Agahon
Sa imong pagbugtaw
Matchang wa ka eagi it gana
Magbangon pa eang sa imong kama.
Indi ka magkaon it pamahaw
Gadali ka ro imong hambae
Ag sa imong pag-abot sa trabaho
Mareklamo ka hay masakit ing ueo.
Paguli nimo sa tru-adlaw
Maskin sangkiri sa imong ilabas wa ka it natabing
Ano ing gustong kan-on? Pangutana ni Nanay
Uwa, imong sabat, gusto ko eang magpahuway.
Masueod ka sa imong kwarto
I-itsa rong bag sa sueod it aparador
Mailis ag matan-aw sa saeamin
Ro imong hibayag siin?
Sa pagbalik nimo sa opisina
Gatikang ka sa kilid it daean
Ro mga euha naga-umpisa nga mahueog
Mas mayad lang siguro kung ikaw hay natueog.
Indi pa kunta nimo mabatyagan
Ro kasakit sa imong kahimtangan
Ro kaeaea sa pagkaduea
Nana nga imong ginghigugma.
Pag-abot it gabii, daea sa kaga-oy
Wa ka eon ka-ihapon
Diretso lang sa eugban
Ro mga natabo, imong gingbalikan.
Ag haron ka eoman dayon
Maagto sa isaea ka-binit
Malingkod, ro ueo sa tuhod
Manguyngoy, matangis.
Asta makaron, pila eon ka-adlaw ro nag-agi
Imaw lang gihapon ro imong gina-inisip
Ro inyong mga oras nga magkaibahan
Tag-kamo pa igto sa eskuylahan.
Pero tapos eon to tanan
Indi eon dapat hinumduman
Tama eon, pagpahuway eon
May nagahueat pa nga hin-aga.
