Kaloy: Da Return of Da Comeback
Any similarities to existing persons (living or dead) and places except to celebrities and the titles of their songs/movies are purely coincindental or where used in the pursuit of creative excellence.
Kaloy: D Return of da Comeback
Pasiuna
An Waray-waray nga linggwahe in baga hin liso. Kon aatendiran ngan patuturukon hin maupay, matubo ngan mabunga manta ini. Pero kon papabay-an la an liso matapos mailubong ha tuna, madudunot la ini ngan diri na masisilawan han sirak.
Para ha mga waray mabuhat.
1
Baga hin sirena hin usa nga ambulansya an baba ni Claudia nga haros makapukaw ha bug-os nga Barangay Aringit ha usa nga bungto nga diri kilala hin duro. Waray hunong ini nga pag-linitanya ha sakob han mansyon nga puno hin mga suruguon.
“Pagkamata na kamo! Paghuna-huna kamo nga damo an naghuhulat nga mga trabahuon yana nga adlaw.”
Waray may nabuhat an mga ginpipiraw pa intawon nga mga kabulig kundi an sumunod bisan waray pa mga muta ha ira mga mata. Napiraw manggud ini hira kay nag-disco pa ha kaluyo nga barangay kagab-i ngan nan-bisperas ha ira sangkay.
“Kanina pa sigi hin tugaok an mga kamanokan pero waray la gihapon kamo pagkakamata. Ginsidngan ko na kamo nga diri magkalakat hin gab-i kay may mga trabaho kamo kinabuwasan pero nagpirit gud la gihapon nga bagan gingigir-asan gud kamo nga makasayaw.”
Hi Claudia an tinapuran ha sakob han mansyon ni Don Mariano Sinsilyo, an giririkohi nga lagas ha ira barangay nga tag-iya hin poultry farm ngan usa nga plantasyon hin kamatis ha Iraya. Labot la nga hi Claudia nala an nasasalin nga kaurupod han lagas, hiya gihapon an asawa ni Borduk nga amo an tinapuran ni Don Mariano nga magbantay kan Val, usa nga Mastiff dog ni Don Mariano. Ini nga ayam in danay nagmomurosdot an nawong nga bagan nauomangkon han mga bulldogs.
Strikta ini hi Claudia, manipis an kiray, dako an irong, permi mapula an im-im, ngan an mga mata baga hin sibuyas an kalidong. Bisan baga hin flower pot an nawong ni Claudia in maupay ini man-bado nga baga hin nakakapanag-iya han mansyon. Permi ini may kapot nga panyolito ha wala nga kamot nga baga-baga hi Vilma Santos kon nakatalikod. Hiya an magigin kontrabida hini nga istorya nga magtatalompigos ha bida ngan matawa hin dako samtang naghihimakuri an iba nga karakter, masiwangag, ngan maghihinitaas an kiray kon magsisinoplada.
Mag-aangay gud la hira ni Borduk tungod nga an nawong han iya asawa in baga hin kaliding nga natuhog hin raysang. Buksol an mga lawas hini ngan nakikita tungod han iya mga ginsusul-ot nga mga huot nga bado. Pero bisan naman la makaloluoy an face value ni Borduk in mahilig ini magsul-ot hin mga bulawan (kulaos) nga singsing nga gintunaw tikang ha mga tinirok niya nga benti singko sentimos. Iton iya mga kamot in baga-baga na lugod hin kanan Arabiano nga waray karukarigo.
“Buenos días, mayora! Adi na an imo kape.”
Pasisingiton na naton yana hi Rosana, an suruguon nga baga hin linta kon makadikit ngan makasup-sop hin dugo kan Claudia. Hiya man la udog an assistant to the assistant ni Don Mariano nga parehas iton ginsusul-ot nga uniporme han mga suruguon ha mansyon. Nagtikang kuno an loyalty ni Rosana ha mayor doma han palitan hiya ni Claudia hin usa nga headband nga color pink nga iya na yana permi ginsusul-ot, umuran man o sumirak an panahon. Para ha iya dako na daw nga butang an headband kay nakakadugang daw ini ha iya kamahusay.
“Rosana, ano ini nga kape? Iba man an teeeeyyyyst?!”
“Ah, mayorahhh. Naubos na an aton kopi meyt sow ginamit ko la anay an gatas ni Val nga nakasulod ha karton,” an eksplinasyon ni Rosana samtang nanliliparo an mga mata ni Claudia.
