Tanging ikaw lamang ang aking pinapangarap
Mula sa paggising ikaw lang ang hinahanap
At pakiramdam ko ako’y nasa mga ulap
Hinaharana ka tuwing ako ay susulyap,
Ang matipid mong ngiti ay walang kasingsarap.
Ang lahat ng mga bituin na nasa langit,
Lahat ng bituin sa iyo ay naiinggit
Sapagkat ikaw lamang ang tanging kaakit-akit,
Magandang binibini, huwag ka lang masungit
Para mga puso natin ay agad maglapit.
Sa pangalan mo lamang ako ay kinikilig
Malulusaw ako kapag ikaw na’y tumitig,
Naririnig mo din ba ang pusong humihimig
Kahit na napakahina pa ng aking tinig,
Pakiusap lang, sana ang puso mo’y maantig.
Naririnig mo din ba ang pusong tumutugtog
Tumatambol ang pusong hindi na makatulog
Sapagkat sa iyo lamang ako ay nahulog
Kapag malapit ka, puso ko ay kumakabog
Parang malulunod ako sa gitna ng ilog.
Alam mo bang lagi kang laman ng aking isip
Gabi-gabi na lang, ikaw din ang panaginip,
Sana ang hanging amihan sa iyo’y umihip
Ibulong ang pagsinta at sa iyo’y magsipsip,
Tingnan ang puso mo, baka ako ang masilip.
O! Pag-ibig, unang beses na ika’y nadanas
Ngunit bakit naman siya’y laging umiiwas
Akala ko noon lahat ng pag-ibig patas,
Pareho man kaming sa labi pa ay may gatas
Binibini, pwede ka bang yayain sa labas?
