ပြိုကျလျက်ရှိသော မိုးရိပ် (Complete)

Part (62) Unicode

ပန်းချီသည် ယနေ့တွင်ကျရောက်သော တစ်စုံတစ်ယောက်၏ မွေးနေ့တွင် ကောင်းမှုကုသိုလ်ပြုပေးရန် မနက်စောစော ဘုရားပေါ်သို့ရောက်နေသည်။ ဆောင်းဝင်လာပြီဖြစ်၍ မနက်ခင်းစောစောတွင် နှင်းများဖြင့် ပတ်ဝန်းကျင်တစ်ခုလုံး ဖုံးလွှမ်းနေသည်။ နဂိုအေးချမ်းသောမြို့လေးသည် ယခုအခါ ပို၍ပင်အချမ်းပိုလေတော့သည်။ ပန်းချီတစ်ယောက် အောက်မှမြန်မာဝတ်စုံ အင်္ကျီလက်ရှည်ပေါ်တွင် ဆွယ်တာလက်ရှည်တစ်ထည်ထပ်ဝတ်ထားသည်။ ထိုဆွယ်တာ၏ အပေါ်တွင်မှ သားမွှေးအနွေးထည်တစ်ထည်ထပ်ဝတ်ထားရသေးသည်။

မိုးကုတ်မြို့၏ အချမ်းသည် ထိုကဲ့သို့ ဝတ်ထားသည့်တိုင် နွေးထွေးမသွားနိုင်ပါ။ ရန်ကုန်ကဲ့သို့ ပူပြင်းသည့်ရာသီဥတုတွင်ကြီးပြီးလာရသည့် ပန်းချီအတွက် ပို၍ အေးခဲနေသည်။ သူမဘုရားသို့ လမ်းလျှောက်လာခြင်းဖြစ်သည်။ ယခုလို မနက်စောစောတွင် သူမဆိုင်ကယ်မစီးနိုင်ပါ။ ဆိုင်ကယ်မောင်း၍ လိုက်ပို့ရမည့် သူကိုလည်း သူမအားနာသည်။ ချမ်းအေးရသည့်အထဲ ဆိုင်ကယ်ထပ်စီးရလျှင် သူမခန္ဓာကိုယ်လေး အေးခဲသွားရမည်မှာသေချာသည်။

ထို့ကြောင့် အချမ်းပြေ ခန္ဓာကိုယ်လှုပ်ရှားမှုရအောင် အနီးရှိ ပတ္တမြားစေတီသို့ လမ်းလျှောက်ကာရောက်လာခြင်းပင်။ လက်ထဲတွင် နှင်းဆီပန်းပွင့် အဖြူရောင် အပွင့်သုံးဆယ်ပါသည့်ပန်းစည်းအားကိုင်လာသေးသည်။ သူမလာသည့် လမ်းတစ်လျှောက်တွင် တချို့အိမ်လေးများအတွင်း၌ မီးဖိုအသေးလေးများဖြင့် မီးလှုံနေသည်အား တွေ့ခဲ့ရသည်။ အေးခဲနေသော မနက်ခင်းစောစောတွင် မီးလှုံခြင်းမှာ ဓလေ့တစ်ခုပင်ဖြစ်လေ့မည်။

ပန်းချီဘုရားပေါ်တွင် ပန်းများအား သေချာကပ်လှူ၍ ဘုရားရှိခိုးသည်။ ယနေ့တွင် သူမပြုလုပ်သောကောင်းမှုအစုစုတို့သည် ရန်ကုန်တွင် ကျန်ရစ်ခဲ့သော အမျိုးသမီးအတွက် ရည်ရွယ်ခြင်းဖြစ်သည်။ ပန်းချီ၏ ဘုရားရှိခိုးခြင်းအဆုံးသတ်တွင် တောင်းသော ဆုတစ်ခုမှာ ထိုအမျိုးသမီးအတွက်သာဖြစ်ချေတော့သည်။

"တပည့်တော်မှ ပြုလုပ်ရသော ကောင်းမှုအစုစုတို့ကြောင့် ယနေ့တွင် ကျရောက်သော တနင်္လာသမီး ကဗျာခြွေသည် မွေးနေ့မှစ၍ အေးချမ်းပါစေ။ အနာရောဂါကင်းဝေးပြီး စိတ်ချမ်းသာ ကိုယ်ကျန်းမာနဲ့အသက်ရာကျော်တိုင်နေထိုင်နိုင်ပါစေ။ စီးပွါးရေးအလုပ်အကိုင်တွေ အဆင်ပြေချောမွေ့ပြီး သူမရဲ့အမျိုးသမီးနဲ့အတူ သက်ဆုံးတိုင် ပေါင်းဖက်နိုင်ပါစေ။ အနှောင့်ယှက်ကင်းသော ချစ်ခြင်းမျိုးနဲ့ သာယာသော အိမ်ထောင်ရေးလေးပိုင်ဆိုင်ရပါစေ အရှင်ဘုရား"