احنا كدا ( الجزء الثانى )

الحلقه { 22 }

الحلقه { 22 }
فجر : انا حر ارفض اقبل انتى لسه صغيره وانا اعرف مصلحتك اكتر منك
حبيبه : وانا وثقه من كده ومقدرش اناقش حضرتك ولا اى حد يقدر يشكك فى كده
بس كنت المفروض تقولى
فجر : كان هيفرق ايه لو كنتى عرفتى ؟
حبيبه : اكيد كان هيفرق على الاقل مكنتش نزلت معاهم البحر ولا كنت هتعامل معاهم عادى وانا عارفه انهم عوزين يتجوزونى
تخيل لما جابولى العصافير والسمك انا كنت بوستهم زى قاسم تخيل كل واحد فيهم كان فكرنى ايه
اكيد كانو هيفكرو انى بحب كل واحد فيهم
فجر : حبيبه الموضوع انتهى روحى ذاكرى
حبيبه : لا مش هروح غير لما افهم ليه رفضتهم
فجر : عشان انتى لسه صغيره
حبيبه : ده مش سبب نانا اتجوزت جدو وهى14 سنه
وكمان منى اتخطبت لحازم وهى 19 سنه
فجر : ( بنرفزه وصوت عالى ) انتى عاوزه ايه دلوقتى ؟
حبيبه : متعليش صوتك وتخلينى اعيط فهمنى انته ليه قولت لا على التلاته
فجر: عشان مينفعوكيش
محمد وحماده مينفعوش تفهين وطيشين مش دول اللى بحلم ليكى بيهم
واياد ظابط شغلو كلو مع الحرميه والمجرمين ممكن وهو فى مهمه ياخد رصاصه ويموت ليه بقى تغمرى وتتجوزى جوازه زى كده
حبيبه : بس هو ده السبب
فجر : ايوه هيكون ايه غير كده ؟
حبيبه : اقولك على حاجه جوايا وخايفه منها
فجر : قولى
حبيبه : خايفه تكون عاوزنى جنبك وبس
فجر : يعنى ايه ؟
حبيبه : يعنى فى امريكا كنت دائما معايا تودينى المدرسه الصبح وتيجى تاخودنى
ممنوع يبقى ليه اصدقاء ممنوع اتكلم مع الجيران
حتى ال tv كنت بتحددلى اتفرج على ايه ومشوفش ايه
وكمان اللبس ممنوع اللبس زى البنات اللى فى سنى لازم لبس حضرتك شايفو مناسب
لما كنت اقولك دادى ده للولاد تقولى انا بنتى راجل مش بنوته مدلعه
طول عمرى بعمل اللى حضرتك تقولى عليه
يمكن انا محبتش حماده ولا محمد ولا اياد
خايفه يوم احب حد وحضرتك تقولى لا عشان عوزنى افضل جنبك وبس ومش مهم انا ولا مهم رئيى ولا قلبى
فجر : قولتى كل اللى عندك ؟
حبيبه : ايوه
فجر : طب بصى بقى موضوع الحب والكلام الفارغ ده تنسيه تماما لغاية ما تخلصى دراسه
والدراسه مش معناها 4 سنين جامعه لا
لسه فى ماجيستير وكمان دكتوراه تمام فهمه كلامى
حبيبه : طب افرض
فجر : ( بشخط ) مفرضش واللى اقولو يتسمع
وخلى بالك يا حبيبه انا رابيتك ان الكلمه تتقال مره واحده تانى مره بعقاب ومهمه كبرتى هتفضلى بنتى وحقى عليكى اعقبك اول ما اشوفك بتغلطى فهمه ولا لا
حبيبه : فهمه
فجر : تروحى الجامعه كل زمايلك اصدقاء واخوات وبس غير كده لا
والا هجبلك واحده تمشى معاكى خطوه خطوه وهمنعك تكلمى حد والنت هشيلو والموبيل كمان هديكى القديم
خليكى حبيبه اللى انا بحبها عشان متزعليش من اللى هعملو مفهوم ؟
حبيبه : طيب ( وسابتو ومشيت )
فجر : مش اسمها طيب بنت اقفى كلمينى
اسمها ايه ؟
حبيبه : حاضر يا دادى
فجر : مفيش حب ولا كلام فارغ من ده قولتى ايه ؟
حبيبه : حاضر
فجر : يلا روحى على اوتك
حبيبه : طب هدخول اقول لنانا حاجه
فجر : قولت على اوضتك وكمان تنامى
حبيبه : حاضر تصبح على خير
فجر : ( بصلها ومردش عليها )
حبيبه : للدرجادى انا ممكن اهون عليك ؟
( ودخلت اوضتها وهى مدمعه )
فجر : ياحببتى يا بنتى معلش لازم اعمل كده الناس بقت وحشه لازم اخوفك عشان مش اى حد يضحك عليكى
اكيد نفسى اشوفك عروسه بفستان الفرح بس لما يكون معاكى شهاده تحميكى ويكون ليكى مستقبل
هى ماما هى السبب
**** ( بقلم هند محمد @isis Mohamed ) ****
ام حازم : حازم خود دول 30 الف وكمان يومين هجبلك زيهم
حازم : ايه ده انتى جبتى الفلوس دى منين ؟
ام حازم : شيلاهم كنت بحوشهملك عشان لما تتجوز نعرف نجيب شبكه حلوه وكمان عفش حلو ونعمل احلى فرح
حازم : حوشتيهم ازاى يعنى ومنين ؟
ام حازم : اهو كنت بدخول جمعيات اوفر من الاكل والشورب او اى قرش كان بيفضل معايا كنت بشيلو
وكمان الفلوس اللى خالك بيدهانى كنت بشيل اللى اقدر عليه
حازم : اه يا لقيمه انتى ولما كنت اقولك عاوز فلوس تقوليلى منين اجبلك منين اتاريكى حطاهم تحت البلاطه
ام حازم : اه اديك فلوس عشان تبقعزقهم لاكن دلوقتى لا انته كبرت وهتتجوز انزل انته ونور واشترو شبكه حلوه وكمان اى عفش عوزين يغيروه قولهم احنا موفقين
حازم : طب ليه وانا خاطب منى مقولتليش انك معاكى كل الفلوس دى ؟
ام حازم : عشان كنت هتاخودهم وهتصرفهم على الفسح والهدايه لاكن نور انته داخل على جواز يعنى شبكه وكمان عفش وفرح
هو ابوها قالك عاوز مهر كام ؟
حازم : لا ماقالش انا حتى قولتلو قالى انا مهر بنتى 100 مليون معاك تدفع
قولتلو لا قالى خلاص مترغيش كتير
ام حازم : والله حماك ده سكر دمو خفيف هههههههههه
مش زى مراتو مريم رخمه شويه
حازم : ام منى كمان قولتى عليها كده فى الاول وبعد كام يوم حبتيها
ام حازم : ام منى دى مكلفتش خاطرها ترد عليا كلمتها اكتر من مره وهى مرضيتش ترد
حازم : طب وكلمتيها ليه وليه مش قولتيلى
ام حازم : يا حازم هو بالساهل عليه تفضل خاطب سناتين وفى الاخر كده تسيبو بعض
يلا اهو كل واحد راح لحالو
بس انا خايفه من نور دى
حازم : ليه بس ؟
حازم : افرض لما اتجوزت وانا وهى شدينا مع بعض وهى بتلعب كاراتيه يابنى دى ممكن تضربنى
حازم : قلبى انتى لا طبعا دى بقى اعتبريها البودى جارد بتعتك اى واحده فى الشارع تدايئك قوليلها بس انا واثق كل الناس هتخاف مننا بعد ما اتجوزها
ام حازم : انا خايفه منها الصراحه
حازم : بكره بعد ما تحبيها مش هتخافى منها
ام حازم : طب هات الفلوس دى
حازم : الله انتى مش ادتهانى ؟
ام حازم : انته عاوزنى اسبهالك تفرتكها وانته نازل تشترى الحاجه هدهملك
حازم : ماشى خوديم ربنا يخليكى ليه يا احلى ام فى الدنيا
ام حازم : ويخليك ليه يا رب
**** ( بقلم هند محمد @isis Mohamed ) ****
ام فجر : انته رايح فين الصبح كده انهاردا الجمعه
فجر : رايح المكتب هقابل محاميين عوزين يتمرنو عندى محتاجه حاجه اجبها وانا جاى
ام فجر : اه طبعا عاوزه اخرج انا من ساعت ما جيت هنا وانا فى البيت مخارجتش تعالى شممنا هوا شويه
فجر : نعم
ام فجر :بقولك عاوزه اخرج تعالى ودينا الهرم ولا البرج او اقولك ركبنى مركب فى النيل
فجر : موديكيش القناطر بالمره ؟
ام فجر : اه ماشى هدخل اللبس
فجر : تلبسى ايه ماما انا مش فاضى وبعدين انتى فى اسكندريه كنتى بتخروجى ؟
ام فجر : اه طبعا كنت بروح مع العيال البحر وكنت بنزل مع هناء او اخواتك وكان ابراهيم بيخرجنى
فجر : طب ماما انا مش فاضى معلش سلام بقى
ام فجر : طب اخود حبيبه وننزل
فجر : انا معاقب حبيبه ومش مسموحلها تخرج باره باب الشقه لحد يوم الحد متخرجش
ام فجر : هو حكم قراقوش ؟
فجر : اه حكم قراقوش ماما لو زوت العقاب عليها هتبقى انتى السبب انا بقولك اهو انا ماشى سلام
( ومشى وقفل الباب )
فجر: ( وهو فى الاسانسير ) اخرجك انا مكنتش بخرج ندى هخرجك انتى يا حببتى يا ندى عمرك ما طالبتى حاجه زى باقى الستات
**** ( بقلم هند محمد @isis Mohamed ) ****
ايمان : مالك لسه مكتأبه ؟
منى : سبينى فى حالى يا ايمان
ايمان : ما تكبرى دماغك مشى واحد يجى غيرو وبعدين انتى اصلا مكنتيش بتحبيه
منى : انا مكنتش بحبو لا طبعا دا انا كنت بموت فيه
ايمان : اللى بيحب حد بيقبلو بكل ظروفو وهو ظروفو ان هو امو هو اللى مسؤل عنها
منى : لا بقى مش هو المسؤل دى هى اللى بتصرف على نفسها
ايمان : حببتى المسؤليه مش مجرد مصروف ومين بيصرف على مين
دى ست كبيره وامو لازم يكون جنبها
لو حصلها حاجه لو تعبت
حتى وهى سليمه ومش عيانه لازم يبقى معاها يسئل عليها ويكون جنبها
منى : ومن امته العقل ده بقى يا ايمان ؟
ايمان : يمكن اكون مروشه شويه مطرقعه حبتين بس بفكر بعقلى
منى : طب تنصاحينى بئيه ؟
ايمان : كلميه وصلحيه وارجعو لبعض سهل اوى تلاقى عريس عندو شقه بعيد عن اهلو
بس صعب تلاقى حد يحبك ويكون باقى عليكى وانا عارفه انو كلمك اكتر من مره عشان ترجعو لبعض
منى : يعنى اكلمو بس كده انا كرامتى فين
ايمان : كرامتك ولا حب عمرك اختارى
انا هطلع عشان عندى درس تاريخ سلام
اه حبيبه كلمتنى وقاتلى انها زعلانه منك ليه بتكلميها وحش
منى : اخر مره لما كانت هنا تخيلى بتقولى انا جايه انصحك
حبيبه الهبله هتنصحنى انا
ايمان : بصى هى حبيبه مش صحبتى اوى بس برضو مسمحلكيش تقولى عليها هبله هى اه طيبه وعلى نيتها بس مش تقولى عليها كده
وبعدين كان المفروض تشوفيها هتنصحك وتقولك ايه ؟
منى : انا كنت متعصبه اوى ومدايقه
انا هكلمها واصالحها
ايمان : طب هى قالتلى حاجه كده متردد اقولهالك ؟
منى : ايه ؟
ايمان : لا اعرافيها منها او من حازم
منى : اوعى تقولى حازم بيحب حبيبه ؟
ايمان : لا طبعا حاجه تانيه انتى لو كلمتى حازم هتعرفى سلام بقى عشان عندى درس
**** ( بقلم هند محمد @isis Mohamed ) ****
ام فجر : حبيبه هنفضل قاعدين كده
حبيبه : انا بذاكر انتى زهقانه افتحلك التلفزيون ؟
ام فجر : ما تيجى نخرج
حبيبه : دادى معاقبنى مش هينفع اخرج
وبعدين هنروح فين ؟
ام فجر : دول بيقولو القاهره فيها اماكن كتير ممكن نخرج فيها ونتفسح
حبيبه : لا انا اخاف اخرج انهاردا الجمعه كلها بكره وعقابى يخلص
ام فجر : طب انا بقى هخرج
حبيبه : هتروحى فين ؟
ام فجر : هتمشى كده
حبيبه : طب افرضى توهتى ؟
ام فجر : لا مانا خليت ابوكى يكتبلى العنوان فى ورقه معايا
حبيبه : طب خليكى يوم الحد ونخرج سوى
ام فجر : طب بصى انا هنزل اجيب شويت حاجات للبيت ومعايا الموبيل لو عوزتى حاجه كلمينى مش هتئخر
حبيبه : طيب ماشى خلى بالك من نفسك
ام فجر : ماشى سلام متفتحيش الباب لحد
حبيبه : حاضر
**** ( بقلم هند محمد @isis Mohamed ) ****
هناء : مالك يا قاسم ؟
قاسم : عاوزه اكلم حبيبه بس خايف
هناء : وخايف من ايه ؟
قاسم : من عمى انا حاسس انو مش حابب حد يقرب من حبيبه
هناء : اى اب بيخاف على بنتو خصوصا لو بنت زى حبيبه
بس قولى انته بتحبها بجد
قاسم : بصراحه اه اوى كمان طيبه كده ورقيقه
هناء : طب ماتكلمها على الاسكاى بى مش هى دى اللى فتحه اون لين
قاسم : اه هى بس هكلمها بحجة ايه ؟
هناء : ستك تطمن على ستك وتشوفهم محتاجين حاجه مش ستك قالتلك كلمنى وقولى ايه بيحصل فى البيت خلاص كلم حبيبه وقولها ادينى تيته خليك ناصح ههههههه
قاسم : صح والله انتى ذكيه
طب خليكى جنبى بقى عشان لما اقولها افتحى الكام واشوفها بس قوليلها انتى طبعا
هناء : ماشى اتصل
قاسم : الو ازيك يا حبيبه؟
حبيبه : اهلا ازيك يا قاسم عامل ايه ؟
قاسم : انا الحمد لله كويس تيته عامله ايه وعمى ؟
حبيبه : الحمد لله تمام ازاى عمو وطانت هناء وعمرو وكل البيت اخبارهم ايه ؟
قاسم : تمام الحمد لله
هناء : انا كويسه انتى عامله ايه وحشانى
حبيبه : وحضرتك كمان والله وحشانى اوى
هناء : طب افتحى الكام عشان اشوفك
حبيبه : حاضر
ها كده شيفانى
حبيبه : اها زى القمر ايه ده انتى اتحجبتى ؟
حبيبه : اها الاسبوع ده اول اسبوع ليه ؟
قاسم : تعرفى ان كده احلى كتير
حبيبه : اصحابى برضو بيقولولى كده
هناء : هى ستك فين ؟
حبيبه : خارجة تجيب حاجات
هناء : خراجة وسابتك ؟
حبيبه : اها هى لقت نفسها زهقانه وانا كان عندى مذاكره فا هى نزلت
قاسم : طب هى راحت فين دى مكنتش بتنزل لوحدها هنا والاسم انها حافظه الشوارع هنا لحسن تتوه
حبيبه : والله قولتلها كده قالتلى لو تاهت هى كاتبه العنوان فى وارقه هتوقف تاكسى وترجع
هناء : طيب معلش يا حبيبه حطه حاجات على البتجاز هقوم اشوفها وراجعه تانى
حبيبه : ماشى
قاسم : لو معطلك اقفل ؟
حبيبه : لا انا كنت ذاكرة وقولت اريح شويه
قاسم : تعرفى انك وحشتينا اوى ؟
حبيبه : وانتم كمان
قاسم : اخبار السحلفه ايه ؟
حبيبه : اسمها سلحفاه الحمد لله هى كويس لسه من شويه عملتلها خياره وعماله تاكل فيها
قاسم : بتحبيها ؟
حبيبه : اه طبعا
قاسم : طب بتحبى السلحفاه اكتر ولا السمك ولا العصافير ؟
حبيبه : انا بحب الحيونات كلها
قاسم : اه طيب مش هتيجى عندنا قريب ؟
حبيبه : مش عارف لما دادى يقول
صحيح هو ممكن تجيب الشله كلها فى الاجازه ونخرج يوم هنا
قاسم : لو انتى عاوزه كده اجبهملك دلوقتى واجيلك
حبيبه : لا خليها بعد الامتحنات لحسن خلاص دا فاضل اقل من شهر ونص
قاسم : اها خلى بالك انا عاوز تقدير مش اقل من جيد جدا
حبيبه : جيد جدا
دا انا لو جبت اقل من امتياز دادى هيولع فيه
قاسم : هههههههه للدرجاى مع ان عمو شكلو طيب اوى
حبيبه : هو طيب بس ساعات بحس انو قاسى اوى عليا وبيزعقلى كتير
قاسم : اكيد بتديقيه ؟
حبيبه : لا والله مش بعملو حاجه
قاسم : معلش
حبيبه : بقولك ايه دادى جه سلام بقى هكلمك تانى
قاسم : طيب ماشى
( قفلت حبيبه الاب ومسكة الكتاب )
فجر : انتى لسه صاحيه اساعه 11
حبيبه : كنت بذاكر وكمان نانا لسه ماجاتش
فجر : ليه هى فين ؟
عند جارتنا رحمه ولا ايه ؟
حبيبه : لاخارجة تتفسح عشان مخنوقه هههههههههه
فجر : هههههههههه بطلى هزار انا عارف انك زعلانه منى
ستك فين
حبيبه : بقولك خارجة
فجر : وكتاب الله ؟
**** ( بقلم هند محمد @isis Mohamed ) ****
حازم : ايوه ؟
منى : فى واحد يرد على حببته يقولها ايوه
حازم : تقصدى اللى كانت حببته
منى : انته رخم اوى انته لسه زعلان منى
حازم : منى كل اللى بنا انتهى
منى : طب انا اسفه انا فكرة وموفقه ان مامتك تعيش معانا لما نتجوز
حازم : هاهاها انتى لسه فكره انسى يا منى
احنا فسخنا خطوبتنا من حوالى شهر ونص يعنى خلاص
منى : خلاص ايه ؟
حازم : انا خطبت وان شاء الله قريب اوى هكتب كتابى
منى : يعنى هتتجوز غيرى ؟
حازم : اكيد ولا فكره انى هفضل عايش على ذكريات حبنا مثلا
منى : انته بتهزر صح
حازم : لا مش بهزر ولعلمك بقى اللى خطبتها موفقه ماما تكون معانا وبتحبنى بجد مش زيك
منى : ومين دى بقى اكيد واحده مش لقيه حد يبص فى وشها عشان ترضى بالوضع ده
حازم : لا بالعكس دى زى القمر وقريب اوى هتبقى دكتوره
عارفه مين نور اللى هى صحبت حبيبه
منى : ايه اللى اتخانقة معانا دى دى راجل
حازم : صح راجل يعتمد عليها مش عيله وملهاش فى حاجه متكلمنيش تانى عشان انا بحب خطبتى اوى ومش عاوز ازعلها
منى : حازم انته بتتكلم بجد ؟
حازم : قريب اوى هعزمك على فرحنا سلام بقى
( وقفل المكالمه )
منى : كده برضو يا حازم نور تتجوز واحده بتضرب الرجاله فى الشوارع
احسن يا رب تتخانق معاها وتضربك يا رب
**** ( بقلم هند محمد @isis Mohamed ) ****
فجر : الساعه باقة 12 وماما لسه ماجاتش
ومش بترد على الموبيل يكون جرالها ايه
حبيبه : متقلقش هى زمانها جايه
فجر : هى خارجه من كام ؟
حبيبه : 7
فجر : بقالها 5 ساعات هتكون راحت فين
طب انزل ادور عليها فين انا
سيبى الكمبيوتر ده وكلمينى
حبيبه : فى ايه هى زمنها جايه متقلقش
فجر : انتى على قلبك مراوح ليه ؟
حبيبه : انا قولتلها متنزلش هى بقى كانت مخنوقه ونزلت
فجر : مخنوقه من ايه ان شاء الله
حبيبه : هى قالتلى من الحبسه اللى ابوكى حابس هالنا دى وهى مش واخده على كده
فجر : هى بارضو اللى قالت كده
حبيبه : اه هى انا عن نفسى واخده انى افضل لوحدى وفى البيت هى بقى مش واخدها
فجر : ماشى مش هحسبك على الكلام ده دلوقتى
حبيبه : ماشى كمان كل ما اقول حاجه هتحاسبنى وتعاقبنى انته مابقتش تحبنى
فجر : يا رب صبرنى
حبيبه : ايه ده منى بتتصل بيه
فجر : طب شوفيها عاوزه ايه
حبيبه : لا مش هرد انا بكلمها كتير وهى مش بترد سيبها شويه
فجر : يا ترى روحتى فين يا ماما
تفتكرو ام فجر راحت فين وايه اخرها ؟