما تكدر تمسح وتنضف حامل وحُرة عدها دراسة وصبيحة تطبخ يعني منو تنضف وياچ؟

ـ صيحلي حرة ما اكدر بعد ضهري موتني

ـ دكملي كملي .

عافتني وراحت حتـة هي مدري شبيها وياي متغيرين كلهم علية هزيت ايدي
بديت أعزل وامسـح وتفكيري كلة يمهم شكو جايين
سئلتهم البعض يكولون عزيمة والبعض علمود سالفة
يلة اني شعلية
ما اهتمت وبقيت انضف ليحدما كملت
شلت السطل والوصلة والزاهي من الگاع
حطتهن على الدرج وصعدت للفوگ
نضفت غرفتنا وكملت

نزلت السطل والغراض وياي

الشال على چتفي ولافة شعري بطريقة عشوائية ...
اول ما نزلت لگيت هامَر راجع من الشغل ...
تعودت أن كلما يرجع من الشغل أخذ غراضة واصعدهن فوگ