طفولة ضائعة

الجزء 27

انا : واخا، ممم شنو نديرو
مروة : نلعبو صراحة
انا : لا لعبو جرادة مالحة هههه
مروة : را هاضرة معاك بصح
انا : صافي اللي بان ليك
مروة : يالاهي نجلسو فالبيت، هانتي القوانين : 1-ممنوع نعاودو السؤال 2-مكاينش ديك القضية ديال لا منجاوبش ولا كدا 3-ممعاناش الكذوب
انا : ممم اوكي مشات
مروة : اوكي انا نبدا : نوفل؟
أنا : مالو
مروة : عاودي ليا عليه
انا : نوفل كبر مني بسبع سنين ولا كان كبر مني، كنا مفاهمين انا وياه بزاف، هو تيشبه ليا فالشخصية ولا انا تنشبه ليه، كان عزيز عليه يفرح بنادم و الضحكة متتخطاهش، شخص اللي ممكن تعاود ليه كلشي، فاش يكون عندك شي مشكل تلجأ ليه، معرفتش المهم شخص رائع و صافي
مروة : اوكي سمحيليا
انا : عادي عادي، نوبتي : كيدارو والديك حتا تلاقاو؟
مروة : هههه اوكي انا نعاود ليك ،دابا ماما واحد النهار كانت مسافرة ياك ، و حتا بابا كان مسافر ياكي، كيف شتي دابا هوما بجوج كانو مسافرين و.......
انا : بلا فقصة الله يرحم باك
مروة : هههه اوكي غي تنضحك، تلاقاو فالتران و كانو الناس اللي حداهم ناعسين، و بابا سول ماما قاليها واخا تقولي ليا اختي الطريقة باش نصاوب اللوبيا حيت انا ساكن بوحدي ، و هي عطاتو الطريقة و بقاو شادين فالهضرة و فاش بغاو يتفارقو عطاها العنوان ديال البريد تاعو حيت ماكانو لا تيليفونات لا والو و بقاو تيهضرو مدة بالرسائل حتا جا النهار اللي كتب ليها فالرسالة هل تقبلين بي زوجا لك و صافي جا خطبها و تزوجو .
انا : نااري العفريتة مكانش يسحابليا عمي رومنسي حتال هاد الدرجة ، و حتا خالتي ماساهلاش.
مروة : ياك ايوا دابا نقولها ليها نشوفو شنو غديري
انا : اويلي أصاحبتي رانا غا ضاحكين
مروة : اوكي نوبتي : شنو كان الاحساس ديالك فاش ماتت ماماك، ولا بلاتي انبدلو، باش ماتت ماماك و امتا واش كانت مريضة ولا شنو
انا : انجاوب على السؤال الأول
مروة : لا انا بدلتو
انا : مسوقيش
مروة : اوكي جاوبي
انا : حسيت بالحزن بالوحدة حسيت براسي تايهة معارفة مندير، بكيت غوت تعصبت هرست ولكن دابا صافي كلشي بقا فالماضي ولاو غير ذكريات ، نوبتي دابا : تيعجبك شي واحد
مروة: هادا سؤال دابا تيسولوه الناس فحالا معارفانيش، انا خاطيني عليك الإعجاب و التصاحيب و ما جاورهما
انا : اسيري عينيك فاضحينك، ماشي بالضرورة تكوني كتبغيه غير تيعجبك ولا تعجبك فيه شي حاجة
مروة : اوكي لاكان هاكا تيعجبني سعد
انا : 😰 سعد لا ميمكنش
مروة : وا متفهميش غلط، تعجبني فحال صديق عشيري، تيعجبني نكونو بثلاثة بينا نخرجو و نضحكو صافي لا غير
انا : اوكي اوكي حتا واحد مفهمك غلط غير رتاحي
مروة : نوبتي : قوليلي شي حاجة معارفاهاش انا عليك
انا : بحالاش؟
مروة : شي سر مثلا
انا : اغتصاب مثلا
مروة : شنو شنو شنو، كيفاش اغتصاب
انا : فاش كنت صغيرة، المهم نوبتي
مروة : لا سطوب كيفاش اغتصاب مفهمتش
انا : قلنا سؤال واحد
مروة : لا حبسي دابا من اللعب كيفاش طرا هدشي و امتا
عاودت ليها دكشي اللي وقع و هي فحالا طرشتيها بقات غير مصدومة، قبل متنطق بحتا كلمة سمعت الكلاكسون ديال الطونوبيل
انا : مروة ختي بابا جا هاني مشيت غذا انشاء الله نتلاقاو و بيجامتك هاني لابساها غدا نجيبها ليك تهلاي
هبطت مخليتليها فين تزيد، كانت هاديك أول مرة انعاود فيها لشي واحد على الاعتداء اللي تعرضت ليه و انا صغيرة ، ركبت و الطريق كلها و انا ساهية، بابا شافني ساكتة خلاني على خاطري، دوك الأيام كلها و انا غير ساكتة و ساهية، مروة سافرات تنهضرو ميساجات ولا آبيل كل نهار ،الهضرة ديالي مع علي قلالت، تنتفكر داك النهار، كانت الشمس عاد تتشرق و انا فسابع نومة ،تنحس بشي يد تتلمس فوجهي بحنان، ماشي اليد ديال بابا هادي، حليت نص عين ،لقيتو تيشوف فيا، تيضحك .
هو : ممم دابا عاد تأكدت هادو عينيك ماشي ليلونتي ،حيت مكاينش شي وحدة بعقلها تنعس بيهم .
انا : ياء ايوا راك شايف بابا حتا هو عينيه خضرين ولا حتا هو تيدير لي لونتي
هو : را عارف غير بغيت نشد فيك شوية و صافي
انا : آجي بعدا شنو جاي دير نتا هنا ؟ و شكون قاليك تدخل؟ و شكون حل ليك الباب اصلا؟
هو : غير وحدة بوحدة السؤال الأول جيت نشوفك حيت توحشتك و بنتي ليا ماشي حتال لهيه، السؤال الثاني باباك اللي قاليا راها ناعسة فبيتها سير لعندها لبغيتي و هو اللي حل ليا الباب اصلا .
انا : علي
علي : نعام
انا : توحشتك
علي : حتا انا ،ناري غتقجيني هاكا تيعنقو الناس،يالاه نوضي نخرجو
انا : فين وباقي اصلا الشمس حتا مطلعات
علي : ياك نتي فالعطلة تتخرجي كل صباح تجري، قلت علاش منخرجوش انا و ياك، شوفي جيت موجد على قبلك لابس الكيطما يالاه نوضي
انا : لا عافاك مفيا منخرج
علي : لا اتخرجي و انمشيو نجريو بجوج
شدني من يدي و داني غسلت وجهي و ختارينا بجوج شنو نلبس كان عبارة على بدلة رياضية صيفية تيشورت بيض ايفازي و فيه كتابة بالكحل و شورت كحل و تحزمت بالفوقاني ديال الكيطما فحال يامات السبور فلابتدائي، و سبرديلة فالكحل و البيض