زمن داعش في العراق

نعيش رغم كل شيء

اني بنيه عمري20 سنه عراقية الجنسيه بعدني طالبه
عايشين بالقريه اني واهلي واقاربنه حياتنه طبيعيه نوعا ما بغض النضر عن المشاكل الصغيره الي تصير بين كل الاقارب ونجاوزها بسهوله لان جنه فعلا نحب بعضنه
بسنه 2014 بدايتها بلشت الخربطه كلشي بده من بلشو اهل وعوائل الفلوجه ينزحون لمناطقنه نكدر نكول ماقصرنه وياهم بالي نكدر علي سكناهم بلاش واكل وعزايم وملابس ومن كولشي عدنه نتقاسمه وياهم بعد شيمة وغيرة عرب مو بدينه.
توالت الاحداث واني من الناس كلت(  شيسوون ولو للفلوجه مايجون علينه تانطلع ونشوف وجه ربنه)اكثر عباره ندمت عليها وراح ابقه ندمانه عليها طول عمري تمنيت متت ولا ﮔايلتها.. والسبب بعدين احجيه.
بعدين كلونه اوضاع المنطقه البيها دراستنه مو زينه كعدو هسه لتجون وهذا الدوام تركنا بقينه نشتغل تانعيش وكل يوم نكول اليوم تتحسن وهي من سي لاسوء بعدها اجه الفرج او هذا الي ضنيته استدعونه وكالو تعالو امتحنوا تاتتخرجون بلشنه نروح دوامي بالرمادي رحنه اول يوم واحنه خايفين اني وصديقاتي من المنطقه وامتحنه واجينه واحنه بنص السيطره مالت الجيش اجت سياره كنه فوك جسر وكفت من جهه وبلشت بالرمي واحنه بنص السيطره ترمي ع السيطره وهاي الجهه يرمون الجهه الثانيه يرمون واحنه بالنص الاحاديات والرشاشات والهاونات كلها مشتغله بس طلعنه سلامات ومتاذه احد بينه والحمدلله مرت ع خيرهالمره مضت الايام واحنه نمتحن وباخر يوم نعادت بينه القصه هجم داعش للرمادي وجان مكان امتحانه بالتاميم ويادوبنه سلمنه اوراق الامتحان وطلعنه وحبسونه بالمكان لان داعش سيطر ع المكان وبدت البنات هاي التلطم وهاي التبجي والثانيه بس تعيط بعون الله امنو النه طريق ركبنه خطوطنه وفلتنه وماطلعنه الرمادي الا بقل هو الله احد لَيــِْ♡̷̴̬̩̃̊ـِْش اكلكم ماخفت لاوالله خفت حيل جنت اباوع وره عبالكم الدنيا نحركت السما سوده من دخان الانفجارات والدمار بكل مكان والجثث مرميه ع جوانب الطريق يعني ﮓلت يوم القيامه هو هذا خلصنه برحمة الله بقينه ببيوتنه وطلعت نتائجنه بالمناسبه نجحت طبعا وبتفوق وره فتره دزو خبر كالو لازم اداومون تدريب بهيت شهرين اني كيفت لان اكره كعدت البيت كمنه نداوم ومااحلانه بس بعدين شو ذولي كامو يزحفون لمناطقنه شوي شوي اول شي برمضان اجوي اجتمعو وصاحو  بلجامع مالتنه تعالو كل واحد بالدوله موضف جيش او شرطه او مختار ومن هاي سوالف الامن يسلم كول شي عنده من سلاح وغيره ويتوب بس لحد هسه مافهمت لَيــِْ♡̷̴̬̩̃̊ـِْش همه من همه موضفين دوله بشنو غلطوا يعني الجندي شنو غلطه تايتوب ع ﮓولتهم دوله اسلاميه وذولي مرتدين همه قرروا ه̷̷َـَْـُذآ كافر ودينطوافرصه حته يكفر عن ذنوبه مجرد التفكير بالموضوع يصيبني بالغثيان لان الذنب الاساسي برايي هو جيتهم همه للدنيا وتلويثها بافكارهم وتصرفاتهم الي دمرت بلدان باكملها .
الي خاف على اهله راح تاب والي بقه متمسك بشغله وبشي هو مومن بيه بقه علي مرت الايام وراحت واجت وبشهر 10 من نفس السنه جنه اني واهلي بالبستان مشتغلين بالتمر وجان يوم جمعه وبده القصف المدفعي والهاونات والطيارات تقصف بمنطقتنه رجعنه للبيت شو الناس تشيل وتمشي بقيه كاعدين بالبيت وساكتين بيوم السبت ثاني يوم اشتدت حيل سمعنه التكبيرات بالجامع وعرفنه انو داعش وصلنه واخذ المنطقه وهنا بدت الحرب طيران الجيش والقصف بالمدفعيه من قاعدة الجيش بدت تزيد شويه شويه والعالم كلها طلعت مبقينه بس احنه لازمين المكان ومنقبل نطلع بس متحملنه كمنه لمينه غراضنه الي نكدر نشيلها ومكانت عدنه سياره او بالاحرى عدنه بس صغيره ومتمشي مسافات طويله واحنه 13 نفر وين تحوينه بس جان عدنه تنكتر والي ميعرفه اسمه بالفصحى محراث او جرار خلينه غراضنه بي وصعدنه اجه عمي تيشغله مشتغل حاول وياه بزع ومقبل يشتغل بالمناسبه ابويه متوفي فعمي هو مسؤل علينه وعلى اطفاله .الله مرادلنه نموت لان تنكترنه مشتغل جان تنكتر بيت خالي موجود يم بيتهم ركبنه وطلعنه منعرف وين نروح الجيش ورانه يقصف وداعش كدامنه المهم طلعنه للصحراء احنه بنص الطريق والهاونات شي توكع كدامنه وشي ورانه ومنشوف بس الدخان والنار ومنسمع بس الصوت من ينطلق ومن ينفجر يمكن تكولون تبالغ بس والله هذا الي صار كنت اباوع على منطقتنه من فوﮓ الجبال طبعا بعد ما بعدنه شويه عن الخطر كانت متبين منها ايتي شغله بس النار والدخان المهم طلعنه ولحكتنه عائله لاقاربنه وبتنه ليله بالصحراء وثاني يوم الصبح نزلنه للقرى لكينه ثلث غرف على الفرات وكعدنه بيهن احنه نعتبر ثلث عوائل لان اني وماما واخواني وبيت عمي وذولاك اقاربنه هم بقينه بيهن وبالليل اجت الطياره ماعرف منطيهم اخباريه انو داعش متواجدين بهيجي مكان المهم وكفت فوكانه وضربت صاروخ احنه متنه خوف كمنه ثاني يوم الصبح شلنه ومشينه بس لمنطقه بيها داعش من لاجاره عدنه اطفال لازم نامن عليهم من القصف العشوائي والطيارات مو حبا بداعش اوتاييد الهم بس مجان كدامنه غير هالطريق المهم بقينه شهر بالضبط اجه الجيش وحرر منطقتنه ورجعنه شلنه ولتفينه من بره داعش بدون علمهم ورجعنه لمنطقتنه شلون صارت ماادري شسوينه وشلون وصلنه كل الاعرفه انو مشينه كان كله صحراء رجعنه لبيتنه وكعدنه تقريبا 20  يوم رجعو داعش ورجعنه نفس الكره شلنه ومشينه بحيث لو متاخرين 5 دقائق عن طلعتنه جان قتلونه لان جيرانه مقبل يطلع وقتلو هو وعائلته تبهذلنه بالمناطق بعدين وصلنه لبيت بمنطقه اسمها حي البكر وبقينه
14يوم بس مرت من عمرنه كانها سنين لان كان البيوت الي مجاورتنه من اربع جهات داعش باليوم 15 شلنه وطلعنه لبغداد من طريق النجف بقينه يومين ع الطريق يله وصلنه