بنت مختلفة

اليوم التاني !!

*حسن*
صحيت بدري وقت الفجرية كده و لقيت جدة دانيا بتصلي .. طبعا اتكسفت و قولت اصلي انا كمان .. معرفش اتوضت فين فاستنيت اما تخلص عشان اسألها مع اني مش متعود ع صلاة الفجر لكني حسيت اني محتاج اصليها فعلا و لما خلصت صلاه سألتها الوضوء فين و كمان كنت محتاج اغسل وشي و اسناني فلقيتها بتشاور ع اوضة صغيرة في الركن .. دخلتها اشبه ما يكون بالحمام عندنا مصنوع من مادة صلبة انا مش عارف ايه هي لكنها شبه جذع الشجر بس ناعم قوي نعومه مش طبيعية و موصلين المياه من البحيرة للبيت عن طريق مواسير عبارة عن جذوع شجر مخلية من جواها .. عاملين نظام كامل متكامل ميعملوش غير مهندس شاطر
لما خرجت من الحمام سألت جدة دانيا الحمام مصنوع من ايه قالتلي جذوع شجر لكن دانيا برداهم بطريق تنعمهم و حاطة عليهم كذا مادة ع بعضها مستخرجاهم من كذا فاكهة و المواسير كانت تنفيذ دانيا لكن فكرة جدتها
معقولة دانيا دي ذكية و شاطرة قوي كدة ؟؟
صليت و قرأت شوية في القرآن بعدين دخلت نمت و لما صحيت لقيت احمد و مريم و جدة دانيا قاعدين برة و دانيا واقفة ورا جدتها فخرجتلهم
انا : صباح الخير
كلهم : صباح النور
جدة دانيا : اتفضل اقعد يا حبيبي .. دانيا .. روحي جيبلنا حاجة نفطر بيها يا حبيبتي
نظرة تعجب من دانيا لجدتها
انا : لالالا خليكي يا دانيا انا هروح
دانيا : خليك انت هتعمل فيها فتوة .. انت متعرفش حاجة هنا .. اقعد وانا رايحة يا بابا
*دانيا*
خرجت من البيت طبعا اشوفلهم حاجة ياكلوها و اكيد كنت متضررة
معرفش ليه من امبارح و جدتي بتعمل معايا كده . .ليه كل مرة بتخليني اعمل حاجة انا مش حابة اني اعملها مع اني متأكدة انها فاهمة كويس احساسي بيكون ايه ..
حسن ده انا مش طايقاه ولا طايقة وجوده ع الجزيرة . .اي نعم هو قمور حبتين تلاتة اربعة لكن رزالته مش طبيعية .. حاسة انه طفل فرحان بشوفة اللي قدامه مضايق من حركاته .. طفل سئيل !!
بس اللي انا مستغرباه احمد و مريم .. دول بيسمعوا كلامه فكل حاجة من غير اي اعتراض او نقاش.. معقولة شغالين عنده ؟؟ بس هما شكلهم محترم قوي ع انهم يكونوا شغالين عند حد .. حسب حكاوي جدتي معظم اللي من بلدنا اللي بيكونوا شغالين عند ناس بيكونوا شكلهم مهرجل قوي
و كمان صمتهم ده غريب قوي و محير في نفس الوقت .. مريم دي بالذات اللي شكلها مش مريحني خالص .. ما علينا هو شهر استحمله بالطول او بالعرض و اخلص بعدها منهم !!
رحت المزرعة جبت منها لبن و شوية اكل برضو بعدين روحت الغابة اجيب شوية فاكهة بعديها قولت هروح عند البحيرة في جنبها شجرة تفاح هقطف منها كذا واحدة و وانا عند البحيرة نسيت نفسي كالعادة و سرحت فتفكيري و قعدت ونسيت خالص الناس اللي كانوا مستنيني
*حسن*
جدة دانيا حكيتلنا قصتهم كلها فغياب دانيا .. دلوقتي بس عرفت سبب تصرفاتها دي . .بصراحة صعبت عليا قوي و في نفس الوقت ندمت اني ضايقتها لأن اكيد هي فيها اللي مكفيها و مكنش المفروض ازود عليها .. و كمان اعجبت بكذا صفة فيها الصراحة من قصتها ..
جدة دانيا : دانيا اتأخرت كدة ليه بس ياربي
احمد : هو مش حضرتك قولتلها تروح تجيب الاكل ؟
جدة دانيا : اه بس هي مش بتتأخر كده في العادي
احمد : طيب خلاص انا هروح ادور عليها
مريم : وانا كمان هاجي معاك
حسن : انتوا الاتنين هتستنوا هنا مع طنط !! انا هروح اشوفها !!
معرفش ايه اللي خلاني اقول كده بس ماعلينا .. خرجت من البيت و قعدت ادور عليها و جه فبالي للحظة انها مدام هتجيب اكل اكيد هتجيبه من الغابة .. فدخلت و قعدت امشي فيها .. انا مدخلتش قوي كدة فيها امبارح .. تقريبا وصلت لنصها و كنت كل اما اخش اكتر كل اما المكان شكله يبتدي يقلقني لحد ما فجأة طلع قدامي فهد كبير و كان باين فعينيه انه جعان ..
طبعا انا حاولت اداري خوفي لكن فجأة الفهد نط فوقي و وقعت ع الارض و هو فوقي !!!!!