Paikot-ikot, Patingin-tingin [isang Tulaserye]

TULA 15: Palakad-lakad, Palayo-layo

Naglakad-lakad ako

sa tabing-dagat

isang umagang

maganda ang panahon

Nakangiti ang araw

Ang mga ulap ay sumasayaw

Masasaya ang mga batang

nagtatampisaw

Sana katulad din nila ako

Pero

heto ako

Pinipilit ngumiti

gaya ng araw

Pinipilit sumayaw

gaya ng mga ulap

Pinipilit magtampisaw

gaya ng mga bata

Subalit

hindi ko nagawa

Nang maabot

ng hampas ng alon

ang aking mga paa

kagyat na pumasok

sa isip ko

ang mga alaala

mula nang siya

ay aking makilala

Lumayo ako

sa dalampasigan

upang hindi na maabot

ng hampas ng alon

ang aking mga paa

upang hindi ko na siya

maalala pa

Sana

Ngunit

tulad ng pagpilit kong ngumiti

gaya ng araw

ng pagpilit kong sumayaw

gaya ng mga ulap

at pagpilit kong magtampisaw

gaya ng mga bata

hindi ko nagawa