عزيزتي الفتاة ، كيف حالك؟! إن شاء الله تمام؟!
اذا صاحبتك اللي انتي احلى منها و اشطر منها خطبت واحد منيح ،، وانتي لسا ما خطبتي ، هاد لا يعني انك محسودة و حظك قليل!
و اذا صاحبتك التانيه برضو اللي انتي احلى منها بكتير خطبت و سافرت ع اميركا ، برضو هاد لا يعني انو حظك عاطل و اكيد عاملينلك عمل!!
واذا بنت خالتك اللي انتي اصغر منها و احلى منها وانتي بتعرفي تلبسي اكتر منها خطبت ، هاد لا يعني انو حظ الملايح طايح وابصر شو!!
واذا كلهم خطبو و ضليتي انتي ، و فرطوو زي المسبحة وانتي مقضيتها ترددي ورى الاغاني عالسناب شات و بتخربشي ع وجهك !!
هاد لا يعني انك ،، لا والله يعني ، لا كتير هيك الصراحه ، لا عنجد في مشكلة ، لأنو مش لهالدرجة ، في إنَّ يا عمي ، هو انا بدي اضل ابررلك ، لا يا عمي روحي تبخرّي ، كتيررر هيك صراحه !! خلص جد في اشي ، ما ضل كرت عرس و خطبة الا اجاكي ، ما زهقتي تلقفي ضمة الورد من ورى العروس!! صرتي لاقفيتها ١٦ مره !! ياما انكسرت رجلك مشان تقدري تلقفيها ، و تروحي عالبيت بتعرجي وماسكة ضمة الورد! و مأجاش دورك !!
لا يا عمي في اشي!!
في انو حظك كتير حلو الصراحة ، ٩٠٪ من اللي خطبو وتجوزو ندمانين عالساعه اللي قالو فيها اه ، و صبغو اشقر ، وكتبو سنة احلى مع خطيبي و مع زوجي رمضان احلى ، هيهم ماكلين هوى و نفسيتهم متدمره ، و مقضينها تنبيش موبايلات ، ونصهم معهم ضغط وسكري لكيفية التعامل مع الزوج و عيلة الزوج !!
اخدو دورات بطريقة التعامل مع مزاج الذكر بس ما زبط ، ومحسودين وبقولو مأحسنو جوزها ، مع انو مريض نفسي وخلاها تحن لإيام العزوبيه ، يا عمي اسمعي مني وضلي ارجلي و سنابشات وعيشي حياتك ، لاحقين عالجيزة ووجع الراس والهم و لف الدوالي !!
نيالك لإنك عايشه من راسك انتي ، مش من راس خواتو وعيلتو وعمتو اللي جاي من الضفه !
مهو بكل طلعه بقضيها ماسك موبايلو ، وانتي اللي بتتفاهمي مع الجرسون!!
عيشي يا حصتي ، مهي خربانه خربانه!
#عمر_زوربا
أنت تقرأ
روايات عمر زوربا
Humorهده مجموعه من الروايات التي تصف الواقع التي كتبها الشاب الاردني *عمر زوربا*
