سلامه عليكوا

اختيار الكلية

كتير مننا بيواجه ازمة اختيار الكلية اللي عايز يدخلها، بنبقي متلخبطين و مش عارفين ايه الحاجة اللي فعلا عايزين نكمل حاياتنا بنعملها. اصل دة مش هزار، دي حاجة المفروض انك هتلبسها بقيت حياتك.

المهم.... طبعا في ظل الظروف اللي احنا بنمر بيها دي اهلنا ضميرهم بيدفعهم انهم لازم يساعدونا و يفيدونا بخبراتهم عشان ناخد القرار السليم و نختار الكلية المناسبة لينا ( او بمعني اصح الكلية اللي كانو هم نفسهم يدخلوها و فشلوا فا طبعا لازم يتجهوا انهم يحققوا احلامهم دي فينا)
و علافكرة اهلك دول مش بيقتسروا علي امك و ابوك بس (حلوة بيقتسروا دي)، دول بيبقوا ابوك و امك و جدودك و جداتك و اخواتك (حتي لو كانوا اصغر منك) و عمتك و جوزها و خالك اللي بيشتغل في الخليج برضه هايكلمك من هناك يقولك رأيه و هو بيباركلك علي نتيجة الثانوية العامة.
لا و ياريتها هاتقف لحد كدا و بس، دة كل واحد في دول مش هيكتفي برأيه و بس، دة كمان هيجمعلك أراء اصحابهم و زمايلهم اللي ولادهم عدوا بالتجربة دي...يا راجل دة انت حتي طانط چيچي جارة عمتك هايبقلها رأي في الموضوع. لأ و الحمد لله كلهم بيتفقوا علي ان الكلية اللي أنت عايز تخشها دي كلية فاشلة و شهادتها مابتأكلش عيش و هاتتخرج منها تقعد عالقهوة.

_يا بنتي فنون جميلة ايه و زفت ايه، عايزة تطلعي مدرسة رسم لشوية عيال يطلعوا ميتين اللي جابوكي
_يا حبيبي ما تسمع الكلام و تخش طب زي سامح ابن طنط مرڤت جارتنا
_معهد تمثيل! انت عايز تشلني و تجيب اجلي يا ابن الكلب انت! عايز تطلع مشخصاتي!
_طب ايه رأيك في طب اسنان، دة انا و جدتك عمالين نكعلهم في فلوس، دول بيكسبوا علي قلبهم فلوس اد كده، اهو حتي تفيدنا و تعالجنا ببلاش

و هاتفضل محاولتهم و زنهم عليك يطاردوك في كل حتة لغاية ما يقرفوك في عشتك. و يا ويلك و يا سواد ليلك لو عرضتهم و أسريت علي كلية ثانية، هاتخلص ساعتها مرحلة الزن و تبتدي مرحلة السياح....
ساعتها بقي بتلاقي نفسك متسيحلك في كل حتة و دة طبعا عشان أمك كل ما تقابل حد من صحابها تقعد تشتكي منك ومن عندك و من الكلية الزبالة اللي أنت عايز تدخلها. دة غير طبعا ابوك اللي بيطلب من اصحابه و كل اصحاب الخبرة انهم يقعدوا معاك و يقنعوك برأيه. و زود علي دول كمان جدك اللي في كل قاعدة فيها ناس كبار لازم يشهدهم عليك و علي دماغك اللي متركبة غلط.
و بكدة يبقي في ناس أكتر بيخشوا في مشكلتك و طبعا مش هايقدروا يمنعوا نفسهم انهم هما كمان يفيدوك بآرائهم العظيمة.

ساعتها بقي هايبقي عندك ٣ حلول:
١-تسمع كلامهم و تسيبك من الكلية المهببة اللي انت عايز تخشها و تدخل كلية من اللي اقترحوها عليك و تدبس نفسك في شغلانة بتكرهها و عمرك ما هتفلح فيها
٢-تحاول تقنعهم بوجهة نظرك و ساعتها بقي هاتبقي زي اللي بيحفر في البحر لأنهم عمرهم ما هيقطنعوا و كمان كل ما هيشوفوك هايدولك جرعة تريقة و احباط تجيب شلل أطفال
٣-و دة بسراحة الحل اللي انصحك بيه، انك تكبر دماغك و تاخد كل واحد فيهم علي اد عقله و تخليه واثق ان هو اللي فاز بشرف اقناعك بالكلية اللي هو عايزها و في الآخر تفاجئهم انك ادمت ورقك في كلية تانية خالص. اينعم انت ساعتها ممكن تتقدم لمحاكمة عسكرية و حملة مقاطعة و لا كأنك عسكري أسرائيلي المقاومة استفرضت بيه و عملت معاه الجلاشة.

و علي فكرة الناس دي كلها مش بيبذلوا المجهود دة غلاسة علينة، احنا عارفين انهم خايفين علينا و عايزين مصلحتنا، بس ما هم لازم يفهموا ان احنا غيرهم و لينا افكار تانية و بنحب حاجات تانية و ان مش شرط اني لما اخش طب هاطلع دكتور مشهور زي الدكتور اللي بيعالج جدتي و الناس هتحجز عندي قبلها بشهر و ألعب بالفلوس لعب... هو بيحب الطب، أنا لأ
عموما دي تجربة لازم نخوضها و معاناة لازم نعدي بيها، ربنا يستر بس و ما ننخش قدام حماس الجماهير دي كلها. سلامو عليكو...