قصص عراقية

الدكتور

اشتغلت بعيادة مال دكتور اسنان عن طريق جوارينه ... الي شغلني بالعيادة هو نفسه الخلفة مال ديكورات الي اشتغل العيادة ... الدكتور ابو العيادة جان بغير منطقة وحول عيادته .. و صدفة صارت شغلتي مثل ما حياتي كلها عبارة عن صدفة جبيرة و حتى حياة كل الناس هيج .. تجيك سالفة تغير حياتك كلها و طبعا مرات للاسوء ومرات للاحسن ..
الدكتور طلب من جوارينه الخلفة واحد يشتغله سكرتير او وحدة مو مهم .. هو رجال جبير و اختصاصة اسنان .. بوقتها جنت اشتغل منا ومنا يعني ماعندي شغلة ثابته ..
عمري 15 سنة و مبطل من المدرسة .. ابن لأم مطلقة و زوجها اصلا مو بالعراق .. عايش بلبنان .. و اخ لبنات ثنين و ولد نظره كلش كلش مو زين ..
جنت الكط رزقي عالجوارين والمعارف .. و ماشية الحال ..
اخذني جوارينه للدكتور .. شافني و كالي تعرف تقرا وتكتب ؟؟
كلتله اي .. كال خلص من الاسبوع الجاي تجي هنا ...
بوقتها بالطريق الي رايحين بي لبيت الدكتور صاحبنا الخلفة كال ديربالك تسأل عاليومية لو عالاسبوعية و لاتخاف راح ينطيك اكثر من ما تتوقع ..
كلتله مو مهم .. المهم يبقيني اشتغل وياه مو مثل حالتي هسة يوم اشتغل و عشرة كاعد .. كال كول يا الله وخلي نشوف ... و صدك ابد مسألت ولا هو جاب طاري الراتب ..
و بعد اللقاء بأسبوع طلعت للشغل .. الدكتور هذا عنده مراجعين قديمين يعني اول مفتح العيادة كامو يجوه الناس من كل مكان و اصلا هو يشتغل بمستشفى الصبح ..
بس الي فاجئني بي الرجال كلش متواضع و من يجي للدوام يجيب وياه غده و اني وياه ناكل سوية .. و دائما من ماكو مراجعين يصيحني اكعد يمه و يسألني على حالتي و وضعي ..
اني مجنت اجذب عليه واحجيله كلشي ..
داراني اكثر من اللازم و حتى الاسبوعية بحياتي مجنت احلم بيها و اضافة لهل الشي اذا جان يدزني بشغلة مثلا اتسوكله مسواك لبيته و اجيب المسواك للسيارة .. جان يكلي خلي الباقي الك حتى لو الباقي هواي فلوس ..
بس الي مدوخني مسواكه مو هواي و مبين لو مال نفر لو نفرين .. لحد ما يوم من الايام اني كلتله ..
كلتله دكتور انت دائما تسألني عن وضعي وحالي زين انت اليوم احجيلي انت شنو حالك ..
كال اني جنت اتمنى انرزق بولد مثلك .. سبع و يساعدني ..
صح اني ممحتاج و شغلي خير من الله .. بس جنت اتمنى يطلع بواحد من ولدي رجال مثلك ..
كلتله صدك ولا مرة شفت ولدك جوي هنا للعيادة لو حتى زوجتك !
كال زوجتي متوفية بس ولدي الجبير عايش بكندا و ميخابرني بس اذا محتاج شي .. والصغير الثاني ابو بنات و المرات الي اشوفه بيها بس علمود ياخذ المصرف مني وهاي هي ..
كلتله الله يساعدك ..
كال والله اني ممحتاج منهم شي بس خايف عليهم اذا اموت يضيعون لان معتمدين عليا و ميحاولون يعتمدون على نفسهم مثلك مثلا ..
الحاصل ...
بدت علاقتي تزيد كلش بالدكتور الى درجة كام مرات يجيني للبيت ياخذني .. و شغلاته البره اروح وياه بيها .. يعني يريد يغير سيارته اروح وياه للمعارض .. تصير عنده شغلة معاملة هم اروح وياه .. حتى مرات يروح لنقابة الاطباء ياخذني وياه ..
حبني كلش ..
و اخذني اكثر من مرة لبيته .. خطية بيته مثل بيوت الافلام الاجنبية .. الهدوء بالبيت قاتل وممل ..
بيت جبير بس اي روح ما بي ..
سنطه كلش و الي يفوت بي يحسة فارغ مو مسكون ..
ومرت سنة و سنتين و تلاثة واني وياه لحظة بلحظة .. الحمدلله حالتنا بالبيت كلش استعدلت .. و اني تعدلت كلش ..
و وصلت لسالفة العسكرية والجيش بذاك الوقت .. تخربطت احوالي كلها وعرفت راح ابطل من عنده ..
رحتله و كلتله هالحجي و كلتله والله ماكو بيدي حل بس شسوي ..
كال ليش تكول ما عندي حل ؟؟
كلتله شنو مفتهمت ..
كال معليك اعتبر نفسك مراح تداوم عسكرية ..
كلتله شلون ؟؟
كال معليك ..
و سوالي معاملة مال اسباب صحية .. جماعته دكاتره بنفس اللجنة الي تطلع اسباب عسكرية ..
و صدك والله واروح و يطلعني من الجيش ..
يعني واحد و سوالي هيج خدمة .. كلتله دكتور بس كلي شلون اجازيك و شسويلك .. تدري انت نقذت عائلة كاملة بهاي مساعدتك ..
لان لو رايح للجيش معناها اهلي ترجع حالتهم مو زينة و احنا والله بحاجة الفلس ..
كالي حتى لو رايح مداوم عسكرية هم جان راتبك ماشي .. حضنته وبجيت لان والله ماعرف شلون اجازي ..
كالي انت ابني لاتخاف ماطول اني عايش ..
و كالي شوف الانسان مضامن نفسه و اني هم مضامن نفسي اذا هسة اطلع من العيادة مضامن نفسي ارجعلها بعد .. بس الي اريده منك اذا اموت دائما تدعيلي و ابد متنساني ..
كلتله الله ينطيك الصحة ليش هيج تحجي ..
كال مو اعرف ولدي من اول اسبوع ينسوني و يكعدون يتعاركون على الي راح اعوفه الهم .. كلتله اني ابنك والله و صدك بيومها انقهرت عليه ..
و بيوم من الايام بعد فترة من هالحجي ..
كالي اريدك باجر تفرغلي نفسك الصبح راح اجيك .. كلتله خير ؟؟
كال فرغلي نفسك ولاتسأل هواي ..
كلتله ماشي ..
ثاني يوم اجاني الصبح وطلعنا للبنك و فتحلي حساب مصرفي و خله بي مبلغ جبير .. المبلغ يكفي شراء محل و تجهيزة تجهيز كامل ..
كالي اني اثق بيك و هاي الفلوس ماريد اخليها بحسابي و ماريد ولدي يعرفون بيها ..
كلتله اي ؟
كال خليتها بأسمك وبعدين اسحبها ..
كلتله من عيوني صار ..
ورجعنا ..
طبعا الفلوس نسيتها اني ومرت اكثر من سنة و هو ابد ميجيب طاريها ... بس بهل الحجي اني جنت اجمع من فلوس شغلي وياه و دخلت بنص كوستر كصيفة شريك .. وي ولد بمنطقتنا هو اصلا سايق كوستر وجان يشتغل يم واحد و جمع فلوس بس متكفي يشتري سيارة لوحدة واصلا هو صديقي من الطفولة و كل حياته اني وياه خطوه بخطوه ..
فتح عليا الموضوع و رئسا شاركته و يومية الكوستر جانت بيني وبينه بالنص ..
جنت اكله كبل نص اليومية تذبها بيد امي ..
والحمدلله والشكر ..
طبعا بهل الحجي السنين تركض ركض ..
وفد يوم اجه الدكتور عادي داوم وكمل شغلة وصاحني ورى مخلص الوقت الي يستقبل بي مراجعين ..
كالي انت تعرف اني اختي باستراليا ..
كلتله اي ؟
كال اني كبرت و ولدي التهو بحياتهم واصلا ممهتميلي لا قبل ولا هسة ..
كلتله اي ؟
كال راح اهاجر هناك هالشهرين ..
كلتله لاتكولها دكتور ..
كال من اليوم ماكو دكتور بعد .. من اليوم كلي بابا لان خلص من باجر بعد عيادة ماكو وراح اخذ راحة لحد ميجي يوم السفر ..
حضنته قوي وكلتله ليش مكلتلي ..
كال مردتك تضوج بس لاتخاف راح ازيد فلوس على فلوسك حتى تسويلك مشروع ..
كلتله يافلوس قصدك ؟
كال فلوسك الي خلتيلكياها بالبنك ..
كلتله شنو ؟؟
كال اي هاي هدية من ابوك حتى من اروح تكدر تسويلك مشروع تعيش منه وترتاح انت واهلك حبيبي ..
كلتله بس اني عندي نص بكوستر وانت تدري وممحتاج والله ..
كال ميخالف اريدك متحتاج بشر بهل الدنيا لا انت ولا اهلك ..
و صدك والله خلى فلوس على الحساب الي بأسمي من عده القديمات و كالي مو تنسى اذا تسمع اني متت لاتنساني وادعيلي ..
كلتله لاتكول هيج ان شاء الله عمرك اطول من عمري .. و اجه يوم السفر ورحت ودعته من حافظ القاضي بوقتها .. طبعا من سلم على ابنه ما بجى .. بس من اجه حضني وبجيت اني هو بجى .. حتى ابنه شكله تعقج بيومها و يمكن كرهني .. مع العلم كل مدة شغلي وي ابوه مشايفه غير اربع لو خمس مرات ..
و راح الدكتور بس ابد مكطعت علاقتي بي وجنت ابلغة اول بأول بكلشي افوت بي .. و فتحت بفلوس الدكتور اسواق غذائية بس جبيرة كلش .. محلين طبك ..
و كدرت اخذ غير نص الكوستر سيارات ثنين و الله فتحها بوجهي اني واهلي و تزوجت و مثل مكلت لحظة بلحظة كلشي يعرف الدكتور...
الى ان بيوم من الايام اجاني اتصال من صديقة هم عراقي و جان اسوء اتصال بحياتي ..
صديقة هم رجال جبير هناك كالي والله اذا اكلك متصدك ..
كلتله شنو ؟
كال الدكتور توفى و صارلة اسبوع حالته كلش مو زينة بس بهل الاسبوع يوميا يذكرني يكلي اذا اموت تكول لفلان اول شي بعدين يله تتصل بولدي لان هو الوحيد الي راح يدعيلي ..
بجيت بجي بيومها و سويتله فاتحة جبيرة .. و الحمدلله والشكر لليوم مكطعت دعاء للي غير حياتي بصدفة ..
صدفة جوارينا اشتغل يمه و سواله الديكور مال عيادة ..
وصدفة الدكتور سأله على سكرتير ..
وصدفة اجاني واخذني للدكتور ..
بس احمدالله واشكره و اطلب من الله يرحم الي ساعدني وساعد اهلي .. لان لو هالدكتور و هالصدفة ..
جان الله يعلم شنو حالنا هسة .. وخصوصا لو لابس عسكرية ..
الف رحمة على روحك ياطيب لان انت مساعدت شخص واحد وروح وحدة .. انت ساعدت خمس ارواح خمس اشخاص تعيش عيشة كريمة و مرتاحين و ما مدو ايدهم لبشر ..
الف رحمة على روحك الطيبة ..
(الدكتور)
انتهى
اخوكم ابو بغداد سايق التكسي
#ابو_بغداد

  هذه القصة منقولة من صفحة أبو بغداد على الفيسبوك .. يرجى متابعتة
Abo Baghdad : https://www.facebook.com/AboTxei