غارقات في دوامة الحب3

الجـــــــــزء 46 ...

ثالث يوم العيد .. وبالتحديد يوم الخميس .. في صالة بيت ابو فهد الخماسي قاعدين بالصالة من غير شغل او شاغل .. ندى وشوق والصغار ، منى وعمر جالسين وسط قطع لعبة ( تركيب) متناثرة بكل مكان حولهم ..لعبة جديدة لعمر يحاولون تركيبها بأشكال مختلفة.. بس هالمرة لاقين صعوبة انهم يبنون قلعة منها .. وندى من فضاوتها تربعت معهم وبين يدينها كتالوج خاص باللعبة .. وتوجهم .. مرة تعلمهم أومرة تمسك القطعة بنفسها وتركبها .. مرات تبتسم ومرات تحس بالمرارة داخلها .. تتخيلها القلعة اللي ياما تكون أميرتها .. حلم قديم طفولي مراهق وررردي ... وشوق من ناحية كانت متربعه بس من غير لا تشارك تتفرج عليهم بس ... ومعهم نايف صاحب التعليقات .... بعد مدة رمت ندى الكتالوج من يدها بملل

ندى : اف !!... بعد بكرة دوام ... طفش يا ناس ..

شوق ابتسمت وخذت الكتاب الخاص تتصفحه بدون تعلق.

ندى بضيق : ملل وش هالعيد الباررررررررررد .. اول يوم كان كول بس الحين.. ملللللللللللللللللل!!

شوق : الشكوى لله .. وين نروح وش تبين تسوين حتى انا ملانه ؟؟

ندى : مــدري ... اهم شي بلا هالحكرة بين اربع جدران ..هــذا عيـــد ابي اطلع استانس ... ابي اساااافررر .. بس مين يسمع لي ..

شوق انشغلت باللي تشوفه .. وصار دورها توجه منى وعمر .

ندى : حتى ام كرشـة طلعت وتركتني ... !!.. أوريهـا ..

شوق : طلعت مع زوجها انتي وين تبين تحشرين نفسك بينهم ...

ندى ابتسمت بشقاوة : ... رايحه تسوي حركات نص كم مع الحبيب .. عارفتها ..

شوق : ههههههه بعد بتحسدينها .. خليها مو قلتي انه عيد

ندى : ايه بس ما يصير تطلع تستانس وانا لا ... آآخ بس عقبالي ..

شوق : هههههههه ( همسـت وهي تقلب الصفحة ) .. مع احمد طبعا ..

رااااحت الابتسامة ولمع الغضب في عيون ندى : اظن اني قلت لك رايي ... ليش تعيدين وتزيدين ؟

شوق : لأني عارفه انو هذا اللي تبينه .

ندى وهي تصد وجهها عنها : لا مو اللي ابيه

شوق : عيني بعينـك !

ندى ناظرتها وهي تغلي : لا يكثر اقووول ...

فجأة صرخ نايف : حركــــات !!

فزت ندى من مكانها وناظرت اخوها وهي متأهبه : وجع ليش تصارخ ؟

وانقلبت الوان وجهها على بالها فهم سوالفهم ..

نايف ما كان معهم ابد .. كان يناظر الله اللعبة : حركات ركبناها !..

زفرت ندى زفرة عميقـة وهي ودها تزنطه ... وشوق هزت راسها وهي تبتسم .. والتفتت للشلة الصغيرة..