حب غريب

عارف لما تقرب من حد انت واثق إن هيجي اليوم اللي مش هتعرفه فيه تاني .. بس المصيبة أنه هو كل حاجة ف حياتك ... يعني بمجرد ما اليوم دة هيجي حياتك هتفضى عليك و هتعيش وحيد و مش هيكون ف حد ليك من بعده !

الحاجة الوحيدة اللي هتفضلك هي "الذكريات" ...

كل حاجة كانت مابينكوا ، كل ضحكة و كل هزار .. كل دمعة و كل خناقة و كل كلمة حلوة كانت بينكوا هي بس اللي هتفضل ..

ووقتها هتنزل أكتر دمعة هتوجعك مع أجمل ابتسامة ليك هتبان على شفايفك ... اصلك أتعودت انك بمجرد ما تفتكره تبتسم ! بس المرة دي هتبقى ابتسامة بوجع .... ابتسامة مش هتقدر بعدها تروح تكلمه و تجري عليه ... ابتسامة غرضها بس تقلب عليك المواجع ...

لا هي ابتسامة فرحة ولا ابتسامة حب .. ولا ابتسامة شوق ..

ساعتها مش هتعرف تروحله تقوله وحشتني !

ساعتها كل حاجة بينكوا هتنتهي ..

ساعتها هتقول ياريت لو ترجع أيام زمان ..

ساعتها هتدعيله من قلبك ربك يحفظه ... و هتقول يارب أسعده مكان ما يكون ...

ساعتها هتحس بقيمة اللي كان معاك ...

هتحس فعلا إن ماينفعش حد تاني ياخد مكانه ..

و هتعرف وقتها إن الظروف أقوى من أي حد تاني !

اصلك عمرك ما حبيت ولا هتحب حد تاني زيه ...

وقتها مش هتعرف تقول يارتني ماعرفته .. ولا تحمد ربك انك عرفته عشان ...

عشان منه عرفت إزاي أحب ...

عشان معاه عرفت إن ف ناس حلوة بجد ..

عشان معاه عرفت يعني إيه حد يكون جنبك .. مش بس وقت ما تحتاجه ، لكن معاك على طول ...

عشان عرفت يعني إيه حد يطمنك لما تخاف ... حد يديك أمل لما تيأس م الحياة ..

حد يشاركك كل حاجة ... حزنك و فرحك ...

حد يزعل لزعلك و يشيل دمعك ...

عشان عرفت يعني إيه "إنسان" بجد ...

عشان حاجات كتير و أفضال كتير لو فضلت أقول فيها مش هتخلص ... و مش هيكفيها كلام ..

عشان لولا دخوله حياتي أنا مكنتش عرفت حاجات كتير ...

علمني إزاي أحب و أزاي أخاف على حد .... علمني إزاي الغيرة ... علمني إزاي يوحشني ..

علمني إزاي أكون جنب الناس لما تحتاجني ...

عشان هو بجد واحد بس ، مافيش زيه حد ...

بمجرد ما يكون موجود الحزن كله بيتهد ...

و الفرحة بتتولد من جديد ...

عشان محدش هيعرف يكون زيه أبدا ولا هعرف أحب من بعده حد ...

أصلا غلطان اللي قال إن الدنيا مابتوقفش على حد !!