أحــــــــــــــلـــــــــى صــــدفة بــحـــــــيــاتي

الجزء الثاني و الثلاثون

  رغد تطالع ظهر اللي ماسك الولد وعرفته من طوله ورزته وريحة عطره وابتسمت...

كان وليد..
الولد: ومن تكون حضرتك..
وليد: مالك دخل من اكون..انا سألتك وش مضيع عند البنت...
الولد وبكل جرئه: مضيع رقمها...ابي رقمها..
وليد وصل معها خلاص ما عاد يشوف قدامه الا سواد: وش قلت عيد وش كنت مضيع..
الولد يعلي صوته اكثر وبوثوق: قلت لك مضيع رقمها ما تسمع انت..
ما امدى الولد يكمل جملته الا بوكس في وجهه مصحيه من اللي هو فيه وطلع الدم من فمه..
وليد: هذا عشان مره ثانيه تنتبه لاغراضك وما تضيعها..
الولدومسح الدم وطالع الدم في قميصه: انت قدها يوم تضربني..
وليد ابتسم ابتسامه تنرفز: قدها وقدود وش بتسوي يا دلوعة ماما..
الولد توه بيضرب وليد الا وليد وبحركه سريعه وقفه عند حده ومسك ايده ولواها..
وليد: حبيبي عيب تضرب اللي هم اكبر منك...ترى مره ثانيه اكسر ايدك فهمت..
الولد يتألم: فك ايدي احسن لك..
وليد ويزيد عليه اكثر: واذا ما فكيتها وش بيصير..
الولد: فك ايدي وخلنا نتفاهم..
وليد: اذا بنتفاهم يا دلوعة ماما عند المغفر اوكي"يعني قسم الشرطه"
الولد خاف: وش دعوه مغافر حنا رجال ونتفاهم مع بعض..
وليد ضحك ضحكه ملت السوق اللي يعتبر فاضي: هههههه رجال...ليه انت تعد نفسك واحد منهم..
الولد اخذ نفس عشان ما يضربه ويروح فيها:وانت وش رايك..؟
وليد: راي اتوقع راح يجرحك..وبعدين بتبكي عند امك وبعدها وش بيسكتك عاد..
الولد: طيب عن الغلط..
وليد: اسمعني من الاخر..انا بتركك وان شفتك داخل المجمع ما تلوم الا نفسك سامع..
الولد ما صدق على الله وليد ترك ايده وهج من المجمع كله..
يوم راح الولد..وليد لف على رغد وقرب منها وهو يعدل ثوبه وعمامته ..كان لابس اماراتي هو العيال كلهم..
وليد وهو مبتسم لها: انتي بخير..
رغد كانت طول الوقت مبسوطه على وليد وعلى شجاعته وحست معاه بالامان اللي فقدته في لحظات الشتات بينها وبين نفسها..
رغد وبأبتسامه اكبر :ايوه انا بخير ...وانت؟؟
وليد: تمام التمام..الا وش فيك يا قلبي جالسه لحالك..
رغد انتبهت لكلمة يا قلبي بس ما بينت:لا ابد سلامتك..بس تعبت من كثر ما ادور فا جلست لحد ما يخلصون البنات..الا انت وش جابك؟؟
وليد: قلبي جابني..حسيت ان فيك شي اقصد فيكم شي..
رغد: مشكور يا وليد على اللي سويته..
وليد: ولو انا بالخدمه...ما ودك تروقين بكوفي بعد الولد الباتكس اللي من شوي..
رغد: ههههه حلوه هذي باتكس..بس بصراحه راكبه عليه..
وليد يدرس كل حركه من رغد ولما ضحكت ذاااب عندها..ومشى جنبها متجهين للكوفي: وش كان يقول لك..
رغد: ما عليك منه خرابيط..
وليد: ووقح بعد..
رغد: لأبعد درجه...
ووصلوا للكوفي..وجلسوا قبال بعض وكانوا لايقين على بعض ..هذا اللي حسه وليد واللي استحت منه رغد..
رغد تصرف تبي تهرب من نظراته لها: بتصل على البنات واقول لهم اني بالكوفي عشان ما يدورون علي..
وليد ما رد عليها بس يطالع فيها..وما كان يلوم الولد اللي من شوي..
رغد: الوو.اهلين ريومه..تراني بالكوفي..هاه...لالا..لحالي....اوكي باي..
وليد: ليش ما قلتي اني معك..
رغد بسرعه: ترى ما اقصد شي..بس عشان العنود وسوالفها..
وليد: في هذي صادقه..."وسكتوا شوي".......رغد..
رغد: هلا..
وليد: بقول لك شي يمكن جرئ شوي بس لازم تسمعيني عشان تفهميني..
رغد وهذا اللي خايفه منه ما ودها يقول شي ابد: تفضل..
وليد: رغد بليز ما تزعلين من حركاتي ترى والله هذا شي غصب عني مو بأيدي...اذا شفتك خلاص اضيع اتخربط..صحيح بتقولين جرئ وكيف يقول لي هالكلام والمفروض اخليه في قلبي...بس انا مو كذا ولا طبعي كذا فا لا تزعلين مني اوكي رغوده..
رغد: بس ..بس انت ولد عمي..يعني ما يجوز تقول لي هالكلام..
وليد بسرعه: اوكيه..اخطبك واصير لك حل...
رغد طيرت عيونها وتحسفت قد شعر راسها انها تكلمت..ولو انها ساكته وبالعه لسانها كان ارحم لها مليون مره...يعني لازم البربره والكلام اللي ماله داعي...
وليد لاحظ سكوتها: وش فيك سكتي..ما تلاحضين انك دايم تسكتين..
رغد في نفسها"يقطع ابو الوهقه والفشيله": هاه..لا عادي..
وليد: طيب انتي موافقه...
رغد: وليد بصراحه...انت فاجئتني..وبعدين احس اني توني صغيره على الزواج..
وليد بمزح: أي صغيره..بسم الله عليك مثل القمر..كبيره وعاقله وفاهمه وش ناقصك بعد..
رغد: هههه الله يسلمك.."تبي تغير الموضوع بس ما عرفت"
وليد وكأنه حس فيها: اوكي انتي فكري وانا ماراح استعجل وترى هذي مو خطبه ولا أي شي بس حبيت اخذ رايك من باب الاحتياط...
رغد تبي تصرف وتاخذ الموضوع بمزح: تصدق على بالي هجوم هههههه...
وليد: ههههه حلوه...يا حلوك وانتي تضحكين..
رغد بلعت ضحكتها وسكتت:....................
وليد حب يغير الموضوع بالمره: ما خلصت فجر من التسوق..
رغد ارتاحت انه تغير الموضوع: لا وين باقي لها كثير..
وليد: انتم يا البنات عليكم حركات ما ادري وش تبي..يعني لازم دبي ..وش فيها الرياض..
رغد: لا بس هنا ماركات عالميه اكثر والبضاعه تكون جديده ..واحسن من الرياض مع ان الرياض فيها اشياء حلوه وتجنن بعد..
وليد: كل هذا مدح بالرياض هههه طيب واذا ما امداها تخلص من دبي وش بتسوي..
رغد: ما لها الا الفيصليه والمملكه والمجمعات اللي هناك..
وليد: اهااا..وكل البنات يسوون حركاتكم..
رغد: لالا مو كل البنات بعضهم..
وليد: وانتي؟؟
رغد حمرت خدودها: وانا ايش؟؟
وليد: اذا جابوا مهرك بتروحين دبي ولا باريس ولا وش بتسوين..
رغد: اذا جا ..فيها حلال..
سكتوا للحظات ..وليد يطالع رغد وبشكلها وحركتها ..كيف ترمش بعيونها كيف تنفس كيف تطالع.. كيف تشرب..كل شي فيها يدرسه وكأن عنده اختبار..
رغد كانت تطالع بالكوفي اللي معاها عشان تهرب من نظرات وليد..وتحاول تخفي توترها من جلوسها معه بعد لحظات مروا من عندهم العيال..
رغد في نفسها"وهذا الي ما حسبت حسابه"<<كانت تقصد تركي..
مشاري: وليد..ومعاك رغد وين على الله..
وليد: كانت جالسه لحالها فا خفت عليها..
طلال: وليش يا بنت خالي تاركينك لحالك..
رغد: لا انا تعبت من كثر المشي..
ماجد: وين شلة المطافيق..
رغد: ههههه حلوه .. بس ترى ما ارضى عليهم..وما ادري وينهم بالضبط..
تركي حشر نفسه من بين طلال ومشاري..وقال بمزحه وهي رزحه:وانتي ما شا الله فالتها مع وليد..
الكل ضحك الا رغد فاهمه وش قصده وانقلبت دنياها لانها متأكده اذا ما سكت تركي بيعلق مع وليد في مشكله وهي في غنى عن المشاكل..
راحوا العيال وجلسوا على الطاولات وصاروا يسولفون ..
تركي وسليمان واقفين..
سليمان: بتجلس؟؟
تركي وهو يطالع وليد ورغد ويغلي من داخل:بجلس معاهم...
سليمان: مو فشله..
تركي: عناد فيهم..
سليمان: كيفك...انا بروح ادور على ريم قلبي..
تركي بروحه الخفيفه: سمعت كلامي امس يا درج..
سليمان: فكرت فيه ولقيت فيه شي من الصحه..
تركي: اقول رح الفيزياء مأثره عليك..
سليمان: تكفى لا تذكرني تنسد نفسي..
تركي: انت روح لها وتنفتح نفسك..
سليمان: وانت صادق..
طبعا سليمان ترى ما يقصد يخون صديقه او يطعن فيه من ورى ظهره..بس حب انه يسلم عليها وعاد نفسه واحد من العايله..لان عيال عمها نفس الطريقه عندهم عادي يروح مخصوص يسلم على بنت عمه او بنت خاله وهو مصدق نفسه واحد من العايله..يعني لا تفهمونه غلط.وتركي كمان نفس الشي واصلا مستحيل يسوون شي في العائله اللي امنتهم على بناتهم واكلهم وشربهم صار واحد..وصاروا تقربيا من ضمن العائله وتعودوا على بعض..
راح سليمان يدور قلبه ريم ..
تركي جلس على نفس طاولة وليد ورغد..عشان ينكد عليهم..
تركي: ارحب بالوليد..
الوليد: مراحب بالتركي..
تركي: وش العلوم والاخبار..؟
الوليد: والله تمام..
رغد حست نفسها غلط..يعني هذا ولد عمها وهذا صديقه هي جالسه ليه..
رغد جات بتقوم الا تركي لف عليها يبي يكلمها قدام وليد..
تركي: كيفك يا رغد..
رغد على طول طالعة وليد تشوف ردة فعله بس كان ساكت وهادي..
رغد: الحمد لله تمام..
تركي انتبه انها خايفه من وليد بس كذا عناد بيزيد: مستعده للفصل الثاني<<ما عنده سالفه بس من اللعانه..
رغد وهي تاخذ شنطتها واغراضها:ا نشا الله..يله عن اذنكم ..ومشت..
تركي لحقها : رغد..
رغد وقفت في مكانها:وش يبي ... ولفت عليه..
تركي قرب من عندها:خذي ..نسيتي النظاره..وشكلك نسيتيني..
رغد اخذت النظاره: مشكور..
تركي: وانا...اخذتي النظاره وانا..؟؟
رغد: تركي روح عني بلا مشاكل..
تركي: تخافين من وليد ..؟
رغد وهي تطالع وليد اللي جالس: لا ما اخاف من احد بس ماله داعي المشاكل وعلى اشياء تافهه..
تركي منفعل: حبي لك اشياء تافهه..
رغد عصبت من انفعاله: تركي.اذا روقت لنا كلام ثاني.."وراحت وتركته"
تركي حس على نفسه انه معصب ورجع لعند وليد ..
وليد كان يناظر بالكوب اللي معاه..
سحب تركي الكرسي وجلس وهو سكت..
وبعد لحظات من الصمت..
وليد وبكل هدوؤ: تحبها؟؟
تركي فاجأه السؤال وما توقع ان وليد ممكن يسأله هذا السؤال:ميـــــــن؟؟
وليد بجديه وبنفس الهدوء: تحب رغد..؟
تركي ارتبك بس حاول يضبط اعصابه: ليش السؤال..؟
وليد طالع تركي ومازال يحاول يضبط هدوئه: اتوقع سؤالي واضح ..تحب رغد؟
تركي توهق وش يقول له..يقول ايه احبها.ولا يقول لا.. ولا وش يقول..
تركي: مثل اختي الهنوف..
وليد وعينه في عين تركي عسى يلاقي الجواب: اكيـــــــد...
تركي بثقه: اكيد...مثلك...مثل ما تكن لها من مشاعر انا مثلك..
وليد عصب بس حاول يكون بارد وصار يقلب الكوب: اهاااا..
تركي بخبث: طيب انا اللي بسألك سؤال وصريح وواضح....ليش تسأل..؟
وليد: كذا ابي اتطمن على بنت عمي ومستقبلها..
تركي: ليش انا ما اطمن..
وليد: انت وش عليك مو تقول ما تحبها...
تركي ارتبك: ايوه انا قلت ...بس افرض اني احبها..
وليد:ما راح افرض شي..لانه ما راح يصير .وحطه على بالك زين اذا فكرت فيه...زين..."وقام من مكانه"...وتراني ما اقصد شي من كلامي..يعني لا يصير بينا أي حزازيه ..ما زلنا اخوان اوكي وراح من عنده وجلس عند مشاري وطلال.وترك تركي بحيرته..
تركي في نفسه" لو اخطب رغد معقوله يوقف في وجهي وليد..ليش لأ باين انه يحبها..وكلامه اللي من شوي باين ان فيه تحدي..وبعدين معقوله حس اني احبها ..كيف حس والباقين ما حسوا..اكيد عشانه يحبها من قلب..مسكين يا وليد راحت عليك.. ما تدري ان رغد لي انا وبس..."

&&&&&&&&&&&&&&&&&&&&&&&&&&&&&&&&&&&&&&&&&&&&&&&&&& &&&&&&&&
نروح لعشيقنا الثاني اللي من زمان عنه واللي كلامه يفتح النفس وشوفته تشرح الخاطر بالنسبه لريم ولنا بعد<<ترني اتكلم عن نفسي..
سليمان شاف ريم ماشيه وهي تضحك مع العنود...
سليمان: يا حبي للبنيه هذي..ياناس ملاك يمشي من البرائه والطفوله والجمال..
سليمان سوى نفسه ماشي قدامهم وما انتبه لهم..
العنود: شوفي سليمان على باله يتمليح وكأنه ما شافنا..
ريم: اهبل فيه...مع انه ما يهون علي..
العنود: عشان مره ثانيه ما يستهبل..
ريم: خلينا نمشي وكأنا ما انتبهنا له..اوكي..
العنود: اوكي..
الهنوف: بنات انا بدخل المحل هذا..لا تروحوا بعيد.
ريم: خذي راحتك يا قلبي..
الهنوف تذكرت رغد وتنهدت ودخلت محل لللأكسسورات...
مشى سليمان وعلى باله انه لاهي وما نتبه لهم..وهم ماشين ونفس الحركه وكأنهم ما لمحوه من ارضه..
مشوا...مشوا...لحد ما مروا من عند بعض وكل واحد يتغلى على الثاني..
سليمان: معقوله ما انتبهوا لي...بسرعه احلق نفسك يا ولد.."ولف ونادى بصوت كأنه شاك"..ريــــــــم...؟؟
ريم لفت وكانها توها تنتبه له: سليمان؟؟؟؟ اهلين..
سليمان قرب من عندهم: تصدقون ما شفتكم..بس بعدين شكيت انه انتم...كيفك العنود؟؟
العنود: الحمد لله تمام..
ريم: حتى احنا تصدق ما شفناك ابد"وشددت على كلمة أبد وهي مبتسمه"
سليمان: هههه يا حليلكم بصراحه بالصدفه شفتكم هنا..
ريم في نفسها"يفضح عمره من زمان وانا قايله ما يعرف يرقع":بصراحه صدفه سعيده...
العنود ناويه عليه: وانت وش جابك لحالك..حتى صديقك مو معك..
سليمان: هاه..تقصدين تركي والعيال..جالسين بكوفي وانا بيني وبينكم ما اشتهيت اجلس فا قلت اتمشى شوي..
ريم تضحك على سليمان وعارفه حركاته اصلا مكشوفه: هههههه ما صادفت برغد اختي..
سليمان: الا كانت جالسه مع وليد..
العنود طيرت عيونها: جالسه مع وليد ليش؟؟
ريم في نفسها" اجل رحتي فيها يا رغد وش بيفكك من عنيد" ريم طالعت سليمان وتأشر له بمعنى فضحتنا..
سليمان فهم عليها:لالا هونت ما كانت جالسه مع وليد..
العنود: اجل وينها فيه وجالسه مع منو.؟
سليمان يتلفت يدور ترقيعه:هاه....كأني شفتها جالسه على الكراسي لحالها...
العنود: ايه صح احنا تركناها هناك ..بس وشوله تكذب..
سليمان: ما كذبت..خربطت..وشلونكم وش اخباركم..؟؟<<يبي يسولف بأي طريقه..
ريم: الحمد لله بخير..
العنود: وينك لا حس ولا خبر..
ريم تطالعها يعني خير تمونين عمتي..
العنود طنشتها: ايوه..
سليمان ومسوي نفسه شي: والله لهيت شوي مع العيال مثل ما انتي عارفه ما عندي وقت لشي..
ريم: اللي يسمعك يقول عندك عقار واسهم واراضي وشركه ما لها مدير وانت اللي بتديرها ومؤسسات محد بيمسكها الا انت........
سليمان: تكفين يا ريم بس..اعرفك اذا مسكتي خط ما سكتي..
ريم: هههه يا حليلك تعرفني..
سليمان: وش قلت على يا حليلك..
ريم تأشر بعيونها يعني عشان العنود فيه..
العنود ناويه عليهم:ليش انتو متى شفتوا بعض عشان تقولها وتقولك...
سليمان: ما ادري وين بس من زمااااااااااااااااااان مررررررره..
العنود: اهااا...
ريم كاتمه ضحكتها عشان حركات العنود بس رحمة سليمان االلي مصدق ان العنود ما تدري عن شي..
العنود: اجل نمشي..
سليمان: لا تونا ما بعد شبعنا منكم..
العنود: بقي لبكره...يله مشينا يا بنت عمي..
ريم ابتسمت: باي سلوم,,اشوفك اليوم بعد المغرب اذا طلعنا اوكي..
سليمان: اوكي...بااااااي...

&&&&&&&&&&&&&&&&&&&&&&&&&&&&&&&&&&&&&&&&&&&&&&&&&& &&&&&&&&
رغد وهي تمشي تحس نفسها بتطيح بأي لحظه..وبتنهار من داخل كمان بأي لحظه..مشتته ..ضايعه..تلاقيها من وين ولا وين..من وليد اللي اليوم فاتحها بالموضوع يلمح لها..ولا تركي اللي ما تدري وش تسوي فيه...ولا الهنوف اللي زعلانه عليها وما تدري ليش....وعندها زعل الهنوف اهم من الكل..الهنوف صديقة عمرها ..وقفت معها بكل لحظه..حتى انها توقف معا ضد اخوها..وش تبي اكثر من كذا صديقه...صديقه تفديها بروحها وبحياتها..وما تتوقع ان راح يمر عليها بحياتها كلها وحده مثل الهنوف..تدور رضاها وتبديها على نفسها..وما تقول لها الا ابشري ولبيه ومن عيوني..رغد ما تعدها الا من غلاة ريم واكثر بعد..امنتها على كل اسرارها الا سر واحد اللي هو عن وليد اكيد..لانها ما راح ترضى على اخوها وراح تقول لها يا وليد يا اخوي بس ما تخلين اخوي كذا معلق وحتى وليد بعد..طبعا هذا الكلام الصح وما فيه نقاش....

صارت تمشي بلا هدف اصلا ما تدري وين تروح..مرت من عند محل وتعدته بعدين رجعت له..فيه بنت تعرفها زين..بنت تموت فيها ولها الغلا كله وتميزها من بين الف وحده..
دخلت عندها في المحل شافتها تشيل سلسه فيها حرفAوبعدين قالت: ما عندك نفسها حرفR..
رغد في نفسها" يا حبي لها تفكر فيني حتى وهي زعلانه ويلومني فيها بعد قلبي والله"
صاحب المحل: واللهRما فيه..
الهنوف: حسافه..
جا صوت من وراها وحط السلسه قدامها: مو هذي احلى واحسن..
كانت سلسله فيهاA,R وبينهم قلب مايل وحلو..
الهنوف لفت تعرف صاحبة الصوت زين: رغـــــــد...؟
رغد ابتسمت لها: على سن ورمح..
الهنوف ما تحملت تبعد عن صديقة عمرها ثانيه زياده..وعلى طول حضنتها: خلك تسوينها مره ثانيه"وضربتها بخفيف"
رغد وهي ضامتها: ههههههه طيب وش سويت انا اصلا..
صاحب المحل يطالعهم مستغرب..بس مبسوط عنده بنتين وكل وحده تقول الزين عندي ولا وبعد رومنسيات بالمره...
الهنوف بعدت عنها: وبعد ما تدرين وش سويتي..
رغد: وش دراني ..ما اذكر اني سويت شي يزعل نصفي الثاني..
الهنوف: خلينا نطلع شوفي هذا بيكلنا بعيونه..
رغد: ههههه واضح..
اشتروا سلسلتين نفس اللي اختارتها رغد وحده لها ووحده للهنوف..وطلعوا من المحل..
رغد: ايوه وش سويت لك يا الدلوعه...
الهنوف: بالله ما لاحظتي اسلوبك معاي ..مطنشتني وحاقرتني.ولي كم يوم ما جلست معاك وقعدنا نسولف مثل ايام قبل..
رغد تذكرت اللي صار: اهاااا..عشان كذا زعلانه..معليش يا قلبي واسفه واذا تبين بوسه بعد انا حاضر..
الهنوف ابتسمت: ايه ابيها..
رغد باستها من خدها: تكفين ارضي علي..
الهنوف: ههههه رضيت عليك..وانا اقدر ازعل...انا اذا مره مره شلت عليك شوي..اما ازعل لا هذي كبيره وماني بقدها..
رغد تطالعها بحب: الله لا يفرقنا..
الهنوف: امين..
رغد: ونتزوج بيوم واحد..
الهنوف: هههههه امين..بس وش جاب طاري الزواج..
رغد: تخيلتنا عرايس مع بعض ..هههههه.
الهنوف: الله فله...يله خذي اخوي وانا اخذ اخوك..
رغد في نفسها" يا ليتها كذا سهله خذني جيتك":حبيبتي هذا زواج مو لعبه..
الهنوف: اذا ما اخذتي اخوي ترى انتي الخسرانه..بس انا بأخذ اخوك..
رغد: يحصله وحده مثلك ويقول لا...مفروض يحمد ربه ليل نهار وصبح ومسا ان ربي رزقه بوحده مثلك..
الهنوف: الله يسلمك يا قلبي..يا ربيه قد ايش اشتقت لك..
رغد: هههه حتى انا والله...

&&&&&&&&&&&&&&&&&&&&&&&&&&&&&&&&&&&&&&&&&&&&&&&&&& &&&&&&&&
خلونا ناخذ لفه على فجر ونوف وعبير..
عبير ونوف طلعوا الشيب في راس فجر..
عبير: فجر خذي هذا يجنن عليك..
نوف: عز الله فصيّل راح فيها..
فجر: انهبلتوا البس هذا...على رقبتي البسه..
عبير: وش فيه..شوفيه وش حلاته..
كان قميص نوم..فتحت الصدر كبيره بالمره وغير هذا شفاف بالمره يبين كل شي تحته...وطوله لحد الركبه..وغير كل هذا كل فتحات كثيره من عند الفخذ الى اخر شي..
فجر: بصراحه تكلفوا فيه..
نوف: لا عاد فجر اخذيه..وقولي لنا وش ردة فعل فيصل اذا لبستيه...
فجر: مهابيل انتو..اصلا عسى البس عنده بيجامه وزين عليه..
عبير: علينا هاه...طيب شوفي هذا شورت ومعاه تي شرت قصير يطلع بطنك ومن فوق توب..هاه وش رايك..
نوف تضحك: خذيه وش فيك ساكته..
فجر: صدق سخيفين والاسخف اللي يعطيكم وجه..
عبير: ههه يا حليلها تستحي..
فجر طلعت من المحل وخلتهم..وهم خذوا قميص النوم والشورت وطلعوا..
فجر: ابدخل هذا المحل واذا دخلتوا معي يا ويلكم..
عبير: ايه هين نخليك بروحك ..ما يصير يا قلبي..
نوف: انتي اختي ولازم اساعدك..
فجر: انتو تساعدون ..انتو تغثون الواحد..
عبير: هههههه تحملينا بالطيب بالغصب تحملينا..
فجر: يا ليتني ماخذه معي رغد والهنوف كان ارحم لي مية مره..
نوف: ولا يهمك نعوضك عنهم..
فجر وهي تدخل المحل: يارب صبرني..
نوف/ حرام رحمتها..
عبيرتستهبل:احسن عشان مره ثانيه تحرم تتزوج.
نوف: ليه فيه مره ثانيه بعد..
عبير: عشان تاخذين عضه وعبره فهمتي..
نوف: انا بشتري بدونك الله يعافيك ويجزاك خير ما ابي منك شي..
عبير: في الحلم يا ماما ..انا بجي مع كل وحده فيكم حتى لو كنت متزوجه..وبنكد عليكم كلكم..
نوف: وانا ماراح اخليك بنكد عليك..
عبير: اصلا تحسبيني بستحي وحركات ماسخه..اصلا انا اللي بشتري مثل هذي الاشياء وألعن بعد..
نوف: هالبنت هذي ما فيها ذرة حيا..
عبير: عادي خلوكم فري مثلي..
نوف: والله احس العكس اذا تزوجتي..
عبير: امشي بس خلينا نروح عند فجير ونطفشها لما تصيح..
نوف: يا نذلك..
عبير وهي تمشي: طالعه عليك..
ودخلو عند فجر ومسكينه طلعوا لها قرون في راسها وجابوا لها الشيب قبل حينها..
&&&&&&&&&&&&&&&&&&&&&&&&&&&&&&&&&&&&&&&&&&&&&&&&&& &&&&&&&&
جا المغرب ورجعوا من السوق هلكانين ومنتهين..
فجر وهي تحط الاكياس: يا ويلي تكسرت ما عاد فيني حيل..
العنود: احسن هذي الي تتزوج بدري تستاهلين..
نوف: سبحان الله نفس كلام عبير..
عبير والعنود جنب بعض ولزقوا وجيهم في بعض وكأنهم بيصورون وابتسموا ابتسامه تجيب الهم: هيهيهي عادي خوات..
ريم: هههه الحمد لله والشكر بس على العقل..
العنود: اعصابك يا الثقل..
ريم رزت نفسها: احسن منك يا الخبله..
رغد: تكفون بلا هالمزح لانه بيقلب جد..
ريم قربت من عند رغد: وينك اليوم اختفيتي..
رغد: اسكتي واللي يعافيك ترى بأبكي عليك الحين..
ريم: اجل هذي يبلها سهره بالليل مع بيبسي مع توكس مع ليز بالتوابل الشرقيه..
رغد: انتي بتسمعين سالفه ولا بتشوفين فلم..
ريم: عادي كلهم مثل بعض..
الهنوف: هاه رويم وش عنك تنكدين على صديقتي..
ريم متعجبه: تراضيتو...؟؟؟؟
رغد: بسم الله وش درا ك ان احنا متزاعلين..
ريم: الحمدلله والشكر باين ان الهنوف زعلانه وانتي معطيتها اشكل<<تحب الفتنه..
الهنوف تعرف حركات ريم:لا الحمد لله تصالحنا قبل لا يتشمتون فينا العذال..
ريم بتهديد: قبل لا يتشمتون فيكم العذال هاه طيب"وصرت تصارخ"..بناااااااات..بنااااااااااااااات..
الكل التفت على ريم. وريم تكمل: ترى الهنوف ورغد تهاوشوا هواش ما قد شفت بحياتي مثله ..هواشي انا والعنود ما يجي قده..
نوف: صدق غربيه..؟
شجون قربت من عندهم: حرام ليش الزعل والجفا..
رغد: وينى فيه ..في بيت القصيد عشان تقولين الجفا...
عبير والعنود يتمسخرون فيهم: هههههههههه
العنود: ومسوين صديقات وهم على جنب..
عبير: ولا ورمنسيات يا شيخه روحي زين..
ريم تطالعم وهي ترفع حواجبها وتنزلها تحرهم..
مها: ترى علي كيكة الصلح..
رغد: ما اقول الا حسبي الله عليك ونعم الوكيل فيك يا رويم.
الهنوف: كذا كذا يا ريم.هين خلك تقولين ولد خالي المزيون والله لو تحلمين فيه ما خطبتك له..
طبعا كانت ريم مو تحب ولد خال الهنوف بس كانت معجبه فيه وبجماله..
ريم: بليه واشربي مويته..مالت عليه ..جا اللي احسن منه ويغطي عليه..خذيه انتي..
الهنوف: افا قلبنا..
ريم: اجل ذالتنا فيه.
الهنوف: ومن هو تكفين اللي يغطي على ولد خالي اللي مطيح نص بنات الرياض ومسدح النص الثاني..
ريم: واحد ما يجي ظفره هذا ولد خالك.
الهنوف: والله انتي الخسرانه..
ومازالو العنود وعبير يتمسخرون في رغد..
ريم: بس ابشركم رجعوا لبعض"وقالت لرغد" رحمتك..
العنود: حسافه ما وسعنا صدورنا..
عبير: مسرع ..حشى انا واختي اللي هي اختي قعدنا اسبوع..
العنود: لالا اتوقع اسبوع ونص..
عبير: ايه اسبوع ونص وانتي وياها 24 ساعه ما كملتوا...
رغد: يمه.بسم الله علينا من عيونك انتي وياها..وش تحسبيني مثلك انتي واختك علاقتكم مثل الريشه يهزها كل شي..لا يا حبيبتي انا والهنوف مثل الجبل ما يهزه ريح..
العنود وعبير سكتوالان رغد معها حق على اتفه شي تزاعلوا وطولوها وهي قصيره.
الهنوف: حرام شكلك جرحتيهم.
رغد: عادي يحطون ديتول هههه..
ريم: هههه يا خف دمي.بصراحه اختي فيها خفة دم ماهي عند احد..
رغد تستهبل: الله يسلمك هذا من ذوقك..
فجر: ما قررتوا وين راح تطلعون...
ريم: وش رايكم نروح السنيما ونشوف كيف الحال...
العنود: مين هشام الهويش..يله قدام..
عبير: الله بشوف هشوم..
رغد: اجل كلموا العيال..
العنود: انا بدق على وليدوه واشوف..
واتصلت...
وليد: الوووو..
العنود: وليدوه اسمع<<ما عندها وقت..
وليد: عبد عندك..تكلمي زين...
العنود: اخلص علينا..البنات يبون يشفون فلم كيف الحال..
وليد: انتي ولا البنات<<عارف حركات اخته...
العنود: انا والبنات وش قلت..
وليد: بنات عمي ابو مشاري وش قالوا..
العنود: ريم ورغد منهبلين بيون يشوفون هشام..
وليد: اجل رغد تبي تشوف هشام هاه...
العنود: كلنا مو هي لحالها هههه..
وليد: انسي..انسي اني اوديكم..ولا غيروا الفلم...
العنود: وليد تكفى عاد بلا سخافه..
وليد: فلم هشام لا لو تحلمين..
العنود ابعدت الموبايل عن اذنها: بنات يقول فلم هشام لا..
رغد: ليش؟؟؟
وليد سمعها وانقهر زياده...
العنود: وش دراني عنه المتخلف..
ريم: رغد كلميه اكيد بيوافق"وتغمزلها"
العنود: تكفين رغد كلميه..
رغد في نفسها" هين يا رويم اوريك":لا وش اكلمه..
فجر: رغد ولد عمك وش فيها...
عبير: بلا سخافه.خلينا نشوف الفلم..
شجون ومها ونوف: تكفين بليييييييييز..
رغد رضت بالامر الواقع: اوكي جيبي الموبايل..
العنود تكلم وليد: اسمع هذي بنت عمي بتكلمك..
وليد توهق: أي بنت عم لا تكون ريـــــــ
رغد قطعته: الووو..
وليد خق على صوتها: هلا والله وغلا..
رغد: اهلين وليد..
وليد: انا على صوتك ما اقدر...
رغد ابتسمت: احم...وليد بليز خلنا نروح نشوف الفلم..
وليد انحرج: فلم هشام لا ومستحيل..
رغد: طيب ممكن اعرف ليش..؟
وليد: بصراحه اغار عليك...تقعدين تطالعين هشام وانتي منهبله عليه مستحييييل..
رغد: خلاص ما راح اطالع بس البنات يبون يشفونه حرام..
وليد: ونطلع انا وياك مكان ثاني..
رغد في نفسها"صدق عمره الولد":لا وين نطلع مكان ثاني..نقعد معاهم بس ما راح اطالع عشانك بس .وبعدين من قال لك اني احب هشام..
وليد: ما يحتاج احد يقول..البنات كلهم منهبلين عليه..
رغد: هههه عاد انا غير..ما نهبلت عليه ولا شي<<ايه هين..
وليد: اذا كان كذا اوكيه ترى بس عشانك..
رغد: اوكيه.تسلم والله..باي..
وليد:باي..
رغد: خلاص وافق..
كانوا البنات يطالعونها وهي تكلم...وكانت كأنها تكلم خطيبها..
ريم: وش دعوه ها الابتسامات والدلع..
رغد: انتوا احمدوا ربكم وافق وبعدين مفروض تشكروني وتحبون راسي بعد..
عبير بخبث: وانا اقول عقل اخوي مفقود اثره معك..
العنود: وليد رايح فيها..ورايح في حب رغدوه..
رغد توترت عشان البنات كلهم فيه: اقول أي حب وخرابيط انا بنت عمه وهو ولد عمي وبس...
الهنوف تطالع عيونها زين: بس شكلك وعيونك تقول غير كذا..
رغد خافت تحس عليها الهنوف لان الهنوف ما يحتاج تفهمها على طول:لالا يتهيأ لك..وبعدين محجرين لي ليش..قوموا البسوا وتكشخوا..يمكن نشوف هشام..
العنود تصرخ: آآآآآآآآآآآآآآ يا هشام يا قلبي عليك..
عبير: اذا شفته والله بسلم عليه ويكمن ابوسه بعد..
نوف: يعني مسويه فري..
فجر: ما عليك منها كلام بس.
شجون: فجير ما تحبين هشوم..
فجر: الا اموت فيه بس خلاص الحين انا مرتبطه بزوج ما يمديني أراهق..
البنات ضحكوا على فجر وبعدين قاموا يتلبسون ويكشخون...

@@@@@@@@@@@@@@@@@@@@@@@@@@@@@@@@@@@@@@@@@@@@@@@@@@ @@@@@@@@@@@@@@@@@@@@@@@@@

" نـــــــــهــــــــــــــــايــــــــة الـــــــــبـــــــــــــــــــــــارت "