سلامه عليكوا

مش فاهمين بعض

_احنا مش فاهمين بعض!!!!

لا لا... مقصدكش انت و صحبتك، انا اقصد احنا و أهلنا!
أهلنا عادةً مش بيبقوا فاهمين دماغنا عاملة ازاي، و أنا عازراهم واللهي مهو برضوا صعب انك تجيب اتنين مختلفين عن بعض من زمنين مختلفين و تتوقع انهم هايعيشوا و يتجاوبوا مع بعض زي الفل كدة عادي.. مش ممكن!!
عشان كدة دي هتبقي اكبر مشكلة هاتقابل اي ابن و أهله (عدم التفاهم)
و علي فكرة دي مش مشكلتنا أحنا وبس، دي مشكلة أجيال... أجيال عدت و أجيال لسة جاية، حتي أبوك و أمك (سوري يعني والدتك) كان عندهم نفس المشكلة مع أهاليهم!
و مهما لقيت الأب أو الأم بيحاولوا أنهم يعملوا فيها free و open mind و مصاحبين عيالهم، ساعة الجد كل حاجة بتنكشف و كلوا بيرجع زي ما كان و أهلك دماغهم بتتربس و يبتدوا ياخدوا برستيجهم كأب و أم كلهم وقار و سيطرة!

_أزاي البنت يبقي عندها اصحاب ولاد، و آل أيه تقولي (دول زي أخواتي و بنخرج كلنا في مجموعة)،  هو احنا خوجات!
_بقي الواد العيل اللي لسة متخرج مابقالوش كام سنة جاي يقولي عايز أخطب! لأ و الأنيل أنو بيقولي في وشي أنو بيحبها من أيام الجامعة! دة أنا ماشوفتش أبوه غير لما أتجوزنا!!!
_ بنت أيه دي اللي تروح تتعلم برة، ليه مالهاش أهل؟! أنا بنتي تفضل قاعدة جمبي لحد ما يجيلها عدلها.

و عشان مايتحرقش دمك ماتحولش تغير وجهة نظرهم. أصل هم  حتي لو قلولك طيب علي أي حاجة هيقولولك كدة عشان يخلصوا من زنك، أنت كدة مخدتش الأذن خالص صدقني. و يا سلام لو قلولك (أعمل اللي أنت عايزه!)، دي بقي ترجمتها (خلي عندك دم و اسمع الكلام بدل ما أمشي كلامي غصب عن عينك و عين اللي جابوك!)

المهم انا بصراحة ماعنديش أي حل أقولهولك (دة طبعاً تطبيقاً لنظرية "كان الحلو نفع روحه")، كل اللي أقدر اقولوا انك أصبر و حاول ما تطلعش عقدك دي علي عيالك بعدين و أتقي الله. سلامو عليكو....